ဝၼ်းတီႈ 03/12/2024 ၼႆႉ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ – ၸွမ်းၼင်ႇ မိူင်းၶႄႇၶဝ်ႈယူႇ ၵႄႈၵၢင်ငူပ်ႉငီႉပၼ်သေ တပ်ႉသိုၵ်းၵဝ်ႈၵၢင်ႉ ထိုင်ဝႆႉတီႈလႂ်ၵေႃႈ တေၵိုတ်းတိုၵ်းဝႆႉလႄႈ တေ ဢုပ်ႇဢူဝ်းၵၼ်တင်း သိုၵ်းမၢၼ်ႈၵႂႃႇ ဝႃႈၼႆ။
ဝၢႆးလင် ၶေႃႈပိုၼ်ၽၢဝ်ႇဢွၵ်ႇၵႂႃႇတဵမ် 10 ဝၼ်းပၢႆ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ၸင်ႇႁူပ်ႉ ဢုပ်ႇၵၼ် တီႈဝဵင်းၶုၼ်ႊမိင်ႊ၊ မိူင်းၶႄႇ တႃႇၶၢဝ်းတၢင်း (2) ဝၼ်း တႄႇဢဝ် ဝၼ်းတီႈ 15 -16/12/2024 ၼႆႉ။ ၾၢႆႇသိုၵ်းမၢၼ်ႈ ပဵၼ်ၸွမ်သိုၵ်း ၵူဝ်ႇၵူဝ်ႇဢူး (ႁူဝ်ၼႃႈ ၸုမ်းၽႅၼ်ၵၢၼ်သိုၵ်း ၶိုၵ်ႉတွၼ်းလႄႈ ၾၢႆႇၵႅတ်ႇၶႄႇ သိုၵ်းမၢၼ်ႈ) ဢွၼ်ႁူဝ်မုၵ်ႉၸုမ်းသေ ၶဝ်ႈႁူမ်ႈၶိုၼ်ႈႁွတ်ႈဢုပ်ႇၵုမ် ။
တီႈၼႂ်းပၢင်ဢုပ်ႇၵုမ် ဝၼ်းတီႈၼိုင်ႈၼၼ်ႉ မီးလွင်ႈဢၼ်တူၵ်းလူင်းၵၼ်ဢမ်ႇလႆႈလႄႈ ဝၢႆးလင် ပၢင်ဢုပ်ႇဢူဝ်း (2) ဝၼ်းသုတ်းယဝ်ႉၵႂႃႇၵေႃႈ ဢမ်ႇလႆႈၶေႃႈတူၵ်းလူင်းသင်သေ ပၢင်ဢုပ်ႇၵုမ် ဢမ်ႇမီးလွင်ႈဢွင်ႇမၢၼ် ၼႆယဝ်ႉ။
ၵွပ်ႈၼၼ်လႄႈ ပၢင်ႁူပ်ႉထူပ်း ဢုပ်ႇဢူဝ်းၵႄႈၵၢင်သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ဢၼ်မိူင်းၶႄႇ ၶဝ်ႈယူႇၵႄႈၵၢင်ငူပ်ႉငီႉပၼ်ၼႆႉ တေၶိုၼ်းၸတ်းႁဵတ်းၼႂ်းလိူၼ်ၵျႅၼ်ႊၼိဝ်ႊရီႊ ပီ 2025 ၼႆႉ ထႅင်ႈ ၵမ်းၼိုင်ႈ – ဝႃႈၼႆ။
ပၢင်ဢုပ်ႇၵုမ် ဢၼ်မီး ၽူႈမီးၸၼ်ႉသုင် ၾၢႆႇတပ်ႉသိုၵ်းမၢၼ်ႈဢွၼ်ႁူဝ်
