ၽူႈၶဝ်ႈၵႄႈၵၢင်ငူပ်ႉငီႉ မိူင်းဢမေႊရိၵၼ်ႊတင်း ၵႃႊတႃႊ လၢတ်ႈဝႃႈ – ဢိတ်ႉသ်ရေႊတင်း ႁႃႊမၢတ်ႉသ် တူၵ်းလူင်းလႆႈၸႂ် တႃႇတေၵိုတ်းတိုၵ်းလႄႈ ပွႆႇပၼ်ၵူၼ်းမိူင်း ၸိူဝ်းတီႉၺွပ်းပဵၼ်တူဝ်ယိူဝ်ႇဝႆႉ ဝႃႈၼႆ။

ပၢင်တိုၵ်း တီႈထုင်ႉၵႃႊသႃႊၼႆႉ ႁိုင်မႃးၶၢဝ်းတၢင်း 1 ပီပၢႆ (15 လိူၼ်)။ ယၢမ်းလဵဝ် လူင်ပွင်ၸိုင်ႈ မိူင်းဢိတ်ႉသ်ရေႊ မၵ်းမၼ်ႈၶေႃႈတူၵ်းလူင်း တႃႇတေၵိုတ်းတိုၵ်းသေ တေတႄႇပဵၼ်တၢင်းၵၢၼ်ၵႂႃႇ ၼႂ်းဝၼ်းတိတ်ႉ တေထိုင်ၼႆႉ – ၸွမ် ၽွင်းလူင် ၵႃႊတႃႊ လၢတ်ႈၼင်ႇၼႆ။ 

ဝၢႆးလင် ပၢင်တိုၵ်းတီႈထုင်ႉၵႃႊသႃႊ ယဝ်ႉတူဝ်ႈၵႂႃႇယဝ်ႉ တေတိူဝ်းႁဵတ်းသၢင်ႈ ၵၢၼ်ၸွႆႈထႅမ်ၵူၼ်းၼင်ႇၵၼ်၊ ၵူၼ်းၸိူဝ်းၺႃးတီႉၺွပ်းပဵၼ်တူဝ်ယိူဝ်ႇဝႆႉၵေႃႈ တေၸၢင်ႈပွၵ်ႈမိူဝ်းႁႃၶိုၼ်းမုင်ႉႁေႃႁိူၼ်းလႆႈ – ၸွမ်ၸိုင်ႈ မိူင်းဢမေႊရိၵၼ်ႊ ၵျူဝ်းပၢႆႊတၼ်ႊ လၢတ်ႈၼင်ႇၼႆ။

ယၢမ်းလဵဝ် တိုၵ်ႉဢုပ်ႇဢူဝ်းႁဵတ်းသၢင်ႈ ၶေႃႈတူၵ်းလူင်း ၵမ်းလိုၼ်းသုတ်းဝႆႉယူႇသေတႃႉ ယွၼ်ႉလႆႈၶေႃႈ တူၵ်းလူင်း ၵၼ်ၵႂႃႇလႄႈ ၶွပ်ႈၸႂ်ထိုင် ၸွမ်ၸိုင်ႈ ၵျူဝ်းပၢႆႊတၢၼ်ႊၼႆ – ၼေႊတၼ်ႊယႃႊႁူႊ ၸွမ်ၽွင်းလူင် မိူင်းဢိတ်ႉသ်ရေႊ လၢတ်ႈၼင်ႇၼႆ။

ၸွမ်ၽွင်းလူင် ၵႃႊတႃႊ လၢတ်ႈဝႃႈ – ၶၵ်ႉတွၼ်ႈၼိုင်ႈ ၵွၼ်ႇပႆႇတႄႇၵၢၼ်ၵိုတ်းတိုၵ်း ၼႂ်းၶၢဝ်းတၢင်း 6 ဝူင်ႈ ႁႃႊမၢတ်ႉသ် တေလႆႈပွႆႇပၼ်ၵူၼ်း ဢၼ်ၶဝ်ၺွပ်းဝႆႉပဵၼ်တူဝ်ယိူဝ်ႇ 33 ၵေႃႉ ပႃးၵူၼ်းထဝ်ႈလႄႈ လုၵ်ႈဢွၼ်ႇ။ ၾၢႆႇဢိတ်ႉသ်ရေႊသမ်ႉ တေလႆႈပွႆႇပၼ် ၵူၼ်းမိူင်းပႃႊလႅတ်ႊသတၢႆႊ ဢၼ်ၶဝ်တီႉၺွပ်းၶင်ၶွၵ်ႈဝႆႉ။

