ၼႂ်းၶၢဝ်းတၢင်းၼိုင်ႈဝူင်ႈမႃးၼႆႉ တီႉၺွပ်းလႆႈယႃႈမဝ်းၵမ် ၼႂ်းမိူင်းတႆးလၢႆလၢႆတီႈ ၵိုင်ႇငိုၼ်း ၼပ်ႉႁူဝ်ပၢၵ်ႇ ပီႊလီႊယၼ်ႊ ငိုၼ်းမၢၼ်ႈ – ပလိၵ်ႈၾၢႆႇၵႂၢတ်ႇလၢင်ႉ ၽဵဝ်ႈမူၺ်ႉယႃႈမဝ်းၵမ် တႂ်ႈသိုၵ်းမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။
ဝၼ်းတီႈ 6/1/2025 ၼႆႉ တီႉၺွပ်းလႆႈ Happy Water ၊ Ecstasy(E) လႄႈ Methamphetamine တီႈဝဵင်း တႃႈၶီႈလဵၵ်း ၵိုင်ႇငိုၼ်း 2,300 သႅၼ်(ငိုၼ်းမၢၼ်ႈ)။ ၸွမ်းၼင်ႇ ၶေႃႈပိုၼ်ၽၢဝ်ႇ ပလိၵ်ႈၾၢႆႇၵႂၢတ်ႇလၢင်ႉ ၽဵဝ်ႈမူၺ်ႉယႃႈမဝ်းၵမ်သိုၵ်းမၢၼ်ႈသေ ၼႂ်းၶၢဝ်းတၢင်းၼိုင်ႈဝူင်ႈ တီႉၺွပ်းလႆႈယႃႈမဝ်းၵမ် တီႈဝဵင်းတႃႈၶီႈလဵၵ်း 3 ပွၵ်ႈ ပႃးပွၵ်ႈၼႆႉ – ၼႆယဝ်ႉ။
ပလိၵ်ႈၶဝ် တီႉၺွပ်းယူႇသေတႃႉ ယႃႈမဝ်ႈၵမ်ယင်းတိုၵ်ႉလိူင်ႇၼမ်ယူႇ – ၵူၼ်းပိုၼ်ႉတီႈတႃႈၶီႈလဵၵ်း လၢတ်ႈၼင်ႇၼႆ။
မိူဝ်ႈဝၼ်းတီႈ 4/1/2025 ပူၼ်ႉမႃးၼႆႉသမ်ႉ တီႉၺွပ်းလႆႈ Happy Water တီႈၼိူဝ်သဵၼ်ႈတၢင်းၵႃး လွႆလႅမ် – တူၼ်ႈတီး ၵိုင်ႇငိုၼ်း 2,500 သႅၼ်။ ၼႂ်းဝၼ်းတီႈ 3 ၼႆႉၵေႃႈ တီႉၺွပ်းလႆႈ ယႃႈမဝ်းၵမ် 3 သႅၼ် 2 မိုၼ်ႇမဵတ်ႉပၢႆ – ဝႃႈၼႆ။
ၼႂ်းဝၼ်းတီႈ 1 သမ်ႉ တီႈၺွပ်းလႆႈ ၶိူင်ႈၶူဝ်း ဢၼ်ႁဵတ်းဢွၵ်ႇယႃႈၽိူၵ်ႇ ၵိုင်ႇငိုၼ်း 1.365 ပီႊလီႊယၼ်ႊ ၼႂ်းၸႄႈဝဵင်းၵဵင်းတုင်၊ ၶိူင်ႈၶူဝ်းသွႆ ၸိူဝ်းၼၼ်ႉ လုၵ်ႉတီႈမိူင်းပဵင်းသေ ဢၢၼ်းသူင်ႇၵႂႃႇတၢင်းဝဵင်းၵဵင်းတုင် ဝႃႈၼႆ။
ဢိင်ၼိူဝ် ၶေႃႈပိုၼ်ၽၢဝ်ႇ ပလိၵ်ႈၾၢႆႇၵႂၢတ်ႇလၢင်ႉၽဵဝ်ႈမူၺ်ႉ ယႃႈမဝ်းၵမ်သိုၵ်းမၢၼ်ႈသေ သိုဝ်ႇၶၢဝ်ႇ RFA ၵဵပ်းသဵၼ်ႈမၢႆဝႆႉၼၼ်ႉ ၼႂ်းပီ 2024 ပူၼ်ႉမႃးၼႆႉ တူဝ်ႈမိူင်းမၢၼ်ႈပတ်းပိုၼ်ႉ ယႃႈမဝ်းၵမ် ဢၼ်တီႉၺွပ်း လႆႈ ႁူမ်ႈသဵၼ်ႈၵိုင်ႇငိုၼ်းမၢၼ်ႈ 1 ပီႊလီႊယၼ်ႊပၢႆလႄႈ လိူင်ႈ(ၶၻီး) တီႉၺွပ်းလႆႈ မီး 53 လိူင်ႈ ၼႆယဝ်ႉ။
ပိုၼ်ႉတီႈ ဢၼ်တီႉၺွပ်းလႆႈယႃႈမဝ်းၵမ် ၼမ်လိူဝ်ပိူၼ်ႈ မိူဝ်ႈပီၵၢႆၼၼ်ႉ ပဵၼ်ၼႂ်းမိူင်းတႆး၊ ၼေႇပျီႇတေႃႇ ၊ တိူင်းတႃႈၵုင်ႈ ၊ ဝဵင်းလိူဝ်ႇ ၊ တိူင်းဢေႇရႃႇဝတီႇ ၊ မိူင်းမွၼ်း ၊ တိူင်းပႃႇၵိူဝ် ၊ တိူင်းတၼၢဝ်းသီလႄႈ တိူင်းၸႄႈၵႅင်း ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