ၸုမ်းဢူၺ်းလီသိုၵ်းပွတ်းႁွင်ႇ 3 ၸုမ်း သိုၵ်းၶႄႇၵဝ်ႈၵၢင်ႉ MNDAA သိုၵ်းရၶႅင်ႇ AA တင်း သိုၵ်းတဢၢင်းပလွင်ႈ TNLA ႁူမ်ႈၵၼ်ပိုၼ်ၽၢဝ်ႇ တႄႇပၢင်ယၼ်ႇသိုၵ်း 1027 မိူဝ်ႈပီ 2023 လိူၼ်ဢွၵ်ႊထူဝ်ႊပိူဝ်ႊ ဝၼ်းတီႈ 27 ယၢမ်းၵၢင်ၼႂ် 4 မူင်း။ တႄႇလူမ်ႇတိုၵ်း ဝဵင်းၼမ်ႉၽႃႈ (ၶျိၼ်းသုၺ်ႇႁိူဝ်)။ ပွႆႇမၢၵ်ႇလၼ်ႇၶူဝ်၊ ယႃႉတၢင်း၊ ၼႂ်းၵႄႈသႅၼ်ဝီ၊ ၵုၼ်လူင်၊ ႁူဝ်ပၢင်ႇ။

ၶၢဝ်းတၢင်း 2 လိူၼ်ပၢႆပၢႆ သိုၵ်းၶႄႇၵဝ်ႈၵၢင်ႉ ယိုတ်းလႆႈ ၼႃႈလိၼ်ၽွင်းငမ်းတူဝ်ၵဝ်ႇၵဝ်ႈၵၢင်ႉ ဢၼ် ပဵၼ် ၸႄႈဝဵင်းၵၢတ်ႇၵဝ်ႇ(လၢဝ်ႇၵၢႆး) ၸႄႈဝဵင်းၵွင်းၸၢင်ႉ (ၵုင်းၵျၢၼ်း) သေဢမ်ႇၵႃး ယိုတ်းလႆႈပႃး ၸႄႈဝဵင်းၵုၼ်လူင်၊ ၸႄႈဝဵင်းသႅၼ်ဝီ၊ ၸႄႈဝဵင်းၵူတ်ႉၶၢႆ၊ ၾၢၵ်ႇတၢင်းဢွၵ်ႇ ဢၼ်မီးထုင်ႉမိူင်းငႅၼ်း၊ မိူင်းၸီး၊ ၽွင်းသႅင် ပႃးၸဵမ်ဝဵင်းမိူင်းၵူဝ်းတင်း ဝဵင်းပၢင်ႇသၢႆး ၵိဝ်ႇၵူတ်ႉ။

ဝၼ်းတီႈ 27 ဢွၵ်ႊထူဝ်ႊပိူဝ်ႊထိုင် ဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ႁူဝ်ပီ 2024 ၶၢဝ်းတၢင်းမွၵ်ႈ 70 ဝၼ်းၵူၺ်း သိုၵ်းမၢၼ်ႈၵၢၼ်ႉသုမ်း ငဝ်ႈငုၼ်းၵုမ်းၵမ်ယၼ်ႇသိုၵ်း ၸၵၶ 16 သႅၼ်ဝီလႄႈ တၵၸ လၢဝ်ႇၵၢႆး ဢၼ်ၵုမ်းၵမ်တပ်ႉၵွင် 20 တပ်ႉၵွင်ၼၼ်ႉ လႆႈယွမ်းၵၢၼ်ႉသိုၵ်း မၢင်ၸိူဝ်းတၢႆ၊ မၢင်ၸိူဝ်း မၢတ်ႇ၊ မၢင်ၸိူဝ်းလႆႈပဵၼ်ၽူႈယွမ်းသိုၵ်း၊ မၢင်ၸိူဝ်းပၢႆႈလိပ်းပၢႆႈတၢႆ ဢွၵ်ႇယၢၼ်ပိုၼ်ႉတီႈ။

ၽွင်းၼၼ်ႉၶၢဝ်းလဵဝ် သိုၵ်းလွႆတဢၢင်းပလွင်ႈသမ်ႉ လူမ်ႇယိုဝ်းၸႄႈဝဵင်းၼမ်ႉတူႈ၊ ၼမ်ႉသၼ်ႇ၊ မၢၼ်ႈ တူင်ႈ၊ ၼမ်ႉၶမ်း၊ ၵူတ်ႉၶၢႆ သိုၵ်းမၢၼ်ႈ ယွမ်းၵၢၼ်ႉ လႆႈထွၼ်ဢွၵ်ႇပၼ်သဵင်ႈသဵင်ႈ။ ယိုတ်းလႆႈပႃးၵိင်ႇ ၸႄႈဝဵင်း မိူင်းငေႃႉ၊ ၵိင်ႇၸႄႈဝဵင်းမိူင်းလူင်။

ၸိူင်ႉၼၼ်ၼင်ႇၵဝ်ႇ သိုၵ်းရၶႅင်ႇ AA ၵေႃႈ လေႃႇတိုၵ်းသိုၵ်းမၢၼ်ႈ တွၼ်ႈၼႃႈတၢင်းတူၵ်း ၸႄႈဝဵင်းပ လႅတ်ႉဝႃႉ ၼႂ်းၸႄႈမိူင်းၶျၢင်း သေဢမ်ႇၵႃး သူင်ႇႁႅင်းသိုၵ်းၶႂၢၵ်ႈမင် ၼႂ်းၸႄႈမိူင်းရၶႅင်ႇ တွၼ်ႈတၢင်း ဢွၵ်ႇၸဵင်ႇၼိူဝ် လေႃႇတိုၵ်းယိုတ်းလႆႈ ဝဵင်းယဝ်ႉဝဵင်း။

ဢိင်ဢဝ်ပၢင်ယၼ်ႇသိုၵ်း 1027 ပဵၼ်ႁႅင်းၸႂ်သေ သိုၵ်းယၢင်းလႅင် လၢႆလၢႆၸုမ်းၵေႃႈ ၶွၼ်ႈႁႅင်းၵၼ် တႄႇ ပၢင်ယၼ်ႇသိုၵ်း 1 သီႇတူဝ် (1111) လိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 11 ၊ ပိုတ်ႇၼႃႈသိုၵ်း လေႃႇ တိုၵ်း သိုၵ်းမၢၼ်ႈ ၼႂ်းၸႄႈမိူင်းယၢင်းလႅင်။

ဢိင်ၶေႃႈပိုၼ်ၽၢဝ်ႇ သိုၵ်းယၢင်းလႅင် မိူဝ်ႈလိူၼ်မၢတ်ႊၶျ် ဝၼ်းတီႈ 23 ပီ 2024 ၼႆႉသေ လႆႈႁူႉဝႃႈ သိုၵ်းယၢင်းလႅင် ႁူမ်ႈၵၼ် ယိုတ်းလႆႈ ဝဵင်းမႄႈၸေႉ၊ တီးမေႃးသူဝ်ႇ၊ ယႂႃႇတိတ်ႉ၊ သျှႃးတေႃး၊ မေႃႇၶျီး၊ ၼမ်ႉမႄႈၶုၼ် ပႃးၸဵမ် ၸႄႈဝဵင်းၾၢႆၶုၼ် မိူင်းပၢႆး တွၼ်ႈၼႂ်းမိူင်းတႆး ပွတ်းၸၢၼ်း။

ငဝ်းလၢႆးၼင်ႇၼၼ် ၸုမ်းသိုၵ်းၵႅတ်ႇၶႄပိုၼ်ႉတီႈ တၢင်းၸႄႈၵဵင်းၵေႃႈ လေႃႇတိုၵ်းသိုၵ်းမၢၼ်ႈ ႁၢဝ်ႈ ႁႅင်း။ ၶျၢင်းၵေႃႈ ၶွၼ်ႈႁႅင်းၵၼ် လေႃႇတိုၵ်း သိုၵ်းမၢၼ်ႈ ဢၼ်ပၵ်းယူႇမိူင်းၶျၢင်း ႁၢဝ်ႈႁႅင်း။ ၸႄႈမိူင်း ၶျၢင်း မီးယူႇ 9 ၸႄႈဝဵင်းၼၼ်ႉ သိုၵ်းၶျၢင်း ပိုၼ်ၽၢဝ်ႇဝႃႈ ၼွၵ်ႈသေ ၼႂ်းတူဝ်ဝဵင်း ပိုၼ်ႉတီႈမိူင်းၶျၢင်း တင်းသဵင်ႈ 75% ၼၼ်ႉ ၶဝ်ယိုတ်းလႆႈဝႆႉသဵင်ႈယဝ်ႉ ဝႃႈၼႆ။ ၽွင်းၼင်ႇၼၼ် ယၢင်းၽိူၵ်ႇၵေႃႈ လေႃႇ တိုၵ်း ယိုတ်းဢဝ်ပိုၼ်ႉတီႈ ၼႂ်းၸႄႈမိူင်းယၢင်းၽိူၵ်ႇလၢႆလၢႆတီႈ လေႃႇတိုၵ်းသိုၵ်းမၢၼ်ႈထိုင် ဝဵင်းမျႃႉ ဝတီႇ။

ၽွင်းၼင်ႇၼၼ် ဝၼ်းတီႈ 11/01/2024 မိူင်းၶႄႇ ႁဵတ်းၵႄႇယူႇၵၢင်သေ မွၵ်ႇႁွင်ႉ တူဝ်တႅၼ်းသိုၵ်း မၢၼ်ႈတင်း တူဝ်တႅၼ်းသိုၵ်းတဢၢင်းပလွင်ႈလႄႈ တူဝ်တႅၼ်း သိုၵ်းၶႄႇၵဝ်ႈၵၢင်ႉ တီႈႁူင်းႁႅမ်းသူၼ် မွၵ်ႇႁၢႆႊၵိူင်ႊ တီႈဝဵင်းၶုၼ်းမိင်သေ ၸႂ်ႉႁႂ်ႈသွင်ၾၢႆႇၵိုတ်းၵၢၼ်တိုၵ်းတေႃးၵၼ်။

မိူဝ်ႈသိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA လိုဝ်ႈၵိုတ်း ပၢင်ယၼ်ႇသိုၵ်း 1027 ယဝ်ႉဢမ်ႇ ႁိုင် ၼႂ်းလိူၼ်လဵဝ်ၵၼ် သိုၵ်းမၢၼ်ႈလူမ်ႇယိုဝ်းၵႃးတၢင်ႇၵွင်ႈ တပ်ႉသိုၵ်းပူတ်းပွႆႇၸိူဝ်ႉၸတ်ႈပဢူဝ်း PNLA တီႈဝၢၼ်ႈၸၢမ်ၽူး ၸႄႈဝဵင်းႁူဝ်ပူင်း မိူဝ်ႈႁူဝ်ပီ 2024 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 21 ၼၼ်ႉလႄႈ သွင်ၾၢႆႇလႆႈပဵၼ်ပၢင်တိုၵ်း ထိုင်တီႈပေႃးၶဝ်ႈလိုပ်ႈလမ်းတိုၵ်းတေႃး သိုၵ်းမၢၼ်ႈဢွၵ်ႇသေ ယိုတ်းလႆႈ ဝဵင်းသီႇသႅင်ႇ ၵႂႃႇၸူဝ်ႈၶၢဝ်း။

