သိုၵ်းၵဝ်ႈၵၢင်ႉ MNDAA ၶုတ်းလုၵ်းလိၼ်ဝႆႉ တၢင်းၶဝ်ႈဢွၵ်ႇဝဵင်းမိူင်းယႆ လုၵ်းယႂ်ႇလုၵ်းလူင်သေ ႁဵတ်းႁႂ်ႈၵူၼ်းမိူင်း ထၢင်ႇထိူမ်မႆႈၸႂ်ဝႆႉ လၢႆလွင်ႈ ဝႃႈၼႆ။

ၼႂ်းလိူၼ်တီႊသႅမ်ႊပိူဝ်ႊ 2024 ၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်းၵဝ်ႈၵၢင်ႉ MNDAA ၶုတ်းလုၵ်းယႂ်ႇလူင်ဝႆႉ တီႈဢိူင်ႇ ႁူဝ်ယ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ယိူင်းဢၢၼ်း တႃႇ ၾင်သဝ် တႃႇႁဵတ်းမုၵ်ႉဢူးမႂ်ႇ ဢၼ်တေပဵၼ်ႁၢင်ႈၾၢင် ပၢႆႉႁပ်ႉတွၼ်ႈ ၶဝ်ႈဝဵင်းမိူင်းယႆ ၵမ်ႈၼမ် ဝႃႈ ၼၼ်သေတႃႉ ၵူၼ်းပိုၼ်ႉတီႈ ဢၼ်ႁူႉငိၼ်းၸွမ်းတႄႉ ယိုၼ်ယၼ်လၢတ်ႈဝႃႈ သိုၵ်းၵဝ်ႈၵၢင်ႉၶဝ် ၶုတ်းလုၵ်းပဵမ်ႇဝႆႉ တႃႇပဵၼ်လွင်ႈႁူမ်ႇလူမ်ႈၶဝ်ၵူၺ်း ဝႃႈၼႆ။

ၵူၼ်းမိူင်းယႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မၼ်းဢမ်ႇၸႂ်ႈ တႃႇႁဵတ်းမုၵ်ႉဢူးၶႃႈၼၼ်ႉ မၼ်းပဵၼ်လုၵ်းဢၼ်ၶဝ်တေပႅပ်ႉမၢၵ်ႇၵူၺ်းၶႃႈဢေႃႈ။ ၵူၺ်းၼႃႇ ၶဝ်မႃးႁဵတ်းၸမ်ၾင်ႇတၢင်း။ ၶဝ်ႁဵတ်းလၢႆတီႈဢေႃႈၼၼ်ႉ။ ၶဝ်ႁဵတ်းၸွမ်း ၵဵတ်ႉၶဝ် ၸိူဝ်းၼၼ်ႉၵူၺ်း။ ၶႅၼ်ႈၵၼ်တင်း ၶူဝ်လွင်းၼၼ်ႉ ဢိတ်းၼိုင်ႈၵူၺ်း”- ဝႃႈၼႆ။

ဢၼ်သိုၵ်းၵဝ်ႈၵၢင်ႉၶဝ် ၶုတ်းလုၵ်းဝႆႉၼႆႉ မီးၾၢႆႇႁွင်ႇဝဵင်းမိူင်းယႆ မီးၼႂ်းဝၢၼ်ႈႁူဝ်ၽၢႆ ဢိူင်ႇႁူဝ်ယ။ ၼိုင်ႈလုၵ်းလႂ် လိုၵ်ႉပဵင်းၸူဝ်ႈၵူၼ်းၼႆႉလႄႈ ၽႂ်ႁၼ်ၵေႃႈ တူၵ်းၸႂ်။ ၵမ်ႈၽွင်ႈဝႃႈ ပဵၼ်လုၵ်းတႃႇၾင် သဝ်မုၵ်ႉဢူး ပၢႆႉႁပ်ႉတွၼ်ႈၶဝ်ႈဝဵင်း။ မိူင်းယႆၼႆႉ သဵင်ၵွင်ႈဢမ်ႇတႅၵ်ႇသေတႃႉ သိုၵ်းၵဝ်ႈၵၢင်ႉ ၵုမ်းလႆႈဝႆႉယဝ်ႉႁိုဝ်ၼႆ ၵေႃႈမီး။ မၢင်ၸိူဝ်းၵေႃႈ လွမ်မႆႈၸႂ် ၵူဝ်ပဵၼ်ပၢင်တိုၵ်းယႂ်ႇလူင် ဝႃႈၼႆ။

မၢင်ၸိူဝ်းၵေႃႈ လၢတ်ႈဝႃႈ – ပဵၼ်ၵၢၼ်ႁၢင်ႈႁႅၼ်း တႃႇတပ်ႉပၢင်သဝ်းၶဝ်ၵူၺ်း ဢမ်ႇထုၵ်ႇလီမႆႈၸႂ်ၼႆ ၵေႃႈမီး။ ၵူၼ်းမိူင်းယႆၵေႃႉၼိုင်ႈလၢတ်ႈ ၼင်ႇၼႆ –

