ၵူၼ်းပၢႆႈၽေးသိုၵ်း 500 ပၢႆ ဢၼ်ပၢႆႈမႃးသွၼ်ႈယူႇဝႆႉ တီႈဝဵင်းၵေးသီးၼႆႉ ယၢမ်းလဵဝ် ယၢပ်ႇၽိုတ်ႇဝႆႉၽႃႈ ႁူမ်ႇၶူဝ်း ၼွၼ်း ယွၼ်ႉၵတ်းႁႅင်းမႃးလိူဝ်ၵဝ်ႇ ဝႃႈၼႆ။

ပူၼ်ႉမႃး မိူဝ်ႈလိူၼ်ၵျုၼ်ႊ – လိူၼ်ၵျူႊလၢႆႊၼၼ်ႉ ၼႂ်းၸိုင်ႈတႆးပွတ်းႁွင်ႇ လၢႆၸႄႈဝဵင်း သိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်းလႃႈသဵဝ်ႈ၊ ၵျွၵ်ႉမႄး၊ သီႇပေႃႉ ၸိူဝ်းၼႆႉ လႆႈဢွၼ်ၵၼ်ပၢႆႈၽေးသိုၵ်း ဢွၵ်ႇမႃးသွၼ်ႈယူႇဝႆႉ တၢင်ႇတီႈတၢင်ႇလႅၼ် တင်းၼမ်။

ၵူၼ်းပၢႆႈၽေးသိုၵ်း ႁွတ်ႈထိုင်ဝႆႉ တီႈဝဵင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇ ပဵၼ်ပၢင်တိုၵ်း ၵေႃႈ ႁဝ်းၶႃႈ ပၢႆႈဢွၵ်ႇမႃးၵမ်းလဵဝ်ယဝ်ႉ။ ပၢႆႈဢွၵ်ႇမႃး ႁိုင် 3 လိူၼ်ပၢႆယဝ်ႉ ပႆႇလႆႈပွၵ်ႈ။ ယၢမ်းလဵဝ် ဢၼ်ႁဝ်းၶႃႈ လူဝ်ႇတၢင်းၸွႆႈထႅမ် ႁႅင်းတႄႉ ပဵၼ်ၽႃႈႁူမ်ႇၶူဝ်းၼွၼ်း ၸိူဝ်းၼႆႉဢေႃႈ။ ယွၼ်ႉၶဝ်ႈၶၢဝ်းၵတ်းမႃး ယဝ်ႉလႄႈ မိူဝ်ႈၽွင်းပၢႆႈမႃးၼၼ်ႉ ႁဝ်း ၶႃႈ ဢမ်ႇလႆႈသင်မႃး လႆႈၶူဝ်းၸပ်းတူဝ် ၸိူင်ႉၼၼ်မႃးၵူၺ်းၶႃႈ”- ဝႃႈၼႆ။

ယၢမ်းလဵဝ် ၸုမ်းဢူၺ်းလီပွတ်းႁွင်ႇၶဝ် ယိုတ်းၵုမ်းဝႆႉ လၢႆလၢႆဝဵင်းသေ ပၢင်တိုၵ်းယဵၼ်ၵႂႃႇသေတႃႉ ယွၼ်ႉသိုၵ်းမၢၼ်ႈ ၵႆႉဢဝ်ၶိူင်ႈမိၼ် မႃးပွႆႇမၢၵ်ႇယူႇၶိူဝ်းယႂ်းလႄႈ ႁဵတ်းႁႂ်ႈၵူၼ်းပၢႆႈၽေးသိုၵ်း ပႆႇႁတ်းပွၵ်ႈမိူဝ်းယူႇသဝ်း။

တီႈၸႄႈဝဵင်းၵေးသီးၼႆႉ တိုၵ်ႉမီးဝႆႉ ၵူၼ်းပၢႆႈၽေးသိုၵ်း 500 ပၢႆ။ ၸိူဝ်းၶဝ် ပၢႆႈၽေးသိုၵ်းမႃး ႁိုင်ၶၢဝ်းတၢင်း 3 လိူၼ်ပၢႆယဝ်ႉလႄႈ ယၢပ်ႇၽိုတ်ႇလွင်ႈၼုင်ႈဝႂ် ၵူၺ်းဢမ်ႇၵႃး ယၢပ်ႇၽိုတ်ႇလိူဝ်ႁႅင်းထႅင်ႈ လွင်ႈၵိၼ်ယႅမ်ႉ ယွၼ်ႉၸဝ်ႈတႃႇၼ မႃးၵမ်ႉၸွႆႈဢေႇလူင်း ဝႃႈၼႆ။

“ယၢမ်းလဵဝ် လွင်ႈၵိၼ်ယႅမ်ႉၼႆႉ ၸမ်မူတ်းယဝ်ႉ။ ၵၢၼ်ငၢၼ်းတႄႉ ၺႃးသင်ၵေႃႈႁဵတ်းၼၼ်ႉ ၸိူင်ႉၼၼ် ၵူၺ်း။ ၸဝ်ႈတႃႇၼၶဝ်ၵေႃႈ ဢေႇလူင်းယဝ်ႉ။ ၵမ်ႈၼမ် ၶွင်ၵိၼ်ယႅမ်ႉတႄႉ ၵုမ်ႇတႃႇဝၼ်းလႂ် ဝၼ်းၼၼ်ႉ ၵူၺ်းယဝ်ႉၶႃႈ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ၵူၼ်းပၢႆႈၽေးသိုၵ်း ၸိူဝ်းၼၼ်ႉ ၵမ်ႈၼမ် ပဵၼ်ၼၢင်းယိင်းလႄႈ လုၵ်ႈဢွၼ်ႇ၊ ဢွၼ်ၵၼ် သွၼ်ႈယူႇဝႆႉ တီႈ ဝတ်ႉဝႃးၽႃသိူဝ်ႇလႄႈ ႁိူၼ်းယေးပီႈၼွင်ႉၸမ်ၸႂ်။