ၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇၶွင်ၵိၼ်ယႅမ်ႉ တီႈဝဵင်းၵုၼ်ႁဵင် ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇၶဝ်ႈၸူၼ်သေ ထုၵ်ႇယိုဝ်းတၢႆထင်တီႈ ၵိုၵ်းႁိူၼ်း။

ဝၼ်းတီႈ 5/1/2025 ယၢမ်းႁူဝ်ၶမ်ႈမွၵ်ႈ 5 မူင်းၶိုင်ႈ မီးၸုမ်းဢမ်ႇႁူႉၾၢႆႇ 4 ၵေႃႉ ၶီႇၵႃးမႃးၸွမ်းလမ်းၼိုင်ႈသေ ၶဝ်ႈ ၸူၼ်ႁိူၼ်းယေးၵူၼ်းဝၢၼ်ႈ ပွၵ်ႉ 2 တီႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸဝ်ႈၶွင်ႁိူၼ်း ၽူႈ ၸၢႆးဢႃယု 50 ပၢႆ ၵေႃႉၼိုင်ႈ ၺႃးယိုဝ်းတၢႆ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၵုၼ်ႁဵင် လၢတ်ႈၽူႈတွႆႇႁွၵ်ႈဝႃႈ – “ၵူၼ်းႁၢႆႉၼၼ်ႉ ၶီႇၵႃးမႃးၸွမ်းၵၼ် လမ်းၼိုင်ႈ ၼႂ်းၵႃးၼၼ်ႉ မႃးၸွမ်းၵၼ် 4 ၵေႃႉ။ တႃႇ 3 ၵေႃႉသမ်ႉ ၶဝ်ႈၸူၼ်ၼႂ်းႁိူၼ်း၊ ထႅင်ႈၵေႃႉၼိုင်ႈသမ်ႉ ပႂ်ႉဝႆႉတီႈၼိူဝ်ၵႃး။ လႆႈငိၼ်းဝႃႈ ၶဝ်ႈယိုဝ်းၸဝ်ႈႁိူၼ်း ၽူႈၸၢႆး ဢႃယု 50 ပၢႆ ၵေႃႉၼိုင်ႈ လူႉတၢႆထင်တီႈ ၼႂ်းႁိူၼ်း။ ယဝ်ႉၵေႃႈ လႆႈၵႂႃႇငိုၼ်း ၵူၺ်းၵႃႈ ငိုၼ်းတႄႉလႆႈၵႂႃႇၵႃႈႁိုဝ်တႄႉ ပႆႇႁူႉၶႃႈ”- ဝႃႈၼႆ။

ႁိူၼ်းၵူၼ်းမိူင်း ဢၼ်ၺႃးၸူၼ်ၼႆႉ ပိုတ်ႇပႃးဝႆႉ ႁၢၼ်ႉၶၢႆၶူဝ်းၵုၼ်ႇၶွင်ၵိၼ်ယႅမ်ႉပႃးထႅင်ႈ ႁိူၼ်းၼႆႉ မီးၾၢႆႇႁွင်ႇၵၢတ်ႇ ဝဵင်းၵုၼ်ႁဵင်။

“ၸဝ်ႈၶွင်ႁိူၼ်းၼႆႉ ဢမ်ႇသူႈၵႂႃႇလႂ် ပိုတ်ႇသႅင်ႇသေ ၶၢႆၶူဝ်းတီႈႁိူၼ်းမၼ်းၸၢႆး ၸိူင်ႉၼႆၵူၺ်း။ မၼ်းၸၢႆး ပဵၼ်ၵူၼ်းလီ ၸွမ်းၼင်ႇ ႁဝ်းၶႃႈႁူႉတႄႉ”- ၵူၼ်းပိုၼ်ႉတီႈ ဝဵင်းၵုၼ်ႁဵင် သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၸုမ်းဢမ်ႇႁူႉၾၢႆႇ ၸိူဝ်းၼၼ်ႉ ပၢႆႈလွတ်ႈဝႆႉ ယဝ်ႉၵေႃႈ ပဵၼ်ၽူႈၸၢႆး တင်းမူတ်း ၶီႇၵႃး Crown သီၶၢဝ် မႃးၸွမ်းၵၼ် လမ်းၼိုင်ႈ ၼႆယဝ်ႉ။

တင်ႈတႄႇ သိုၵ်းမၢၼ်ႈ ယိုတ်းမိူင်းမႃး ၸမ် 4 ပီၼႆႉ လွင်ႈၸူၼ်ၵၼ် ထိုင်တီႈၶႃႈႁႅမ်ၵၼ်တၢႆ တီႈဝဵင်းၵုၼ်ႁဵင် ၸိူင်ႉၼႆၼႆႉ ပႆႇယၢမ်ႈမီးမႃးသေပွၵ်ႈ။ ပွၵ်ႈၼႆႉတႄႉ လႆႈဝႃႈပဵၼ်ပွၵ်ႈ ဢၼ်ႁၢႆႉႁႅင်းသုတ်းယဝ်ႉ ဝႃႈၼႆ။

ၸဝ်ႈၶွင်ႁိူၼ်းၼၼ်ႉသမ်ႉ ၸိုဝ်ႈႁွင်ႉ လုင်းသႅင်ယႃႈလႄႈ ပႃႈငိုၼ်းဢွင်ႇ ၵေႃႉလူႉတၢႆၵႂႃႇသမ်ႉ ပဵၼ်လုင်းသႅင်ယႃႈ – သိုဝ်ႇၶၢဝ်ႇတႆးလွတ်ႈလႅဝ်း (Tai Freedom) ဢွၵ်ႇဝႆႉၼင်ႇၼႆ။