ၾၢႆႇတၢင်းမိူင်းၶၢင်သမ်ႉ လိူၼ်မၢတ်ႉၶျ်၊ ဝၼ်းတီႈ 7 သိုၵ်းၶၢင်လႄႈ သိုၵ်း PDF ၶၢင် ပိုၼ်ၽၢဝ်ႇ ပၢင် ယၼ်ႇသိုၵ်း 0307 လေႃႇတိုၵ်းသိုၵ်းမၢၼ်ႈႁၢဝ်ႈႁၢဝ်ႈႁႅင်းႁႅင်း။ ၽွင်းၼင်ႇၼၼ် တၢင်းမိူင်းတႆး ပွတ်း ႁွင်ႇ သိုၵ်းမၢၼ်ႈၵေႃႈ သူင်ႇၶိူင်ႈမိၼ် ပွႆႇမၢၵ်ႇဢမ်ႇထၢတ်ႇ၊ ၾၢႆႇၸုမ်းဢူၺ်းလီသိုၵ်းပွတ်းႁွင်ႇၵေႃႈ ဝၵ်ႉ ဢဝ် တိုဝ်ႉတၢင်း ၵိုတ်းသိုၵ်းသေ မႄႇၶႂၢၵ်ႈၼႃႈသိုၵ်း။ ၵဝ်ႉၼႄးၵႃ ၵႃၼႄးၵဝ်ႉ ပိၼ်ႇၼႄးၵၼ် တင်း သွင်ၾၢႆႇ။ ထိုင်မႃး ဝၼ်းတီႈ 25/06/2024 ထိုင်တီႈပိုတ်ႇၼႃႈသိုၵ်း တႄႇပၢင်ယၼ်ႇသိုၵ်း 1027 ႁွပ်ႈ ၵမ်း 2 ၶိုၼ်း။

ၾၢႆႇသိုၵ်းၶႄႇ ၵဝ်ႈၵၢင်ႉ သူင်ႇႁႅင်းသိုၵ်း လူမ်ႇတိုၵ်း ငဝ်ႈငုၼ်းသိုၵ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ရပၶ ၵူၼ်ႇပင်းသေ ယိုတ်းလႆႈ ဝဵင်းလႃႈသဵဝ်ႈ မိူဝ်ႈဝၼ်းတီႈ 3 ဢေႃႊၵတ်ႊသ်။ ၼႂ်းပိုၼ်းၶၢဝ်းတၢင်း လုၵ်ႉၽိုၼ်ႉ 70 ပီ လႆႈဝႃႈသိုၵ်းမၢၼ်ႈ သုမ်းယႂ်ႇသုမ်းလူင်။ ပၢင်ယၼ်ႇသိုၵ်း ႁွပ်ႈၵမ်းသွင်ၼႆႉ သိုၵ်းလွႆ ၵေႃႈ ယိုတ်းလႆႈဝဵင်းမိူင်းၵုတ်ႈ၊ မိူင်းမိတ်ႈ၊ ၼွင်ၶဵဝ်၊ ၵျွၵ်ႉမႄးတင်း ဝဵင်းသီႇပေႃႉထႅင်ႈ။

ၶၢဝ်းတၢင်း ပၢင်ယၼ်ႇသိုၵ်း 1027 ၼႆႉ မိူင်းၶႄႇ ၶတ်းၸႂ်ၶဝ်ႈၵႄႈ ႁွင်ႉၸုမ်းသိုၵ်းမၢၼ်ႈတင်း ၸုမ်း ဢူၺ်းလီသိုၵ်းပွတ်းႁွင်ႇ ဢုပ်ႇၵၼ် 6 ပွၵ်ႈသေတႃႉ ဢမ်ႇလႆႈၶေႃႈလႆႈသဵင်သင်။ ၽွင်းၼင်ႇၼၼ် တၢင်းၸႄႈမိူင်းရၶႅင်ႇ ဢၼ်တႄႇပၢင်ယၼ်ႇသိုၵ်း 1027 ၸွမ်းမိူဝ်ႈလဵဝ်ၵၼ်ၼႆႉ ၶၢဝ်းတၢင်း 1 ပီၵူၺ်း ၼႂ်းၸႄႈမိူင်းရၶႅင်ႇ မီး 17 ၸႄႈဝဵင်းၼၼ်ႉ သိုၵ်းဢႃရတ်ႉၶ ယိုတ်းလႆႈ 14 ၸႄႈဝဵင်း။ ယင်းပႆႇသွၼ်ႇ ပႃး ၸႄႈဝဵင်းပလႅတ်ႉဝႃႉ ဢၼ်ယူႇၼႂ်းၸႄႈမိူင်းၶျၢင်း ပွတ်းတႂ်ႈထုင်ႉတိတ်းဢိူမ်ႈမိူင်းရၶႅင်ႇ ဢၼ်သိုၵ်း AA ယိုတ်းလႆႈ ၸဵမ်မိူဝ်ႈႁၢင်ပီ 2023။

ပေႃးႁုပ်ႈသေ လၢတ်ႈၵေႃႈ ၶၢဝ်းတၢင်း ပၢင်ယၼ်ႇသိုၵ်း 1027 ၼႆႉ သိုၵ်းမၢၼ်ႈ သုမ်းၵၢၼ်ႉ တိူင်းသိုၵ်း ရမၶ လႃႈသဵဝ်ႈ ဢၼ်မီးၼႂ်းမိူင်းတႆးပွတ်းႁွင်ႇလႄႈ တိူင်းသိုၵ်းဝၼ်းတူၵ်းၼပၶ ဢၼ်ပၵ်းတီႈဝဵင်း ဢၢမ်း ဢၼ်သိုၵ်းရၶႅင်ႇ တိုၵ်ႉယိုတ်းလႆႈ မိူဝ်ႈဝၼ်းတီႈ 20 လိူၼ်တီႊသႅမ်ႊပိူဝ်ႊ ပီ 2024 ပူၼ်ႉမႃးၼႆႉ။

ၶၢဝ်းတၢင်းပၢင်ယၼ်ႇသိုၵ်းၼႆႉ သိုၵ်းမၢၼ်ႈ သုမ်းၵၢၼ်ႉ ငဝ်ႈငုၼ်းၵုမ်းၵမ်ၵၢၼ်သိုၵ်း ၼႂ်းမိူင်းတႆး တၵၸ လၢဝ်ႇၵၢႆး၊ ၸၵသ 16 သႅၼ်ဝီ။ တၢင်းမိူင်းရၶႅင်ႇၵေႃႈ သိုၵ်းမၢၼ်ႈ သုမ်းၵၢၼ်ႉ 3 ငဝ်ႈငုၼ်း ၵုမ်းၵမ် ၵၢၼ်သိုၵ်းမိူၼ်ၵၼ်။ ဢဝ်တပ်ႉတိုၵ်း ၶလယ တင်း ၶမယဝႃႈ သိုၵ်းမၢၼ်ႈ သုမ်းၵၢၼ်ႉ ၼႂ်း မိူင်းတႆး 47 တပ်ႉၵွင် ၼႂ်းမိူင်းရၶႅင်ႇ 42 တပ်ႉၵွင် ယင်းပႆႇ သွၼ်ႇပႃး တပ်ႉၵွင်ႈလူင် တပ်ႉတေႃႉသူင်ႇ တပ်ႉမ၊ တပ်ႉလူမ်း၊ တပ်ႉပၢႆးယူႇလီ၊ တပ်ႉဢိၼ်ႇၵျိၼ်ႊၼီႇယိူဝ်ႊ ဢၼ်ပၵ်းၼႂ်းပိုၼ်ႉတီႈ။

ၼမ်ႉတွၼ်းယႂ်ႇလူင်တွၼ်ႈတႃႇ သိုၵ်းဝႃႉ ၼႂ်းပီ 2024 တႄႉ ဢမ်ႇလၼ်ႇၵွင်ႈသေလုၵ်ႈ ဢမ်ႇလႆႈသုမ်း ဢဵၼ်ႁႅင်းသင်သေ ၶဝ်ႈၵုမ်းလႆႈဝဵင်းႁူဝ်ပၢင်ႇ တင်း ၵိင်ႇၸႄႈဝဵင်းပၢင်ႇလူင်။ လိူဝ်ၼၼ်ႉ ယင်းလႆႈပႃး တႃႈၶူင်း “တႃႈတိုင်းတၼ်” (မိူင်းၵႅတ်ႈ) ၶၢမ်ႈထိုင်တၢင်းတူၵ်းၶူင်းသေ ဢဝ်တီႈယူႇလႆႈ တၢင်းထုင်ႉမိူင်းၵႅတ်ႈ မၢၼ်ႈမၢၵ်ႇ ထုင်ႉၾၢႆႇဢွၵ်ႇဝဵင်းလႃႈသဵဝ်ႈ 20 ဢိူင်ႇပၢႆလႄႈ ထုင်ႉၾၢႆႇဢွၵ်ႇဝဵင်း တၢင်ႉယၢၼ်း 20 ဢိူင်ႇပၢႆ။ ႁူမ်ႈတင်းမူတ်း ဢမ်ႇယွမ်း 50 ဢိူင်ႇ။

ပီ 2024 တွၼ်ႈတႃႇ တပ်ႉသိုၵ်း SSPP/SSA တႄႉ တေလႆႈဝႃႈ ပီလိပ်ႈ ႁိုဝ် ပီမၢၼ်၊ ၾၢႆႇၼိုင်ႈ ဢမ်ႇလႆႈဢွၵ်ႇဢဵၼ် ဢွၵ်ႇႁႅင်းသင်သေ သိုၵ်းမၢၼ်ႈသမ်ႉ ထွၼ်ဢွၵ်ႇပိုၼ်ႉတီႈလႄႈ ၵုမ်းၵမ်လႆႈၵိင်ႇၸႄႈဝဵင်း မၢၼ်ႈႁဵဝ်းထုင်ႉ 19 ဝၢၼ်ႈ ၾၢႆႇႁွင်ႇၼမ်ႉမၢဝ်း တင်းပိုၵ်း။ ၾၢႆႇၼိုင်ႈသမ်ႉ ၵူၼ်းၼႂ်းပိုၼ်ႉတီႈလၢတ်ႈ ဝႃႈ သိုၵ်း SSPP လႆႈထွၼ်တၢင်း မိူင်းယေႃ၊ မိူင်းၵႅတ်ႈ ထုင်ႉႁူဝ်မႃး ႁူဝ်တွမ်း (ထုင်ႉဢၼ်ဝႃႉ ၽိုတ်ႉ ယူႇ ၼင်ႇလၢတ်ႈမႃးပႃႈၼိူဝ်) ပႃးၸဵမ် တၢင်းပွတ်း ၸႄႈဝဵင်းသႅၼ်ဝီ ၸႄႈဢူ၊ ၵူတ်ႉၶၢႆ၊ ၼမ်ႉတူႈ၊ မၢၼ်ႈ တူင်ႈ၊ ၼမ်ႉၶမ်း ၸိူဝ်းၼႆႉၵေႃႈ ၵႂႃႇမႃးတူင်ႉၼိုင် မိူၼ်ၵူႈပွၵ်ႈ ဢမ်ႇလႆႈယဝ်ႉ။

မၢႆၶပ်ႉဝၼ်း ၶၢဝ်းတၢင်းပၢင်ယၼ်ႇသိုၵ်း 1027

2023/10/27 တပ်ႉသိုၵ်းရၶႅင်ႇ AA တပ်ႉသိုၵ်းတဢၢင်းပလွင်ႈ TNLA တပ်ႉသိုၵ်းၶႄႇၵဝ်ႈၵၢင်ႉ MNDAA ႁူမ်ႈၵၼ်ပိုၼ်ၽၢဝ်ႇ တႄႇၽႅၼ်ၵၢၼ်ယၼ်ႇသိုၵ်း 1027 သေ လေႃႇတိုၵ်း ဝဵင်းၼမ်ႉၽႃႈ (ၶျိၼ်း သုၺ်ႇႁိူဝ်) ပွႆႇမၢၵ်ႇယႃႉၶူဝ်၊ ယႃႉတၢင်း ဝူင်ႈၵၢင်သႅၼ်ဝီ – ၵုၼ်လူင်။

2023/10/29 ပၢင်ယၼ်ႇသိုၵ်း 1027 ၶၢဝ်းတၢင်း 3 ဝၼ်း ၸုမ်းဢူၺ်းလီသိုၵ်းပွတ်းႁွင်ႇ ပိုၼ်ၽၢဝ်ႇဝႃႈ ယိုတ်းလႆႈတပ်ႉပၢင်သဝ်း သိုၵ်းမၢၼ်ႈ 60 တီႈၼႆသေ သိုပ်ႇတိုၵ်းဝဵင်းၼမ်ႉၽႃႈ၊ သႅၼ်ဝီ၊ မိူင်းၵူဝ်း။ သိုၵ်းမၢၼ်ႈ တတ်းၶၢတ်ႇၾႆးၾႃႉ၊ ၾူၼ်း၊ ဢိၼ်ႊထိူဝ်ႊၼႅတ်ႊ ၼႂ်းမိူင်းတႆးပွတ်းႁွင်ႇလၢႆလၢႆဝဵင်း။

