ၽွင်းမိူင်းၶႄႇ မိပ်ႇဢီးႁႂ်ႈသိုၵ်းတဢၢင်း TNLA  လႄႈ သိုၵ်းမၢၼ်ႈ ႁူပ်ႉထူပ်းဢုပ်ႇဢူဝ်းၵၼ် ၽွင်းတူဝ်တႅၼ်းတင်းသွင် ၸုမ်းႁွတ်ႈထိုင်ဝႆႉတီႈဝဵင်းလူင်ၶုၼ်ႊမိင်ႊ မိူင်းၶႄႇၼၼ်ႉ တႃႇဢုပ်ႇဢူဝ်းလွင်ႈၵိုတ်းတိုၵ်းၵၼ် ၼႆယူႇၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇတီႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၵူၼ်းမိူင်းလႆႈယၢပ်ႇၸႂ်ၸွမ်း။

ဝၼ်းတီႈ 15/2/2025 သိုၵ်းမၢၼ်ႈ လုၵ်ႉတၢင်း တပ်ႉၶမယ – 406 ဝၢၼ်ႈတွင်းၶမ်းလႄႈ ၶမယ 354 သေ ပွႆႇမၢၵ်ႇလူင် ၶိူဝ်းယႂ်း။ လိူဝ်ၼၼ်ႉ ဢဝ်ၶိူင်ႈမိၼ် Y-12 ပွႆႇမၢၵ်ႇထႅင်ႈဢမ်ႇထၢတ်ႇၵူႈဝၼ်း သိုၵ်းတဢၢင်း TNLA ပိုၼ်ၽၢဝ်ႇဝႆႉၼင်ႇၼႆ ။

ၽူႈၸၢႆးၵူၼ်းဝၢၼ်ႈ ဢၼ်ပၢႆႈၽေးသိုၵ်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈသိုၼ်း တိုၵ်းၵၼ်တင်းၶိုၼ်း၊ တေႃႇထိုင် မိူဝ်ႈဝႃး ၵၢင်ၼႂ် သဵင်ၵွင်ႈသဵင်မၢၵ်ႇ ယိၼ်းလီၼႃႇ ၊ ပဵၼ်တင်းဝၢၼ်ႈ ဢုမ်ႇတီး ။ ႁူင်းႁဵၼ်းသွၼ်လိၵ်ႈ တင်းဝၢၼ်ႈ ဢုမ်ႇတီးၼႆႉ သိုၵ်းမၢၼ်ႈ ဢဝ်ၻရူၼ်ႊ မႃးပွႆႇလႄႈ ၾႆးမႆႈပႅတ်ႈ လင်ၼိုင်ႈ ၊ ယၢမ်းလဵဝ် ငဝ်းလၢႆး  ၶဵင်ႈၶႅင်ၵၢၼ်သိုၵ်း ၵၼ်ဝႆႉ”- ဝႃႈၼႆ။

ၽွင်းၶဝ် တေဢုပ်ႇၵၼ်လွင်ႈၵိုတ်းတိုၵ်းယူႇၼႆႉ သိုၵ်းမၢၼ်ႈသမ်ႉ မႃးယိုဝ်းသႂ်ႇႁိူၼ်းယေးၵူၼ်းမိူင်း ၼႂ်းပိုၼ်ႉတီႈသိုၵ်းတဢၢင်းတူင်ႉၼိုင်ယူႇၸိူင်ႉၼႆ မိူၼ်တၢင်းၶႂ်ႈၼႄဝႃႈ ႁဵတ်းႁိုဝ်ၵေႃႈ သိုၵ်းမၢၼ်ႈပေႉပုၼ်ႈယူႇၼႆၵူၺ်း – ၽူႈလဵပ်ႈ ႁဵၼ်းၵၢၼ်မိူင်းလၢတ်ႈၼင်ႇၼႆ။