တပ်ႉသိုၵ်းဢိတ်ႉသ်ရေႊ တေလႆႈထွၼ်တပ်ႉဢွၵ်ႇ ၼႂ်းပိုၼ်ႉတီႈၵူၼ်းမိူင်းယူႇသဝ်းၼမ်၊ တေလႆႈပၼ်ၶႂၢင်ႉ ၵူၼ်းပၢႆႈၽေးပွၵ်ႈၶိုၼ်းႁိူၼ်း၊ တေလႆႈပၼ်ၶႂၢင်ႉ ရူတ်ႉၵႃးၸွႆႈထႅမ်ၶဝ်ႈဢွၵ်ႇၵႂႃႇမႃးၵူႈဝၼ်း – ဝႃႈၼႆ။

ၶၵ်ႉတွၼ်ႈသွင်သမ်ႉ တေလႆႈသိုပ်ႇပွႆႇပၼ် ၵူၼ်းမိူင်းၸိူဝ်းၺႃးၺွပ်းပဵၼ်တူဝ်ယိူဝ်ႇ၊ တပ်ႉသိုၵ်း ဢိတ်ႉသ်ရေႊ တေလႆႈထွၼ်ဢွၵ်ႇၵႂႃႇ ၼႂ်းပိုၼ်ႉတီႈ ၵႃႊသႃႊ တင်းမူတ်း။ ဝၢႆးလင်ၵိုတ်းတိုၵ်းၵၼ် ထူၼ်ႈ ထိုင် 16 ဝၼ်းယဝ်ႉ တေလႆႈသိုပ်ႇ ဢုပ်ႇၵုမ်ၵၼ် တႃႇလွင်ႈငမ်းယဵၼ် ဢၼ်တေမၼ်ႈၵိုမ်းၶၢဝ်းယၢဝ်း – ၼႆယဝ်ႉ။

ၶၵ်ႉတွၼ်ႈထီႉသၢမ် ၶၵ်ႉတွၼ်ႈၵမ်းလိုၼ်းသုတ်းသမ်ႉ တႃႇမႄးပူၵ်းပွင်ၶိုၼ်း တီႈထုင်ႉၵႃႊသႃႊလႄႈတင်း တေႃႉဢဝ်ၶၢပ်ႈတူဝ်ၵူၼ်းၸိူဝ်းလူႉတၢႆ တီႈၵႃႊသႃႊ ၸိူဝ်းၼႆႉ။ 

ၵူၼ်းမိူင်းဢိတ်ႉသ်ရေႊလႄႈ ပႃႊလႅတ်ႊသတၢႆး ဢွၼ်ၵၼ်ႁူမ်ၸူမ်းႁပ်ႉတွၼ်ႈ ၵၢၼ်ၵိုတ်းတိုၵ်းၼႆႉသေတႃႉ တေႃႇထိုင် ဝၼ်းတီႈ 15/1/2025 ၼႆႉ ဢိတ်ႉသ်ရေႊ တိုၵ်ႉပွႆႇမၢၵ်ႇ တီႈထုင်ႉၵႃႊသႃႊဝႆႉယူႇ။

ၵွၼ်ႇပႆႇပဵၼ်ပၢင်တိုၵ်းၼၼ်ႉ တီႈထုင်ႉၵႃႊသႃႊ မီးႁူဝ်ၼပ်ႉၵူၼ်းယူႇသဝ်း 2.3 လၢၼ်ႉ ပဵၼ်ဢွင်ႈတီႈ ၵူၼ်းယူႇသဝ်း ၵိုၼ်းၶွၼ်ႈ။ ယၢမ်းလဵဝ်တႄႉ ထုင်ႉၵႃႊသႃႊတင်းသဵင်ႈ ၸမ်လူႉလႅဝ်မူတ်းယဝ်ႉ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။