2023/11/02 ပၢင်ယၼ်ႇသိုၵ်း 1027 ၶၢဝ်းတၢင်း 6 ဝၼ်း သိုၵ်းၶႄႇၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ယိုတ်းလႆႈ ဝဵင်းၼမ်ႉၽႃႈတင်း ထုင်ႉၽွင်းသႅင်။ သိုၵ်းမၢၼ်ႈ တပ်ႉၶလယ 143 ဢၼ်ပၵ်းတီႈလွႆၵၢင် မိူင်း ၵုၼ်လူင် လႆႈဝၢင်းၶိူင်ႈၵႂႃႇလႄႈ တပ်ႉမၢၼ်ႈတင်း ၵၢၼ်ၽွင်းငမ်း ၼႂ်းဝဵင်းၵုၼ်လူင် ၵူၼ်ႇပင်း ယင်ႉၵိုတ်းၵႂႃႇ။

2023/11/10 သိုၵ်းၶႄႇၵဝ်ႈၵၢင်ႉ ယိုတ်းလႆႈ ဝဵင်းၵုၼ်လူင် တင်းပိုၵ်း။ ပိုၼ်ၽၢဝ်ႇဝႃႈ ယိုတ်းလႆႈ တပ်ႉ ပၢင်သဝ်းသိုၵ်းမၢၼ်ႈ 120 တီႈ။ ၵူၼ်းမိူင်းၼႂ်းမိူင်းတႆးပွတ်းႁွင်ႇ 5 မိုၼ်ႇပၢႆ လႆႈပၢႆႈၽေးသိုၵ်း။

2023/11/11 သိုၵ်းယၢင်းလႅင် လၢႆလၢႆၸုမ်း ႁူမ်ႈၵၼ်တႄႇပၢင်ယၼ်ႇသိုၵ်း ၼိုင်ႈ 4 တူဝ် လေႃႇတိုၵ်း သိုၵ်းမၢၼ်ႈ ၵူႈၸႄႈဝဵင်း ၼႂ်းၸႄႈမိူင်းယၢင်းလႅင်ၵူၺ်းဢမ်ႇၵႃး လေႃႇတိုၵ်းသိုၵ်းမၢၼ်ႈ ဢၼ်ပၵ်းၼႂ်း ၸႄႈဝဵင်းၾၢႆၶုၼ်၊ မိူင်းပၢႆး ၸိူဝ်းၼႆႉႁၢဝ်ႈႁၢဝ်ႈႁႅင်းႁႅင်း။ ပၢင်တိုၵ်း ပဵၼ်ယူႇဢမ်ႇထၢတ်ႇ တေႃႇထိုင် ယၢမ်းလဵဝ်။

2023/11/13 သိုၵ်းမၢၼ်ႈ ပိုၼ်ၽၢဝ်ႇၸႂ်ႉမၢႆမီႈသိုၵ်း မတ်ႉတႃ (419) သိုၵ်းၽွင်းငမ်း ၼႂ်းမိူင်းတႆးပွတ်း ႁွင်ႇ 8 ၸႄႈဝဵင်း – ၵူတ်ႉၶၢႆ၊ ၵုၼ်လူင်၊ ၼမ်ႉၶမ်း၊ လႃႈသဵဝ်ႈ၊ သႅၼ်ဝီ၊ ၵွင်းၸၢင်ႉ၊ ၵၢတ်ႇၵဝ်ႇ(လၢဝ်ႇၵၢႆး) တင်း မူႇၸေႊ။ ၾၢႆႇၸုမ်းဢူၺ်းလီသိုၵ်းပွတ်းႁွင်ႇဝႃႈ မၢႆမီႈသိုၵ်း ဢၼ်သိုၵ်းမၢၼ်ႈ ပိုၼ်ၽၢဝ်တႄႇ ၸႂ်ႉၼၼ်ႉ ဢမ်ႇသုမ်ႇငမ်း ၶဝ်ႈထိုင်လႆႈယဝ်ႉ ဝႃႈၼႆ။

2023/11/28 သိုၵ်းၶႄႇၵဝ်ႈၵၢင်ႉ ပိုၼ်ၽၢဝ်ႇဝႃႈ ယိုတ်းလႆႈ ဝဵင်းၵွင်းၸၢင်ႉ(ၵုင်းၵျၢၼ်း) တင်း ဝဵင်းသႅၼ် ဝီ။ ပၢင်တိုၵ်းၶၢဝ်းတၢင်းလိူၼ်႞ ၼၼ်ႉ တပ်ႉလူင်မၢၼ်ႈ ငဝ်ႈငုၼ်းၵုမ်းၵမ်            ယၼ်ႇသိုၵ်း ၸၵၶ မၢႆ 16 ဢၼ်ပၵ်းဝႆႉ တီဝဵင်းသႅၼ်ဝီၼၼ်ႉ လႆႈတူၵ်းသုမ်းပၼ်သိုၵ်းၶႄႇၵဝ်ႈၵၢင်ႉၵႂႃႇ။ ၽူႈမီးၸၼ်ႉ ၵူၼ်းသိုၵ်း တင်းလုၵ်ႈမေး 272 ၵေႃႉ လႆႈယွမ်းၵၢၼ်ႉ၊ ဝၢင်းၶိူင်ႈ။ တပ်ႉၶလယ 125 ဢၼ်ပၵ်းတီႈ ဝဵင်းၵွင်းၸၢင်ႉ ၼၼ်ႉၵေႃႈ တူၵ်းသုမ်းၵူၼ်းသိုၵ်း 93 ၵေႃႉ လုၵ်ႈမေးၶဝ် 27 ၵေႃႉ လႆႈယွမ်းသိုၵ်း။

2023/11/29 ႁွင်ႈၵၢၼ်လူင် ၾၢႆႇၼွၵ်ႈမိူင်း မိူင်းၶႄႇ ပိုၼ်ၽၢဝ်ႇ တီႈပၢင်သပ်းၸႅင်ႈၶၢဝ်ႇဝႃႈ ပၢင်ယၼ်ႇ သိုၵ်း 1027 ဢၼ်ၸုမ်းဢူၺ်းလီသိုၵ်းပွတ်းႁွင်ႇ လေႃႇတိုၵ်းသိုၵ်းမၢၼ်ႈ ယူႇၼႂ်းမိူင်းတႆး ပွတ်းႁွင်ႇ ၼၼ်ႉ ဢမ်ႇၵဵဝ်ႇသင်တင်းၶဝ်။ ၾၢႆႇၼိုင်ႈသမ်ႉ ႁိူဝ်းသၢင်းၽေႃး သိုၵ်းၶႄႇ 3 လမ်း ႁွတ်ႈထိုင် တႃႈႁိူဝ်း တီႇလဝႃႇ တႃႈၵုင်ႈ ဢႅဝ်ႇယဵမ်ႈမိူင်းမၢၼ်ႈ ၼႂ်းၶၢဝ်းတၢင်းဢူၺ်းလီယဵမ်ႈမိူင်း။ ႁႅင်းတုမ်ႉယွၼ်ႈ ပၢင်  ယၼ်ႇသိုၵ်း 1027 ပဵၼ်မႃး ႁႅင်းသူၼ်းၾႆး တႃႇၸုမ်းလုၵ်ႉၽိုၼ်ႉ လေႃႇတိုၵ်း တၢင်းတိူင်းၸႄႈၵႅင်း မိူင်းၶျၢင်း၊ ယၢင်းၽိူၵ်ႇ၊ ယၢင်းလႅင်တင်း မိူင်းမွၼ်း ၸိူဝ်းၼႆႉ။

2023/12/04 ၸုမ်းဢူၺ်းလီသိုၵ်းပွတ်းႁွင်ႇ ႁူမ်ႈၵၼ်လေႃႇတိုၵ်း တပ်ႉပိဝ်ႇႁႃႇမၢၼ်ႈ 105 လၵ်း သုၼ် ၵႃႉၶၢႆလူင် ဝဵင်းမူႇၸေႊ။ ၾႆးမႆႈၵႃးလူင် ၼပ်ႉႁူဝ်ပၢၵ်ႇလမ်း။ UNOCHA ပိုၼ်ၽၢဝ်ႇဝႃႈ ၶၢဝ်းတၢင်း ပၢင် ယၼ်ႇသိုၵ်း 1027 ၼႆႉ ၵူၼ်းမိူင်းလႆႈတၢႆ 95 ၵေႃႉ၊ မၢတ်ႇၸဵပ်း 150 ပၢႆ၊ ၵူၼ်းမိူင်း 8 မိုၼ်ႇပၢႆ လႆႈပၢႆႈ ၽေးသိုၵ်း။

2023/12/05 သိုၵ်းတဢၢင်း ပလွင်ႈ TNLA ပိုၼ်ၽၢဝ်ႇဝႃႈ ယိုတ်းလႆႈ ၵိင်ႇၸႄႈဝဵင်းမိူင်းလူင် (ဝဵင်းၽႄ ၸႄႈဝဵင်းၵျွၵ်ႉမႄး)

2023/12/10 သိုၵ်းတဢၢင်ပလွင်ႈ TNLA ပိုၼ်ၽၢဝ်ႇဝႃႈ ယိုတ်းလႆႈ ၸႄႈဝဵင်းၼမ်ႉၶမ်း၊ ၼမ်ႉသၼ်ႇ၊ မၢၼ်ႈတူင်ႈ တင်းဝဵင်းၵူတ်ႉၶၢႆ လီငၢမ်းယဝ်ႉ ဝႃႈၼႆ။ ၸိူင်ႉၼၼ်ၼင်ႇၵဝ်ႇ သိုၵ်းရၶႅင်ႇၵေႃႈ ပိုၼ်ၽၢဝ်ႇ ဝႃႈ ယိုတ်းလႆႈတပ်ႉပၢင်သဝ်းပလိၵ်ႈမၢၼ်ႈ သိုၵ်းမၢၼ်ႈ 140 တပ်ႉပၢင်သဝ်း ဢၼ်ပၵ်းၸွမ်းသၢပ်ႇ ၼမ်ႉ လႅၼ်လိၼ် ဢၼ်တိတ်းဢိူမ်ႈၸိုင်ႈမိူင်းပင်းၵြႃးတျဵတ်ႉသ်။

2023/12/14 မိူင်းၶႄႇ ၶဝ်ႈယူႇၵၢင်သေ မွၵ်ႇႁွင်ႉ တူဝ်တႅၼ်း ၸုမ်းဢူၺ်းလီသိုၵ်းပွတ်းႁွင်ႇ 3 ၸုမ်း – တပ်ႉသိုၵ်း ရၶႅင်ႇ AA တပ်ႉသိုၵ်းတဢၢင်းပလွင်ႈ TNLA တပ်ႉသိုၵ်းၶႄႇၵဝ်ႈၵၢင်ႉ MNDAA ႁႂ်ႈဢုပ်ႇ ဢူဝ်းတင်းၸုမ်းသိုၵ်းမၢၼ်ႈ တႃႇၵိုတ်းၵၢၼ်တိုၵ်းတေႃးၵၼ်ၼႆသေတႃႉ သိုၵ်းမၢၼ်ႈ သူင်ႇၶိူင်ႈမိၼ် ပွႆႇမၢၵ်ႇသႂ်ႇဝဵင်းၼမ်ႉသၼ်ႇ ၼႂ်းဝၼ်းလဵဝ် လၢႆလၢႆပွၵ်ႈ။ ၸုမ်းဢူၺ်းလီသိုၵ်းပွတ်းႁွင်ႇၵေႃႈ ပိုၼ်ၽၢဝ်ႇ ဝႃႈ ယိုတ်းလႆႈဝဵင်းၼမ်ႉသၼ်ႇတင်း တပ်ႉပိဝ်ႇႁႃႇမၢၼ်ႈ ဢၼ်ပၵ်းတီႈ 105 လၵ်း၊ ဝဵင်းမူႇၸေႊ။

