မိူဝ်ႈၼႆႉ ဝၼ်းတီႈ14/1/2025 ၸုမ်းဢူၺ်းလီ 7 ၸုမ်း (7 EAO Alliace) ၸတ်းပၢင်ၵုမ် ဢုပ်ႇဢူဝ်းၵၼ် တၢင်းဢွၼ်ႊလၢႆႊ ပဵၼ်ပွၵ်ႈၵမ်းႁႅၵ်ႈ ၼႂ်းပီ 2025  ၸုမ်းဢွၼ်ႁူဝ်လႄႈ ၸုမ်းၽူႈၼမ်းၼႂ်း ၶဝ်ႈႁူမ်ႈ 22 ၵေႃႉ ဝႃႈၼႆ။

ၼႂ်းပၢင်ၵုမ်ၼၼ်ႉ ယူႇတီႈ ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ဝႃႈ – “ပေႃးႁဝ်း ႁဵတ်းၵၢၼ်ၵႂႃႇမိူၼ်လၢႆးၵဝ်ႇတႄႉ မၼ်းဢမ်ႇတၼ်း လွင်ႈပိူင်ပဵၼ် ဝၢၼ်ႈမိူင်း ဢၼ်တေၵိူတ်ႇ ၶိုၼ်ႈၼႂ်းပီ 2025 ယဝ်ႉ ႁဝ်းလူဝ်ႇလႆႈလႅၵ်ႈလၢႆႈ လွင်ႈႁဵတ်းသၢင်ႈၵၢၼ်ငၢၼ်းတင်းသဵင်ႈယဝ်ႉ ”- ဝႃႈၼႆ။

လိူဝ်ၼၼ်ႉ သိုပ်ႇလၢတ်ႈထႅင်ႈဝႃႈ – “ဢၼ်ယူႇတီႈ မိူင်းႁိမ်းႁွမ်း၊ ၸၢတ်ႈၸိုင်ႈလုမ်ႈၾႃႉ UN ၶဝ် မႆႈၸႂ်ယူႇ ၼႆႉ ၾၢႆႇသၢၼ်ၶတ်းတင်းသဵင်ႈၼႆႉ ၶဝ်လၢတ်ႈၶိူဝ်းတႃႇတေၽဵဝ်ႈ SAC ။ ပေႃးၶဝ်ၽဵဝ်ႈလႆႈယဝ်ႉၵေႃႈ ၸွင်ႇ တေၸူႉလုမ်းတုမ်ၵေႃၵၼ်လႆႈႁိုဝ်။ ဢၼ်ၶဝ်မႆႈၸႂ်ၼႆႉ ပေႃးဢမ်ႇၸူႉလုမ်းတုမ်ၵေႃၵၼ်ၼႆ မိူင်းၼႆႉ တေ တႅၵ်ႇပႅတ်ႈသဵင်ႈသဵင်ႈယဝ်ႉ။ ၵွပ်ႈပိူဝ်ႈၸိူင်ႉၼႆလႄႈ မၼ်းလူဝ်ႇၼႄဝႃႈ ပေႃးမီးလွင်ႈလႅၵ်ႈလၢႆႈၼႆ ႁဝ်းၵေႃႈ ယင်းတိုၵ်ႉပဵၼ်ပိုၵ်ႉပဵၼ်ၽႅၼ်ႇၸွမ်း ၵၼ်ယူႇ ဢၼ်ၼႆႉ လူဝ်ႇၼႄဢိူဝ်ႈ။ ပေႃးႁဝ်းၼႄလႆႈမိူင်းႁိမ်းႁွမ်း၊ ဢႃႊသီႊယၼ်ႊ၊ UN ၶဝ်ၸိုင် ပိူၼ်ႈတေဢွၼ် ၵၼ် ၸႂ်လီႁူမ်ၸူမ်းၸွမ်းၼၼ်ႉယဝ်ႉ”- ဝႃႈၼႆ။

ၼႂ်းပၢင်ၵုမ်ၼၼ်ႉ လႆႈဢုပ်ႇဢူဝ်းထတ်းသၢင်ၶိုၼ်း ငဝ်းလၢႆးဢၼ်ပဵၼ်ယူႇယၢမ်းလဵဝ် မိူၼ်ၼင်ႇ – ၵၢၼ်မိူင်း၊ ၵၢၼ်သိုၵ်း၊ လွင်ႈငမ်းယဵၼ်၊ ၵၢၼ်ပၢႆးမၢၵ်ႈမီး၊ လွင်ႈၶဵင်ႇတႃႉၵူၼ်းမိူင်း ဢၼ်လႆႈႁူပ်ႉထူပ်း ယၢပ်ႇၽိုတ်ႇ ၵူႈလွင်ႈလွင်ႈ ၸိူဝ်းၼႆႉ ဝႃႈၼႆ။

ၼႂ်းပၢင်ဢုပ်ႇဢူဝ်းၸုမ်းဢူၺ်းလီ 7 ၸုမ်း ပွၵ်ႈၵမ်းၼႆႉ ၸွမ်သိုၵ်းလူင် ယွတ်ႈသိုၵ်း ပဵၼ်ၽူႈ ၼင်ႈၸိုင်ႈ မၢႆ 1 လႄႈ ၼၢႆႇဢွင်ႇမိၼ်း ပဵၼ်ၽူႈၼင်ႈၸိုင်ႈ မၢႆ 2 ။

ၸုမ်းဢူၺ်းလီ 7 ၸုမ်း (7 EAO Alliace) ၼႆႉ ၶွတ်ႇၽွတ်ႈမႃး မိူဝ်ႈၵၢင်လိူၼ်မၢတ်ႊၶျ် ပီ 2024 ၼၼ်ႉသေ  ၼႂ်း 7 ၸုမ်းၼၼ်ႉ မိူၼ်ၼင်ႇ – တပ်ႉသိုၵ်းလႃးႁူႇ LDU ၊ တပ်ႉသိုၵ်းတႆး RCSS ၊ ပႃႇတီႇမိူင်းမွၼ်းမႂ်ႇ MNSP ၊ တပ်ႉသိုၵ်းပဢူဝ်း PNLO ၊ တပ်ႉသိုၵ်းယၢင်းၽိူၵ်ႇ KNLA – PC ၊ တပ်ႉသိုၵ်းယၢင်းၽိူၵ်ႇ ၵမ်ႉၸွႆႈတီႇမူဝ်ႇၶရေႇသီႇ DKBA လႄႈ တပ်ႉသိုၵ်းရၶႅင်ႇ ALP ၸိူဝ်းၼႆႉ။