ၸုမ်းပျီႇတူႉၸိတ်ႉပဢူဝ်း ၸီႉသင်ႇၵူၼ်းပၢႆႈၽေးသိုၵ်း ပွၵ်ႈႁိူၼ်းယေးၶိုၼ်း သင်ဢမ်ႇပွၵ်ႈၸိုင် တေထုၵ်ႇယိုတ်းဢဝ် ႁိူၼ်းယေးလၢႆ ဝႃႈၼႆ။
ယၢမ်းလဵဝ် ၸုမ်းပျီႇတူႉၸိတ်ႉပဢူဝ်း PNO တီႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၸီႉသင်ႇႁႂ်ႈၵူၼ်းမိူင်း ဢၼ်ပၢႆႈ ၽေးသိုၵ်းဝႆႉတၢင်ႇတီႈသီႇလႅၼ် ၸိူဝ်းၼၼ်ႉ ႁႂ်ႈဢွၼ်ၵၼ်ပွၵ်ႈၶိုၼ်းႁိူၼ်းယေး ၽႂ်မၼ်း။
ၵူၼ်းပိုၼ်ႉတီႈ ဝဵင်းသီႇသႅင်ႇ လၢတ်ႈၽူႈတွႆႇႁွၵ်ႈဝႃႈ – “PNO ၶဝ်ဝႃႈ ႁႂ်ႈဢွၼ်ၵၼ်ပွၵ်ႈမႃးယူႇၶိုၼ်းႁိူၼ်း။ ပေႃးဢမ်ႇမႃးယူႇၶိုၼ်းႁိူၼ်းၼႆ တေယိုတ်းသိမ်းပႅတ်ႈ တေဢမ်ႇပၼ်ယူႇယဝ်ႉၼႆၸိူဝ်းၼႆႉဢိူဝ်ႈ။ ဢၼ်ၶဝ်ႈလၢတ်ႈၼႆႉ ပဵၼ်ၸွမ်းဝၢၼ်ႈလွႆၵဵင်ႈ၊ ဝၢၼ်ႈၼွၵ်ႇဝူဝ်း သမ်ႉထႅင်ႈဝၢၼ်ႈမႂ်ႇ ၸိူဝ်းၼႆႉ။ ၶဝ်ၸႂ်ႉမိူဝ်းၶိုၼ်း မူတ်းဢေႃႈ။ ပေႃးမိူဝ်းၼႆၵေႃႈ တေလႆႈၼုင်ႈပႃးသိူဝ်ႈၶူဝ်းသိုၵ်း PNO ၶဝ်သေ တေလႆႈႁဵတ်းၵၢၼ်ပၼ်ၶဝ်။ ပေႃးပဵၼ် ၼၢင်းယိင်းသမ်ႉ တေႁႂ်ႈႁုင်ၶဝ်ႈ ၽၵ်းလဵင်ႉၶဝ်ၼႆဢေႃႈ”- ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၽူႈမီးပုၼ်ႈၽွၼ်း တီႈၸုမ်းပျီႇတူႉၸိတ်ႉပဢူဝ်း PNO တႄႉလၢတ်ႈဝႃႈ ငဝ်းလၢႆးပိုၼ်ႉတီႈ ပၢင်တိုၵ်းယဵၼ်လႄႈ ၸီႉသင်ႇႁႂ်ႈပွၵ်ႈၶိုၼ်းႁိူၼ်းၵူၺ်း ဢမ်ႇမီးလွင်ႈလွၵ်ႇငိုတ်ႈသင် ဝႃႈၼႆ။
ၸဝ်ႈႁၢၼ် တၢၼ်းၵျွႆႇ ၸုမ်းပျီႇတူႉၸိတ်ႉပဢူဝ်း PNO လၢတ်ႈၽူႈတွႆႇႁွၵ်ႈဝႃႈ – “ယူႇတီႈ ႁဝ်းၶႃႈသေ ဢၼ်လႆႈလွၵ်ႇငိုတ်ႈၵူၼ်းမိူင်းတႄႉ ဢမ်ႇမီးၶႃႈ။ ယွၼ်ႉဝႃႈ ပိုၼ်ႉတီႈၸွမ်းဝၢၼ်ႈ ၸိူဝ်းၼၼ်ႉ ၽူႈၶဵၼ်ၸုမ်းသိုၵ်း တၢင်ႇဢၼ်ဢမ်ႇမီးယဝ်ႉလႄႈ သင်ဝႃႈ ၶႂ်ႈပွၵ်ႈၶိုၼ်း ႁိူၼ်းယေးၽႂ်မၼ်းၵေႃႈ ပွၵ်ႈၶိုၼ်းလႆႈယဝ်ႉၼႆၵူၺ်း။ ၵူၼ်းဝၢၼ်ႈၶဝ်သမ်ႉ ဢမ်ႇႁူႉလီလႄႈ ဢမ်ႇႁတ်းမိူဝ်းၼၼ်ႉၶႃႈၼႃႇ။ တီႈတႄႉမၼ်းၵတ်းယဵၼ် ၶိုၼ်းယဝ်ႉလႄႈ ၸႂ်ႉမိူဝ်းၵူၺ်း တႃႇဝႃႈတေသိမ်းႁိူၼ်းယေး ၵူၼ်းမိူင်း ဢၼ်ဝႃႈၼၼ်ႉတႄႉဢမ်ႇမီးၶႃႈ”- ဝႃႈၼႆ။
