သိုၵ်းဝႃႉ UWSA ပူင်တူတ်ႈတၢမ်ႇၼၵ်း တီႈၵူၼ်းၼုမ်ႇၸၢႆး 7 ၵေႃႉ ၼႂ်းၼၼ်ႉ ပႃးတၢမ်ႇတၢႆ ၵေႃႉၼိုင်ႈ ပဵၼ်ၵူၼ်းၼုမ်ႇၸၢႆး တိုၵ်ႉမီးဢႃယု 16 ပီ။
ၼႂ်းဝၼ်းတီႈ 30/10/2024 ယၢမ်းၵၢင်ၼႂ် တီႈဝဵင်းႁူဝ်ပၢင်ႇ ၼႃႈတီႈၸုမ်းသိုၵ်းဝႃႉ UWSA ၵုမ်းၵမ်သေ ပူင်တူတ်ႈတၢမ်ႇၼၵ်း တီႈၵူၼ်းၼုမ်ႇ 7 ၵေႃႉ တေႃႇၼႃႈၵူၼ်းတင်းၼမ်။ တႃႇၵေႃႉၼိုင်ႈ ပဵၼ်တူတ်ႈတၢမ်ႇတၢႆ၊ လူၺ်ႈတၢင်းၽိတ်းယႂ်ႇလူင် – ၶဝ်ႈၸူၼ်ၼႂ်းႁိူၼ်းယေးၵူၼ်းမိူင်းသေ ၶႃႈႁႅမ်လုၵ်ႈဢွၼ်ႇပိူၼ်ႈ တၢႆပႃး ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းၺႃးတူတ်ႈတၢမ်ႇၸိူဝ်းၼႆႉ ဢမ်ႇၸႂ်ႈၵူၼ်းပိုၼ်ႉ တီႈယူႇတီႈဝဵင်းႁူဝ်ပၢင်ႇသေၵေႃႉ။ ပဵၼ်ၵူၼ်းတၢင်ႇတီႈတၢင်ႇဝဵင်း မႃးႁဵတ်းၵၢၼ်တီႈဝဵင်းႁူဝ်ပၢင်ႇ။ တႃႇ 6 ၵေႃႉၼၼ်ႉ ပဵၼ်တၢင်း ၽိတ်း ၵၼ်ႉၸၼ်လူလၢႆၼၢင်းယိင်း – ၸိူဝ်းၶဝ်ၺႃးတၢမ်ႇၶွၵ်ႈ။ ပဵၼ်ၵူၼ်းၼုမ်ႇ သႅၼ်းပၢၼ် ဢႃယု 20 လူင်းတႂ်ႈလွၼ်ႉလွၼ်ႉ”- ဝႃႈၼႆ။
ၵေႃႉထုၵ်ႇပူင်တူတ်ႈတၢမ်ႇတၢႆၼၼ်ႉ ပဵၼ်ၸၢႆးၵျေႃႇထုၼ်း ဢႃယု 16 ပီ ယူႇပွၵ်ႉ 4 ဝဵင်းလႃႈသဵဝ်ႈသေ ၵႂႃႇႁဵတ်းၵၢၼ်တီႈဝဵင်းႁူဝ်ပၢင်ႇ။ မၼ်းၸၢႆးၼႆႉ မိူဝ်ႈဝၼ်းတီႈ 03/08/2024 ယၢမ်းၵၢင်ၼႂ်ၸဝ်ႉ မၼ်းၸၢႆး ၶဝ်ႈၸူၼ်ႁိူၼ်းလင်ၼိုင်ႈ ၼႂ်းဝဵင်းႁူဝ်ပၢင်ႇ၊ ၶႃႈႁႅမ်လုၵ်ႈဢွၼ်ႇပိူၼ်ႈ ဢႃယု 10 ၶူပ်ႇတၢႆပႃး ၵေႃႉၼိုင်ႈ။ ထုပ်ႉပေႃႉၸဝ်ႈႁိူၼ်းမၢတ်ႇၸဵပ်းႁႅင်း 3 ၵေႃႉ။ တၢင်းၽိတ်းယႂ်ႇလႄႈ လုမ်းတြႃးၸင်ႇပူင်တူတ်ႈတၢမ်ႇတၢႆ ၾၢႆႇၼႃႈၵူၼ်းတင်းၼမ် ဝႃႈၼႆ။
