ၽူႈၼမ်း သိုၵ်းၵဝ်ႈၵၢင်ႉ MNDAA ၽိူင်တႃႉသိူင်း ဢွၵ်ႇၶၢဝ်းတၢင်းၵႂႃႇမိူင်းၶႄႇ ၵႂႃႇဢုပ်ႇဢူဝ်းၵၼ်တင်း တူဝ်တႅၼ်းၶိုၵ်ႉတွၼ်း မိူင်းၶႄႇ ၸဵမ်မိူဝ်ႈလိူၼ်ပူၼ်ႉမႃးသေတႃႉ တေႃႇထိုင်ယၢမ်းလဵဝ် ပႆႇပွၵ်ႈၶိုၼ်း၊ သိုဝ်ႇၶၢဝ်ႇ Myanmar Now တႄႉ ဢွၵ်ႇဝႆႉဝႃႈ – ၺႃးၶႄႇႁွင်ႉၵုမ်းၶင်ဝႆႉ ဝႃႈၼႆ။

ၼႂ်းၶၢဝ်ႇၼၼ်ႉတႅမ်ႈဝႆႉဝႃႈ – လိူၼ်ဢွၵ်ႊထူဝ်ႊပိူဝ်ႊပူၼ်ႉမႃး ဢိင်ၼိူဝ်မိူင်းၶႄႇ မွၵ်ႇထိုင်သေလႄႈ ၽူႈၼမ်း သိုၵ်းၵဝ်ႈ ၵၢင်ႉ တႃႇၵႂႃႇႁူပ်ႉထူပ်းဢုပ်ႇဢူဝ်း တဵင်ႉသျီႊၵျွၼ်ႊ တူဝ်တႅၼ်းၶိုၵ်ႉတွၼ်း ႁွင်ႈၵၢၼ်ၽွင်း လူင်ၾၢႆႇၼွၵ်ႈမိူင်း မိူင်းၶႄႇ တွၼ်ႈတႃႇဢေႊသျႃႊဝၼ်းဢွၵ်ႇ။

မီးၶၢဝ်ႇဝႃႈ မိူင်းၶႄႇ ပၼ်ႁႅင်းဢီးၵဝ်ႈၵၢင်ႉ ယႃႇႁႂ်ႈပိုတ်းယိုဝ်း သိုၵ်းမၢၼ်ႈယဝ်ႉ၊ ယႃႇၵပ်းသိုပ်ႇတိတ်းတေႃႇ တင်းၸုမ်း NUG ၼႆသေဢမ်ႇၵႃး ၸႂ်ႉသိုၵ်းၵဝ်ႈၵၢင်ႉ ထွႆထွၼ်ဢွၵ်ႇဝဵင်းလႃႈသဵဝ်ႈ – ဝႃႈၼႆပႃး။

မီးၶၢဝ်ႇဝႃႈ လႆႈႁူပ်ႉထူပ်းယဝ်ႉၼႆသေတႃႉ ဢမ်ႇႁၼ်ၽိူင်တႃႉသိူင်းပွၵ်ႈမႃးၶိုၼ်း။ လႅင်ႇၶၢဝ်ႇဢၼ်မီး တၢင်းၸႄႈမိူင်းယုၼ်ႊၼၢၼ်ႊ လၢတ်ႈတီႈသိုဝ်ႇၶၢဝ်ႇ Myanmar Now ဝႃႈ မိူင်းၶႄႇႁွင်ႉဝႆႉ ဢမ်ႇပၼ်ပွၵ်ႈ – ဝႃႈၼႆ။

ၾၢႆႇၼိုင်ႈသမ်ႉ မီးၶၢဝ်ႇဢွၵ်ႇမႃးထႅင်ႈဝႃႈ – ဢၼ်ၽိူင်တႃႉသိူင်း ဢမ်ႇပွၵ်ႈမႃးၶိုၼ်းၼႆႉ ယွၼ်ႉပိူဝ်ႈ ယူတ်း ယႃတူဝ်ဝႆႉတီႈႁူင်းယႃ ၸႄႈမိူင်းယုၼ်ႊၼၢၼ်ႊဝႃႈၼႆသေတႃႉ တိုၵ်ႉမီးတၢင်းၵပ်းသိုပ်ႇၸူး ၽူႈၼမ်းတပ်ႉသိုၵ်း MNDAA ယူႇ ဝႃႈၼႆဝႆႉ။