တီႈၼႂ်းပၢင်ဢုပ်ႇၵုမ်ပွၵ်ႈၼႆႉ ၾၢႆႇသိုၵ်းမၢၼ်ႈ ပဵၼ်ၸွမ်သိုၵ်း ၵူဝ်ႇၵူဝ်ႇဢူး ဢွၼ်ႁူဝ် ဢိၵ်ႇပႃး ၵႅမ် ၸွမ်ႁၢၼ် တၢၼ်းၸေႃႇ (ၾၢႆႇႁူမ်ႇလူမ်ႈတပ်ႉသိုၵ်းမၢၼ်ႈ – ၸယၽ) လႄႈ ၸုမ်းတၢင်တူဝ်ၶိုၼ်ႈ ႁွတ်ႈ။ ပိူင်လူင် ဢုပ်ႇဢူဝ်းငူပ်ႉငီႉၵၼ် လွင်ႈတပ်ႉ ၼမ်လိူဝ်သေလွင်ႈငမ်းယဵၼ် – ၽူႈႁူႉႁၼ် ၸွမ်း တီႈၼႂ်းပၢင်ဢုပ်ႇၵုမ် လၢတ်ႈၼင်ႇၼႆ။
ၾၢႆႇသိုၵ်းၵဝ်ႈၵၢင်ႉ MNDAA သမ်ႉ ပဵၼ်လုၵ်ႈၸၢႆး ၽိူင်တႃႉသိူင်း – ၽိူင်ၶုၼ်း (ၽူႈႁပ်ႉပုၼ်ႈ ၽွၼ်း ၾၢႆႇၼွၵ်ႈမိူင်း) ဢွၼ်ႁူဝ် မုၵ်ႉၸုမ်းသေ ၶိုၼ်ႈႁွတ်ႈ ၼႆယဝ်ႉ။
လွင်ႈတၢင်းဢၼ်ႁဵတ်းႁႂ်ႈ ပၢင်ဢုပ်ႇၵုမ် ဢမ်ႇဢွင်ႇမၢၼ်ၼႆႉ ၵဵဝ်ႇၶွင်ႈၵၼ်တၢင်း ၶေႃႈတုၵ်းယွၼ်း တပ်ႉသိုၵ်းတင်းသွင်ၾၢႆႇ ဝႃႈၼႆ။
ဢၼ်ၾၢႆႇသိုၵ်းမၢၼ်ႈ ဢဝ်ဢုပ်ႇဢူဝ်းငူပ်ႉငီႉၵၼ်တင်း သိုၵ်းၵဝ်ႈၵၢင်ႉၼၼ်ႉ မီး (3) ၶေႃႈ –
- ႁႂ်ႈသိုၵ်းၵဝ်ႈၵၢင်ႉ ထွႆဢွၵ်ႇဝဵင်းလႃႈသဵဝ်ႈၵႂႃႇ ၵမ်းၸၼ်ႉၸၼ်ႉ
- ႁႂ်ႈသိုၵ်းၵဝ်ႈၵၢင်ႉ ပွႆႇပၼ်ၶိုၼ်း ႁၢႆးသိုၵ်း သိုၵ်းမၢၼ်ႈ (ပႃးၸဵမ်တူဝ် ၽူႈၵွၼ်းတပ်ႉလႄႈ တင်း သိုၵ်းႁၢၼ်)
- ႁႂ်ႈပိုတ်ႇပၼ်ၶိုၼ်း ၵဵတ်ႉ/လၢၼ်ႇ လႅၼ်လိၼ် လႃႈသဵဝ်ႈ – ၵုၼ်လူင် – ဝဵင်းၼမ်ႉၽႃႈ (ၶျိၼ်း သူၺ်ႇႁေႃႇ) ၸိူဝ်းၼႆႉ ဝႃႈၼႆ။
ၾၢႆႇသိုၵ်းၵဝ်ႈၵၢင်ႉတႄႉ ပိူင်လူင်တုၵ်းယွၼ်း ႁႂ်ႈသိုၵ်းမၢၼ်ႈ ဢဝ်ဝဵင်းလႃႈသဵဝ်ႈ သႂ်ႇပၼ်တီႈၼႂ်း ၼႃႈလိၼ်ၶိုၵ်ႉတွၼ်းမၢႆ 1 (ၼႃႈလိၼ်ဢုပ်ႉပိူင်ႇၽွင်းငမ်းတူဝ်ၵဝ်ႇ ၵဝ်ႈၵၢင်ႉ ၸွမ်းၼင်ႇ ပိူင်ငဝ်ႈ ပိုင်းမိူင်း 2008) – ၽူႈတူင်ႉၼိုင်ၵၢၼ်သိုၵ်း ၼႂ်းမိူင်းတႆးပွတ်းႁွင်ႇ လၢတ်ႈၼင်ႇၼႆ။