2024/01/01 သိုၵ်းလွႆတဢၢင်း TNLA ပိုၼ်ၽၢဝ်ႇဝႃႈ ယိုတ်းလႆႈတပ်ႉမၢၼ်ႈ တပ်ႉၶလယ 253 လႄႈ 237 ဢၼ်မီးၼႂ်းမိူင်းငေႃႉ။ ၵုမ်းလႆႈပႃး တပ်ႉပလိၵ်ႈမၢၼ်ႈ လုမ်းၽွင်းငမ်းမၢၼ်ႈသဵင်ႈသဵင်ႈသေ ၵုမ်းလႆႈဝဵင်းမိူင်းငေႃႉ လီငၢမ်း ဝႃႈၼႆ။

2024/01/05 MNDAA သိုၵ်းၶႄႇ ၵဝ်ႈၵၢင်ႉ ပိုၼ်ၽၢဝ်ႇဝႃႈ ယိုတ်းလႆႈ ဝဵင်းၵၢတ်ႇၵဝ်ႇ (လၢဝ်ႇၵၢႆး) တပ်ႉ ငဝ်ႈငုၼ်းၵုမ်းၵမ်သိုၵ်းပိုၼ်ႉတီႈ တၵၸ လၢဝ်ႇၵၢႆး၊ လႆႈဝၢင်းၶိူင်ႈတင်းမူတ်း။ ၽူႈမီးၸၼ်ႉ သိုၵ်းမၢၼ်ႈ 228 ၵေႃႉ ၵူၼ်းသိုၵ်း 2100 ပၢႆ၊ လုၵ်ႈမေးၵူၼ်းသိုၵ်း 1,500 ပၢႆ လႆႈယွမ်းသိုၵ်း။ သိုၵ်းဝႃႉ ႁပ်ႉဢဝ်ၶဝ် တၢင်ႇၵႃးသူင်ႇ တၢင်းပၢင်သၢင်းသေ ႁႂ်ႈပွၵ်ႈၶိုၼ်းတၢင်းဝဵင်းလႃႈသဵဝ်ႈ။

2024/01/11 မိူင်းၶႄႇၶဝ်ႈယူႇၵၢင်သေ မွၵ်ႇႁွင်ႉ တူဝ်တႅၼ်း ၸုမ်းဢူၺ်းလီသိုၵ်းပွတ်းႁွင်ႇ 2 ၸုမ်း – တပ်ႉသိုၵ်းတဢၢင်းပလွင်ႈ TNLA တပ်ႉသိုၵ်းၶႄႇၵဝ်ႈၵၢင်ႉ MNDAA ႁႂ်ႈဢုပ်ႇဢူဝ်းတင်းၸုမ်းသိုၵ်း မၢၼ်ႈ ဝၢင်းၶပ်ႉႁႂ်ႈၵိုတ်းယိုတ်း ၵၢၼ်တိုၵ်းတေႃးၵၼ်ၼႆသေ ပၢင်ယၼ်ႇသိုၵ်း 1027 (1^st Seriesလႆႈ ၵိုတ်းယင်ႉၵႂႃႇၵမ်းသိုဝ်ႈ)။ တွၼ်ႈတႃႇ ပၢင်တိုၵ်းတၢင်းမိူင်းရၶႅင်ႇတႄႉ ဢမ်ႇမီးၶၢဝ်ႇဝႃႈ ဢုပ်ႇပႃး။

2024/01/20 သိုၵ်းမၢၼ်ႈ လူမ်ႇယိုဝ်းၵႃးတၢင်ႇၵွင်ႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLO/ PNLA တီႈဝၢၼ်ႈၸၢမ်ၽူး ၸႄႈဝဵင်းႁူဝ်ပူင်း။ သွင်ၾၢႆႇလႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း။ ထိုင်တီႈ လိၵ်ႈၵိၼ်ၵႅၼ်ႇၵိုတ်းတိုၵ်း NCA ဝူင်ႈၵၢင်သိုၵ်းမၢၼ်ႈ တင်း PNLO ပေႃးလႆႈလူႉၵွႆ။

2024/01/25 တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLO/PNLA လေႃႇတိုၵ်းလိုပ်ႈလမ်း သိုၵ်းမၢၼ်ႈ ဢွၵ်ႇယၢၼ်ပိုၼ်ႉတီႈသေ ယိုတ်းလႆႈ ဝဵင်းသီႇသႅင်ႇ ၶၢဝ်းတၢင်းလိူၼ်ပၢႆ။

2024/01/28 တပ်ႉသိုၵ်းၶၢင် KIA တင်း သိုၵ်းၵႅတ်ႇၶႄၵူၼ်းမိူင်း PDF ႁူမ်ႈၵၼ်လေႃႇတိုၵ်း ယိုတ်းလႆႈ ဝဵင်းမၢၼ်ႈပဵင်း ဢၼ်တိတ်းၸပ်း ၸႄႈမိူင်းၶၢင်။

2024/01/30 ၽွင်းၵိုတ်းပၢင်ယၼ်ႇသိုၵ်း 1027 ဝႆႉ ၸူဝ်ႈၶၢဝ်းၼၼ်ႉ ၶႄႇသူင်ႇႁႅင်းသိုၵ်းပလိၵ်ႈ ထိုင် ၼေႇပျီႇတေႃႇသေ တီႉၺွပ်းဢဝ် ၽူႈၼမ်းၶႄႇၵူဝ်းၵၢင်ႉ ပၢႆသဝ်ၶျိူင် (ၵေႃႉၽိုၼ်ႉဝၢႆႇ ၽိူင်ၵျႃးသိူင်း ၽူႈၼမ်း သိုၵ်းၶႄႇၵဝ်ႈၵၢင်ႉ MNDAA သေ လႅၵ်ႈႁဵတ်းတပ်ႉပႂ်ႉလႅၼ်လိၼ် ၊ ႁပ်ႉပဵၼ်ႁူဝ်ပဝ်ႈ ၼႃႈ လိၼ်ၵဝ်ႈၵၢင်ႉသေ ယူႇတႂ်ႈသိုၵ်းမၢၼ်ႈၵုမ်းၵမ်) လုၵ်ႈလၢင်း၊ ၵူၼ်းၸွမ်းတင်းမူတ်း 5 ၵေႃႉ၊ ဢဝ်ပွၵ်ႈ မိူင်းၶႄႇ၊ မီးၶၢဝ်ႇၶႄႇ ဢွၵ်ႇမႃးဝႃႈၶႄႇ ပၼ်တူတ်ႈတၢမ်ႇတၢႆ။

2024/02/10 လူၺ်ႈပၢင်ယၼ်ႇသိုၵ်း 1027 သေ သိုၵ်းမၢၼ်ႈ ဢမ်ႇမီးႁႅင်းသိုၵ်း လေႃႇတိုၵ်းၼႃႈသိုၵ်း ယဝ်ႉလႄႈ ပိုၼ်ၽၢဝ်ႇ ၸႂ်ႉမၢႆမီႈ “ၵူၼ်းမိူင်းၵူႈၵေႃႉ တၵ်းလႆႈႁဵတ်းသိုၵ်း” ၸၢႆးဢႃယု 18 – 45 ပီ ယိင်း ဢႃယု 18 – 35 တၵ်းလႆႈၶဝ်ႈႁၢပ်ႇၵၢၼ်သိုၵ်းၵူႈၵေႃႉ။ ၽႂ်ဝႄႈတၵ်းၺႃးတူတ်ႈတၢမ်ႇၶွၵ်ႈ 5 ပီ ၼႆလႄႈ ၵူၼ်းမိူင်း ဢွၼ်ၵၼ်တူၵ်းၸႂ်၊ ၵမ်ႈၽွင်ႈ ပၢႆႈဝၢၼ်ႈ၊ ပၢႆႈမိူင်း။

2024/03/01 မိူင်းၶႄႇၶဝ်ႈယူႇၵၢင်သေ မွၵ်ႇႁွင်ႉ တူဝ်တႅၼ်း ၸုမ်းဢူၺ်းလီသိုၵ်းပွတ်းႁွင်ႇ 3 ၸုမ်း – တပ်ႉသိုၵ်းရၶႅင်ႇ AA တပ်ႉသိုၵ်းတဢၢင်းပလွင်ႈ TNLA တပ်ႉသိုၵ်းၶႄႇၵဝ်ႈၵၢင်ႉ MNDAA ႁႂ်ႈဢုပ်ႇ ဢူဝ်း တင်းၸုမ်းသိုၵ်းမၢၼ်ႈ တီႈႁူင်းႁႅမ်းသူၼ်ႇမွၵ်ႇႁၢႆးၵိူင်ႊ ဝဵင်းၶုၼ်းမိင် ၸႄႈမိူင်းယူၼၢၼ်၊ မိူင်း ၶႄႇ။ ပၢင်ႁူပ်ႉဢုပ်ႇၵၼ် ၵမ်းထူၼ်ႈ 4 ၶၢဝ်းတၢင်း 3 ဝၼ်း (1 -3/3/2024) ။ မီးၶၢဝ်ႇဝႃႈ ဢုပ်ႇလွင်ႈ တႃႇ ပိုတ်ႇလၢၼ်ႇလႅၼ်လိၼ်၊ ၵၢၼ်ၵႃႉၶၢႆ၊ ၵၢၼ်ၽဵဝ်ႈယႃႈမဝ်းၵမ်၊ ၽဵဝ်ႈတီႉၵူၼ်းလွၵ်ႇလႅၼ် တၢင်းဢွၼ်ႊ လၢႆႊ Online ၼႆသေတႃႉ ဢမ်ႇလႆႈၶေႃႈလႆႈသဵင်သင်ၵၼ်။

2024/03/07 ၽွင်းတၢင်းမိူင်းတႆး ဢၼ်ပဵၼ် တပ်ႉသိုၵ်းတဢၢင်းပလွင်ႈ TNLA  ၊ တပ်ႉသိုၵ်းၶႄႇၵဝ်ႈ ၵၢင်ႉ MNDAA ၵိုတ်းၵၢၼ်တိုၵ်းတေႃး သိုၵ်းမၢၼ်ႈဝႆႉၼၼ်ႉ တၢင်းမိူင်းၶႄႇ တပ်ႉသိုၵ်းလွတ်ႈလႅဝ်းၶၢင် KIA တႄႇပၢင်ယၼ်ႇသိုၵ်း 0307 သေ လေႃႇတိုၵ်းသိုၵ်းမၢၼ်ႈ ႁၢဝ်ႈႁၢဝ်ႈႁႅင်းႁႅင်း။ ယၢမ်းလဵဝ် ၼႂ်းၸႄႈ မိူင်းၶၢင် ထုင်ႉၾၢႆႇဢွၵ်ႇၼမ်ႉၵဵဝ် ၵိုတ်းဝဵင်းမၢၼ်ႈမေႃႇ ဝဵင်းလဵဝ် သိုၵ်းၶၢင် ပႆႇယိုတ်းလႆႈ။

2024/03/29 ၽွင်းၸုမ်းဢူၺ်းလီသိုၵ်းပွတ်းႁွင်ႇ ၵိုတ်းယင်ႉပၢင်ယၼ်ႇသိုၵ်း 1027 ၼၼ်ႉ သိုၵ်းမၢၼ်ႈ တႄႇၶၢၼ်းႁွင်ႉၵူၼ်းၼုမ်ႇ ၶဝ်ႈႁၢပ်ႇၵၢၼ်သိုၵ်း၊ ၾိုၵ်းသွၼ်ၵၢၼ်သိုၵ်း ၸုပ်ႈၵမ်းႁႅၵ်ႈ တႄႇၵဵပ်းၵူၼ်း ၼုမ်ႇ 5,000 ၵေႃႉ ပတ်းပိုၼ်ႉတူဝ်ႈမိူင်း။ ၵူၼ်းၼုမ်ႇ ၵမ်ႈၽွင်ႈပၢႆႈယၢၼ်ဝၢၼ်ႈယၢၼ်မိူင်း။