သိုဝ်ႇၶၢဝ်ႇမၢၼ်ႈမျၢၼ်ႇမႃႇၼၢဝ်းတႄႉ ထတ်းသၢင်ဝႆႉဝႃႈ – ဢိင်ၼိူဝ်ၽႅၼ်ယၼ်ႇသိုၵ်း 1027 သေ တပ်ႉသိုၵ်းၵဝ်ႈၵၢင်ႉ MNDAA ယိုတ်းလႆႈၶိုၼ်းၼႃႈလိၼ် ၽွင်းငမ်းတူဝ်ၵဝ်ႇ ဢၼ်သိုၵ်းမၢၼ်ႈ သူင်ႇတူဝ်တႅၼ်းၶဝ် တႅၼ်းတၢင်ၽွင်းငမ်းဝႆႉ – ဝႃႈၼႆ။

လိူဝ်ၼၼ်ႉ ယိုတ်းလႆႈပႃး ဝဵင်းၶျိၼ်ႊသူၺ်ႊႁေႃႊ (ဝဵင်းၼမ်ႉၽႃႈ) လႄႈ ဝဵင်းလၢဝ်ႇၵၢႆး ၸိူဝ်းၼႆႉသေဢမ်ႇၵႃး ယိုတ်းလႆႈပႃး တိူင်းသိုၵ်းမၢၼ်ႈ ယမၶ ဢၼ်ပၵ်းဝဵင်းလႃႈသဵဝ်ႈ။

ဢိင်ၼိူဝ် ၸုမ်းယိပ်းၵွင်ႈၵၢင်ႇတူဝ်ႈမိူင်း ပိုတ်းယိုဝ်းသိုၵ်းမၢၼ်ႈ ၵူႈတီႈသေလႄႈ မိူင်းၶႄႇ မႆႈဢူၵ်းမႆႈၸႂ် ၵူဝ်သိုၵ်းမၢၼ်ႈသုမ်းသိုၵ်း။ ၸင်ႇတႄႇႁူပ်ႉထူပ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၸွမ်းလႅၼ်လိၼ်တႆး – ၶႄႇသေ သူၼ်းဢီးယႃႇႁႂ်ႈႁူမ်ႈတင်း NUG ယႃႇပိုတ်းယိုဝ်းသိုၵ်းမၢၼ်ႈ။

မိူဝ်ႈတဵင်ႉသျီႊၵျွၼ်ႊ ႁူပ်ႉတင်းၸုမ်းသိုၵ်းဝႃႉၼၼ်ႉ လၢတ်ႈတီႈႁူဝ်ၼႃႈသိုၵ်းဝႃႉဝႃႈ – “မိူင်းၶႄႇ လႆႈၽဵဝ်ႈ လၢင်ႉ ၶိူဝ်းႁိူၼ်းယႂ်ႇ ဢၼ်ပဵၼ်ၼႃႈပဵၼ်တႃ ၼႂ်းၸုမ်းသိုၵ်းၵဝ်ႈၵၢင်ႉ 4  ၶိူဝ်းႁိူၼ်းယဝ်ႉ။ ၵူၺ်းၵႃႈ 4 ၶိူဝ်း ႁိူၼ်းၼၼ်ႉ ဢမ်ႇမီးသေတႃႉ ၸုမ်းသိုၵ်းၵဝ်ႈၵၢင်ႉ တိုၵ်ႉလိပ်းၶီးလႆႈယူႇ။ ၵူၺ်းၵႃႈ ပေႃးၶိူဝ်းႁိူၼ်း ၽိူင် ဢမ်ႇမီးယဝ်ႉတႄႉ ၸုမ်းသိုၵ်းၵေႃႈ တေဢမ်ႇၸၢင်ႈလိပ်းၶီးယဝ်ႉ။ သင်ဝႃႈ သိုၵ်းၵဝ်ႈၵၢင်ႉ ဢမ်ႇထွႆထွၼ် ဢွၵ်ႇလႃႈသဵဝ်ႈ ၸွမ်းၼင်ႇ ၶေႃႈတိုၵ်းသူၼ်းမိူင်းၶႄႇၸိုင် ၶိူဝ်းႁိူၼ်းၽိူင် ၸၢင်ႈပဵၼ်ၶိူဝ်းႁိူၼ်း ဢၼ်ထုၵ်ႇ ၽဵဝ်ႈလၢင်ႉထီႉ 5 ” – ၼႆ လႅင်ႇၶၢဝ်ႇၸမ်ၸႂ် ၸုမ်းသိုၵ်းဝႃႉ လၢတ်ႈၼင်ႇၼႆ။