လိူဝ် 6 ၵေႃႉၼၼ်ႉသမ်ႉ ပဵၼ်တူတ်ႈတၢမ်ႇ ယွၼ်ႉပိူဝ်ႈႁူမ်ႈၵၼ် ၵၼ်ႉၸၼ်ၼၢင်းယိင်းဢွၼ်ႇၵေႃႉၼိုင်ႈ။ ၼႂ်းၼၼ်ႉ ၵေႃႉၼိုင်ႈ မီးတၢင်းၽိတ်းယႂ်ႇသုတ်း ၺႃးတူတ်ႈၶွၵ်ႈ တေႃႇၸူဝ်ႈ ။ 5 ၵေႃႉတႄႉ တူတ်ႈၶွၵ်ႈ 15 ပီ ဝႃႈၼႆ။
ၽွင်းပၢင်ယၼ်ႇသိုၵ်း 1027 ၸုမ်းဢူၺ်းလီ 3 ၸုမ်း ပိုတ်းယိုဝ်းသိုၵ်းမၢၼ်ႈဢွင်ႇပေႉ၊ ယိုတ်းလႆႈ ဝဵင်းႁူဝ်ပၢင်ႇသေ မွပ်ႈပၼ်တပ်ႉသိုၵ်းဝႃႉ UWSA ၵုမ်းယိပ်းဝႆႉ။
ၼႃႈလိၼ်ၶိုၵ်ႉတွၼ်းမၢႆ 2 ဢၼ်သိုၵ်းဝႃႉ UWSA ၵုမ်းၵမ်လႄႈ ၼႃႈလိၼ်ၶိုၵ်ႉတွၼ်း မၢႆ 4 တပ်ႉသိုၵ်းမိူင်းလႃး MNDAA ၵုမ်းၵမ်ဝႆႉၼႆႉ ပေႃးမီးၵူၼ်းမီးတၢင်းၽိတ်းၼၵ်းၼႃႁၢဝ်ႈႁႅင်းၼႆ ၵႆႉပူင်တူတ်ႈတၢမ်ႇ၊ ပၼ်တၢင်းၽိတ်း တေႃႇၼႃႈတေႃႇတႃ ၵူၼ်းမိူင်း ၸိူင်ႉၼႆမႃးတႃႇသေႇ။ ယွၼ်ႉတၢင်းၽိတ်းယႂ်ႇႁႅင်းသေ ယိုဝ်းတၢႆတေႃႇၼႃႈ တေႃႇတႃၵူၼ်းမိူင်းတင်းၼမ်ၵေႃႈ ယၢမ်ႈမီးမႃး။
လွင်ႈၼႆႉ ယူႇတီႈ ၸုမ်းတူင်ႉၼိုင်သုၼ်ႇလႆႈၵူၼ်း မိူင်းဝၼ်းတူၵ်း ဢမ်ႇႁၼ်လီၸွမ်း။ ဝၼ်းတီႈ 26/04/2024 ၼႆႉၵေႃႈ ၸၢတ်ႈၸိုင်ႈယူႊရူပ်ႉ EU ဢွၵ်ႇလိၵ်ႈပိုၼ်ၽၢဝ်ႇဝႆႉၽိုၼ်ၼိုင်ႈ။ သႄႉသွမ်းဝႆႉ လွင်ႈပၼ်တူတ်ႈတၢမ်ႇႁၢႆႉႁႅင်းတေႃႇၼႃႈ ၵူၼ်းတင်းၼမ်။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