2024/04/05 တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း KNU/KNLA တင်း ၸုမ်းသိုၵ်းၵႅတ်ႇၶႄၵူၼ်းမိူင်း PDF ႁူမ်ႈၵၼ်လေႃႇတိုၵ်း ယိုတ်းလႆႈ တပ်ႉပိဝ်ႇႁႃႇ ဢၼ်ပၵ်းတီႈ တိင်ႇၵၢၼ်းၺီႇၼွင်ႇလႄႈ သဵၼ်ႈ တၢင်း တႃႇၶဝ်ႈလေႃႇတိုၵ်း ဝဵင်းမျူႉဝတီႇ ပွင်ႇပဵဝ်ၵႂႃႇ။

2024/04/10 တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း KNU/KNLA တင်း ၸုမ်းသိုၵ်းၵႅတ်ႇၶႄ ၵူၼ်းမိူင်း PDF ၊ တပ်ႉပႂ်ႉလႅၼ်လိၼ် PGF ၵေႃႈ ၶဝ်ႈႁူမ်ႈၵၼ်လေႃႇတိုၵ်းယိုတ်းၸွမ်းလႄႈ တပ်ႉၶလယ 275 ဢၼ်ဢဝ်ႁူမ်ႇလူမ်ႈ ဝဵင်းမျႃႉဝတီႇၼၼ်ႉ လႆႈသုမ်းၵၢၼ်ႉဢွၵ်ႇပၢႆႈတပ်ႉ။ ႁႅင်းသိုၵ်းမၢၼ်ႈ 100 ပၢႆ ပၢႆႈ ၵႂႃႇမူၵ်း တႂ်ႈၶူဝ်ၶၢမ်ႈလႅၼ်လိၼ် မျႃႉဝတီႇ – မႄႈသွတ်ႇ။ သိုၵ်းယၢင်း KNU ၵေႃႈ ၶဝ်ႈယိုတ်းဝဵင်းမျႃႉဝ တီႇလႆႈလၢႆလၢႆဝၼ်း။ ဝၢႆးၼၼ်ႉ ဢမ်ႇႁိုင် တပ်ႉပႂ်ႉလႅၼ်လိၼ် PGF ပၢႆႈႁူမ်ႈၶိုၼ်းသိုၵ်းမၢၼ်ႈလႄႈ သိုၵ်းယၢင်း လႆႈထွၼ်ဢွၵ်ႇဝဵင်းမျႃႉဝတီႇၶိုၼ်း။

2024/05/14 မိူင်းၶႄႇၶဝ်ႈယူႇၵၢင်သေ မွၵ်ႇႁွင်ႉ တူဝ်တႅၼ်း ၸုမ်းသိုၵ်းမၢၼ်ႈတင်း တူဝ်တႅၼ်းၸုမ်း ဢူၺ်းလီသိုၵ်းပွတ်းႁွင်ႇ 3 ၸုမ်း – တပ်ႉသိုၵ်းရၶႅင်ႇ AA တပ်ႉသိုၵ်းတဢၢင်းပလွင်ႈ TNLA တပ်ႉသိုၵ်း ၶႄႇၵဝ်ႈၵၢင်ႉ MNDAA ႁႂ်ႈဢုပ်ႇဢူဝ်းၵၼ်တီႈႁူင်းႁႅမ်းသူၼ်ႇမွၵ်ႇႁၢႆးၵိူင်ႊ ဝဵင်းၶုၼ်းမိင် ၸႄႈမိူင်းယူ ၼၢၼ် မိူင်းၶႄႇ (14-16/05/2024) ၶၢဝ်းတၢင်းသၢမ်ဝၼ်း။ သိုၵ်းၶႄႇၵဝ်ႈၵၢင်ႉ ဢုပ်ႇဢူဝ်းပႃးလွင်ႈႁႂ်ႈ လႆႈပိုတ်ႇၶိုၼ်းၽၵ်းတူ လႅၼ်လိၼ် 3 တီႈ – တီႈဝဵင်းၼမ်ႉၽႃႈ၊ တီႈမိူင်းၵူဝ်းတင်း တီႈဝဵင်းပၢင်ႇသၢႆး။ ယွၼ်းဢဝ်ၶွၼ်ႇ 75% တေၽႄပၼ်သိုၵ်းမၢၼ်ႈ 25% ။ ၾၢႆႇသိုၵ်းမၢၼ်ႈ ဢမ်ႇၽွမ်ႉလႄႈ သွင်ၾၢႆႇ ၶဵင်ႈၶႅင် ၵၢၼ်သိုၵ်းတေႃႇၵၼ်ၶိုၼ်း။

2024/06/25 ၸုမ်းဢူၺ်းလီသိုၵ်းပွတ်းႁွင်ႇ တႄႇပၢင်ယၼ်ႇသိုၵ်း 1027 ႁွပ်ႈၵမ်းသွင်ၶိုၼ်း။ ဢၼ် လူင်ပွင်ၸိုင်ႈမိူင်းၶႄႇ ယူႇၵၢင် ႁႂ်ႈၸုမ်းဢူၺ်းလီသိုၵ်းပွတ်းႁွင်ႇတင်း ၸုမ်းသိုၵ်းမၢၼ်ႈ သွင်ၾၢႆႇၵိုတ်း တိုၵ်းၵၼ်ဝႆႉ မိူဝ်ႈႁူဝ်လိူၼ်ၵျႅၼ်ႊၼိဝ်ႊရီႊၼၼ်ႉ လူႉၵွႆ။ သိုၵ်းတဢၢင်းပလွင်ႈ TNLA တႄႇလေႃႇ တိုၵ်း ဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းလူင်၊ မိူင်းမိတ်ႈ။ သိုၵ်းၶႄႇၵဝ်ႈၵၢင်ႉ MNDAA ၵေႃႈ တႄႇ လေႃႇတိုၵ်းတပ်ႉမၢၼ်ႈ ဢၼ်ဢဝ်ႁူမ်ႇလူမ်ႈ ပၵ်းယူႇၼွၵ်ႈဝဵင်းလႃႈသဵဝ်ႈ ၸိူဝ်းၼၼ်ႉ။ ၸုမ်းသိုၵ်း ၵႅတ်ႇၶႄၵူၼ်းမိူင်း ဝဵင်းလိူဝ်ႇ MDY-PDF ဢၼ်ယူႇတႂ်ႈ လူင်ပွင်ၸိုင်ႈငဝ်း NUG ၊ တပ်ႉသိုၵ်းပူတ်းပွႆႇ ၵူၼ်းမိူင်း PLA တပ်ႉၸုမ်း 611 ၊ တပ်ႉသိုၵ်းပူတ်းပွႆႇၵူၼ်းမၢၼ်ႈ BPLA ၵေႃႈ ၶဝ်ႈႁူမ်ႈၸွမ်း။

2024/06/27 ၽွင်းၸုမ်းဢူၺ်းလီသိုၵ်းပွတ်းႁွင်ႇ တႄႇပၢင်ယၼ်ႇသိုၵ်း 1027 ႁွပ်ႈၵမ်းသွင်ၼႆႉ လူင် ပွင်ၸိုင်ႈမိူင်းၶႄႇ မွၵ်ႇႁွင်ႉ ၸွမ်ၸိုင်ႈၵဝ်ႇ ဢူးတဵင်းၸဵင်ႇ ၵႂႃႇမိူင်းၶႄႇ။ မွၵ်ႇၶဝ်ႈႁူမ်ႈပၢင်ၵုမ် မၢႆတွင်း လိၵ်ႈႁူမ်ႈမၢႆပၢင်တွင်း (ပၢင်ၵုမ် ဝဵင်းပၢင်တွင်း မိူင်းဢိၼ်ႊတူဝ်ႊၼီႊသျိူဝ်ႊ ဢၼ်မိူင်းႁိမ်းႁွမ်း တင်း မိူင်းၶႄႇ တူၵ်းလူင်းၵၼ် 5 ၶေႃႈ တႃႇယူႇႁူမ်ႈၵၼ်ၵႂႃႇ ၵတ်းၵတ်းယဵၼ်ယဵၼ်)။

2024/07/02 သိုၵ်းၶႄႇၵဝ်ႈၵၢင်ႉ MNDAA တႄႇလေႃႇတိုၵ်း ဝဵင်းလႃႈသဵဝ်ႈ။ ၶဝ်ႈထိုင်ၼႂ်းတူဝ်ဝဵင်းသေ ဝႅတ်ႉလွမ်ႉငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ ယမၶ ဢၼ်ပၵ်းၼႂ်းတူဝ်ဝဵင်းလႃႈသဵဝ်ႈ။

2024/07/10 သိုၵ်းတဢၢင်းပလွင်ႈ TNLA ယိုတ်းလႆႈဝဵင်းၼွင်ၶဵဝ်။ တပ်ႉမၢၼ်ႈ တပ်ႉၵွင်ႈလူင် မၢႆ 354 တပ်ႉ ဒတရ (ဒုံးတပ်ရင်း) ၊ တပ်ႉၶမယ 114 တင်း ၶမယ115 ၸိူဝ်းပၵ်းၼႂ်းၸႄႈဝဵင်းၼွင်ၶဵဝ် ယွမ်း ၵၢၼ်ႉဝၢင်းၶိူင်ႈ။

2024/07/18 ဝၼ်းတီႈ 18/07/2024 ယၢမ်းဝၢႆးဝၼ်း 4 မူင်းပၢႆ ၶိူင်ႈမိၼ်သိုၵ်းမၢၼ်ႈ Jet Fighter လမ်း ၼိုင်ႈ မိၼ်ဝၢႆႈ ပွႆႇမၢၵ်ႇသႂ်ႇ ၼႂ်းဝဵင်းသႅၼ်ဝီ လၢႆလၢႆၵမ်း။ မၢၵ်ႇလူင်တူၵ်းသႂ်ႇ တီႈၼွင်မူဝ်၊ ၵၢတ်ႇလူင်၊ ႁူင်းႁေႃဝဵင်း (မြို့တော်ခန်းမ)။ ၵူၼ်းမိူင်းတၢႆမၢတ်ႇ ဢမ်ႇယွမ်း 40 ၵေႃႉ။

2024/07/22 ၽူႈၼမ်းၸုမ်းသိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ ၶိုၼ်ႈႁပ်ႉပဵၼ်ၸွမ်ၸိုင်ႈ ႁင်း ၵူၺ်း၊ ပုတ်ႈတႅၼ်းဢဝ်တီႈယူႇၸွမ်ၸိုင်ႈ (ၸူဝ်ႈၶၢဝ်း) ဢူးမျိၼ်ႉသူၺ်ႇ၊ ယွၼ်ႉဝႃႈ ပၢႆးယူႇလီဢမ်ႇတဵမ် ထူၼ်ႈ ဝႃႈၼႆ။

2024/07/24 ပၢင်ယၼ်ႇသိုၵ်း 1027 ႁွပ်ႈၵမ်းသွင် ၶွပ်ႈတဵမ်လိူၼ် သိုၵ်းတဢၢင်းပလွင်ႈ TNLA ပိုၼ် ၽၢဝ်ႇဝႃႈ ယိုတ်းလႆႈဝဵင်းမိူင်းၵုတ်ႈ။ တပ်ႉမၢၼ်ႈ ဢၼ်ပၵ်းၼႂ်းၸႄႈဝဵင်းမိူင်းၵုတ်ႈ ဝၢင်းၶိူင်ႈမူတ်း။ ၵူၼ်းမိူင်း ၸိူဝ်းသၢၼ်ၶတ်းသိုၵ်းမၢၼ်ႈ မူၵ်းယူႇၸွမ်းထိူၼ်ႇၸိူဝ်းၼၼ်ႉ လႆႈပွၵ်ႈၶိုၼ်းႁိူၼ်း။

2024/07/31 ပၢင်ယၼ်ႇသိုၵ်း 1027 ႁွပ်ႈၵမ်းသွင် ၶွပ်ႈတဵမ်လိူၼ် သိုၵ်းတဢၢင်းပလွင်ႈ TNLA ပိုၼ် ၽၢဝ်ႇယိုတ်းလႆႈ ဝဵင်းမိူင်းမိတ်ႈ။ မိူဝ်ႈလိူၼ်ၵျႅၼ်ႊၼိဝ်ႊရီႊ 13 ၼၼ်ႉ တပ်ႉသိုၵ်းၶၢင် KIA တၼ်း ယိုတ်းလႆႈ ဝဵင်းမိူင်းမိတ်ႈ ၶၢဝ်းတၢင်းလိူၼ်ပၢႆ။ ဝၢႆးၼၼ်ႉ လႆႈထွၼ်ဢွၵ်ႇပၼ်ၶိုၼ်း။

