သိုၵ်းၵဝ်ႈၵၢင်ႉ MNDAA ပၼ်တူတ်ႈတၢမ်ႇတၢႆ – တၢမ်ႇၶွၵ်ႈ ၵူၼ်းမီးတၢင်းၽိတ်း 21 ၵေႃႉ တီႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ။

ဝၼ်းတီႈ 05/12/2024 ယၢမ်းၵၢင်ၼႂ်ၼႆႉ သိုၵ်းၵဝ်ႈၵၢင်ႉ MNDAA ပၼ်တူတ်ႈတၢမ်ႇ ၵူၼ်းမီးတၢင်းၽိတ်း တင်းမူတ်း 21 ၵေႃႉ တီႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၼႂ်း 21 ၵေႃႉၼၼ်ႉ ဢၼ်ၺႃးတၢမ်ႇတၢႆမီး 6 ၵေႃႉလႄႈ ဢၼ်ၺႃးတၢမ်ႇၶွၵ်ႈ မီး 10 ပၢႆ ၼႆယဝ်ႉ။  

ၵဵဝ်ႇလူၺ်ႈလွင်ႈၼႆႉ သိုဝ်ႇၶၢဝ်ႇ The Kokang တႅမ်ႈတၢင်ႇဝႆႉဝႃႈ – “ၵူၼ်းၸိူဝ်းၺႃးတူတ်ႈတၢမ်ႇ 21 ၵေႃႉၼႆႉ ပဵၼ် ၵူၼ်းႁဵတ်းၽိတ်းပၵ်းပိူင်မၢႆမီႈ ႁၢဝ်ႈႁႅင်း။ မိူၼ်ၼင်ႇ တၢင်းၽိတ်းၶႃႈႁႅမ်ႈၵူၼ်းတၢႆ၊ ၺွပ်းၵူၼ်းမိူင်း ပဵၼ်တူဝ်ယိူဝ်ႇလႄႈ ႁဵတ်းႁၢႆႉၸႃႉ ၼိူဝ်ၼၢင်းယိင်း ၸိူဝ်းၼႆႉ။ လိူဝ်ၼၼ်ႉ တႃႇ 7 ၵေႃႉသမ်ႉ ပဵၼ်တၢင်း ၽိတ်းၽူႈလၵ်ႉၸၵ်ႉၶုတ်ႈ၊ ယွၵ်ႇလႅၼ်ပိူၼ်ႈလႄႈ ၸူၼ်ပိူၼ်ႈ ၸိူဝ်းၼႆႉ- ဝႃႈၼႆ။

ၼႂ်းၵူၼ်းၺႃးတူတ်ႈတၢမ်ႇ 21 ၵေႃႉၼႆႉ ဢၼ်ၺႃးတၢမ်ႇတၢႆမီး 6 ၵေႃႉ၊ ၼႂ်းၼၼ်ႉ ပႃးၼၢင်းယိင်း 1 ၵေႃႉ။ လိူဝ်ၼၼ်ႉ တႃႇ 7 ၵေႃႉသမ်ႉ ၺႃးတၢမ်ႇၶွၵ်ႈၼိုင်ႈၵေႃႉလႂ် 10 ပီ။ ၵူၼ်းၸိူဝ်းၺႃးတၢမ်ႇတၢႆၼႆႉ သိုၵ်းၵဝ်ႈၵၢင်ႉ MNDAA ၶဝ် ဢဝ် ၵႂႃႇလဵပ်ႈၼႄ ၵူၼ်းတင်းၼမ်ယဝ်ႉ ၸင်ႇပၼ်တူတ်ႈတၢမ်ႇၶႃႈႁႅမ်တၢႆ ၼႆယဝ်ႉ။

တီႈဝဵင်းလၢဝ်ႇၵၢႆးၼႆႉ ပူၼ်ႉမႃးမိူဝ်ႈဝၼ်းတီႈ 24/04/2024 ၼၼ်ႉ ယူႇတီႈ သိုၵ်းၵဝ်ႈၵၢင်ႉ MNDAA သေ လႆႈပၼ်တူတ်ႈတၢမ်ႇၵူၼ်းမီးတၢင်းၽိတ်း 10 ၵေႃႉ မႃးယဝ်ႉပွၵ်ႈၼိုင်ႈ။ ပွၵ်ႈၼၼ်ႉၵေႃႈ မီးၵူၼ်းၺႃး တၢမ်ႇတၢႆ 3 ၵေႃႉ တၢမ်ႇၶွၵ်ႈ 7 ၵေႃႉ။  

ဝၢႆးလင် ၽႅၼ်ယၼ်ႇသိုၵ်း 1027 သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ယိုတ်းလႆႈဝဵင်းလၢဝ်ႇၵၢႆးၼႆႉယဝ်ႉ ဢၼ်ပၼ်တူတ်ႈတၢမ်ႇ ၵူၼ်းမီးတၢင်းၽိတ်းၼႆႉ မီးမႃး 2 ပွၵ်ႈၼႆႉယဝ်ႉ ဝႃႈၼႆ။