ၸုမ်း Judicial Watch တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်းဝႆႉဝႃႈ ၸုမ်းလူင်ပွင်ၸိုင်ႈမႂ်ႇ မိူင်းဢမေႊရိၵၼ်ႊ ႁၢင်ႈ ႁႅၼ်းတေပိုၼ်ၽၢဝ်ႇပဵၼ်ငဝ်းလၢႆးၶိုၵ်ႉၶၵ်ႉသေ ၸႂ်ႉဢဵၼ်ႁႅင်းတပ်ႉသိုၵ်း သူင်ႇတူဝ်ၵူၼ်း ၸိူဝ်းယူႇသဝ်းၼႂ်းမိူင်းဢမေႊရိၵၼ်ႊ ဢမ်ႇမႅၼ်ႈတၢင်းၵၢၼ်ၼၼ်ႉ ပွၵ်ႈမိူင်းၶိုၼ်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၻူဝ်ႊၼေႃႊ ထရမ်ႉ ၼေႃႇၽူႈတႅၼ်းၸွမ်ၸိုင်ႈ မိူင်းဢမေႊရိၵၼ်ႊ ဢၼ်ဢွင်ႇပေႉ ပၢင်လိူၵ်ႈတင်ႈဝႆႉၼၼ်ႉ တႅမ်ႈတုမ်ႉတွပ်ႇၶိုၼ်းဝႃႈ ထုၵ်ႇမႅၼ်ႈယူႇ ဝႃႈၼႆ။

ၽွင်းလူင်းသူၼ်းတုမ်ႁႃသဵင်ၼၼ်ႉၵေႃႈ ၻူဝ်ႊၼေႃႊ ထရမ်ႉ ယၢမ်ႈလၢတ်ႈပၼ်ၵႂၢမ်းမၼ်ႈဝႆႉဝႃႈ သင်မၼ်းၸၢႆး ဢွင်ႇပေႉပၢင်လိူၵ်ႈတင်ႈသေ ပဵၼ်ၸွမ်ၸိုင်ႈမႃးၸိုင် တေႁဵတ်းသၢင်ႈ လွင်ႈလႅၵ်ႈလၢႆႈယႂ်ႇလူင် ၼႂ်းပိုၼ်းမိူင်းဢမေႊရိၵၼ်ႊ (တေသူင်ႇတူဝ်ၵူၼ်းၸိူဝ်းယူႇသဝ်း ၼႂ်းမိူင်းဢမေႊရိၵၼ်ႊ ဢမ်ႇမႅၼ်ႈတၢင်းၵၢၼ် ပွၵ်ႈမိူင်းၶိုၼ်း) ဝႃႈၼႆဝႆႉ။

ၵူၼ်းၸိူဝ်းယူႇသဝ်း ၼႂ်းမိူင်းဢမေႊရိၵၼ်ႊ လူၺ်ႈဢမ်ႇမႅၼ်ႈတၢင်းၵၢၼ်ၼႆႉ ၶၢတ်ႈလၢမ်းဝႆႉမီးမွၵ်ႈ 11 လၢၼ်ႉ။

မၢင်ၸိူဝ်း ထတ်းသၢင်လၢတ်ႈဝႃႈ တႃႇတေသူင်ႇတူဝ်ၵူၼ်းၼပ်ႉႁူဝ်လၢၼ်ႉ ပွၵ်ႈမိူင်းၶိုၼ်းၼၼ်ႉ တေလႆႈသဵင်ႈငိုၼ်း ၼပ်ႉပီႊလီႊယၼ်ႊ ဢမေႊရိၵၼ်ႊ တေႃႊလႃႊတင်းၼမ်။ ၾၢႆႇပၢႆးမၢၵ်ႈမီးၵေႃႈ ၸၢင်ႈမီးလွင်ႈလူႉသုမ်း။ ငိုၼ်းၶွၼ်ႇလႄႈ ဢဵၼ်ႁႅင်း ၵူၼ်းႁဵတ်းၵၢၼ်ၸိူဝ်းၼႆႉ ၸၢင်ႈၶၢတ်ႇၵႂႃႇ။ ပိူင်လူင် ၸၢင်ႈမီးလွင်ႈ တုမ်ႉယွၼ်ႈတေႃႇ တူင်ႇဝူင်းၵၢၼ် ၽုၵ်ႇသွမ်ႈ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။