ၼႂ်းၶၢဝ်းတၢင်း ပီၵဝ်ႇလၢႆႈၸူးပီမႂ်ႇၼႆႉ သိုၵ်းမၢၼ်ႈ ပလိၵ်ႈမၢၼ်ႈ ပွတ်းဢွၵ်ႇၶူင်း ၵႆႉပိုၼ်ၽၢဝ်ႇဝႃႈ တီႉၺွပ်းလႆႈ ၵူၼ်း ၵႃႉယႃႈမဝ်းၵမ်ၼမ်မႃး ႁဵတ်းႁႂ်ႈၵူၼ်းပိုၼ်ႉတီႈပႅၵ်ႇႁူပႅၵ်ႇတႃ ယွၼ်ႉပလိၵ်ႈမၢၼ်ႈ ဢမ်ႇတွၼ်ႉဝႆႉၼၵ်း လွင်ႈၽဵဝ်ႈမူၺ်ႉယႃႈမဝ်းၵမ်။

တႄႇဢဝ်ၶၢဝ်း ပီ 2024 ၸမ်သဵင်ႈ တေႃႇပေႃးထိုင် ၼႂ်းႁူဝ်ပီ 2025 ၼႆႉ ပလိၵ်ႈလႄႈ ၾၢႆႇၽဵဝ်ႈမူၺ်ႉ ယႃႈမဝ်းၵမ် ၼႂ်း ၸိုင်ႈတႆးပွတ်းဢွၵ်ႇၶူင်း ဢၼ်ယူႇတႂ်ႈသိုၵ်းမၢၼ်ႈ ၵႆႉလူင်းပိုၼ်ႉတီႈလႄႈသင် ပႂ်ႉၵဵတ်ႉလၢၼ်ႇၵူတ်ႇထတ်း တီႉၺွပ်း ၵူၼ်းၵႃႉယႃႈမဝ်းၵမ်မႃး ၸိူဝ်းၼႆႉလႄႈသင် လွင်ႈၼႆႉ ၵူၼ်းပိုၼ်ႉ တီႈလၢတ်ႈဝႃႈ ပဵၼ်ဢၼ်လၢၵ်ႇလၢႆး၊ မိူဝ်ႈၵူႈပွၵ်ႈယႃႈမဝ်းၵမ် ၵႃႉၶၢႆသူႇသမ်းတေႃႇၼႃႈတေႃႇတႃၵေႃႈ ၶဝ်ဢမ်ႇတီႉ၊ ၸင်ႇႁႃလုၵ်ႉမႃးတီႉယၢမ်းလဵဝ်။   

ၾၢႆႇၽဵဝ်ႈမူၺ်ႉ ယႃႈမဝ်းၵမ် တႂ်ႈသိုၵ်းမၢၼ်ႈ CCDAC Myanmar ၵေႃႈ ၵႆႉပိုၼ်ၽၢဝ်ႇဝႃႈ ပလိၵ်ႈမၢၼ်ႈ ပွတ်းဢွၵ်ႇၶူင်း တီႉၺွပ်းလႆႈ ယႃႈမဝ်းၵမ်ၼမ်လၢႆတႄႉတႄႉ။ တီႉလႆႈပႃးၵူၼ်းလႄႈ ၶိူင်ႈမႆႉၶိူင်ႈမိုဝ်း ဢၼ်ၵပ်းၵၢႆႇလူၺ်ႈ ယႃႈမဝ်းၵမ်လူးၵွၼ်ႇ။

ပေႃးမႃးတူၺ်း ၶၢဝ်းတၢင်းသိုၵ်းမၢၼ်ႈ ယိုတ်းမိူင်းမႃးၼႆႉ မိူင်းတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၸိူဝ်းၼႆႉ ယႃႈမဝ်းၵမ်လိူင်ႇၽႄႈမႃးလိူဝ်ၵဝ်ႇ။ မိူၼ်ၼင်ႇ – ၵဵင်းတုင်၊ တႃႈၶီႈလဵၵ်း၊ မိူင်းသၢတ်ႇ၊ မိူင်း တူၼ်၊ ၼႃးၵွင်းမူး၊ ပုင်ႇပႃႇၶႅမ် ၸိူဝ်းၼႆႉၵေႃႈ ၵူၼ်းၵိၼ်ၵူၼ်းၶၢႆ လိူင်ႇမႃး။