2024/08/03 ပၢင်ယၼ်ႇသိုၵ်း 1027 ႁွပ်ႈၵမ်းသွင် သိုၵ်းၶႄႇၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ယိုတ်း လႆႈ ဝဵင်းလႃႈသဵဝ်ႈတင်းပိုၵ်း။ သိုၵ်းမၢၼ်ႈ ၼပ်ႉႁဵင် ၼႂ်းတပ်ႉငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ယမၶ ဢၼ်ပၵ်းတီႈဝဵင်းလႃႈသဵဝ်ႈၼၼ်ႉ ယွမ်းသိုၵ်းဝၢင်းၶိူင်ႈၵွင်ႈၵၢင်ႇ တင်းမူတ်း။ သိုၵ်းဝႃႉ UWSA တင်း သိုၵ်း SSPP ႁပ်ႉၸွႆႈသိုၵ်းမၢၼ်ႈ ဢဝ်သူင်ႇပွၵ်ႈ တၢင်းမိူင်းယႆ။

2024/08/05 ၶိူင်ႈမိၼ် ၸုမ်းသိုၵ်းမၢၼ်ႈ မိၼ်ဝၢႆႇ ပွႆႇမၢၵ်ႇသႂ်ႇ ၼႂ်းဝဵင်းၵူတ်ႉၶၢႆ 7 လုၵ်ႈ ၾႆးမႆႈၵၢတ်ႇ ဝဵင်း ၵူတ်ႉၶၢႆ ပဵၼ်ၽဝ်ၵႂႃႇ 400 ႁၢၼ်ႉၶၢႆ သုမ်းၶၼ်ငိုၼ်း ၼပ်ႉႁူဝ်မိုၼ်ႇသႅၼ်ပျႃး။ ယွၼ်ႉမၢၵ်ႇလူင်သိုၵ်း မၢၼ်ႈသေ ၵူၼ်းမိူင်းတၢႆ 6 ၵေႃႉ မၢတ်ႇၸဵပ်းႁၢဝ်ႈႁႅင်း 3 ၵေႃႉ။

2024/08/06 ပၢင်ယၼ်ႇသိုၵ်း 1027 ႁွပ်ႈၵမ်းသွင်ၶိုၼ်း ၶၢဝ်းတၢင်း 40 ဝၼ်း သိုၵ်းတဢၢင်းပလွင်ႈ TNLA ပိုၼ်ၽၢဝ်ႇဝႃႈ ယိုတ်းလႆႈဝဵင်းၵျွၵ်ႉမႄး။ တပ်ႉမၢၼ်ႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 1 ၵျွၵ်ႉမႄးတပ်ႉ ၶမယ 501 တင်း ၶမယ 502 ယွမ်းၵၢၼ်ႉဝၢင်းၶိူင်ႈ။

2024/08/11 ပၢင်ယၼ်ႇသိုၵ်း 1027 ႁွပ်ႈၵမ်းသွင် ၼႂ်းဝၼ်းတီႈ 10 – 11/08/2024 ၶၢဝ်းတၢင်းသွင် ဝၼ်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းဝဵင်းၵျွၵ်ႉမႄး ၵူၼ်းမိူင်းလႆႈလူႉတၢႆ 13 ၵေႃႉ။ ၼႂ်းၼၼ်ႉ ပႃးသင်ၶၸဝ်ႈ 1 တူၼ်၊ ၸဝ်ႈၶၢဝ် 1 တူၼ်၊ လုၵ်ႈဢွၼ်ႇတႂ်ႈ 10 ၶူပ်ႇ 2 ၵေႃႉ။ ႁူမ်ႈၵူၼ်းၸၢႆး 7 ၵေႃႉ၊ ၼၢင်းယိင်း 6 ၵေႃႉ လႆႈလူႉတၢႆ။

2024/08/14 ၸွမ်ၽွင်းလူင် ၾၢႆႇၼွၵ်ႈမိူင်း မိူင်းၶႄႇ မိတ်ႉသ်တိူဝ်ႊ ဝမ်ယီႉ ႁွတ်ႈထိုင်မိူင်းမၢၼ်ႈသေ ႁူပ်ႉထူပ်း မိၼ်းဢွင်ႇလၢႆႇ ၽူႈၼမ်းၸုမ်းသိုၵ်းမၢၼ်ႈ ယိုတ်းဢႃႇၼႃႇ။ မွၵ်ႇလၢတ်ႈဝႃႈ ပၢင်ယၼ်ႇသိုၵ်း တၢင်းပွတ်းႁွင်ႇ ၶဝ်ဢမ်ႇလႆႈႁူႉၸွမ်း။ တေသိုပ်ႇပၼ်ႁႅင်း ၸုမ်းသိုၵ်းမၢၼ်ႈ ၸတ်းပၢင်လိူၵ်ႈတင်ႈသေ တိုၵ်းသူၼ်းႁႂ်ႈပႂ်ႉပႃး ၵူၼ်းၶႄႇလႄႈ ပၢႆးမၢၵ်ႈမီးၶႄႇ။

2024/08/16 ၸွမ်ၽွင်းလူင် ၾၢႆႇၼွၵ်ႈမိူင်း မိူင်းၶႄႇ မိတ်ႉသ်တိူဝ်ႊ ဝမ်ယီႉ ႁွတ်ႈထိုင်ၵဵင်းမႂ်ႇ မိူင်းထႆး သေ ၶဝ်ႈႁူမ်ႈပၢင်ၵုမ်လူင် သၢပ်ႇၼမ်ႉမႄႈၶွင် – လၢၼ်ႇၶျၢၼ်း။ မွၵ်ႇလၢတ်ႈၶေႃႈၵမ်မၼ်ႈ ဢၼ်ၵဵဝ်ႇ ၵပ်း မိူင်းမၢၼ်ႈ 3 ၶေႃႈ – လူၺ်ႈဝၢၼ်ႈမိူင်း မိူင်းမၢၼ်ႈ ဢမ်ႇၼိမ်သဝ်းၼႆသေတႃႉၵေႃႈ တေဢမ်ႇပၼ် ႁႅင်း ႁႂ်ႈၼႂ်းမိူင်းမၢၼ်ႈ ပဵၼ်သိုၵ်းၵၢင်မိူင်း၊ ပၼ်ႁႃမိူင်းမၢၼ်ႈၼႆႉ တိုၼ်းဝႄႈဢမ်ႇလွတ်ႈလႆႈ ၼႂ်းတူင်ႇ ဝူင်း ၸိုင်ႈမိူင်းဢႃႊသီႊယၼ်ႊ သဵၼ်ႈတၢင်းဢၼ်ဢႃႊသီႊယၼ်ႊ တမ်းဝၢင်းဝႆႉ၊ လိူဝ်ၼၼ်ႉၵေႃႈ တေ ဢမ်ႇပၼ် ၵူၼ်းၼွၵ်ႈမိူင်း မိူင်းလႂ် ၶဝ်ႈၶူၼ်းၵႅဝ်ၸွမ်းပၼ်ႁႃ ဢၼ်ပဵၼ်ယူႇၼႂ်းမိူင်းမၢၼ်ႈ။

2024/08/27 ၽူႈမီးပုၼ်ႈၽွင်း လူင်ပွင်ၸိုင်ႈမိူင်းၶႄႇတင်း တူဝ်တႅၼ်း ၽူႈဢွၼ်ႁူဝ် ၸုမ်းသိုၵ်းဝႃႉ ႁူပ်ႉၵၼ်တီႈ ႁူင်းႁႅမ်းႁူၺ်ႉၵျုၼ်း ဝဵင်းၽူးဢႃႊ ၸႄႈမိူင်းယုၼ်ၼၢၼ်။ ၾၢႆႇၶႄႇ 9 ၵေႃႉ တဵင်ႉသျီႇ ၵျုၼ်ႊ ဢွၼ်ႁူဝ်၊ ၾၢႆႇဝႃႉ UWSA ၶိုၼ်ႈႁွတ်ႈ 3 ၵေႃႉ။ ၵျၢဝ်ၵေႃႇဢၢင်း ၵႅမ်ႁူဝ်ပဝ်ႈဝႃႉ ဢွၼ်ႁူဝ်။ ၼႂ်း ၼၼ်ႉ ပႃးၵူၼ်းၼုမ်ႇၵေႃႉၼိုင်ႈ ၸိုဝ်ႈပဝ်းဢၢႆႈၶမ်း (လုၵ်ႈၸၢႆး ပဝ်းယဵဝ်သျႅင် ႁူဝ်ႈပဝ်ႈ ၸုမ်းသိုၵ်းဝႃႉ)။ ၶေႃႈဢုပ်ႇဢူဝ်းတင်းသဵင်ႈ မၢတ်ႈမၢႆဝႆႉၾၢႆႇၶႄႇ ပဵၼ်ပဵၼ်လိၵ်ႈမၢၼ်ႈ မီး 32 ၼႃႈ (ႁူဝ်ႈဢွၵ်ႇၼိူဝ်ၼႅင်ႈ သၢၼ် ဢွၼ်ႊလၢႆႊ ၽွင်းၵၢင်လိူၼ် သႅပ်ႊသႅမ်ႊပိူဝ်ႊ)။ ၼႂ်းၶေႃႈ ဢုပ်ႇထၢမ်ၵၼ် ပႃးလွင်ႈပၢင်တိုၵ်း ၼႂ်းမိူင်းတႆးပွတ်းႁွင်ႇ ပႃးလွင်ႈႁၢမ်ႈႁႄႉ ယႃႇႁႂ်ႈသူင်ႇမၢၵ်ႇမိုဝ်ႉၸိုၼ်းယၢမ်း ၵမ်ႉၸွႆႈ ၸုမ်းယိပ်းၵွင်ႈ ၵၢင်ႇလုၵ်ႈၽိုၼ်ႉ ၼႂ်းမိူင်းမၢၼ်ႈ။

2024/09/05 ပၢင်ယၼ်ႇသိုၵ်း 1027 ႁွပ်ႈၵမ်းသွင် ၽွင်းသိုၵ်းၶႄႇၵဝ်ႈၵၢင်ႉ ႁၢင်ႈႁႅၼ်းသိုၵ်း ၶိုင်ယိုတ်း သဵၼ်ႈတၢင်း မိူင်းယႆ – သီႇပေႃႉ ဢၼ်လတ်းတၢင်းသႅင်ၵႅဝ်ႉၼၼ်ႉ တပ်ႉသိုၵ်းၵူၼ်းမိူင်း သႅင်ၵႅဝ်ႉ ၸွမ် ႁၢၼ်လွႆမၢဝ်း (ႁူဝ်ပဝ်ႈၵဝ်ႇ SSPP ဢၼ်ဢွၼ်တပ်ႉၸုမ်း 3 မိူင်းၶိူဝ်း၊ တပ်ႉငဝ်ႈငုၼ်းသႅင်ၵႅဝ်ႉလႄႈ တပ်ႉၸုမ်း 7 ၵႃလီႉ လႅၵ်ႈပဵၼ်ပျီႇတူႉၸိတ်ႉ မိူဝ်ႈပီ 2010) ဢွၼ်ႁႅင်းသိုၵ်း ႁိမ်းႁဵင်ပွၵ်ႈႁူမ်ႈၶိုၼ်း တပ်ႉ သိုၵ်းၸိုင်ႈတႆး SSA ငဝ်ႈငုၼ်းဝၢၼ်ႈႁႆး။ ၽွင်းပၢင်တိုၵ်း ၵိူတ်ႇၶိုၼ်ႈၼႂ်းမိူင်းတႆးပွတ်းႁွင်ႇ ႁၢဝ်ႈႁႅင်း ၼၼ်ႉ သိုၵ်းရၶႅင်ႇ AA လေႃႇတိုၵ်း တပ်ႉၶိုၵ်ႉတွၼ်း ၵုမ်းၵမ်ၽႅၼ်ၵၢၼ်ယၼ်ႇသိုၵ်းၼႃႈၼမ်ႉတပ်ႉ ပၢင်သဝ်း (တပ်ႉၼမ်ႉ) မွင်ႇသူၺ်ႇလေး ဢၼ်ပၵ်းၼိူဝ်ၼႃႈ ၼမ်ႉပၢင်ႇလၢႆ ၸႄႈဝဵင်းတၢၼ်ႇတွႆး။

