သိုၵ်းၵဝ်ႈၵၢင်ႉ MNDAA တေၶွတ်ႇၽွတ်ႈ ၸုမ်းတူင်ႉၼိုင်လွင်ႈႁူမ်ႇလူမ်ႈ ၼႂ်းဝဵင်းလႃႈသဵဝ်ႈ ဝႃႈၼႆသေ ထႅင်ႈၾၢႆႇၼိုင်ႈၵေႃႈ သိုၵ်းမၢၼ်ႈ တိုၵ်ႉဢဝ်ၶိူင်ႈမိၼ်မႃးပွႆႇမၢၵ်ႇယူႇၶိူဝ်းယႂ်းလႄႈ ႁဵတ်းႁႂ်ႈၵူၼ်းမိူင်းပႆႇႁတ်း တမ်းၸႂ်။

ယၢမ်းလဵဝ် တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ယူႇတီႈ သိုၵ်းၵဝ်ႈၵၢင်ႉ MNDAA ႁၢင်ႈႁႅၼ်း တေၶွတ်ႇၽွတ်ႈၸုမ်းတႃႇတူင်ႉၼိုင် ဢဝ်လွင်ႈႁူမ်ႇလူမ်ႈပၼ်ၼႂ်းဝဵင်းသေတႃႉ ၵူၼ်းမိူင်းတႄႉ ယင်းတိုၵ်ႉလႆႈ မႆႈၸႂ်လွင်ႈႁူမ်ႇလူမ်ႈ ၵူဝ်သိုၵ်းမၢၼ်ႈ မႃးပွႆႇမၢၵ်ႇ ၼႆယဝ်ႉ။

ၵူၼ်းဝဵင်းလႃႈသဵဝ်ႈ ၽူႈယိင်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းၵဝ်ႈၵၢင်ႉၶဝ် ဢမ်ႇဢွၵ်ႇၶေႃႈပိုၼ် ၽၢဝ်ႇဝႃႈ ၵတ်းယဵၼ်ယဝ်ႉ ယူႇလႆႈယဝ်ႉ ဢမ်ႇလူဝ်ႇၵူဝ်သင်ယဝ်ႉ ႁွင်ႉပီႈၼွင်ႉသူမႃးလႃႈ ၼႆၸိူဝ်းၼႆႉ ဢမ်ႇဝႃႇၶႃႈ။ ၽႂ်ၵေႃႈ ပႆႇႁတ်းပွၵ်ႈ ပႃးၸဵမ်ႁဝ်းယဝ်ႉ။ ဢၼ်မႆႈၸႂ်သေပိူၼ်ႈတႄႉ ၵူဝ်မၢၵ်ႇၶိူင်ႈမိၼ် မႃးတူၵ်းသႂ်ႇၶႃႈဢေႃႈ ၼၼ်ႉတႄႉ တေမႃးၶၢဝ်းလႂ် တေမႃးမိူဝ်ႈလႂ်တႄႉ ဢမ်ႇၸၢင်ႈလၢမ်းလႆႈ”- ဝႃႈၼႆ။

ဢိင်ၼိူဝ် လွင်ႈသိုၵ်းၵဝ်ႈၵၢင်ႉ တေဢဝ်လွင်ႈႁူမ်ႇလူမ်ႈပၼ် ၼႂ်းဝဵင်းလႃႈသဵဝ်ႈၼႆႉ ယူႇတီႈ သိုၵ်းၶဝ်သေ ႁႂ်ႈၶဝ်ပေႃးပၼ်လွင်ႈမၼ်ႈၵႅၼ်ႇဝႃႇ တမ်းၸႂ်လႆႈယဝ်ႉ မၼ်းဢမ်ႇလူဝ်ႇၵူဝ်သင်ယဝ်ႉ ဢမ်ႇမီးဢီႇသင်ယဝ်ႉ ၸဵမ်ၸိူဝ်းၼႆႉ ႁႂ်ႈလၢတ်ႈပၼ်လွင်ႈဢုၼ်ႇၸႂ် ၸိူင်ႉၼၼ်တႄႉ ဢမ်ႇမီး – ၵူၼ်းပိုၼ်ႉတီႈလၢတ်ႈ။