ၼင်ႇႁိုဝ် တေမီးဢွင်ႈတီႈ ဢၼ်ၵူၼ်းၸိူဝ်းသူင်မိုတ်ႈ လွင်ႈမူၼ်ႈတၢင်းၵျေႃႇ ပေႃးတေၶဝ်ႈထိုင်လႆႈ ၼၼ်ႉ ၸဝ်ႈငိုၼ်းသႃးၶဝ် လူင်းတိုၼ်း ပိုတ်ႇႁၢၼ်ႉၵိၼ်ၵျေႃႇဝႆႉလၢႆသႅၼ်း။ ႁဵတ်းႁႂ်ႈၵူၼ်းၼုမ်ႇ ၼႂ်းပိုၼ်ႉတီႈ ၵမ်ႈၼမ် မဝ်းၸွမ်းတၢင်း ၵျေႃႇၼၼ်ႉသေ ငိုၼ်းၵေႃႈသဵင်ႈ ၶၢဝ်းယၢမ်းၵေႃႈသုမ်း။

သိုၵ်းမၢၼ်ႈလႄႈ ပလိၵ်ႈမၢၼ်ႈၶဝ် ႁူႉဝႃႈ ၵူၼ်းၵႃႉယႃႈၼမ်ယူႇသေတႃႉ တင်ႈၸႂ်ပွႆႇႁႂ်ႈမၼ်းၽႄႈဝႆႉ သေ ပႂ်ႉတူၺ်းငဝ်းလၢႆးမၼ်း။ ပေႃးယဝ်ႉ ၸင်ႇလူင်းပိုၼ်ႉတီႈ ထႆၵိၼ်ငိုၼ်း။ ဢၼ်ၶဝ် တီႉၺွပ်းယူႇ ၶၢဝ်းၼႆႉၵေႃႈ ဢိင်ၼိူဝ် ၸုမ်းပလိၵ်ႈမၢၼ်ႈၶဝ် လႅၵ်ႈတီႈယူႇၵၼ်ၵေႃႈပႃး။ သမ်ႉထႅင်ႈပဵၼ်ၶၢဝ်းပီမႂ်ႇ သေ ၶဝ်လႅၵ်ႈတီႈယူႇၵူၼ်း (ပလိၵ်ႈ) မႂ်ႇလႄႈသင် ပဵၼ် ၽွင်းလူဝ်ႇၼႄၼမ်ႉမိုဝ်းၼမ်ႉၵတ်ႉတၢင်းၶႅၼ်ႇ ပလိၵ်ႈ  ၸိူဝ်းလူဝ်ႇၶိုၼ်ႈၸၼ်ႉ (တၼ်းႁဵင်း) ၸိူဝ်းၼႆႉလႄႈသင်  ၸင်ႇလႄႇႁႃၵူတ်ႇထတ်းတီႉၺွပ်း ၵူၼ်းၵႃႉယႃႈမဝ်းၵမ် ၸိူဝ်းၼႆႉမႃးၵူၺ်း ပေႃႈႁိူၼ်းၼုမ်ႇ တီႈတႃႈၶီႈလဵၵ်း ၵေႃႉၼိုင်ႈ လၢတ်ႈၼႄတၢင်း ႁၼ်ထိုင်ဝႆႉၼင်ႇၼႆ –