ဢိင်ၼိူဝ် မိူင်းၶႄႇပၼ်ႁႅင်းဢီးၸိူင်ႉၼႆသေ ၸိူဝ်းပဵၼ်ၸုမ်းသိုၵ်း BPLA လႄႈ သိုၵ်း PDF ၸိူဝ်းပဵၼ် ဢူၺ်းလီသိုၵ်းၵဝ်ႈၵၢင်ႉၵေႃႈ ဢွၼ်ၵၼ်ထွႆထွၼ်ဢွၵ်ႇၸႄႈဝဵင်းလႃႈသဵဝ်ႈသေ ယၢမ်းလဵဝ်မႃးတူင်ႉၼိုင်ဝႆႉ ၼႂ်းၸႄႈဝဵင်းသီႇပေႃႉ၊ ၵျွၵ်ႉမႄးလႄႈ ၼွင်ၶဵဝ်။

ယၢမ်းလဵဝ် ၶႄႇႁွင်ႉ ၽိူင်တႃႉသိူင်းဝႆႉ၊ ဢမ်ႇပႆႇပၼ်ပွၵ်ႈၶိုၼ်းမိူင်းၸိူင်ႉၼႆ – ငဝ်းလၢႆးၵၢၼ်သိုၵ်း ၵၢၼ်မိူင်း တီႈဝဵင်းလႃႈသဵဝ်ႈ လႅပ်ႈတေမီးလွင်ႈလႅၵ်ႈလၢႆႈသေၸိူဝ်ႉသေပိူင်ယူႇၼႆ ၸုမ်းယိပ်းၵွင်ႈၵၢင်ႇ ဢၼ်ပိုတ်းယိုဝ်း သိုၵ်းမၢၼ်ႈဝႆႉ ယၢမ်းလဵဝ် ဢွၼ်ၵၼ်လၢမ်းၶၢတ်ႈဝႆႉ ၼင်ႇၼႆ။

လွင်ႈဢၼ်မိူင်းၶႄႇ တဵၵ်းႁႂ်ႈထွၼ်ဢွၵ်ႇဝဵင်းလႃႈသဵဝ်ႈၼၼ်ႉ – ၽိူင်တႃႉသိူင်း လၢတ်ႈယူႇတႃႇသေႇ တႄႉဝႃႈ – တေၶၢမ်ႇတၢႆၵူၺ်းယဝ်ႉ – ႁႂ်ႈထွႆတႄႉ တိုၼ်းတေဢမ်ႇထွႆၼႆ – ၽူႈၼမ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်ပိုတ်းယိုဝ်းသိုၵ်းမၢၼ်ႈ ယူႇယၢမ်းလဵဝ် ၸဝ်ႈၼိုင်ႈၵေႃႈ လၢတ်ႈၼင်ႇၼႆ။ 

ၵူၺ်းၵႃႈ ၾၢႆႇၼိုင်ႈၵေႃႈ သင်ၸိူဝ်ႈၸုမ်းသိုၵ်းၵဝ်ႈၵၢင်ႉ ဝူၼ်ႉတႃႇမိူဝ်းၼႃႈၽူႈၼမ်းၶဝ်တႄႉၸိုင် ၶဝ်ၸၢင်ႈထွႆထွၼ် ဢွၵ်ႇဝဵင်းလႃႈသဵဝ်ႈလႆႈၵူႈၶၢဝ်းယၢမ်း ၽူႈၼမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼၼ်ႉ ထတ်းသၢင်လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉတႄႉ တီႈၼႃႈလိၵ်ႈသိုဝ်ႇၶၢဝ်ႇ ၸုမ်းသိုၵ်းၵဝ်ႈၵၢင်ႉ The Kokang News ၵေႃႈ ဢမ်ႇပိုၼ်ၽၢဝ်ႇဝႆႉသင်ပဵၼ်တၢင်းၵၢၼ်။ ၵပ်းသိုပ်ႇၸူးၽူႈၶၢၼ်ပၢၵ်ႇ သိုၵ်းၵဝ်ႈၵၢင်ႉၵေႃႈ ဢမ်ႇလႆႈလႄႈ လွင်ႈတၢင်းၸုမ်းယိပ်းၵွင်ႈၵၢင်ႇ ၵဝ်ႈ ၵၢင်ႉပႆႇပွၵ်ႈၶိုၼ်းမိူင်းၼၼ်ႉ ပႆႇၸၢင်ႈယိုၼ်ယၼ် ဝႃႈပဵၼ်လွင်ႈသင်တႄႉတႄႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)