ၾၢႆႇသိုၵ်းမၢၼ်ႈ ဢမ်ႇၽွမ်ႉၸွမ်း တႃႇတေဢဝ်ဝဵင်းလႃႈသဵဝ်ႈ သႂ်ႇၼႂ်းၼႃႈလိၼ်ၶိုၵ်ႉတွၼ်းမၢႆ (1) ။ သိုၵ်းမၢၼ်ႈ လၢတ်ႈဝႃႈ ႁႂ်ႈသိုၵ်းၵဝ်ႈၵၢင်ႉထွႆဢွၵ်ႇဝဵင်းလႃႈသဵဝ်ႈ ဢွၼ်တၢင်းယဝ်ႉၵွၼ်ႇ ၸင်ႇ သိုပ်ႇဢုပ်ႇၵုမ်ၵၼ်ထႅင်ႈ – ဝႃႈၼႆ။
တႃႇတေထွႆဢွၵ်ႇလႃႈသဵဝ်ႈလႄႈ တႃႇတေပွႆႇပၼ်ႁၢႆးသိုၵ်း သိုၵ်းမၢၼ်ႈၼၼ်ႉ ၾၢႆႇသိုၵ်းၵဝ်ႈၵၢင်ႉၵေႃႈ ဢမ်ႇၽွမ်ႉၸွမ်း။ တိင်ႉသျီႊၵျွၼ်ႊ ၽူႈတၢင်တူဝ်ၶိုၵ်ႉတွၼ်းမိူင်းၶႄႇတႄႉ လၢတ်ႈဝႃႈ – ပၢင် ဢုပ်ႇၵုမ်ပွၵ်ႈၼႆႉ ဢမ်ႇလႆႈၽွၼ်းလႆႈ ၸွမ်းၼင်ႇမုင်ႈမွင်းဝႆႉလႄႈ ၸႂ်ဢမ်ႇလီၸွမ်းတႄႉတႄႉယူႇ ဝႃႈၼႆ။
ၽူႈတူင်ႉၼိုင်ၵၢၼ်သိုၵ်း ၵေႃႉၼိုင်ႈ လၢတ်ႈဝႃႈ – တႃႇႁႂ်ႈသိုၵ်းၵဝ်ႈၵၢင်ႉထွႆဢွၵ်ႇ လႃႈသဵဝ်ႈ၊ တႃႇ ဢဝ်ဝဵင်းလႃႈသဵဝ်ႈ ပၼ်သိုၵ်းမၢၼ်ႈၶိုၼ်းၼၼ်ႉ ၾၢႆႇမိူင်းၶႄႇ လၢတ်ႈဝႆႉတီႈသိုၵ်းၵဝ်ႈၵၢင်ႉ ၵွၼ်ႇ ၼႃႈ ပႆႇထိုင်ပၢင်ၵုမ်ၼၼ်ႉယဝ်ႉ။ ၵူၺ်း ၵႃႈ ၽိူဝ်ႇထိုင်ဝၼ်းပၢင်ၵုမ်မႃး ၽူႈတၢင်တူဝ်သိုၵ်းၵဝ်ႈ ၵၢင်ႉၶဝ် သမ်ႉဢမ်ႇယွမ်းၽွမ်ႉၸွမ်း ဝႃႈၼႆ။
ၾၢႆႇၼိုင်ႈၵေႃႈ ၽိူင်တႃႉသိူင်း ႁူဝ်ၼႃႈသိုၵ်းၵဝ်ႈၵၢင်ႉ MNDAA ဢၼ်ယူတ်းယႃတူဝ်ဝႆႉယူႇတီႈ မိူင်းၶႄႇၼၼ်ႉ တေသိုပ်ႇပဵၼ်ၸိူင်ႉႁိုဝ် ၊ ပွၵ်ႈမိူဝ်းၶိုၼ်းယဝ်ႉႁိုဝ်ၼႆတႄႉ ဢမ်ႇလႆႈႁူႉၸွမ်း တႅတ်ႈတေႃး။
ဝၢႆးလင် ၽႅၼ်ယၼ်ႇသိုၵ်း 1027 ၵမ်းထူၼ်ႈၼိုင်ႈသေ တေႃႇထိုင်လိူၼ်မၢတ်ႊၶျ် ပီ 2024 ၼႆႉ ၸွမ်းၼင်ႇ မိူင်ၶႄႇၶဝ်ႈယူႇၵႄႈၵၢင်ငူပ်ႉငီႉပၼ်သေ သိုၵ်းမၢၼ်ႈတင်း ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်း ႁူပ်ႉဢုပ်ႇ “ပၢင်ဢုပ်ႇၵုမ် ႁၢႆႊ ၵျိၼ်ႊ” ယဝ်ႉတူဝ်ႈၵႂႃႇ 4 ပွၵ်ႈ။