“လွင်ႈၶဝ်ၶၢႆ ၶႄး K ၊ ႁႅပ်ႉပီႉဝႃႊထိူဝ်ႊ happy water ဝႃႈၸိူဝ်းၼႆႉၼႆ ၵမ်ႈၼမ်တႄႉ တိုၼ်းလႆႈသႂၢင်း ၶွၼ်ႇ တီႈပလိၵ်ႈမၢၼ်ႈၶဝ်ယူႇယဝ်ႉ။ ၵူၺ်းၵႃႈ ၶဝ်တေဢမ်ႇတမ်းဝၢင်းဝႆႉ ၼႂ်းႁၢၼ်ႉၵမ်းသိုဝ်ႈ။ မိူၼ်ၼင်ႇ ၼႂ်းႁၢၼ်ႉၼိုင်ႈႁၢၼ်ႉၸိုင် တေမီးၵူၼ်းၵေႃႉလဵဝ်ၵူၺ်း ဢၼ်တေယိပ်းဝႆႉယႃႈမဝ်းၵမ် ၸိူဝ်းၼၼ်ႉ။ ပေႃးဢဝ်ပလိၵ်ႈဝႃႈ ၶဝ်ႁူႉၵၼ်မူတ်းယဝ်ႉ ဝႃႈၽႂ်ၶၢႆဢမ်ႇၶၢႆ။ ၵူၺ်းၼႃႇ မၢင်ၸိူဝ်းသမ်ႉ ၶၢႆသေ ဢမ်ႇပၼ်ငိုၼ်းၸိူဝ်းၼႆႉ ၸင်ႇၺႃးၺွပ်းၵေႃႈ ၸၢင်ႈပဵၼ်လႆႈၼႃ။ ဢၼ်ၶဝ် ၺွပ်းယူႇၸိူဝ်းၼႆႉၵေႃႈ ဢမ်ႇၸႂ်ႈဝႃႈ ၵႂႃႇၵူတ်ႇၵႂႃႇထတ်းမူတ်းသေလႄႈ ၺွပ်းဢဝ်ၵေႃႈ ဢမ်ႇၸႂ်ႈၼင်ႇၵဝ်ႇ။ ၶဝ်တိုၼ်းႁူႉၵၼ် ဝႆႉယူႇယဝ်ႉ။ ပေႃးႁူႉၶၢဝ်ႇဝႃႈ ၵေႃႉၼၼ်ႉၵေႃႉၼႆႉ တေၵႂႃႇသူင်ႇပၼ်ယႃႈ ၵႃႈၼၼ်ၵႃႈၼႆၼႃႈၼႆ ၵေႃႈ ၶဝ်ၵႂႃႇပႂ်ႉၺွပ်းဢဝ်ႁဵတ်းၼၼ်ၵူၺ်း မၼ်းတုမ်ႉတိူဝ်ႉလၢႆးႁႃၵိၼ်ၶဝ်လႄႈ ၸင်ႇႁဵတ်းၵူၺ်းၵၢၼ် ၸိူဝ်းၼႆႉ”- ဝႃႈ ၼႆ။

မိူၼ်ၼင်ႇ ပွတ်းတၢင်းဝဵင်းတႃႈၶီႈလဵၵ်းၼႆႉၵေႃႈ ယွၼ်ႉယႃႈမဝ်းၵမ်သေ ဢွၵ်ႇၸိုဝ်ႈလူႉဝႆႉၼမ်ၼႃႇ ယဝ်ႉလႄႈ သိုၵ်းမၢၼ်ႈ ၶႂ်ႈႁူမ်ႇတူမ်းဝႆႉ လွင်ႈပလိၵ်ႈမၢၼ်ႈၶဝ် ဢမ်ႇႁႄႉႁၢမ်ႈၵႅတ်ႇၶႄသင်လႆႈ။ ၸိုဝ်ႈသဵင်ပလိၵ်ႈမၢၼ်ႈၵေႃႈ လူႉၼမ် ၼႃႇယဝ်ႉလႄႈ ၽူႈမီးၸၼ်ႉၼႂ်းၸုမ်းၶဝ် ၸင်ႇႁႃလၢႆးတၢင်းႁႃၸိုဝ်ႈ သဵင်လီၶိုၼ်းၵေႃႈ ပဵၼ်လႆႈ – ၵူၼ်းပိုၼ်ႉတီႈ သိုပ်ႇလၢတ်ႈၼင်ႇၼႆ။

