မိူဝ်ႈၼႆႉ ဝၼ်းတီႈ 19/02/2025 ယၢမ်းၵၢင်ၼႂ် တပ်ႉသိုၵ်းၵဝ်ႈၵၢင်ႉ MNDAA တႄႇတင်ႈလၢၼ်ႇၵူတ်ႇထတ်း ဝႂ်ၶွၼ်ႇရူတ်ႉၵႃး တီႈႁိမ်းႁူဝ်ၶူဝ်ၼမ်ႉတူႈ ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵႃးၸိူဝ်းၺႃးၵူတ်ႇထတ်းၼႆႉ ပဵၼ်ၵႃးၸိူဝ်းတေၵႂႃႇ လႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ ၵုၼ်လူင်၊ ႁူဝ်ပၢင်ႇ၊ လဝ်ႉၵႆႇ (လၢဝ်ႇ ၵၢႆး)လႄႈ ၼႂ်းၼႃႈတီႈပွတ်းႁွင်ႇ ဢၼ်ၸုမ်းသိုၵ်းဢူၺ်းလီသၢမ်ၸုမ်း ၵုမ်းၵမ်ဝႆႉၼၼ်ႉသေ သင်ရူတ်ႉၵႃးလမ်းလႂ် ပႆႇလႆႈႁဵတ်း၊ ပႆႇမီးဝႂ်ၶွၼ်ႇရူတ်ႉၵႃး ဢၼ်ၸုမ်းသိုၵ်းၶဝ် ႁဵတ်းဢွၵ်ႇပၼ်ပဵၼ်တၢင်းၵၢၼ်ၼၼ်ႉၸိုင် လႆႈၵႂႃႇႁဵတ်းၶိုၼ်း ၼႆယဝ်ႉ။

ၸဝ်ႈၵႃး ဢၼ်လႅၼ်ႈ လႃႈသဵဝ်ႈ – လဝ်ႉၵႆႇ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ။ ဝႂ်ႁေႃႈရူတ်ႉၼႆႉ ၶဝ်တေႁဵတ်းပၼ်သွင်ၽိုၼ်။ တႃႇၽိုၼ်ၼိုင်ႈၼႆႉ ပဵၼ်လၢႆႊသိၼ်ႊတႃႇႁေႃႈရူတ်ႉ၊ ထႅင်ႈဝႂ်ၼိုင်ႈသမ်ႉ ပဵၼ်လၢႆႊသိၼ်ႊတႃႇတေႃႉတၢင်ႇၵုၼ်ႇဢေႃႈ။ ပေႃးၶဝ်ထတ်းၺႃးဝႃႈ ၵႃးလမ်းလႂ် ပႆႇမီးဝႂ်ၼႆ ၶဝ်ၸႂ်ႉၵႂႃႇ ႁဵတ်းၶိုၼ်း တီႈလုမ်းၶဝ်”- ဝႃႈ ၼႆ။

လႆႈႁူႉဝႃႈ လၢၼ်ႇၵူတ်ႇထတ်း ဝႂ်ၶွၼ်ႇရူတ်ႉၵႃးၼႆႉ တေတင်ႈဝႆႉတေႃႇထိုင်ဝၼ်းလႂ်တႄႉၵေႃႈ ပႆႇလႆႈႁူႉဝၼ်းမၼ်း တႅတ်ႈတေႃး ၼႆယဝ်ႉ။