ဝၢႆးသေ ပၢင်ဢုပ်ႇၵုမ် ယဝ်ႉတူဝ်ႈၵႂႃႇ 4 ပွၵ်ႈလႄႈ ဢမ်ႇမီးလွင်ႈဢွင်ႇမၢၼ်ၼၼ်ႉ ပၢင်ဢုပ်ႇၵုမ်လႆႈ ၵိုတ်းယင်ႉၵႂႃႇ၊ ၽႅၼ်ယၼ်ႇသိုၵ်း 1027 ၵမ်ႈထူၼ်ႈသွင်ၵေႃႈ ၵိူတ်ႇပဵၼ်ၶိုၼ်ႈမႃး။ ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်း ပိုတ်ႇၼႃႈသိုၵ်းၼႂ်းမိူင်းတႆးပွတ်းႁွင်ႇ ပႃးၸဵမ် ၼႂ်းမိူင်းရၶႅင်ႇ ၸိူဝ်းၼႆႉ သေ ၶဝ်ႈယိုတ်းဝဵင်း ဢၼ်သိုၵ်းမၢၼ်ႈ ၵုမ်းၵမ်ဝႆႉ။
ဝၢႆးသေ သိုၵ်းၵဝ်ႈၵၢင်ႉ MNDAA ယိုတ်းလႆႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸဵင်ႇႁွင်ႇဝၼ်းဢွၵ်ႇလႄႈ ဝဵင်းလႃႈသဵဝ်ႈ ၽွင်းၽႅၼ်ယၼ်ႇသိုၵ်း 1027 ၵမ်းထူၼ်ႈသွင်ၼၼ်ႉယဝ်ႉ ၾၢႆႇသိုၵ်းမၢၼ်ႈလၢတ်ႈဝႃႈ တေဢမ်ႇၶိုၼ်ႈႁွတ်ႈ ပၢင်ဢုပ်ႇၵုမ်ဢၼ်မိူင်းၶႄႇၶပ်ႉၶိုင်ပၼ်ၼၼ်ႉယဝ်ႉၼႆသေ ပၢင်ဢုပ်ႇၵုမ် လႆႈၵိုတ်းယင်ႉၵႂႃႇတင်းပိုၵ်း။
ၸွမ်းၼင်ႇ ၶေႃႈဢုပ်ႇဢူဝ်း တီႈၼႂ်းပၢင်ၵုမ်ႁၢႆႊၵျိၼ်ႊ သိုၵ်းမၢၼ်ႈတင်း ၸုမ်းသိုၵ်းဢူၺ်းလီ ပွတ်းႁွင်ႇ ပွၵ်ႈၵမ်းလိုၼ်း ၼၼ်ႉၵေႃႈ ၾၢႆႇသိုၵ်းမၢၼ်ႈ လၢတ်ႈဝႆႉဝႃႈ မၵ်းမၼ်ႈယွမ်းႁပ်ႉ ပိုၼ်ႉတီႈၵဝ်ႈၵၢင်ႉ ပဵၼ်ၼႃႈလိၼ်ၶိုၵ်ႉတွၼ်း မၢႆ(1) ယူႇ။ ၵူၺ်းၵႃႈ တႃႇတေမၵ်းမၼ်ႈပၼ်ၼႃႈလိၼ် ၼၼ်ႉတႄႉ ႁႂ်ႈသိုၵ်းၵဝ်ႈၵၢင်ႉ ထွႆတပ်ႉဢွၵ်ႇၼႂ်းပိုၼ်ႉတီႈ ဢၼ်ယိုတ်းဝႆႉ ၵမ်ႈၽွင်ႈၼၼ်ႉယဝ်ႉ ၸင်ႇသိုပ်ႇဢုပ်ႇဢူဝ်းၵၼ်ၵႂႃႇထႅင်ႈ – ဝႃႈၼႆ။