မိူဝ်ႈၼႂ်းလိူၼ်ၼူဝ်ႊဝႅမ်ႊပိူဝ်ႊလႄႈ တီႊသႅမ်ႊပိူဝ်ႊ ႁၢင်ပီ 2024 ၼၼ်ႉၵေႃႈ ႁၢၼ်ႉၶၢႆၾူၼ်း First Rate လႄႈ ႁၢၼ်ႉလႅၵ်ႈငိုၼ်း ၼႂ်းဝဵင်းတႃႈၶီႈလဵၵ်း ၺႃးၸူၼ်သေ ဝၢႆးၼၼ်ႉ ဢမ်ႇႁိုင်လၢႆဝၼ်းၵူၺ်း ပလိၵ်ႈမၢၼ်ႈ လမ်းယိုဝ်း ၵူၼ်း ၸူၼ်ၸိူဝ်းၼၼ်ႉထိုင်တီႈ။ ၵူၼ်းမိူင်းႁၼ် လွင်ႈႁဵတ်းသၢင်ႈပလိၵ်ႈမၢၼ်ႈ ၶိုပ်ႈၼႃႈမႃး ဝႃႈၼႆသေတႃႉ ဢမ်ႇႁၼ်လွင်ႈပူင်ႇသႂ် ၼိူဝ်ၵူၼ်းမိူင်း။ ဢမ်ႇၸႅင်ႈၼႄဝႃႈ ဢၼ်ၶဝ်ၽဵဝ်ႈပႅတ်ႈၵူၼ်းၸူၼ်ၸိူဝ်းၼၼ်ႉ ပဵၼ်ၵူၼ်းတၢင်းလႂ်လႄႈ ၶဝ်ယိုတ်းသင် လႆႈတီႈၸုမ်းၸူၼ် ၸိူဝ်းၼၼ်ႉ။

ပိူင်လူင်မၼ်း ပီမႂ်ႇၼႆႉ ပလိၵ်ႈမၢၼ်ႈ ၶႂ်ႈလႆႈၸိုဝ်ႈသဵင်ၵေႃႈ ပိူင်ၼိုင်ႈလႄႈ ၶဝ်ၶႂ်ႈႁႃငိုၼ်းၶဝ်ႈၵေႃႈ ပိူင်ၼိုင်ႈ – ၽူႈသူၼ်ၸႂ်ၵၢၼ်မိူင်းတီႈ ၵဵင်းတုင်ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ပေႃးတူၺ်းတႄႉ လႅပ်ႈၶဝ်တေလူဝ်ႇငိုၼ်းၼၼ်ႉယဝ်ႉ။ ပလိၵ်ႈမၢၼ်ႈ ၸိူဝ်းတူၵ်းပုၼ်ႈၽွၼ်းတၢင်း ပွတ်းဢွၵ်ႇၶူင်း ၼႆႉ ၶဝ်လႆႈငိုၼ်းပၼ်ငဝ်ႈငုၼ်းပလိၵ်ႈၶဝ် တီႈယၢၼ်ႇၵုင်ႇ ၼမ်တီႈသုတ်းလူး ပဵၼ်ထီႉၼိုင်ႈၼႆၵေႃႈ ဝႃႈလႆႈ။ တၢင်းပွတ်းဢွၵ်ႇၶူင်းၼႆႉ ပလိၵ်ႈမၢၼ်ႈ ႁႃငိုၼ်းလႆႈၼမ်သေပိူၼ်ႈသုတ်းယဝ်ႉ။ ပေႃးၶဝ်ဢမ်ႇလူဝ်ႇငိုၼ်းတႄႉတႄႉ ၶဝ်ၵေႃႈ ပွႆႇလွတ်ႈဝႆႉႁဵတ်းၼၼ်ၵူၺ်း။ ထႅင်ႈဢၼ်ၼိုင်ႈတႄႉ တေၸၢင်ႈပဵၼ် ယွၼ်ႉၸုမ်းၵႃႉၶၢႆယႃႈမဝ်းၵမ်ပေႃႇမႃးထႅင်ႈမႂ်ႇ ဢၼ်ၶဝ်ဢမ်ႇၵုမ်းလႆႈ ၸိူဝ်းၼၼ်ႉ ၸင်ႇႁႃတီႉၵူၺ်းၵႂႃႈ။ ပေႃးဝႃႈမီးၵူၼ်းၵႃႉယႃႈၵေႃႈ ၶဝ်သမ်ႉတေလႆႈငိုၼ်းၸွမ်း၊ ၵူၺ်းၵႃႈ ပေႃးမီးၸုမ်းမႂ်ႇမႃး ၶၢႆၶႅင်ႇၵၼ်ထႅင်ႈၵေႃႈ ၸုမ်းဢၼ်ဢဝ်ငိုၼ်းမွၼ်ဝႆႉပလိၵ်ႈ ၸိူဝ်းၼၼ်ႉသမ်ႉ ဢမ်ႇႁၢၼ်ႉ ၸႂ်သေ တိူင်ႇ လၢတ်ႈပလိၵ်ႈလႄႈ ၸင်ႇၵႂႃႇၺွပ်းၵေႃႈ ပဵၼ်လႆႈ”- ဝႃႈၼႆ။