တႃႇတေပွၵ်ႈၶိုၼ်းႁိူၼ်းယေးၼၼ်ႉ ၵူၼ်းပၢႆႈၽေးသိုၵ်း ၵမ်ႈၽွင်ႈ ဢမ်ႇမီးတီႈယူႇတၼ်းသဝ်း ယွၼ်ႉႁိူၼ်းယေးလူႉ ၵွႆႇ တႃႇႁဵတ်းသၢင်ႈၼႃႈၵၢၼ်ၵေႃႈ ဢမ်ႇၸၢင်ႈယဝ်ႉလႄႈ ၵူၼ်းပၢႆႈၽေးၶဝ် တိုၵ်ႉမီးလွင်ႈယၢပ်ႇ ဝႆႉယူႇလၢႆလၢႆလွင်ႈ ဝႃႈ ၼႆ။
“ပေႃးဝႃႈ တေပွၵ်ႈၶိုၼ်းႁိူၼ်းၼႆၵေႃႈ ၵမ်ႈၽွင်ႈၼႆႉ ႁိူၼ်းယေးဢမ်ႇမီးယဝ်ႉ။ မိူၼ်ၼင်ႇ ဝၢၼ်ႈၼမ်ႉၽႃမူ ဢၼ်ၸပ်းၵၼ်တၢင်းဝၢၼ်ႈမႂ်ႇၼၼ်ႉ ႁိူၼ်းယေးၵူၼ်းဝၢၼ်ႈသမ်ႉ ပေႃးဢမ်ႇၶႂ်ႈမီးယဝ်ႉလူး။ မိူၼ်ၼင်ႇ ဝၢၼ်ႈၼွၵ်ႇဝူဝ်းၼၼ်ႉ လင်ႁိူၼ်းပိူၼ်ႈၵိုတ်းသွင်လင်ၵူၺ်း။ သမ်ႉပဵၼ်ႁိူၼ်းသုမ်ႉထႅင်ႈ။ ၽႂ်သမ်ႉတေ ႁဵတ်းႁိုဝ်မိူဝ်းယူႇၶိုၼ်းႁိူၼ်း။ တေလႆႈၵႂႃႇၼွၼ်းတီႈလႂ်။ ၸိူဝ်ႉမၢၵ်ႇၶဝ်ႈတဝ်ႈၼမ်ႉ၊ ၽုၼ်ႇ ၸိူဝ်းၼႆႉၵေႃႈ ဢမ်ႇမီးသင်ယဝ်ႉ။ ၼႃႈၵၢၼ်တႃငၢၼ်းၵေႃႈ ဢမ်ႇမီး။ သမ်ႉလႆႈၵူဝ်ပၢင်တိုၵ်းထႅင်ႈ။ ဢမ်ႇၸၢင်ႈႁဵတ်းသင် ယဝ်ႉမိူဝ်ႈလဵဝ်ၼႆႉ” – ၵူၼ်းပၢႆႈၽေးသိုၵ်း ဝဵင်းပၢင်လွင်း သိုပ်ႇလၢတ်ႈၼႄၼင်ႇၼႆ။
တီႈဝဵင်းပၢင်လွင်းၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်သေ ယၢမ်ႈပဵၼ်ပၢင်တိုၵ်းၵၼ်တင်း တပ်ႉသိုၵ်းၽွမ်ႉႁူမ်ႈယၢင်းလႅင် ၸွမ်းတၢင်းဝၢၼ်ႈၼွၵ်ႇဝူဝ်း၊ လွႆၵဵင်ႈ၊ ဝၢၼ်ႈၼမ်ႉၽႃမူ၊ ၾၢႆၶုၼ်၊ ဝၢၼ်ႈသွင်းပျွင်း ၸိူဝ်းၼႆႉမႃး မိူဝ်ႈၽွင်းႁၢင်ပီ 2024။
ယွၼ်ႉၼၼ်လႄႈ ၵူၼ်းမိူင်း ဢွၼ်ၵၼ်ပၢႆႈၽေးသိုၵ်း သွၼ်ႈယူႇၸွမ်း ဝဵင်းၼွင်တယႃး ၸိူဝ်းၼႆႉ ဢမ်ႇယွမ်းသၢမ်ႁဵင်ၵေႃႉ ယင်းပႆႇၸၢင်ႈပွၵ်ႈၶိုၼ်းႁိူၼ်း။ ယဝ်ႉၵေႃႈ ၵူၼ်းပၢႆႈၽေးသိုၵ်း ဢၼ်လုၵ်ႉတၢင်း ၸႄႈဝဵင်းမိူင်းပၢႆး၊ ၾၢႆၶုၼ် ၸိူဝ်းၼၼ်ႉသေ ပၢႆႈမႃးၵေႃႈမီး။
ယၢမ်းလဵဝ် သိုၵ်းမၢၼ်ႈ ထႅမ်ႁႅင်းသိုၵ်း ၸွမ်းလႅၼ်လိၼ်မိူင်းတႆး − မိူင်းယၢင်းလႅင် ႁၢဝ်ႈႁႅင်းၵူၺ်းဢမ်ႇၵႃး သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇၸွမ်းပိုၼ်ႉတီႈ ၸႄႈဝဵင်းမိူင်းပၢႆး၊ ၾၢႆၶုၼ်ထႅင်ႈလႄႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်မႆႈၸႂ် ၵူဝ်ပၢင်တိုၵ်း ပဵၼ်ႁၢဝ်ႈႁႅင်းထႅင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