ဝၢႆးလင်ၼၼ်ႉယဝ်ႉ မိူင်းၶႄႇ ဢွၵ်ႇလိၵ်ႈပၼ်ႁႅင်းဢီး ႁႂ်ႈသိုၵ်းၵဝ်ႈၵၢင်ႉ MNDAA တင်း သိုၵ်းတဢၢင်း TNLA ၵိုတ်းတိုၵ်း။ လိူဝ်ၼၼ်ႉဢမ်ႇၵႃး ၶၢဝ်းတၢင်း ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝင် ယိ မႃးမိူင်းမၢၼ်ႈၼၼ်ႉၵေႃႈ ပဵၼ်လွင်ႈ ဢၼ်ၼႄဝႃႈၶႄႇ ၸုၵ်းမၼ်ႈၾၢႆႇ တပ်ႉသိုၵ်းမၢၼ်ႈဝႆႉယူႇ – ၽူႈလဵပ်ႈႁဵၼ်းၵၢၼ်မိူင်း ၵမ်ႈၽွင်းထတ်းသၢင်ၼင်ႇၼႆ။
ၼႂ်းၶေႃႈပိုၼ်ၽၢဝ်ႇ သိုၵ်းၵဝ်ႈၵၢင်ႉမိူဝ်ႈၸဝ်ႉၼၼ်ႉ ပႃးဝႆႉဝႃႈ လွင်ႈႁၼ်ထိုင်ဢမ်ႇမိူၼ်ၵၼ် ၼႂ်းၵႄႈသွင်ၸုမ်းၼၼ်ႉ မုင်ႈမွင်းဝႆႉဝႃႈ တေဢဝ်ၵၢၼ်မိူင်းၵႄႈလိတ်ႈၵႂႃႇ။
ယူႇတီႈ သိုၵ်းၵဝ်ႈၵၢင်ႉ ၵမ်ႉထႅမ်ၾၢႆႇပိူင်ၵၢၼ်မိူင်းယူႇသေတႃႉ လၢတ်ႈပႃးဝႆႉဝႃႈ တေသိုပ်ႇၸႂ်ႉတိုဝ်း သုၼ်ႇၵႅတ်ႇၶႄတူဝ်ၵဝ်ႇယူႇၼႆလႄႈ ၵဵဝ်ႇၵပ်းၵၢၼ်ၵုမ်းထိင်းပိုၼ်ႉတီႈၼၼ်ႉ မီးၶေႃႈၸုၵ်းမၼ်ႈၵႅၼ်ႇယူႇၼႆ ၽူႈလဵပ်ႈႁဵၼ်းၵၢၼ်သိုၵ်းၶဝ် ထတ်းသၢင်ဝႆႉၼင်ႇၼႆ။
ၵူၺ်းၵႃႈ ပၢင်ဢုပ်ႇဢူဝ်းၼႂ်းဝၼ်းတီႈ 15/12/2024 ၼႆႉ ဢၼ်ဝႆႉပဝ်ႉမၢႆဝဵင်းလႃႈသဵဝ်ႈသေ ဢုပ်ႇဢူဝ်းၵၼ်ၼၼ်ႉ ယွၼ်ႉဢမ်ႇလႆႈၶေႃႈတူၵ်းလူင်သင်လႄႈ တီႈဝဵင်းလႃႈသဵဝ်ႈ ၸၢင်ႈမီးၽေး လွင်ႈ သိုၵ်းမၢၼ်ႈပွႆႇမၢၵ်ႇၼႆ ၽူႈလဵပ်ႈ ႁဵၼ်းၵၢၼ်မိူင်း လၢတ်ႈၼင်ႇၼႆ။
ၵျေႇသိၼ်ႊတႃႇဝႃႈ ၽူႈၸီႉသင်ႇ ၾၢႆႇလဵပ်ႈႁဵၼ်းၵၢၼ်မိူင်း USIP တႄႉ လၢတ်ႈဝႆႉတႅတ်ႈတေႃးဝႃႈ မိူင်းၶႄႇ ၵမ်ႉယၼ်ဝႆႉၾၢႆႇသိုၵ်းမၢၼ်ႈ ဝႃႈၼႆ။
ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ၵျွင်းၽြႃးၶႄႇ တီႈဝဵင်းလႃႈသဵဝ်ႈသေတႃႉ မိူင်းၶႄႇ ဢမ်ႇတူၵ်ႇတၵ်ႉသင်။ ၼင်ႇႁိုဝ် တေလႆႈၶိုၼ်းဢွင်ႈတီႈၼၼ်ႉ မိူင်းၶႄႇ တေသိုပ်ႇၵမ်ႉၸွႆႈသိုၵ်းမၢၼ်ႈၵႂႃႇယူႇၼႆ ၵျေႇသိၼ်ႊတႃႇဝႃႇ လၢတ်ႈဝႆႉ တၢင်းႁၼ်ထိုင်မၼ်းၼင်ႇၼႆ။
