ၸွမ်ၸိုင်ႈ မိူင်းယူႊၶရဵၼ်ႊ ဝီႊလွတ်ႊတီႊမီႊယႃႊ သီႊလႅၼ်ႊသၵီႊ လၢတ်ႈဝႃႈ ရတ်ႉသျႃႊ ၸႂ်ႉတိုဝ်းမၢၵ်ႇၼူၾႆး 120 ၶိူင်ႈလႄႈ ၶိူင်ႈမိၼ်ၻရူၼ်ႊ 90 လမ်းသေ ပိုတ်းယိုဝ်းဢွင်ႈတီႈႁဵတ်းဢွၵ်ႇပိုၼ်ၽႄႈ ႁႅင်းထၢတ်ႈ ဢၼ်မီးတူဝ်ႈမိူင်း ယူႊၶရဵၼ်ႊပတ်းပိုၼ်ႉ ပႃးၸဵမ်ငဝ်ႈၸိုင်ႈဝဵင်းလူင်ၶိပ်ႉ (kyiv) မီးၵူၼ်းလူႉတၢႆ ဢမ်ႇယွမ်း 10 ၵေႃႉ။

မိူၼ်ၼင်ႇ ၶွမ်ႊပၼီႊ ႁႅင်းထၢတ်ႈသုၼ်ႇတူဝ် ဢၼ်ယႂ်ႇလိူဝ်သေပိူၼ်ႈ တီႈၼႂ်းမိူင်းယူႊၶရဵၼ်ႊ ၶွမ်ႊပၼီႊ (DTEK) ၵေႃႈ မီးလွင်ႈတုမ်ႉတိူဝ်ႉလူႉၵွႆၵႂႃႇတင်းၼမ်သေ လွင်ႈၸႅၵ်ႇၽႄပၼ်ႁႅင်းထၢတ်ႈ လႆႈၵိုတ်းၶၢတ်ႇၵႂႃႇ။

ၶွမ်ႊပၼီႊ ႁႅင်းထၢတ်ႈ Ukrenergo  ၶွင်လူင်ပွင်ၸိုင်ႈၵေႃႈ ပိုၼ်ၽၢဝ်ႇၼႂ်းဝၼ်းတီႈ 18 ၼႆႉဝႃႈ တေမီးလွင်ႈမၵ်းတတ်း ၼႂ်းၵၢၼ်ပိုၼ်ၽႄႈႁႅင်းထၢတ်ႈ တူဝ်ႈမိူင်းယူႊၶရဵၼ်ႊပတ်းပိုၼ်ႉ ဝႃႈၼႆ။

လွင်ႈပိုတ်းယိုဝ်း ပွၵ်ႈၼႆႉ ပဵၼ်လွင်ႈပိုတ်းယိုဝ်း ဢၼ်ယႂ်ႇလိူဝ်ပိူၼ်ႈသုတ်း ဝၢႆးလင် လွင်ႈပိုတ်းယိုဝ်း ဢၼ်ယဝ်ႉၵႂႃႇ ၼႂ်းႁူဝ်လိူၼ်သႅပ်ႊထႅမ်ႊပိူဝ်ႊၼၼ်ႉ။

ႁွင်ႈၵၢၼ်ၽွင်းလူင် ၾၢႆႇၵႅတ်ႇၶႄ ရတ်ႉသျႃႊတႄႉ ပိုၼ်ၽၢဝ်ႇဝႆႉဝႃႈ ပိုတ်းယိုဝ်းမႅၼ်ႈပဝ်ႉမၢႆတင်းသဵင်ႈ၊ လႆႈဢဝ်ဢွင်ႈတီႈပိုၼ်ၽႄႈႁႅင်းထၢတ်ႈ ဢၼ်ပဵၼ်တီႈ ၵမ်ႉယၼ်ပၼ် တပ်ႉသိုၵ်းယူႊၶရဵၼ်ႊၼၼ်ႉ ပဵၼ်ပဝ်ႉမၢႆသေ ပိုတ်းယိုဝ်း ၼႆယဝ်ႉ။

