သိုၵ်းၵဝ်ႈၵၢင်ႉ MNDAA ဢဝ်တိုဝ်ႉတၢင်း ပီမႂ်ႇၶႄႇၼႆႉသေ ပိုတ်ႇပၢင်တေႃႇလွင်းၶိုၼ်း တီႈဝဵင်းသႅၼ်ဝီ ႁဵတ်းႁႂ်ႈၵူၼ်းမိူင်းပိုၼ်ႉတီႈ မႆႈၸႂ်ထႅင်ႈ။

တႄႇဢဝ် ႁၢင်လိူၼ်ၵျႅၼ်ႊၼိဝ်ႊရီႊ 2025 ၼႆႉမႃး သိုၵ်းၵဝ်ႈၵၢင်ႉ MNDAA ပဵၼ်ၸဝ်ႈတႅင်ႇလူင်သေ ပိုတ်ႇပၢင်တေႃႇလွင်းၶိုၼ်း တီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၶဝ်တိုၵ်ႉႁႃပိုတ်ႇၶိုၼ်း မိူဝ်ႈၼႃႈပီမႂ်ႇၶႄႇၼႆႉ။ ဢွင်ႈတီႈသုမ်ႉ တႃႇပိုတ်ႇမၼ်းၵေႃႈ ၾၢႆႇၸဝ်ႈၼႃႈတီႈၶဝ် ႁဵတ်းပၼ်လၢႆလၢႆၵူၺ်းၶႃႈ။ ဢွင်ႈတီႈ ၶဝ်ပိုတ်ႇၶိုၼ်းၼၼ်ႉၵေႃႈ ပဵၼ်တီႈၵဝ်ႇပၢင်ႇပွႆးလိူၼ်သီႇၼႆႉၵူၺ်း။ ႁဝ်းၶႃႈ ၵူၼ်းမိူင်းတႄႉ ဢမ်ႇႁၼ်လီၸွမ်းၶႃႈ။ ၽွၼ်းတုမ်ႉယွၼ်ႈ ပၢင်တေႃႇလွင်းၼႆႉ ႁဵတ်းႁႂ်ႈၽူဝ်မေးၽိတ်းမေႃးၵၼ်၊ လွင်းသုမ်းယဝ်ႉ ဢဝ်ၶမ်း၊ သၢႆၶေႃး၊ ဝႅၼ်၊ ၸွပ်ႇမိုဝ်း၊ ပီႇႁူ၊ ရူတ်ႉၵႃး၊ ၾူၼ်း ၸိူဝ်းၼႆႉ ဢဝ်ၵႂႃႇၵမ်ႉတီႈ ၸဝ်ႈပၢင်လွင်း ၸိူင်ႉၼႆဢေႃႈ ပၼ်ႁႃဢၼ်ပဵၼ်ယူႇယၢမ်းလဵဝ်ၼႆႉ”- ဝႃႈၼႆ။

ဝၢႆးၽႅၼ်ယၼ်ႇသိုၵ်း 1027 မႃးၼႆႉ ယူႇတီႈ သိုၵ်းၵဝ်ႈၵၢင်ႉ MNDAA ယိုတ်းၵမ်းလႆႈဝႆႉ ဝဵင်းသႅၼ်ဝီ မႃးမိူဝ်ႈႁၢင်ပီ 2023 ၼၼ်ႉသေ ထိုင်မႃး ပီမႂ်ႇၶႄႇ 2024 ၼၼ်ႉ ယူႇတီႈ သိုၵ်းၶဝ်သေ ဢွၼ်ႁူဝ် ပိုတ်ႇပၢင်တေႃႇ လွင်းၶိုၵ်ႉယႂ်ႇလူင်မႃး တီႈပၢင်ႇပွႆးလိူၼ်သီႇ ၵၢင်ဝဵင်းသႅၼ်ဝီၼၼ်ႉမႃး ႁၢၼ်ႉတေႃႇထိုင် လိူၼ်ႁႃႈ (သွၼ်းၼမ်ႉ) ဝႃႈၼႆ။

“ပၢင်တေႃႇလွင်းၶဝ်ၼၼ်ႉ တိုၵ်ႉယင်းၵႂႃႇလႆႈမွၵ်ႈ 6 လိူၼ်ၼႆႉၵူၺ်း။ လွင်ႈၶဝ် ယင်ႉပၢင်တေႃႇလွင်းၵႂႃႇၼၼ်ႉ ယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇထပ်းၵၼ်ႁႅင်းလႄႈ ၶဝ်ၸင်ႇယင်ႉၵႂႃႇၵူၺ်း။ တၢင်ႇတီႈတႄႉ တိုၵ်ႉသိုပ်ႇႁဵတ်းၵႂႃႇ ဢိတ်းဢိတ်းဢွတ်းဢွတ်းယူႇ ပၢင်မၼ်းတႄႉ ဢမ်ႇၵႂၢင်ႈယႂ်ႇ မိူၼ်တီႈပၢင်ႇပွႆး လိူၼ်သီႇၼႆႉၶႃႈ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။