ၵူၺ်းၵႃႈ ၾၢႆႇသိုၵ်းၵဝ်ႈၵၢင်ႉ MNDAA ၵေႃႈ ၼင်ႇႁိုဝ် တေဢမ်ႇသုမ်းၶိုၼ်းၼႃႈတီႈ ယိုတ်းၵုမ်း လႆႈဝႆႉၼၼ်ႉ တေသိုပ်ႇၶဵင်ႈၶႅင်တေႃႇသူႈၵႂႃႇယူႇ။
ၾၢႆႇမိူင်းၶႄႇ ၸၢင်ႈယႅၵ်ႈ ဝဵင်းလႃႈသဵဝ်ႈ ပၼ်သိုၵ်းမၢၼ်ႈတင်း သိုၵ်းၵဝ်ႈၵၢင်ႉ။ မိူၼ်ၼင်ႇဝႃႈ ၾၢႆႇသိုၵ်းမၢၼ်ႈ ဢဝ်ႁူမ်ႇလူမ်ႈဝဵင်း ၾၢႆႇသိုၵ်းၵဝ်ႈၵၢင်ႉ ၸတ်းၵၢၼ်ၽွင်းငမ်းဝဵင်းၵႂႃႇ။ ၵူၺ်းၵႃႈ လၢႆးၼႆႉ ဢမ်ႇၸႂ်ႈၶေႃႈတွပ်ႇ ဢၼ်သွင်ၸုမ်းၶႂ်ႈလႆႈ၊ ယူႇတီႈမိူင်းၶႄႇ ၸၢင်ႈပၼ်ႁႅင်းဢီးမႃးယူႇၼႆ ၵျေႇ သိၼ်ႊတႃႇဝႃႇ ထတ်းသၢင်လၢတ်ႈဝႆႉၼင်ႇၼႆ။
သိုၵ်းတဢၢင်း TNLA ၵေႃႈ ယွၼ်ႉႁႅင်းဢီးမိူင်းၶႄႇသေ ပူၼ်ႉမႃး မိူဝ်ႈဝၼ်းတီႈ 25/11/2024 ၼၼ်ႉ ပိုၼ်ၽၢဝ်ႇပဵၼ်တၢင်းၵၢၼ်ဝႃႈ တေဢုပ်ႇဢူဝ်လွင်ႈငမ်းယဵၼ်ၵၼ်တင်း တပ်ႉသိုၵ်းမၢၼ်ႈ။ ဝၢႆးၼၼ်ႉ လွင်ႈသိုၵ်းတဢၢင်း ထူဝ်းသိုၵ်းတိုၵ်းသိုၵ်းမၢၼ်ႈၵေႃႈ ၵိုတ်းဝႆႉ။ ၾၢႆႇၼိုင်ႈၵေႃႈ မိူင်းၶႄႇ တင်း သိုၵ်းတဢၢင်း မီးလွင်ႈႁူပ်ႉထူပ်းဢုပ်ႇဢူဝ်းၵၼ်ဝႆႉ။
ၵဵဝ်ႇၵပ်းၵၢၼ်မိူင်းသေ တၢင်းႁၼ်ထိုင် TNLA မီးဝႆႉၸိူင်ႉႁိုဝ်ဢၼ်ဝႃႈၼၼ်ႉ လုၵ်ႉတီႈမိူင်းၶႄႇ လႆႈတွင်ႈထၢမ်ၵၼ်ဝႆႉယူႇၼႆ ၸွမ်ႁၢၼ် တႃးၽူင်းၵျေႃႇ ၽူႈၼမ်းၼႂ်းၵူႈလွင်ႈလွင်ႈ TNLA ယိုၼ် ယၼ် လၢတ်ႈဝႆႉ တီႈသိုဝ်ႇ BBC ၼင်ႇၼႆ။
မီးၶၢဝ်ႇဢွၵ်ႇမႃးထႅင်ႈဝႃႈ ဝၢႆးႁူပ်ႉ သိုၵ်းၵဝ်ႈၵၢင်ႉယဝ်ႉ မီးၽႅၼ်တႃႇတေႁူပ်ႉဢုပ်ႇတင်း သိုၵ်း တဢၢင်း ဝႃႈၼႆ။ ၵူၺ်းၵႃႈ တေႃႇထိုင်ဝၼ်းတီႈ 17/12/2024 ၼႆႉတႄႉ ၾၢႆႇမိူင်းၶႄႇ ပႆႇတူၵ်ႇ လၢတ်ႈသင်မႃးၼႆ ၽူႈၸမ်ၸႂ်တင်း သိုၵ်းတဢၢင်း လၢတ်ႈၼင်ႇၼႆ။