“ဢမ်ႇပဵၼ်သင်ၶႃႈ မၼ်းပဵၼ်တႃႇလွင်ႈႁူမ်ႇလူမ်ႈ ၶဝ်ၵူၺ်း။ ဢမ်ႇမီးလွင်ႈ ၵူဝ်ၸိူင်ႉႁိုဝ်ၼင်ႇၵဝ်ႇၶႃႈ။ ၶဝ်ႁဵတ်းဝႆႉႁဵတ်း ၼၼ်ၵူၺ်း။ လွင်ႈႁူမ်ႇလူမ်ႈတႄႉ မၼ်းၵေႃႈ မိူၼ်ၵဝ်ႇၵူၺ်းၼင်ႇၵဝ်ႇ”- ဝႃႈၼႆ။

ထႅင်ႈလွင်ႈၼိုင်ႈ ပွတ်းတၢင်းမိူင်းယႆၼႆႉ မီးၶၢဝ်ႇလိုဝ်းဢွၵ်ႇထႅင်ႈဝႃႈ တေလႆႈယိပ်းဝႂ်ၶၢမ်ႈမိူင်းသႅၼ်းၼိုင်ႈ ၸင်ႇၶဝ်ႈမိူင်းယႆ လႆႈၼႆၵေႃႈမီး။ လွင်ႈၼႆႉ ၵူၼ်းပိုၼ်ႉတီႈတႄႉ ယိုၼ်ႈယၼ်လၢတ်ႈဝႃႈ ဢမ်ႇပႆႇမီးလွင်ႈလႅၵ်ႈလၢႆႈသင် တိုၵ်ႉပဵၼ်ၶၢဝ်ႇလိုဝ်းၵူၺ်း – ဝႃႈၼႆ။

ၼႂ်းၸႄႈဝဵင်းမိူင်းယႆၼႆႉ ပဵၼ်ပိုၼ်ႉတီႈ သိုၵ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး တူင်ႉၼိုင် ၵုမ်းၵမ်ၼႆသေတႃႉ ၸူဝ်ႈၽႅၼ်ယၼ်ႇသိုၵ်း 1027 ၼႆႉ ဢိင်ၼိူဝ် သိုၵ်းၵဝ်ႈၵၢင်ႉ MNDAA ယိုတ်းလႆႈ တိူင်းသိုၵ်းယမၶ လႃႈသဵဝ်ႈသေ သိုၵ်းမၢၼ်ႈ လႃႈသဵဝ်ႈလႄႈ လုၵ်ႈလၢင်းၼၢင်းမေး ထွႆထွၼ်လူင်းၵႂႃႇ ယူႇသဝ်းဝႆႉ ၼႂ်းၸႄႈဝဵင်းမိူင်းယႆ။ သိုၵ်းၵဝ်ႈၵၢင်ႉ MNDAA ၵေႃႈ ၵႂႃႇတူင်ႉၼိုင် ယူႇသဝ်းဝႆႉၸွမ်းႁိမ်းၶွပ်ႇ ၸႄႈဝဵင်းမိူင်းယႆ – ၼမ်ႉလၼ်ႈ – သီႇပေႃႉ ၸိူဝ်းၼႆႉဝႆႉ။

ၵူၼ်းၸမ်ၸႂ် SSPP/ SSA ၼႂ်းၸႄႈဝဵင်းမိူင်းယႆတႄႉ ယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ – ဝၢႆးၾူၼ်ၸၢႆး ၼၢႆးႁိူင်ၼႆႉ သဵင်ၵွင်ႈၸၢင်ႈတႅၵ်ႇ ဝႃႈၼႆသေတႃႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းၸူး ၽူႈၶၢၼ်ပၢၵ်ႇ SSPP ၵေႃႈ ၵပ်းဢမ်ႇလႆႈလႄႈ ဢမ်ႇၸၢင်ႈယိုၼ်ယၼ် လၢတ်ႈၸိူင်ႉႁိုဝ်။

သိုၵ်းၵဝ်ႈၵၢင်ႉၼႆႉ ၵုမ်းလႆႈ တပ်ႉၶလယ 67 တီႈႁိမ်းဝၢၼ်ႈႁူဝ်ယ ၸႄႈဝဵင်းမိူင်းယႆတင်း ၶလယ 147 တီႈဝၢၼ်ႈၼွင် ၵေႃႈလူင် ၸႄႈဝဵင်းသီႇပေႃႉ လီငၢမ်း မိူဝ်ႈလိူၼ်သႅပ်ႊထႅမ်ႊပိူဝ်ႊ ပူၼ်ႉမႃး။ ယၢမ်းလဵဝ် သိုၵ်းၵဝ်ႈၵၢင်ႉၼႆႉ မႃးႁွတ်ႈၽႅဝ် ႁိမ်းဝဵင်းၼမ်ႉလၼ်ႈ ၸိူဝ်းၼႆႉဝႆႉလႄႈ သိုၵ်းမၢၼ်ႈၵေႃႈ ၵမ်းၵမ်း ယိုဝ်းၵွင်ႈလူင် ၵႂႃႇၵူႈႁူးၵူႈတၢင်း။ ၵူၼ်းမိူင်းဝဵင်းၼမ်ႉလၼ်ႈတႄႉ ဢမ်ႇႁတ်းယူႇလႄႈ လႆႈပၢႆႈၽေးသိုၵ်းဝႆႉ ပႆႇၸၢင်ႈပွၵ်ႈၶိုၼ်းႁိူၼ်းယေးၽႂ်မၼ်း။