မိူၼ်ၼႆၼင်ႇၵဝ်ႇ တီႈဝဵင်းလႃႈသဵဝ်ႈၵေႃႈ ယူႇတီႈ သိုၵ်းၵဝ်ႈၵၢင်ႉ MNDAA ၸတ်းႁဵတ်း ပွႆးပီမႂ်ႇၶႄႇ တႃႇၶၢဝ်းတၢင်း 1 လိူၼ် တႄႇဢဝ် ဝၼ်းတီႈ 28/01/2025 တေႃႇထိုင် 28/02/2025 တီႈဝၢင်းမၢဝ်းသတႃး၊ ဝၢင်းၽြႃး ယၢၼ်ႇတဵင်းဢွင်ႇ၊ ဝၢင်းသူၼ်မွၵ်ႇ (ပန်းခြံ) ၸိူဝ်းၼႆႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပွႆးပီမႂ်ႇၶႄႇ တီႈဝဵင်းလႃႈသဵဝ်ႈ ပီၼႆႉ ၶဝ်ၸတ်းယႂ်ႇဢေႃႈ။ ယဝ်ႉၵေႃႈ မီးပႃးပၢင်တေႃႇလွင်း မိူၼ်ၼင်ႇ – မၢၵ်ႇၶူၵ်းၶူၵ်း ၸိူဝ်းၼႆႉထႅင်ႈ ၶဝ်တေၸတ်းတႃႇ 1 လိူၼ်ၼႆဢေႃႈ”- ဝႃႈ ၼႆ။

ထႅင်ႈၾၢႆႇၼိုင်ႈၵေႃႈ တီႈဝဵင်းလႃႈသဵဝ်ႈၼႆႉ ယူႇတီႈ မိူင်းၶႄႇ ၸီႉသင်ႇၸူး သိုၵ်းၵဝ်ႈၵၢင်ႉ MNDAA ဝႃႈ ဝၢႆးပွႆးပီမႂ်ႇၶႄႇယဝ်ႉ တၵ်းတေလႆႈထွႆထွၼ်ဢွၵ်ႇဝဵင်းလႃႈသဵဝ်ႈၶိုၼ်း ဝႃႈၼႆသေတႃႉ လွင်ႈၼႆႉ တၢင်းၾၢႆႇသိုၵ်း ၵဝ်ႈၵၢင်ႉတႄႉ ပႆႇပိုၼ်ၽၢဝ်ႇဢွၵ်ႇမႃး ပဵၼ်တၢင်းၵၢၼ်။

“ႁဝ်းၶႃႈတႄႉ လႆႈႁၼ်ၼႂ်းၶၢဝ်ႇမၢၼ်ႇ BBC, Irrawaddy ၶဝ် ဢွၵ်ႇဝႆႉၸိူင်ႉၼၼ်ၵူၺ်း လွင်ႈဝႃႈ မိူင်းၶႄႇ ၸႂ်ႉၶဝ် ထွႆလႃႈသဵဝ်ႈၼႆႉ။ လွင်ႈဝႃႈ ၶဝ်တေထွႆ ဢမ်ႇထွႆၼၼ်ႉတႄႉ ႁဝ်းၶႃႈ ယင်းပႆႇႁူႉၶႃႈ။ သင်သိုၵ်းၵဝ်ႈၵၢင်ႉၶဝ် ထွႆတႄႉၸိုင် ၸုမ်း PDF လူး ၸွင်ႇတေထွႆ။ သင်ဝႃႈ ၶဝ်ဢမ်ႇထွႆ ပၢင်တိုၵ်း တီႈလႃႈသဵဝ်ႈၼႆႉ တေ ပႆႇယဵၼ် သိုၵ်းမၢၼ်ႈတင်း PDF တေယိုဝ်းၵၼ်ထႅင်ႈယူႇ ႁဝ်းၶႃႈၵူၼ်းမိူင်းတႄႉ လွမ်မႆႈၸႂ်ဝႆႉ ၸိူင်ႉၼႆ ဢေႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းလႃႈသဵဝ်ႈၼႆႉ ၵူၼ်းမိူင်းဢွၼ်ၵၼ် ပွၵ်ႈမႃးယူႇၶိုၼ်းႁိူၼ်းယေးၽႂ်မၼ်း ၵမ်ႈၼမ်ယဝ်ႉ။ လိူဝ်ၼၼ်ႉ ၸွမ်းၵၢတ်ႇ ၸွမ်းတၢင်း ၸိူဝ်းၼႆႉၵေႃႈ ၵူၼ်းၵိုၼ်းၶွၼ်ႈမႃးယဝ်ႉ ႁၢၼ်ႉတၢင်းၵိၼ် ၸိူဝ်းၼႆႉၵေႃႈ ပိုတ်ႇမႃးၶိုၼ်း ၵမ်ႈ ၼမ်ယဝ်ႉ ဝႃႈၼႆ။