သိုၵ်းမၢၼ်ႈ ပွႆႇမၢၵ်ႇၵွင်ႈလူင် တီႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ထပ်းၵၼ်လၢႆဝၼ်း မၢၵ်ႇတူၵ်းတိုဝ်ႉ ၵူၼ်းမိူင်းမၢတ်ႇၸဵပ်း လူႉတၢႆၼမ်။
ဝၼ်းတီႈ 13/02/2025 ယၢမ်းႁူဝ်ၶမ်ႈ 6 မူင်း သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO လုၵ်ႉတင်းတူၵ်း ဝဵင်းၾၢႆ ၶုၼ် ယိုဝ်းၵွင်ႈလူင် 3 လုၵ်ႈ တူၵ်းသႂ်ႇၼႂ်းဝၢၼ်ႈလိၼ်ပူၵ်ႇတႅၵ်ႇ (တောင်ပို့ကွဲ) ၵူၼ်းပိုၼ်ႉတီႈ ဢႃယု 30 ပၢႆ မၢတ်ႇၸဵပ်းႁၢဝ်ႈႁႅင်း ၾႆးမႆႈႁိူၼ်းယေးလူႉၵွႆ။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 12/02/2025 ယၢမ်းႁူဝ်ၶမ်ႈ 5 မူင်း ၼၼ်ႉၵေႃႈ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO လုၵ်ႉတၢင်းတူၵ်းဝဵင်းၾၢႆၶုၼ် ယိုဝ်းၵွင်ႈလူင် 6 လုၵ်ႈ မၢၵ်ႇတူၵ်းတႅၵ်ႇ တီႈဝၢၼ်ႈလိၼ် ပူၵ်ႇတႅၵ်ႇယဝ်ႉ ၵမ်းၼိုင်ႈ။ ၼၼ်ႉၵေႃႈၸၢၵ်ႇမၢၵ်ႇတူၵ်းတိူဝ်ႉ ၵူၼ်းမိူင်း 2 ၵေႃႉ တၢႆထင်တီႈ၊ မၢတ်ႇၸဵပ်း 2 ၵေႃႉ ဝႃႈၼႆ။
ၵူၼ်းၸၢႆး ဢႃယု 40 ပီ ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး သိုၵ်းမၢၼ်ႈယိုဝ်းၵွင်ႈလူင်လႄႈ ၵူၼ်းပိုၼ်ႉတီႈ တၢႆထင်တီႈ 2 ၵေႃႉ၊ မၢတ်ႇၸဵပ်း ႁၢဝ်ႈႁႅင်း 2 ၵေႃႉ၊ ႁိူၼ်းၵူၼ်းပိုၼ်ႉတီႈၵေႃႈ ၺႃးၸၢၵ်ႇ မၢၵ်ႇလူႉၵွႆ၊ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယိုဝ်းမႃး၊ မႃးၺႃးဝၢၼ်ႈ လိၼ်ပူၵ်ႇတႅၵ်ႇၼႆႉ ၵူၼ်းဝၢၼ်ႈ မၢင်ၸိူဝ်းၵေႃႈ ပၢႆႈၽေးသိုၵ်းယဝ်ႉ”- ဝႃႈၼႆ။
ၵူၼ်းဢၼ်လူႉတၢႆၼၼ်ႉ ၸိုဝ်ႈႁွင်ႉ ၸၢႆးလႅင် ဢႃယု 10 ၶူပ်ႇလႄႈ လုင်းၸၢႆးလူင် ဢႃယု 40 ပီ လူႉတၢႆထင်တီႈ။ ပႃႈ ၼၢင်းၽၢင် ဢႃယု 40 လႄႈ လုင်းၵျႃး ဢႃယု 40 မၢတ်ႇၸဵပ်းတီႈၶႃ တီႈၶႅၼ် တီႈမိုဝ်း ၸိူဝ်းၼႆႉ ႁၢဝ်ႈႁႅင်း။