ၾၢႆႇၼိုင်ႈၵေႃႈ ၼႂ်းၶၢဝ်းယၢမ်းလဵဝ်ၵၼ်ၼႆႉ ၸွမ်ၸိုင်ႈ ဢမေႊရိၵၼ်ႊ ၵျူဝ်းပၢႆႊတႅၼ်ႊ လႆႈပၼ်ၶႂၢင်ႉ တႃႇတေဢဝ် ၶိူင်ႈယိပ်းၵွင်ႈၵၢင်ႇ ဢၼ်ႁဵတ်းဢွၵ်ႇတီႈမိူင်းဢမေႊရိၵၼ်ႊသေ ပိုတ်းယိုဝ်းၶဝ်ႈၵႂႃႇ တီႈၼႂ်းမိူင်းရတ်ႉသျႃႊၼႆ ႁွင်ႈၵၢၼ် ၶၢဝ်ႇ ရၢႆႊတိူဝ်ႊ ႁၢႆးငၢၼ်းဝႆႉၼင်ႇၼႆ။  

လွင်ႈၼႆႉ ပဵၼ်လွင်ႈလႅၵ်ႈလၢႆႈ မူႇဝႃႇတယႂ်ႇလူင် ၶွင်မိူင်းဢမေႊရိၵၼ်ႊ ၽွင်းပၢင်တိုၵ်းယူႊၶရဵၼ်ႊ – ရတ်ႉသျႃႊ ၸမ်တဵမ် 1,000 ဝၼ်း။

ၼႂ်းလၢႆဝၼ်း တေထိုင်ၼႆႉ ၾၢႆႇယူႊၶရဵၼ်ႊ ႁၢင်ႈႁႅၼ်း တႃႇတေၸႂ်ႉတိုဝ်း ၶိူင်ႈပိုတ်းယိုဝ်းတၢင်းၵႆ ပဵၼ်ပွၵ်ႈၵမ်းႁႅၵ်ႈ။ တႃႇတေလႆႈၶႂၢင်ႉတိုၵ်းတေႃးၼင်ႇၼႆၼႆႉ ယူႇတီႈၸွမ်ၸိုင်ႈ မိူင်းယူႊၶရဵၼ်ႊ တုၵ်းယွၼ်းမႃး ၶၢဝ်းႁိုင်ယဝ်ႉသေတႃႉ ဢမေႊရိၵၼ်ႊ တိုၵ်ႉပၼ်ၶႂၢင်ႉ ၵွၼ်ႇၼႃႈ ၻူဝ်ႊၼေႃႊ ထရမ်ႉ တေၶိုၼ်ႈမႃးပဵၼ် ၸွမ်ၸိုင်ႈ ထႅင်ႈၶၢဝ်းတၢင်း 2 လိူၼ် ၼႆႉၵူၺ်း။

ၾၢႆႇဢမေႊရိၵၼ်ႊ လၢတ်ႈဝႃႈ လွင်ႈပၼ်ၶႂၢင်ႉၼႆႉ ပဵၼ်လွင်ႈတုမ်ႉတွပ်ႇၶိုၼ်း ဢၼ်ရတ်ႉသျႃႊ ဢဝ်ဢဵၼ်ႁႅင်းတပ်ႉပႆလိၼ် မိူင်းၵူဝ်ႊရီႊယိူဝ်ႊႁွင်ႇ မႃးၽိူမ်ႉထႅမ်ဢဵၼ်ႁႅင်းသိုၵ်းၼၼ်ႉ ဝႃႈၼႆ။

ပလႃႊတီႊမီႊယႃႊ သႃႊပႃႊရွပ်ႊ ၵႅမ်ႁူဝ်ပဝ်ႈ ၶွမ်ႊမတီႊ ၵဵဝ်ႈလူၺ်ႈၵူႈမိူင်းမိူင်း သၽႃးၼိူဝ် မိူင်းရတ်ႉသျႃႊ ထတ်းသၢင်လၢတ်ႈဝႃႈ လွင်ႈဢမေႊရိၵၼ်ႊပၼ်ၶႂၢင်ႉၸိူင်ႉၼႆၼႆ့  မိူၼ်ၵၼ် တင်းႁဵတ်းႁႂ်ႈပဵၼ်မႃး သိုၵ်းၵမ်ႇၽႃႇ ပွၵ်ႈသၢမ်ၵူၺ်း – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။