2024/09/20 သိုၵ်းတဢၢင်းပလွင်ႈ TNLA ပိုၼ်ၽၢဝ်ႇ တႄႇၵၢၼ်ၽွင်းငမ်းသေ တႄႇၵဵပ်းၶွၼ်ႇၼႂ်း ၸႄႈဝဵင်းမိူင်းၵုတ်ႈတင်း မိူင်းမိတ်ႈ။ ၵူၼ်းမိူင်း ၼႂ်းမိူင်းၵုတ်ႈ တၵ်းလႆႈသႂ်ႇၶွၼ်ႇႁႆႈ၊ ၶွၼ်ႇၼႃး၊ ၶွၼ်ႇ ႁိူၼ်း၊ ၶွၼ်ႇႁၢၼ်ႉၵႃႉ တၢင်းၶၢႆ ပႃးၸဵမ်ၶွၼ်ႇလူတ်ႉ၊ ၶွၼ်ႇၵႃး။ ၵူၼ်းမိူင်းမိတ်ႈၵေႃႈ တေႃႈၼင်ႇၼၼ်။ လိူဝ်ၼၼ်ႉ ၶွမ်ႊပၼီႊၶုတ်းၶမ်း၊ သေးၶမ်း ၼႂ်းၸႄႈဝဵင်းမိူင်းမိတ်ႈၵေႃႈ တၵ်းလႆႈသႂ်ႇၶွၼ်ႇ တင်းသဵင်ႈ တႃႇၼိုင်ႈပီ ယႃႇႁႂ်ႈယွမ်းၶမ်း 10 ၸွႆႉ။ မိူင်သေးၶမ်း 1 မိူင် တၵ်းလႆႈသႂ်ႇၶမ်း 1 ၶၼ် (သိပ်းၵျၢပ်ႈတေႃႇပီ) ။

2024/09/23 ဝၼ်းတီႈ 23/09/2024 ယၢမ်းဝၢႆးဝၼ်းမွၵ်ႈ 3 မူင်းၶိုင်ႈၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇ သႂ်ႇ တီႈဝၢၼ်ႈလီႉသေႃး ႁိမ်းဝၢၼ်ႈၼႃးလွႆ ဝဵင်းသီႇပေႃႉ တူၵ်းတႅၵ်ႇသႂ်ႇႁိူၼ်းၵူၼ်းမိူင်း ၵမ်းသိုဝ်ႈ။ ၸၢၵ်ႇမၢၵ်ႇတိူဝ်ႉသႂ်ႇ ၼၢႆးလၢၼ် 4 ၵေႃႉ တၢႆထင်တီႈ၊ ႁိူၼ်းယေးၵေႃႈ လူႉၵွႆၵႂႃႇ 7 လင်။

2024/10/04 ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇလူင်သႂ်ႇ ၵျွင်းၽြႃးၶႄႇ (လားရှိုး တရုတ်ဘုံကျောင်း) ဢၼ် မီးၼႂ်းပွၵ်ႉႁႃႈ ဝဵင်းလႃႈသဵဝ်ႈ။ ၵျွင်းၽြႃးၶႄႇ လႃႈသဵဝ်ႈၼႆႉ ၵေႃႇတင်ႈၵိုၵ်းတီႈဢႅဝ်ႇယဵမ်ႈ ဝဵင်းလႃႈသဵဝ်ႈ မႃး 100 ပီပၢႆ ၊ ၺႃးမၢၵ်ႇလူင်သိုၵ်းမၢၼ်ႈလႄႈ လူႉၵွႆသဵင်ႈ။

2024/10/10 သိုၵ်းၶႄႇၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ တႃႇၵႅတ်ႇၵင်ႈသုၼ်ႇလႆႈပႃႇတီႇ/ တပ်ႉသိုၵ်း ၼၼ်ႉ ၵူၼ်းသိုၵ်းၵူႈၸၼ်ႉထၢၼ်ႈတင်းသဵင်ႈ တေဢမ်ႇလႆႈ ၵပ်းသိုပ်ႇတိတ်းတေႃႇ တၢင်းၼွၵ်ႈမိူင်း လႃးလႃး။ လူင်ပွင်ၸိုင်ႈငဝ်း NUG ၵေႃႈ တေဢမ်ႇလႆႈၵွင်ႉၵၢႆႇသေဢိတ်း ဝႃႈၼႆ။

2024/10/14 သိုၵ်းတဢၢင်းပလွင်ႈ TNLA ပိုၼ်ၽၢဝ်ႇဝႃႈ ယိုတ်းလႆႈဝဵင်းသီႇပေႃႉ။ တပ်ႉမၢၼ်ႈ ၶလယ 23 ၊ ၶမယ 503 တင်း 504 ၵေႃႈ ယွမ်းၵၢၼ်ႉဝၢင်းၶိူင်ႈမူတ်း ဝႃႈၼႆ။

2024/10/27 ပၢင်ယၼ်ႇသိုၵ်း 1027 – ဢၼ်သိုၵ်းဢူၺ်းလီ 3 ၸုမ်း TNLA, MNDAA, AA တႄႇလေႃႇ တိုၵ်းပိုတ်းယိုဝ်းသိုၵ်းမၢၼ်ႈ တၢင်းမိူင်းတႆးပွတ်းႁွင်ႇ ၶွပ်ႈတဵမ်ပီၼၼ်ႉ ၸုမ်းတူင်ႉၼိုင် သုၼ်ႇလႆႈ သုၼ်ႇပဵၼ်ၵူၼ်း HRAN Human Rights Action Network ၵဵပ်းၶေႃႈမုလ်းသေ ပိုၼ်ၽၢဝ်ႇဝႆႉဝႃႈ ၵူၼ်း မိူင်းမၢတ်ႇၸဵပ်းလူႉတၢႆ ယွၼ်ႉပၢင်တိုၵ်းမီးႁဵင်ပၢႆ။ သိုၵ်းမၢၼ်ႈ ဢဝ်ၶိူင်ႈမိၼ် မိူဝ်းပွႆႇမၢၵ်ႇလႄႈ ႁိူၼ်း ယေး၊ ဝတ်ႉၵျွင်း၊ ႁူင်းႁဵၼ်း၊ ႁူင်းယႃ တုမ်ႉတိူဝ်ႉလူႉၵွႆ ဢၢၼ်ႇႁူဝ်ႁဵင်လင် ဝႃႈၼႆ။

2024/10/28 ၽွင်းသိုၵ်းၶၢင်လႄႈ ၸုမ်းဢူၺ်းလီသိုၵ်းပွတ်းႁွင်ႇ မႄႇၶႂၢၵ်ႈ ၵုမ်းၵမ်ပိုၼ်ႉတီႈၼၼ်ႉ

တပ်ႉသိုၵ်း ၸိူဝ်ႉၸၢတ်ႈတႆးလႅင် SNA ႁႅင်းသိုၵ်း 100 ပၢႆ ၼႄဢဵၼ်ႁႅင်း ၼႂ်းဝဵင်းမိူင်းယၢင်း ၸႄႈမိူင်း ၶၢင်။ ယိူင်းဢၢၼ်းတႃႇႁႂ်ႈလႆႈႁူႉဝႃႈ တီႈလိၼ်ပီႈၼွင်ႉတႆးလႅင် ယူႇမႃးၸဵမ်ၵွၼ်ႇ ပူႇမွၼ်ႇၼၢႆးယႃႈ ၼၼ်ႉ ပီႈၼွင်ႉတႆးလႅင် တေသိုပ်ႇယူႇသဝ်းၵႂႃႇထႅင်ႈ ဝႃႈၼႆ။

2024/10/31 ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉ မီးၶၢဝ်ႇႁူဝ်ႈဢွၵ်ႇမႃးဝႃႈၽူႈၼမ်း သိုၵ်းၵဝ်ႈၵၢင်ႉ MNDAA ၽိူင်တႃႉသျႂင် ၺႃးလူင်ပွင်ၸိုင်ႈမိူင်းၶႄႇ ၵၵ်းၶင်တူဝ်ဝႆႉ။ ၽွင်းၵႂႃႇယူတ်းယႃတူဝ်။ ဢိင်ၼိူဝ်ၶၢဝ်ႇႁူဝ်ႈ လိုဝ်းသေ လူင်ပွင်ၸိုင်ႈၶႄႇ သပ်းၸႅင်ႈၶၢဝ်ႇဝႃႈ ဢမ်ႇလႆႈၵၵ်းၶင် မၼ်းၸၢႆး ယူတ်းယႃတူဝ်ယူႇဝႆႉတီႈ မိူင်းၶႄႇၵူၺ်း ဝႃႈၼႆ။ ၽွင်းၼင်ႇၼၼ် သိုၵ်းၶႄႇၵဝ်ႈၵၢင်ႉ တႄႇၵၢၼ်ၽွင်းငမ်း ၼႂ်းၸႄႈဝဵင်းလႃႈ သဵဝ်ႈဝႆႉယူႇသေ ဢွၵ်ႇၶၢဝ်ႇဝႃႈ တိုၼ်းတေဢမ်ႇထွၼ်ဢွၵ်ႇဝဵင်းလႃႈသဵဝ်ႈ ဝႃႈၼႆ။

2024/11/05 ၶႄႇမွၵ်ႇႁွင်ႉ ၽူႈၼမ်းၸုမ်းသိုၵ်းမၢၼ်ႈယိုတ်းဢႃႇၼႃႇ ၸွမ်သိုၵ်းလူင်မိၼ်းဢွင်ႇလၢႆႇ ၵႂႃႇၶဝ်ႈႁူမ်ႈ ပၢင်ၵုမ်ၸိုင်ႈမိူင်းသၢပ်ႇၼမ်ႉမႄႈၶွင် ဢၼ်မိူင်းၶႄႇ ဢွၼ်ၼမ်းၸတ်းႁဵတ်း။ တင်ႈတႄႇ ယိုတ်းဢႃႇၼႃႇမႃး ၸဵမ်မိူဝ်ႈပီ 2021 လႆႈဝႃႈပဵၼ် ၶၢဝ်းတၢင်းပွၵ်ႈႁႅၵ်ႈ ဢၼ်မိၼ်းဢွင်ႇလၢႆႇ ၵႂႃႇၶိုၼ်ႈ ပၢင်ၵုမ်တီႈမိူင်းၶႄႇ။

2024/11/06 သိုၵ်းတဢၢင်းပလွင်ႈ TNLA ဢၼ်ယိုတ်းဝႆႉ ဝဵင်းမိူင်းၵုတ်ႈၼၼ်ႉ ပိုၼ်ၽၢဝ်ႇ ထိုင်ၶွမ်ႊပ ၼီႊဢွၼ်ႇ ၶုတ်းသႅင် တင်းလၢႆဝႃႈ ပိူဝ်ႈတႃႇၵႄႈပၼ်ႁႃတၢင်းယၢပ်ႇ ပၢၵ်ႇတွင်ႉႁွင်ႈသႆႈသေ တေတႄႇ ပၼ်ၶုတ်းသႅင်ၵႂႃႇ။ ၶွမ်ႊပၼီႊယႂ်ႇတႄႉ တေပႆႇပၼ်ၶုတ်း ဝႃႈၼႆ။

2024/11/18 သိုၵ်းထႆးတင်း တူဝ်တႅၼ်း ၸုမ်းသိုၵ်းဝႃႉ UWSA ပွတ်းၸၢၼ်း ႁူပ်ႉထူပ်းဢုပ်ႇဢူဝ်းၵၼ် ၼႂ်းၸႄႈတွၼ်ႈၵဵင်းမႂ်ႇ တီႈၼိုင်ႈ။ ၾၢႆႇထႆးၸီႉသင်ႇဝႃႈ ႁႂ်ႈသိုၵ်းဝႃႉ ထွႆထွၼ်တပ်ႉ ဢၼ်ပူၼ်ႉပႅၼ် ၶဝ်ႈ ပၵ်းၼႂ်းလိၼ်ထႆး 9 တီႈ။ သိုၵ်းဝႃႉ ဢမ်ႇယွၼ်းထွႆ ၸႂ်ႉႁႂ်ႈဢုပ်ႇၵၼ်တင်း မိူင်းတေႃႇမိူင်း (မိူင်းထႆး -မိူင်း မၢၼ်ႈ)။