ၽူႈလဵပ်ႈႁဵၼ်းၵၢၼ်မိူင်း ဢူးတၢၼ်းၸူဝ်းၼၢႆႇ လၢတ်ႈဝႃႈ – “ၾၢႆႇတင်းသိုၵ်းမၢၼ်ႈတႄႉ ၶဝ်ၶႂ်ႈလႆႈၼမ်ႉမျၢတ်ႈၼမ်ႉတွၼ်း ၼႂ်းၵၢၼ်ဢုပ်ႇဢူဝ်းၵၼ်လႄႈ ပွႆႇမၢၵ်ႇ/ ယိုဝ်းၵွင်ႈလူင် ၼႄယူႇတိၵ်းတိၵ်းယဝ်ႉ။ လွင်ႈဢုပ်ႇဢူဝ်းၵၼ်ၼႆႉ တေမိူၼ်ၵူႈပွၵ်ႈၵူၺ်း တႃႇတေဢွင်ႇမၢၼ်ၼႆႉ တေဢမ်ႇငၢႆႈ။ ပေႃးဢမ်ႇယုမ်ႇၸႂ်ၵၼ် ၵၢၼ်ဢုပ်ႇဢူဝ်းၼႆႉၵေႃႈ တေပဵၼ်လွင်ႈထဵင်မေႃးၵၼ်ယူႇၸိူင်ႉၼႆၵူၺ်း”- ဝႃႈၼႆ။

ယၢမ်းလဵဝ် ၵူၼ်းပိုၼ်ႉတီႈ ဝဵင်းၼွင်ၶဵဝ် လႆႈပၢႆႈၽေးသိုၵ်းမီးၸမ် 2 ပီယဝ်ႉလႄႈ တႃႇႁႃၵိၼ်လဵင်ႉတွင်ႉ ပဵၼ်ဢၼ်ယၢပ်ႇၽိုတ်ႇၵိၼ်းၸႂ် ဝႃႈၼႆ။

ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“ၶႂ်ႈႁႂ်ႈၵိုတ်းတိုၵ်းၵၼ်ဝႆးဝႆး၊ ၵူၼ်းမိူင်းၼႆႉ တုၵ်ႉၶၼႃႇ၊ ၵၢၼ်ႁႃၵိၼ်လဵင်ႉတွင်ႉၵေႃႈ ဢမ်ႇလႆႈႁဵတ်းလီလီ ၵုမ်ႇလႆႈပၢႆႈသိုၵ်းပၢႆႈသိူဝ်ယူႇ ၸိူင်ႉၼႆ သမ်ႉလႆႈၵူဝ်သိုၵ်းမၢၼ်ႈ တေမႃးပွႆႇမၢၵ်ႇမိူဝ်ႈလႂ် ၸိူင်ႉၼႆထႅင်ႈ”- ဝႃႈၼႆ။

တႄႇဢဝ် ၼႂ်းႁူဝ်လိူၼ်ၵျႅၼ်ႊၼိဝ်ႊရီႊ 2025 ၼႆႉမႃး ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇၼႂ်းဝဵင်းၵျွၵ်ႉမႄးတင်း ၼႂ်းၸႄႈဝဵင်းၼွင်ၶဵဝ်ၼႆႉသေ ၵူၼ်းမိူင်းဢၼ်ၺႃးၸၢၵ်ႇမၢၵ်ႇ လူႉတၢႆမီး 14 ၵေႃႉ မၢတ်ႇၸဵပ်း 20 ပၢႆ။

ပၢင်ဢုပ်ႇဢူဝ်း သိုၵ်းမၢၼ်ႈတင်း သိုၵ်းတဢၢင်း ပဵၼ်ဝၼ်းတီႈ 16/2/2025 ။ လွင်ႈၶဝ်ဢုပ်ႇဢူဝ်းတူၵ်းလူင်းၼၼ်ႉတႄႉ ၾၢႆႇတင်းသိုၵ်းတဢၢင်း ပႆႇပိုၼ်ၽၢဝ်ႇဢွၵ်ႇမႃးသင်။

မိူင်းၶႄႇ ၶဝ်ႈၵႄႈမိပ်ႇဢီးသေ  ႁွင်ႈၵၢၼ်ၾၢႆႇၽွင်းလူင်ၼွၵ်ႈမိူင်းပိုၼ်ၽၢဝ်ႇဝႆႉ မိူဝ်ႈဝၼ်းတီႈ 18/1/2025 ၼၼ်ႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA ၵေႃႈ ဢုပ်ႇဢူဝ်းတူၵ်းလူင်းၵိုတ်းတိုၵ်းၵၼ် ၼႆယဝ်ႉ။