သိုၵ်းၵဝ်ႈၵၢင်ႉ MNDAA ၼႄၶေႃႈဢၢင်ႈဝႃႈ သူႇသမ်းယႃႈမဝ်းၵမ်ၼႆသေ တီႉၺွပ်းၵူၼ်းဝဵင်းသႅၼ်ဝီ မၢင်ၸိူဝ်း သူင်ႇ ၵႂႃႇတၢင်းဝဵင်းမိူင်းယႆ မၢင်ၸိူဝ်း လႆႈပၼ်ငိုၼ်းၼပ်ႉႁူဝ်ပၢၵ်ႇသႅၼ် ၸင်ႇပွႆႇလွတ်ႈမႃးၶိုၼ်း ဝႃႈၼႆ။

တႄႇလိူၼ်ဢွၵ်ႊထိူဝ်ႊပိူဝ်ႊပူၼ်ႉမႃး သိုၵ်းၵဝ်ႈၵၢင်ႉ ၼႄၶေႃႈဢၢင်ႈ ၽဵဝ်ႈမူၺ်ႉယႃႈမဝ်းၵမ်ၼႆသေ ၵူတ်ႇထတ်းတီႉၺွပ်း ၵူၼ်းသူႇသမ်းၵႃႉၶၢႆယႃႈမဝ်းၵမ် ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ၼၢင်းယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၵူၼ်းၺႃး တီႉၺွပ်းမွၵ်ႈ 15 ၵေႃႉၼႆႉ လႆႈထုၵ်ႇသူင်ႇ ၵႂႃႇတၢင်းဝဵင်းမိူင်းယႆသေ မၢင်ၸိူဝ်း လႆႈၶုတ်းလုၵ်းပဵမ်ႇလုၵ်းလိၼ်၊ မၢင်ၸိူဝ်း လႆႈတႅပ်းမႆႉပၼ် တႃႇသိုၵ်းၵဝ်ႈၵၢင်ႉ၊ မၢင်ၸိူဝ်း လႆႈပၼ်ငိုၼ်း 170 သႅၼ်သေ ထုတ်ႇတူဝ်မႃးၶိုၼ်း”- ဝႃႈၼႆ။  

ဢိင်ၼိူဝ် လွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတီႈသိုၵ်းၵဝ်ႈၵၢင်ႉ MNDAA သေတႃႉ ၵပ်းသိုပ်ႇဢမ်ႇလႆႈလႄႈ ပႆႇၸၢင်ႈယိုၼ်ႈယၼ်။

ဝဵင်းသႅၼ်ဝီၼႆႉ ၸုမ်းသိုၵ်းၵဝ်ႈၵၢင်ႉၶဝ် လေႃႇတိုၵ်းသိုၵ်းမၢၼ်ႈသေ ယိုတ်းၵုမ်းလႆႈဝႆႉ မိူဝ်ႈၽႅၼ်ယၼ်ႇသိုၵ်း 1027 ၊ ဝၢႆးၼၼ်ႉ တႄႇၵၢၼ်ၽွင်းငမ်းမႃး တေႃႇထိုင်ဝၼ်းမိူဝ်ႈၼႆႉ။

မိူၼ်ၼႆ တီႈဝဵင်းလႃႈသဵဝ်ႈၵေႃႈ သိုၵ်းၵဝ်ႈၵၢင်ႉ ၵူတ်ႇထတ်းတီႉၺွပ်း ၵူၼ်းသူႇသမ်းၵႃႉၶၢႆယႃႈမဝ်းၵမ်ယူႇၼႆ ၽူႈၶဝ်ႈပႃး ၼႂ်းၸုမ်းပူၵ်းပွင်ဝဵင်းလႃႈသဵဝ်ႈ လၢတ်ႈဝႆႉၼင်ႇၼႆ။