ၶမ်ႈၶိုၼ်းဝၼ်းတီႈ 21/02/2025 ၼၼ်ႉသိုၵ်းမၢၼ်ႈဢဝ်ၶိူင်ႈမိၼ် ပွႆႇမၢၵ်ႇသႂ်ႇတီႈဝၢၼ်ႈ -မၢၼ်ႈသႃႇ ၸႄႈဝဵင်းမၢၼ်ႈၸေႊ ဢၼ်မီးတီႈလႅၼ်လိၼ် တႆး-ၶၢင်၊ တိူဝ်ႉသႂ်ႇၵူၼ်းဝၢၼ်ႈ ၼၢင်းယိင်းတၢႆၵေႃႉၼိုင်ႈ လုၵ်ႈဢွၼ်ႇတၢႆၵေႃႉၼိုင်ႈ။
ၵူၼ်းပိုၼ်ႉတီႈလၢတ်ႈဝႃႈ-“သိုၵ်းမၢၼ်ႈဢဝ်ၶိူင်ႈမိၼ်သႅၼ်း Y12 ပိုတ်းယိုဝ်း မၢၵ်ႇလူင် 12 လုၵ်ႈ။ ႁိူၼ်းယေးၵူၼ်းမိူင်း ၵွႆ 3 လင် ။ လုၵ်ႈဢွၼ်ႇယိင်း 8 ၶူပ်ႇၵေႃႉၼိုင်ႈလႄႈ 20 ၶူပ်ႇၵေႃႉၼိုင်ႈတၢႆထင်တီႈ။ လုၵ်ႈဢွၼ်ႇ 2 ၵေႃႉလႄႈၼၢင်းယိင်းၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်း။ ၽွင်းသိုၵ်းမၢၼ်ႈဢဝ်ၶိူင်ႈမိၼ်မႃးပိုတ်းယိုဝ်းၼၼ်ႉ တီႈဝဵင်းမၢၼ်ႈၸေႊ ဢမ်ႇမီးပၢင်တိုၵ်းသိုၵ်းသိူဝ်သင် ”- ဝႃႈၼႆ။
ၵူၼ်းပိုၼ်ႉတီႈလၢတ်ႈဝႃႈ တီႈဝၢၼ်ႈ မၢၼ်ႈသႃႇၼႆႉ မီးၵူၼ်းတၢင်းဝၢၼ်ႈမေႃႈလႄႈ မၢၼ်ႈၸေႊ ပၢႆႈၽေးသိုၵ်းမႃးသွၼ်ႇယူႇသဝ်းၼပ်ႉႁူဝ်ပၢၵ်ႇၵေႃႉယူႇဝႃႈၼႆ။
ၼႂ်းဝူင်ႈဝၢင်ႈၼႆႉသိုၵ်းၶၢင် KIA သမ်ႉ ၶိုၼ်ႈယိုဝ်းပၢင်သဝ်းလႄႈ တပ်ႉသိုၵ်းမၢၼ်ႈၼႂ်းၸႄႈဝဵင်းဝၢၼ်ႈမေႃႈ ဢၼ်ၼိုင်ႈယဝ်ႈဢၼ်ၼိုင်ႈ။
သိုၵ်းမၢၼ်ႈ သုမ်းသိုၵ်းၵမ်းၼႆႉ ဢမ်ႇပေႉမေႃႈပေႃႉၵၢၵ်ႇ ဢမ်ႇမီးပၢင်တိုၵ်းၵေႃႈ ဢဝ်ၶိူင်ႈမိၼ်မႃးယိုဝ်းသႂ်ႇဝၢၼ်ႈ၊ ၵူၼ်းမိူင်းၵူၺ်းမၢတ်ႇၸဵပ်းလူႉတၢႆလၢႆလၢႆ။ ပဵၼ်ဢၼ်ပူၼ်ႉပႅၼ်သုၼ်ႇလႆႈၵူၼ်းတႄႉတႄႉ -ၼႆ ၸုမ်းသုၼ်ႇလႆႈၵူၼ်းၶဝ်ၵေႃႈ တၵ်ႉလၢတ်ႈၼင်ႇၼႆ။
သိုဝ်ႇၶၢဝ်ႇၶၢင်တႄႉတႅမ်ႈတၢင်ႇႁၢႆးငၢၼ်းဝႆႉဝႃႈ ဝၼ်းတီႈ 19/02/2025 ၼၼ်ႉသိုၵ်းမၢၼ်ႈ ဢဝ်ၶိူင်ႈမိၼ်ယိုဝ်းသႂ်ႇတီႈဝဵင်းမိူင်းမွၵ်ႇ ၵူၼ်းမိူင်းတၢႆ 7 ၵေႃႉမၢတ်ႇၸဵပ်း 9 ၵေႃႉ၊ မိူဝ်ႈလိူၼ်ၵျႅၼ်ႊၼိဝ်ႊရီႊပူၼ်ႉမႃးၼၼ်ႉသမ်ႉ သိုၵ်းမၢၼ်ႈဢဝ်ၶိူင်ႈမိၼ်ယိုဝ်းသႂ်ႇ တီႈဝဵင်းၽႃၵၢၼ်ႉလႄႈဝဵင်းတၢတ်ႇၼၢႆး ၵူၼ်းမိူင်းတၢႆ 30 ပၢႆဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