သိုၵ်းမၢၼ်ႈႁူမ်ႈတင်း ၸုမ်းပျီႇတူႉၸိတ်ႉပဢူဝ်း PNO ပွႆႇမၢၵ်ႇလူင်သႂ်ႇ ၸွမ်းဝၢၼ်ႈၽြႃးလွႆၼွႆႉလႄႈ ၸွမ်းပိုၼ်ႉတီႈ ပၢင်သဝ်းၵူၼ်းပၢႆႈၽေး ၼႂ်းၸႄႈဝဵင်းယွင်ႁူၺ်ႈ ႁဵတ်းႁႂ်ႈၵူၼ်းမိူင်းလူႉတၢႆ 2 ၵေႃႉ မၢတ်ႇၸဵပ်း 7 ၵေႃႉ။

ဝၼ်းတီႈ 05/02/2025 ယၢမ်းၵၢင်ၼႂ် 7 မူင်းပၢႆ သိုၵ်းမၢၼ်ႈ ယိုတ်းမိူင်း ႁူမ်ႈတင်း ၸုမ်းပျီႇတူႉၸိတ်ႉပဢူဝ်း PNO ဢၼ်ပၵ်းယူႇဝႆႉ တီႈႁိမ်းဝၢၼ်ႈတိတ်ႉပိၼ်ႇၵွၵ်ႉ (သစ်ပင်ကောက်ရွာ) သေ ပွႆႇမၢၵ်ႇလူင်သႂ်ႇ တီႈဝၢၼ်ႈၽြႃးလွႆၼွႆႉ ဢၼ်မီးၵူၼ်းဝၢၼ်ႈတင်း ၵူၼ်းပၢႆႈၽေးသိုၵ်းၶဝ် ယူႇသဝ်းဝႆႉၼၼ်ႉ ၸၢၵ်ႇမၢၵ်ႇတိူဝ်ႉၺႃး ထဝ်ႈၸၢႆး ဢႃယု 74 ပီ ၵေႃႉၼိုင်ႈ လူႉတၢႆလႄႈ ၼၢင်းယိင်း သွင်ၵေႃႉ လႆႈမၢတ်ႇၸဵပ်း ၼႆယဝ်ႉ။

လိူဝ်ၼၼ်ႉ ယၢမ်းၵၢင်ၼႂ်မွၵ်ႈ 9 မူင်း ၼၼ်ႉၵေႃႈ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ပွႆႇမၢၵ်ႇသႂ်ႇ တီႈပၢင်သဝ်းၵူၼ်းပၢႆႈၽေး ႁိမ်းဝၢၼ်ႈၽြႃးလွႆၼွႆႉၼႆႉထႅင်ႈ ၸၢၵ်ႇမၢၵ်ႇတိူဝ်ႉၺႃး ၵူၼ်းၸၢႆး ဢႃယု 44 ပီ ၵေႃႉၼိုင်ႈ လူႉတၢႆထင်တီႈ လိူဝ်ၼၼ်ႉ ၵူၼ်းပၢႆႈၽေး ပႃးၸဵမ်ၵူၼ်းပိုၼ်ႉတီႈ မၢတ်ႇၸဵပ်းထႅင်ႈ 5 ၵေႃႉ။ ၼႂ်းဝၼ်းတီႈ 5 ဝၼ်းလဵဝ်ၼႆႉ ၵူၺ်း မီးၵူၼ်းလူႉတၢႆ 2 ၵေႃႉ မၢတ်ႇၸဵပ်း 7 ၵေႃႉ ဝႃႈၼႆ။

ယၢမ်းလဵဝ် ၸွမ်းပိုၼ်ႉတီႈ ဝၢၼ်ႈၽြႃးလွႆၼွႆႉၸိူဝ်းၼႆႉ ၵူၼ်းမိူင်းပိုၼ်ႉတီႈ ပႃးၸဵမ်ၵူၼ်းပၢႆႈၽေးသိုၵ်းၶဝ် လႆႈမႆႈၸႂ်လွင်ႈႁူမ်ႇလူမ်ႈ ၵူဝ်ၸုမ်းၶဝ်မႃးပွႆႇမၢၵ်ႇထႅင်ႈလႄႈ ၵူၼ်းမိူင်း ၵမ်ႈၽွင်ႈ ဢွၼ်ၵၼ်ပၢႆႈၵႂႃႇတၢင်း ထုင်ႉၸၢမ်ၵႃး ၸွမ်းဝၢၼ်ႈလူင်ၵၼ် ၸိူဝ်းၼႆႉ။

လိူဝ်ၼၼ်ႉ ၼႂ်းလိူၼ်ၵျႅၼ်ႊၼိဝ်ႊရီႊ ပူၼ်ႉမႃးၼႆႉၵေႃႈ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ပွႆႇမၢၵ်ႇသႂ်ႇလႄႈ ၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ် 14 ၵေႃႉ ယဝ်ႉပွၵ်ႈၼိုင်ႈ။