လိူဝ်ၼၼ်ႉ ဝႂ်ၶွၼ်ႇရူတ်ႉၵႃး ဢၼ်သိုၵ်းၵဝ်ႈၵၢင်ႉ ႁဵတ်းဢွၵ်ႇပၼ်ၼႆႉ ၸႂ်ႉတိုဝ်းလႆႈ တႃႇဢွၵ်ႇၶၢဝ်းတၢင်း ၼႂ်းမိူင်းတႆးပွတ်းႁွင်ႇ ၸိူဝ်းပိုၼ်ႉတီႈ ဢၼ်သိုၵ်းၵဝ်ႈၵၢင်ႉတင်း သိုၵ်းတဢၢင်းၶဝ် ၵုမ်းၵမ်ဝႆႉၼၼ်ႉၵူၺ်း။ ဢႃယုဝႂ်ၶွၼ်ႇႁေႃႈရူတ်ႉ ၵႃးၼႆႉ လႆႈပၼ်ငိုၼ်းသေႁဵတ်း။ ၼိုင်ႈဝႂ်ၼႆႉ လႆႈပၼ်ဢေႇသုတ်း 80,000 ပျႃး တေႃႇၼိုင်ႈသႅၼ်ပျႃးသေ ၸႂ်ႉလႆႈၶၢဝ်းယၢမ်းႁိုင်ထိုင် 6 လိူၼ် ၼႆယဝ်ႉ။

“တေၸၢင်ႈႁဵတ်းႁိုဝ်ၶႃႈလႃႇၼေႃႈ၊ ႁဝ်းၵေႃႈ လူဝ်ႇႁႃၵိၼ်လဵင်ႉတွင်ႉၶႃႈလူး။ ၶဝ်ယွၼ်းၵႃႈႁိုဝ်ၵေႃႈ ႁူႉၵႃႈလႆႈပၼ်ယဝ်ႉ။ ပေႃးဢမ်ႇၵႂႃႇႁဵတ်းဝႂ်ၼႆႉၵေႃႈ ဢမ်ႇၸၢင်ႈလႅၼ်ႈၵိၼ်ၵႃးယဝ်ႉလႄႈ ဢမ်ႇမီးၵေႃႈ ၵႃႈလႆႈၵူႈ လႆႈႁိမ်ပိူၼ်ႈႁႄ ၵႂႃႇႁဵတ်းၼၼ်ႉယဝ်ႉ။ မိူဝ်ႈလဵဝ် ၵူၼ်းၵႂႃႇမႃးၵေႃႈ ႁမ်ႉဢေႇ၊ တေဝႃႈတၢင်ႇၵုၼ်ႇၵိၼ်ၼႆၵေႃႈ ၼမ်ႉမၼ်းရူတ်ႉသမ်ႉၵႃႈ၊ ၵႃႈတၢင်ႇၵုၼ်ႇၵေႃႈ ဢမ်ႇပေႃးလႆႈၼမ်ၵႃႈႁိုဝ်။ ၵူဝ်ဢမ်ႇမီးၵၢၼ်လႄႈ ႁဵတ်းၵူၺ်းယဝ်ႉ”- ၸဝ်ႈၵႃး လႃႈသဵဝ်ႈ – လဝ်ႉၵႆႇ သိုပ်ႇလၢတ်ႈၼႄဝႃႈ။

တပ်ႉသိုၵ်းၵဝ်ႈၵၢင်ႉၼႆႉ ႁူမ်ႈၵၼ်တင်း သိုၵ်းၸၢဝ်းၶိူဝ်းလၢႆလၢႆၸုမ်းသေ တိုၵ်းသိမ်းဢဝ် ၸႄႈဝဵင်းလႃႈ သဵဝ်ႈ၊ သႅၼ်ဝီ၊ ၵုၼ်လူင်၊ ႁူဝ်ပၢင်ႇ၊ လဝ်ႉၵႆႇ (လၢဝ်ႇၵၢႆး) ၸဵမ်ၸိူဝ်းၼႆႉသေ တင်ႈတႄႇႁူဝ်လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး ၶဝ် ဢွၵ်ႇပၵ်းပိူင်ဝႃႈ ၸိူဝ်းမီးရူတ်ႉၵႃး တေလႆႈသႂ်ႇၶွၼ်ႇလႄႈ ႁဵတ်းဝႂ်ႁေႃႈရူတ်ႉၵႃး ၸဵမ်ၸိူဝ်းၼႆႉ။

မူၺ်ၶမ်း