ဝၼ်းတီႈ 12/11/2024 ဝၢႆးဝၼ်း 2 မူင်းၶိုင်ႈ  သိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇတူၵ်းသႂ်ႇတီႈ ႁၢၼ့်ၼမ့်ၼဵင်ႈၸဵမ်း   တီႈဝဵင်းၼွင်ၶဵဝ် ၸိုင်းတႆးပွတ်းႁွင်ႇ ၵူၼ်းမိူင်းမၢတ်ႇၸဵပ်းလူႉတၢႆမွၵ်ႈ 20 ။

ဢၼ်မၢၵ်ႇသိုၵ်းမၢၼ်ႈတူၵ်းသႂ်ႇၼႆႉ တိူဝ်ႉသႂ်ႇ ႁၢၼ့်ၼမ့်ၼဵင်ႈၸဵမ်း လၢၼ်းသၢၼ်း (လန်းဆန်း) ဢၼ်မီးၵၢင်ဝဵင်း။

ႁၢၼ်ႉၼမ်ႉၼဵင်ႈၼႆႉပဵၼ်တီႈၵူၼ်းပိုၼ်ႉတီႈလႄႈၵူၼ်းတၢင်ႇတီႈမႃးလိုဝ်ႈသဝ်းၵိၼ်ၼမ်ႉၼဵင်ႈၼမ်ႉဝၢၼ်း။ ၵူၼ်းၵိုၼ်းဝႆႉယူႇတႃႇသေႇ။    

ၵူၼ်းၸၢႆးပိုၼ့်တီႈလၢတ်ႈၽူႈတွႆႇႁွၵ်ႈဝႃႈ -“  မၢတ်ႇၸဵပ်း 11 တၢႆ 11 ။ ပႃးၵူၼ်း ၵႂႃႇမႃး လႄႈၵူၼ်းမႃးလိုဝ်ႈသဝ်း ၊ ႁိူၼ်းယေးၵေႃႈၾႆးမႆႈလူႉၵွႆ 4-5 လင်”- ဝႃႈၼႆ ။

ယွၼ့်မၢၵ်ႇတူၵ်းတိူဝ်ႉသႂ်ႇၵမ်းသိုဝ်ႈလႄႈ ႁၢၼ့်ၼမ့်ၼဵင်ႈၸဵမ်း လႅဝ်ၵႂႃႇမူတ်း   ။  

မိူၼ်ၼင်ၼႆ ဝၼ်းတီႈ 11/11/2024  ယၢမ်းၵၢင်ၶမ်ႈၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်သႅၼ်း Jetfighter မႃးပွႆႇမၢၵ်ႇတီႈ မိူင်းၵုတ်ႈ ဢမ်ႇယွမ်း 5 ၵမ်း။   ၼၼ်ႉၵေႃႈၵူၼ်းမိူင်းတၢႆ 9 ၵေႃႉ မၢတ်ႇၸဵပ်း 13။  

ဝဵင်းမိူင်းၵုတ်ႈၼႆႉ သိုၵ်းမၢၼ်ႈလႄႈသိုၵ်း တဢၢင်းတႄႇပိုတ်းယိုဝ်းၵၼ်မိူဝ်ႈဝၼ်းတီႈ 25 လိူၼ်ၵျုၼ်ႊ။ ထိုင်မႃးဝၼ်းတီႈ 24 ၵျူႊလၢႆႊ သိုၵ်းတဢၢင်းပိုၼ်ၽၢဝ်ႇယိုတ်းလႆႈဝဵင်းမိူင်းၵုတ်ႈ။ တင်ႈတႄႇၼၼ်ႉမႃး သိုၵ်းမၢၼ်ႈ ၵမ်းၵမ်းဢဝ်ၶိူင်ႈမိၼ်မႃးပွႆႇမၢၵ်ႇ။

ဝၢႆးလင်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ လုၵ်ႉမိူင်းၶႄႇပွၵ်ႈမႃးၶိုၼ်းမိူင်းမၢၼ်ႈ မိူဝ်ႈဝၼ်းတိတ်ႉပူၼ်ႉမႃးၼႆႉယဝ်ႉ ၶိူင်ႈမိၼ်သိုၵ်းမၢၼ်ႈၵႂႃႇပွႆႇမၢၵ်ႇသႂ်ႇ လၢႆလၢႆၸႄႈဝဵင်းၼႂ်းမိူင်းႁူမ်ႈတုမ်။

 တီႈမိူင်းၶျၢင်းၵေႃႈ မိူဝ်ႈဝႃးဝၼ်းဢၢင်းၵၢၼ်းဝၼ်းလဵဝ် သိုၵ်းမၢၼ်ႈၵႂႃႇပွႆႇမၢၵ်ႇတီႈဝဵင်းမိၼ်းတပ်ႉလႄႈ ဝဵင်းဢၢမ်း မိူၼ်ၵၼ်။  

မိူဝ်ႈဝၼ်းတိတ်ႉၼၼ်ႉၵူၺ်းၼင်ႇၵဝ်ႇ ယၢမ်းၵၢင်ၶိုၼ်း သိုၵ်းမၢၼ်ႈဢဝ်ၶိူင်ႈမိၼ် ၵႂႃႇပွႆႇမၢၵ်ႇတီႈဝဵင်းၼွင်ၶဵဝ်၊ မၢၵ်ႇတူၵ်းတႅၵ်ႇသႂ်ႇတီႈ ႁူင်းပလိၵ်ႈ၊ တီႈပွၵ်ႉၵၢတ်ႇလႄႈ တီႈပွၵ်ႉၸၢၼ်း။

သိုၵ်းတဢၢင်း TNLA တႄႉ ပိုၼ်ၽၢဝ်ႇဝႆႉဝႃႈ – သိုၵ်းမၢၼ်ႈလႅပ်ႈတေဢဝ်ၶိူင်ႈမိၼ်လၢမ်းလိမ်းပွႆႇမၢၵ်ႇတိၵ်းတိၵ်းလႄႈ ၵူၼ်းမိူင်းၸိူဝ်းတိုၵ်ႉယူႇသဝ်းဝႆႉၼႂ်းဝဵင်း – ယႃႇ ၶွၼ်ႈၵၼ်ယူႇသဝ်း၊ ႁႂ်ႈၾၢင်ႉတူၺ်းထွမ်ႇၶၢဝ်ႇငၢဝ်း ဢၼ်ပၼ်ၾၢင်ႉၽေးၶိူင်ႈမိၼ်သိုၵ်း ၼၼ်ႉသေၵမ်း- ဝႃႈၼႆဝႆႉ ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ် )