မိူဝ်ႈဢွၼ်တၢင်း မိူၼ်ၼင်ႇ Happy Water ၊ Ketamine Hydrochlorde (K) ၸိူဝ်းၼႆႉ ပလိၵ်ႈမၢၼ်ႈ ပွတ်းဢွၵ်ႇၶူင်း ဢမ်ႇသူႈသႂ်ႇၸႂ်တီႉၺွပ်း မိူၼ်ၼင်ႇ ၶဝ်သွၼ်ႇဝႃႈ ဢမ်ႇၸႂ်ႈသႅၼ်းယႃႈမဝ်းၵမ်။ မိူၼ် ၼင်ႇ ႁၢၼ်ႉၵိၼ်ၵျေႃႇ KTV , Bar ၸိူဝ်းၼႆႉၵေႃႈ ဢွၼ်ၵၼ်သိုဝ်ႉၶၢႆ ၶွင်ၵိၼ်ၵျေႃႇ ၸိူဝ်းၼႆႉ ပေႃးတဵမ် ဝၢၼ်ႈတဵမ်မိူင်းၵေႃႈ ပလိၵ်ႈမၢၼ်ႈ ႁဵတ်းမိူၼ် ဢမ်ႇႁၼ် ယွၼ်ႉဝႃႈ ၶဝ်လူဝ်ႇပႂ်ႉၵဵပ်းၵိၼ်ၶွၼ်ႇ ၼင်ႇၶဝ် ၶႂ်ႈယွၼ်းၼႆ ၵူၼ်းပိုၼ်ႉတီႈသိုပ်ႇလၢတ်ႈ။

ယွၼ်ႉလႆႈသႂၢင်းၶွၼ်ႇ ပလိၵ်ႈမၢၼ်ႈႁၢဝ်ႈႁႅင်းလႄႈ ၸဝ်ႈႁၢၼ်ႉၵိၼ်ၵျေႃႇ ၵမ်ႈၼမ် ၶိုၼ်ႈၵႃႈၵိၼ် ၵႃႈယႅမ်ႉလႄႈ ၵႃႈၶၢတ်ႈႁွင်ႈ KTV ၸိူဝ်းၼႆႉ။ မိူၼ်ၼင်ႇ တီႈတႃႈၶီႈလဵၵ်းၼႆႉ ၵႃႈၶၢတ်ႈႁွင်ႈၵိၼ်ၵျေႃႇ KTV မီး 3,000 ဝၢတ်ႇ ထိုင် 8,000 ဝၢတ်ႇ။ လိူဝ်ၼၼ်ႉ သင်ႁွင်ႉပႃးၼၢင်းယိင်း ႁပ်ႉၶႅၵ်ႇၼင်ႈၸွမ်းၸိုင် လႆႈၸၢႆႇၵႃႈတူဝ် ၼိုင်ႈၵေႃႉလႂ် ဢမ်ႇယွမ်း 500 ဝၢတ်ႇ(ၼပ်ႉငိုၼ်းမၢၼ်ႈ ဢမ်ႇယွမ်းသႅၼ်)။ ၸဝ်ႈႁၢၼ်ႉၵိၼ်ၵျေႃႇ ၵမ်ႈၼမ် ၼင်ႇႁိုဝ် တေလႆႈၼမ်ႉမျၢတ်ႈ ၼမ်ႉတွၼ်း ၼမ် ၼင်ႇႁိုဝ် ပေႃးတေပၼ်ၶွၼ်ႇ သိုၵ်းမၢၼ်ႈလႆႈၼၼ်ႉ ၵႃႈလႆႈၶိုၼ်ႈၵႃႈၶၼ် ၵူႈၸိူဝ်ႉၵူႈလွင်ႈ ဢၼ်ၶဝ်ဝၢင်းၶၢႆၼႂ်း ႁၢၼ်ႉၵိၼ်ၵျေႃႇၼႆ ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈၼင်ႇၼႆ။