2024/11/25 တပ်ႉသိုၵ်းတဢၢင်း ပလွင်ႈ TNLA ပိုၼ်ၽၢဝ်ႇဝႃႈ တူဝ်ႈတၼ်း တႃႇဢုပ်ႇဢူဝ်း ၵႄႈလိတ်ႈ ပၼ်ႁႃ ၵၢၼ်မိူင်း/ၵၢၼ်သိုၵ်း ၸွမ်းၸုမ်းသိုၵ်းမၢၼ်ႈ။ ၼႄၼမ်ႉၸႂ်ဝႃႈ ဝႆႉၼၵ်းၼိူဝ် ၵၢင်ၸႂ်မိူင်းၶႄႇ ၶႂ်ႈ ႁႂ်ႈသၢပ်ႇၼမ်ႉလႅၼ်လိၼ် ၵတ်းယဵၼ်ၼိမ်သဝ်း။

2024/11/27 မိတ်ႉသ်တိူဝ်ႊ Karim Khan ၸွမ်ၽူႈတၢင်လၢတ်ႈ လုမ်းတြႃးၵူႈမိူင်းမိူင်း တၢင်ႇယိုၼ်ႈ လိၵ်ႈၸူးၽူႈတတ်းသိၼ်တြႃး လုမ်းတြႃးၵူႈမိူင်းမိူင်း ICC ႁႂ်ႈတႅပ်းတတ်းတြႃးပိုၼ်ၽၢဝ်ႇတီႉၺွပ်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢၼ်ၸီႉသင်ႇၶႃႈႁႅမ် လိုပ်ႈလမ်း ၵူၼ်းၶိူဝ်းရူဝ်ႊႁိၼ်ၵျႃႊ လၢၼ်ႉပၢႆ လႆႈပၢႆႈၵႂႃႇ ပိုင်ႈႁူမ်ႈ ၼႂ်းပၢင်သဝ်းၵူၼ်းပၢႆႈၽေး မိူင်းပင်းၵြႃးတျဵတ်ႉသ်။

2024/11/30 ၶမ်ႈၶိုၼ်း ႁပ်ႉတွၼ်ႈပီမႂ်ႇတႆး 2119 ၼီႈၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇဝိႁၢရ်လွႆပဝ်း ပွၵ်ႉထူင်းၽူဝ်ႇ ဝဵင်းၵျွၵ်ႉမႄး။ ၵူၼ်းဝၢၼ်ႈလႄႈ ၸဝ်ႈၼၢႆးၶၢဝ် 10 ၵေႃႉ လႆႈလူႉတၢႆ၊ မၢတ်ႇၸဵပ်း 20 ၵေႃႉပၢႆ။

2024/12/03 ဝၢႆးမီးၶၢဝ်ႇဝႃႈ မိူင်းၶႄႇၵုမ်းၶင် ၽူႈၼမ်းသိုၵ်းၵဝ်ႈၵၢင်ႉမႃးယဝ်ႉ မွၵ်ႈ 1 လိူၼ် သိုၵ်းၶႄႇ ၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ တူဝ်တႅၼ်း တႃႇဢုပ်ႇဢူဝ်းတင်း ၸုမ်းသိုၵ်းမၢၼ်ႈ။ ပိုၼ်ၽၢဝ်ႇပႃး ဝႃႈ သိုၵ်း MNDAA ထိုင်တီႈလႂ် တေပၵ်းသဝ်းဝႆႉ၊ ၵူၺ်းၵႃႈ တေဢမ်ႇပိုတ်းယိုဝ်း တင်းသိုၵ်းမၢၼ်ႈၼႆ သေတႃႉ တေတိုဝ်းၵမ် ပိူင်ၵႅတ်ႇၶႄတူဝ်ၵႂႃႇ။ သိုၵ်းတဢၢင်းပလွင်ႈၵေႃႈ ပိုၼ်ၽၢဝ်ႇဝႆႉၸိူင်ႉၼၼ်မိူၼ် ၵၼ်။

2024/12/10 ၶၢဝ်းတၢင်း 10 ဝၼ်း လူင်ပွင်ၸိုင်ႈမိူင်းၶႄႇ သူင်ႇတူဝ်တႅၼ်း မွၵ်ႇႁူပ်ႉၸုမ်းသိုၵ်းၶၢင် KIA သိုၵ်းရၶႅင်ႇ AA သိုၵ်းတဢၢင်းပလွင်ႈ TNLA တင်းသိုၵ်းၶႄႇၵဝ်ႈၵၢင်ႉ MNDAA။ ၾၢႆႇၼိုင်ႈပိုၼ်ၽၢဝ်ႇ ပၢၵ်ႇလၢတ်ႈဝႃႈ တၵ်းတေလႆႈၵိုတ်းသိုၵ်း ၸွမ်းသၢပ်ႇၼမ်ႉလႅၼ်လိၼ်မိူင်းၶႄႇ၊ တေၵမ်ႉထႅမ်သိုၵ်း မၢၼ်ႈ ႁႂ်ႈပဵၼ်ပၢင်လိူၵ်ႈတင်ႈၵႂႃႇ ၸဵမ်ၸိူဝ်းၼႆႉ။ ဢၼ်ႁူပ်ႉထူပ်းသိုၵ်းၶၢင်ၼၼ်ႉ ၵေႃႉပဵၼ်ႁူဝ်ပဝ်ႈ ဢၼ်ပၢၼ်းလ ၵေႃႉၵႂႃႇႁူပ်ႉထူပ်းသေ ၶႄႇၽွမ်ႉပိုတ်ႇပၼ်ၶိုၼ်း လၢၼ်ႇလႅၼ်လိၼ် တီႈဢၼ် သိုၵ်း ၶၢင် ၵုမ်းၵမ်ဝႆႉ ၸိူဝ်းၼၼ်ႉသဵင်ႈသဵင်ႈ။

2024/12/15  လူင်ပွင်ၸိုင်ႈမိူင်းၶႄႇ ၶဝ်ႈၵႄႈယူႇၵၢင်သေ မွၵ်ႇႁွင်ႉတူဝ်တႅၼ်း ၸုမ်းသိုၵ်းမၢၼ်ႈ တင်း တူဝ်တႅၼ်းတပ်ႉသိုၵ်းၶႄႇၵဝ်ႈၵၢင်ႉ MNDAA ႁူပ်ႉထူပ်းဢုပ်ႇဢူဝ်းၵၼ် တီႈမိူင်းၶႄႇထႅင်ႈ ၵမ်းထူၼ်ႈ 6 ။ လူင်ပွင်ၸိုင်ႈၶႄႇၼႆႉ ၾၢႆႇၼိုင်ႈၵေႃႈ ဝၼ်းတီႈ 1/12/2024  ႁူပ်ႉဢုပ်ႇ ၽူႈမီးပုၼ်ႈ ၽွၼ်းသိုၵ်းရၶႅင်ႇ AA ဝၼ်းတီႈ 8/12/2024  ႁူပ်ႉဢုပ်ႇ ၽူႈမီးပုၼ်ႈၽွၼ်း သိုၵ်းတဢၢင်းပလွင်ႈ TNLA ဝၼ်းတီႈ 11/12/2024  ႁူပ်ႉဢုပ်ႇၽူႈမီးပုၼ်ႈၽွၼ်းသိုၵ်းၶၢင် KIA ။ ၸိူင်ႉၼၼ်ၼင်ႇၵဝ်ႇ ဝၼ်းတီႈ 3/12/2024  ၼၼ်ႉၵေႃႈ ႁူပ်ႉဢုပ်ႇၽူႈမီးပုၼ်ႈၽွၼ်းၸုမ်းသိုၵ်းဝႃႉ UWSA ။

2024/12/19 ဢိင်ၼိူဝ် ၸုမ်းသိုၵ်းမၢၼ်ႈယိုတ်းဢႃႇၼႃႇ ၵူၼ်းမိူင်းလုၵ်ႉႁိုၼ်ႇသၢၼ်ၶတ်း ပၢင်တိုၵ်း ၵိူတ်ႇၶိုၼ်ႈ ၶႂ်ႈဝႃႈၵူႈၸႄႈမိူင်း ၼႂ်းမိူင်းမၢၼ်ႈလႄႈ ပိူဝ်ႈတႃႇႁႃတၢင်းဢွၵ်ႇၸွႆႈၼၼ်ႉ မိူင်းထႆးႁပ်ႉႁဵတ်း ၸဝ်ႈတႃႇၼသေ မွၵ်ႇႁွင်ႉၽူႈၼမ်းမိူင်းၶႄႇ၊ မိူင်းၵြႃး၊ မိူင်းလၢဝ်းတင်း မိူင်းပင်းၵြႃးတဵတ်ႉသျ် မႃးၶဝ်ႈ ႁူမ်ႈ။ ၸတ်းႁဵတ်းၵႂႃႇၶၢဝ်းတၢင်း 2 ဝၼ်း 19-20/12/2024 ။ ပၢင်ဝၼ်းႁႅၵ်ႈၼၼ်ႉ ၸုမ်းသိုၵ်းမၢၼ်ႈ ယိုတ်းဢႃႇၼႃႇၵေႃႈ သူင်ႇတူဝ်တႅၼ်း ၶဝ်ႈႁူမ်ႈၸွမ်း။

2024/12/20 ဝၢႆးမီးၶၢဝ်ႇဝႃႈ သိုၵ်းရၶႅင်ႇ AA လေႃႇတိုၵ်းယိုတ်းလႆႈ တပ်ႉငဝ်ႈငုၼ်းတိူင်းသိုၵ်းဝၼ်း တူၵ်းၼပၶ ဢၼ်ပၵ်းတီႈဝဵင်းမိူင်းဢၢမ်း၊ ၵႅမ်ၽူႈၵွၼ်းတိူင်းသိုၵ်းလႄႈ ၽူႈမီးၸၼ်ႉသႅၼ်း ၵႅမ်ၸွမ် ႁၢၼ် 3 ၵေႃႉတင်း ၵေႃႉသိုၵ်း ၵေႃႉႁၢၼ် ၼပ်ႉႁူဝ်ပၢၵ်ႇ လႆႈဝၢင်းၶိူင်ႈ။ ၼႂ်းၸႄႈမိူင်းရၶႅင်ႇမီး 17 ၸႄႈ ဝဵင်းၼၼ်ႉ ၼွၵ်ႈသေ ဝဵင်းၸိတ်ႉတူၺ်ႇ၊ ဝဵင်းမၢၼ်ႇဢွင်ႇတင်း ဝဵင်းၵျွၵ်ႉၽိဝ်ႇ သိုၵ်းရၶႅင်ႇယိုတ်းလႆႈ 15 ၸႄႈဝဵင်း (ပႃးၸႄႈဝဵင်းပလႅတ်ႉဝႃႉ မိူင်းၶျၢင်း)။

2024/12/30 ၵေႃႇသိုဝ်ႇၶၢဝ်ႇ BNI : Burma News International ဢွၵ်ႇၽိုၼ်ႁၢႆးငၢၼ်းဝႃႈ ပတ်းပိုၼ်ႉ မိူင်းမၢၼ်ႈ ဢၼ်မီး 330 ၸႄႈဝဵင်းၼၼ်ႉ ၸုမ်းသိုၵ်းလုၵ်ႉၽိုၼ်ႉ ယိုတ်းလႆႈ 89 ဝဵင်း။ ပၢႆးမၢၵ်ႈမီးၶႄႇ 11 တီႈ ဢၼ်ၶဝ်ႈပၵ်းၼႂ်းမိူင်းရၶႅင်ႇၼၼ်ႉၵေႃႈ သိုၵ်းရၶႅင်ႇ ၵုမ်းၵမ်ၵႅတ်ႇၶႄလႆႈဝႆႉ 10 တီႈ။