ၼႂ်းၵႄႈဝဵင်းၾၢႆၶုၼ် – ယွင်ႁူၺ်ႈ တပ်ႉသိုၵ်းၽွမ်ႉႁူမ်ႈလႄႈ သိုၵ်းမၢၼ်ႈ ၵႆႉပဵၼ်ပၢင်တိုၵ်းၵၼ်သေ ၾၢႆႇသိုၵ်းမၢၼ်ႈၵႆႉ ဢဝ်ၵွင်ႈလူင် ယိုဝ်းၸွမ်းဝၢၼ်ႈ။
မိူၼ်ၼင်ႇၼႆ ဝၼ်းတီႈ 12/02/2025 ယၢမ်းႁူဝ်ၶမ်ႈ 5 မူင်း သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO လုၵ်ႉတၢင်း ၾၢႆႇတူၵ်း ၼမ်ႉမႄႈၽီလူး ဝၢၼ်ႈလွႆၽီး ယိုဝ်းမၢၵ်ႇလူင် 8 လုၵ်ႈလႄႈ မၢၵ်ႇတူၵ်းတိူဝ်ႉၾႆးမႆႈ ႁိူၼ်းၵူၼ်းပိုၼ်ႉတီႈၵွႆ 2 လင် တီႈဝၢၼ်ႈၼမ်ႉတူၵ်း ၼႂ်းၸႄႈဝဵင်းပၢင်လွင်း ဝႃႈၼႆ။
ပျီႇတူႉၸိတ်ႉပဢူဝ်း PNO ၵဵပ်းၵူၼ်းၼုမ်ႇၼႂ်းဝၢၼ်ႈဢိူင်ႇသပေႇၵူင်းသေ ပၼ်ပၢင်သွၼ်သိုၵ်း 5 ဝၼ်း သိုၵ်းဢဵၼ်ႁႅင်း 800 လူင်းပၢင်သွၼ် မိူဝ်ႈဝၼ်းတီႈ 11/02/2025 ဝႃႈၼႆ။ ၵူၼ်းသိုၵ်း ဢၼ်လူင်းပၢင်သွၼ် ၼၼ်ႉ ပႂ်ႉၵဵတ်ႉလၢၼ်ႇ တီႈတၢင်းလႅၼ်လိၼ်တႆး – ယၢင်းလႅင် ဝႃႈၼႆ။
ၵူၼ်းဝၢၼ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၶဝ်တႄႉ ပေႃးလူင်းပၢင်သွၼ်ယဝ်ႉၵေႃႈ လၢတ်ႈဝႃႈ တေ လႆႈပႂ်ႉၵဵတ်ႉလၢၼ်ႇၼႆ။ မၢင်ၸိူဝ်းတႄႉ ၶဝ်သူင်ႇၼႃႈသိုၵ်း ၵမ်းလဵဝ် သွၼ်ဢဝ် 5 ဝၼ်းၵူၺ်း လၢႆးႁႄႉၵင်ႈ တူဝ်တင်းပႆႇႁူႉယူဝ်ႉ၊ ဝၢႆးပွႆးလူင်းပၢင်သွၼ်ယဝ်ႉၵေႃႈ ဢဝ်မၢၵ်ႇလူင်သေ ပွႆႇၼႂ်းဝၢၼ်ႈယဝ်ႉ”- ဝႃႈၼႆ။
ၼႂ်းလိူၼ်ၾႅပ်ႊပိဝ်ႊရီႊ ၶၢဝ်းတၢင်းၽၢၵ်ႇလိူၼ်ၼႆႉ ယွၼ်ႉမၢၵ်ႇၵွင်ႈလူင် သိုၵ်းမၢၼ်ႈသေ ၵူၼ်းပိုၼ်ႉတီႈ ၼႂ်းၸႄႈဝဵင်းယွင်ႁူၺ်ႈတၢႆ 5 ၵေႃႉ။ ၵူၼ်းဝၢၼ်ႈၼမ်ႉတူၵ်း၊ ဝၢၼ်ႈၽြႃးလွႆ၊ ဝၢၼ်ႈၼမ်ႉမႆႈလႄႈ ၺွင်ႇသီႇတူၼ်ႈ လႆႈပၢႆႈၽေးသိုၵ်းဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