သင်ဝႃႈ ပဵၼ်ႁူပ်ႉၵၼ်မႃးၸိုင် ၾၢႆႇသိုၵ်းမၢၼ်ႈ ၸၢင်ႈတုၵ်းယွၼ်းမႃး ၼႃႈတီႈဢၼ်သိုၵ်းတဢၢင်း TNLA ယိုတ်းၵုမ်းလႆႈဝႆႉ၊ တႃႇတေပွႆႇပၼ်ၶိုၼ်းၼႃႈတီႈၸိူဝ်းၼၼ်ႉတႄႉ တေဢမ်ႇငၢႆႈ။ မိူဝ်ႈယိုဝ်း တိုၵ်းသိုၵ်းမၢၼ်ႈၼၼ်ႉ သိုၵ်းဢူၺ်းလီၵေႃႈ ၶဝ်ႈပႃးဝႆႉ။ လိူဝ်ၼၼ်ႉ လႆႈဢဝ်သၢႆၸႂ်ၵူၼ်းတင်း ၼမ်သေ ယိုဝ်းတိုၵ်းမႃးလႄႈ တေဢမ်ႇၸၢင်ႈပွႆႇပၼ်ၶိုၼ်းၼႆ ၸွမ်ႁၢၼ် တႃးၽူင်းၵျေႃႇ လၢတ်ႈ ဝႆႉၼင်ႇၼႆ။
ၵူၺ်းၵႃႈ ၸွမ်းၼင်ႇပဵၼ်ၾိင်ႈၵၢၼ်ဢုပ်ႇဢူဝ်းၼၼ်ႉ လွင်ႈယွၼ်ႇယၢၼ်းပၼ်ၵၼ်တႄႉ ၸၢင်ႈမီး ယူႇ။ လႅၼ်ၶႅၼ်ႈ ဢၼ်ဢမ်ႇၸၢင်ႈၶၢမ်ႈၵေႃႈ တေမီး။ ၵဵဝ်ႇၵပ်းၼႃႈတီႈသေ တႃႇတေယွမ်းပၼ်တႄႉ တေယၢပ်ႇယူႇၼႆ TNLA လၢတ်ႈဝႆႉၼင်ႇၼႆ။
ၾၢႆႇၼိုင်ႈၵေႃႈ လွင်ႈသိုၵ်းမၢၼ်ႈ ဢဝ်တၢင်းၵမ်ႉၸွႆႈမိူင်းၶႄႇသေ ႁူပ်ႉထူပ်းဢုပ်ႇဢူဝ်းၵၼ်တင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်ယိုတ်းၵုမ်းလႆႈဝႆႉ ၼႃႈတီႈတင်းၼမ်ၼၼ်ႉ မိူၼ်ၼင်ႇ ယႅၵ်ႈဢွၵ်ႇ ၼႂ်းတပ်ႉၸုမ်းလုၵ်ႉၽိုၼ်ႉလႄႈ NUG ယဝ်ႉၼႆ မီးၶေႃႈထတ်းသၢင်ဝႆႉၼင်ႇၼႆ။
ၾၢႆႇသိုၵ်းမၢၼ်ႈ ယႅၵ်ႈပႅတ်ႈၸုမ်းလုၵ်ႉၽိုၼ်ႉသေတႃႉ ၶေႃႈတွပ်ႇလိုၼ်းသုတ်းၼႆႉ ဢိင်ဝႆႉၼိူဝ် ၵူၼ်းမိူင်းယဝ်ႉၼႆ တေႃႇသိၼ်ႇမႃႇဢွင်ႇ ၽွင်းလူင်ၾၢႆႇၼွၵ်ႈမိူင်း လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG တွပ်ႇဝႆႉတီႈသိုဝ်ႇ BBC ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