ၽွင်းသိုၵ်းၵဝ်ႈၵၢင်ႉ MNDAA ၵုမ်းဝဵင်းလႃႈသဵဝ်ႈမႃးၼႆႉ လႆႈဢွၵ်ႇပၵ်းပိူင်မၢႆမီႈမႂ်ႇ လၢႆမဵဝ်း။ ယၢမ်းလဵဝ် ယွၼ်ႉမီးပိူင် ဢုပ်ႇပိူင်ႇၽွင်းငမ်းမႃးလၢႆမဵဝ်းယဝ်ႉလႄႈ တႃႇႁဵတ်းၵၢၼ်ၵႃႉၶၢႆ ၸိူဝ်းၼႆႉၵေႃႈ ပႆႇထၢင်ႇႁၢင်ႈ ၵႃႉၶၢႆလႆႈလွတ်ႈလႅဝ်း။

“ႁဝ်းၶၢႆတၢင်းၶၢႆယူႇၾၢႆႇၼႃႈႁိူၼ်းႁဝ်း ပေႃးဢမ်ႇထုၵ်ႇၸႂ်ၶဝ် ဢမ်ႇထုၵ်ႇတႃႇၶဝ်ၼႆ ၶဝ်ၶႂ်ႈမႃးဝႃႈသင်ၵေႃႈ မႃးဝႃႈၸိူင်ႉၼၼ် တေလႆႈဝႃႈပၵ်းပိူင်ႈမၢႆမီႈၶဝ်ၼႆႉ ၶႂ်ႈၵျၢမ်းၵႂႃႇဢိတ်ႉၼိုင်ႈ။ ပေႃးၶၢႆၶဝ်ႈၼႂ်းတၢင်းဢိတ်းၼိုင်ႈ ၶဝ်ဢမ်ႇၶႂ်ႈပၼ်ၶၢႆယဝ်ႉ။ တီႈသုၵ်ႉသၵ်ႉဢိတ်ႉၼိုင်ႈၵေႃႈ ဢမ်ႇၶႂ်ႈပၼ်ၶၢႆ ၶဝ်ၶႂ်ႈႁႂ်ႈၵႂႃႇၶၢႆ မိူၼ်ၼင်ႇ တီႈၵၢတ်ႇလူင် ၸိူင်ႉၼၼ် ဢေႃႈ။ ၶဝ်ယင်းပႆႇလႆႈယိပ်းၵုမ်းၵမ်ဝဵင်းတႄႉတႄႉ သင်ၶဝ်ဢုပ်ႉပိူင်ႇမႃးတႄႉတႄႉလူး တေပဵၼ်ႁိုဝ်”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

တီႈဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ တႄႇၶဝ်ႈတိုၵ်းႁၢဝ်ႈႁႅင်း လွပ်ႈသွင် ၼႂ်းၽႅၼ်ယၼ်ႇသိုၵ်း 1027 ၼႆႉ မိူဝ်ႈဝၼ်းတီႈ 02/07/2024 ယၢမ်းၵၢင်ၶိုၼ်း 11:45 မူင်းသေ ထိုင်မႃးဝၼ်းတီႈ 03/10/2024 ၼႆႉ ၸင်ႇယိုတ်းၵုမ်းလႆႈ ဝဵင်းလႃႈသဵဝ်ႈမႃး – ၵူၼ်းပိုၼ်ႉတီႈလၢတ်ႈ။

တႄႇဢဝ်လိူၼ်ၵျူႊလၢႆႊၼၼ်ႉမႃး တေႃႇထိုင် လိူၼ်ဢွၵ်ႊထူဝ်ႊပိူဝ်ႊ ၼႂ်းၶၢဝ်းတၢင်း 4 လိူၼ်ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ တိူဝ်ႉၺႃး ၵူၼ်းမိူင်း လူႉတၢႆ 38 ၵေႃႉ မၢတ်ႇၸဵပ်း 128 ၵေႃႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 01/11/2024 ၼႆႉၼင်ႇၼႆ။