ၼႂ်းပီ 2024 ၼႆႉ ၵူၼ်းမိူင်းပၢင်လွင်း ၸိူဝ်းယူႇတိတ်းၸပ်းလႅၼ်လိၼ်တႆး – ယၢင်းလႅင် ထူပ်းၽေးသိုၵ်းသိူဝ်ပႃး ၸဵမ် ၽေးသၽႃႇဝ ၼမ်ႉထူမ်ႈၼမ်ႉၼွင်း။ ၸူဝ်ႈဢမ်ႇပဵၼ်ပၢင်တိုၵ်းၼႆႉသမ်ႉ သိုၵ်းမၢၼ်ႈ လၢမ်းလိမ်းပွႆႇမၢၵ်ႇလူင်၊ ဢဝ်ၶိူင်ႈမိၼ် မႃးပွႆႇမၢၵ်ႇၶိူဝ်းယႂ်းလႄႈ ၵူၼ်းမိူင်း ဢမ်ႇႁတ်းယူႇသဝ်း တီႈ ႁိူၼ်းယေးဝၢၼ်ႈသူၼ်ၸဝ်ႈၵဝ်ႇ။

ၼႂ်းပိုၼ်ႉတီႈၵေႃႈ ၸုမ်းပျီႇတူႉၸိတ်ႉပဢူဝ်းသမ်ႉ တူင်ႉၼိုင်ႈၸွမ်းၼႂ်းဝၢၼ်ႈၼႂ်းသူၼ် တဵၵ်းၵဵပ်းငိုၼ်း ၵူၼ်းမိူင်း။ မိူၼ်ၼင်ႇ ၵူၼ်းဝၢၼ်ႈလူင်ၵမ် ၸႄႈဝဵင်းပၢင်လွင်းၼၼ်ႉ ၵမ်းၵမ်း ၺႃးသိုၵ်းပဢူဝ်း လွၵ်ႇငိုတ်ႈယွၼ်းငိုၼ်းလႄႈ ဢမ်ႇလႆႈယူႇၵတ်းယဵၼ်ၸႂ် ဝႃႈၼႆ။

ဝၢၼ်ႈလူင်ၵမ်ၼႆႉ ယၢၼ်ၵႆတၢင်းဝဵင်းပၢင်လွင်းမွၵ်ႈ 26 လၵ်း ၸမ်ဝၢၼ်ႈမေႃႇပီႇ ၸမ်တၢင်းၽႄၵႂႃႇ ဝဵင်းလွႆၶေႃ၊ ဝဵင်းယွင်ႁူၺ်ႈ၊ ဝဵင်းၵဝ်ႇၸၢမ်ၵႃး။ ဝၢၼ်ႈလူင်ၵမ်ၼႆႉ ယၢမ်းလဵဝ် ၵူၼ်းတၢင်းမိူင်းပၢႆး ၾၢႆ ၶုၼ်လႄႈ ၵူၼ်းၸွမ်းၶႅပ်ႇ ဝဵင်းပၢင်လွင်း မိူၼ်ၼင်ႇ ဝၢၼ်ႈလိၼ်ၶၢၼ်၊ ဝၢၼ်ႈလွႆၵဵင်ႈ၊ ဝၢၼ်ႈႁူဝ်ဝူဝ်း ဝၢၼ်ႈသေႃလမ် ၸိူဝ်းၼႆႉၵေႃႈ ၶၢႆႉပၢႆႈမႃး သွၼ်ႈယူႇဝႆႉ ၼမ်။ ယွၼ်ႉပိူဝ်ႈ သိုၵ်းမၢၼ်ႈ ယိုတ်းမိူင်း ဢဝ် ၶိူင်ႈမိၼ် မႃးပွႆႇမၢၵ်ႇၶိူဝ်းယႂ်း။

ၸူဝ်ႈမီးၵူၼ်းတၢင်ႇဝၢၼ်ႈ ပၢႆႈၽေးသိုၵ်း မႃးယူႇၸွမ်းတီႈဝၢၼ်ႈလူင်ၵမ်ၼႆႉ – သိုၵ်းမၢၼ်ႈလႄႈ ၸုမ်း PNO ၵေႃႈ ထႅမ် ႁႅင်းသိုၵ်းမႃးတူင်ႉၼိုင် ဝႆႉတင်းၼမ်။ ၸွမ်းတႃႈၸွမ်းတၢင်းၵေႃႈ တင်ႈၵဵတ်ႉလၢၼ်ႇ ပႂ်ႉ ၵဵပ်းငိုၼ်း ႁဵတ်းႁႂ်ႈၵူၼ်းမိူင်း ဢမ်ႇထၢင်ႇႁၢင်ႈယူႇသၢင်ႈၵိၼ်သဝ်း။ တေႃႈၼင်ႇ သွင်ပေႃႈလုၵ်ႈ ၸဝ်ႈ ႁၢၼ်ႉၶၢႆၾူၼ်း တီႈဝၢၼ်ႈလူင်ၵမ် 2 ၵေႃႉ ဢၼ် ၵႂႃႇၶၢႆၶူဝ်း ၼႂ်းၵၢတ်ႇသေ ပွၵ်ႈၶိုၼ်းႁိူၼ်းၼၼ်ႉၵူၺ်း ၵေႃႈ ၺႃးၸုမ်း PNO တဵၵ်းၵဵပ်းယွၼ်းငိုၼ်း သွင်ပေႃႈလုၵ်ႈဝႃႈ ၶၢႆၶူဝ်းဢမ်ႇလႆႈ ဢမ်ႇမီးငိုၼ်းတႃႇပၼ် ႁႂ်ႈပွႆႇဝၢင်းပၼ် ၼႆၼၼ်ႉ ၸုမ်းပျီႇတူႉၸိတ်ႉၸႂ်လမ် ထိုင်တီႈပိုတ်းယိုဝ်းလွၵ်ႇငိုတ်ႈ။ မၢၵ်ႇၵွင်ႈၶဝ်သမ်ႉ ၵႂႃႇတိူဝ်ႉၺႃးၵူၼ်းၶဝ်ၶိုၼ်း မၢတ်ႇၸဵပ်း – ၵူၼ်းပိုၼ်ႉတီႈလၢတ်ႈၼင်ႇၼႆ။

“ဢဝ်ၵွင်ႈ ၵႂႃႇယိုဝ်းရူတ်ႉၶိူင်ႈသွင်ပေႃႈလုၵ်ႈၼၼ်ႉ ၵူၺ်းၵႃႈ မၢၵ်ႇၵွင်ႈသမ်ႉ ၵႂႃႇတိူဝ်ႉသႂ်ႇလဵၵ်း မၢၵ်ႇလေႃႉရူတ်ႉၶိူင်ႈ ၼၼ်ႉသေ ၶိုၼ်းပုင်ႈၵႂႃႇတိူဝ်ႉသႂ်ႇ ၶႃၸုမ်း PNO ၶဝ်ၶိုၼ်း။ တိူဝ်ႉသႂ်ႇၵုမ်ႇၵူၼ်ႈလႄႈ ၶႃပျီႇတူႉၸိတ်ႉၼၼ်ႉ။ ႁဵတ်း ၼၼ်သေ သမ်ႉယွၼ်းၵႃႈသၢႆႈတႅၼ်း 5 သႅၼ်ပျႃး ၼႆဝႃႇ။ ဢမ်ႇပၼ်လႆႈလႄႈ ၸင်ႇၺွပ်းပေႃႉထုပ်ႉ ၼႆဢေႃႈ။ ၵူၼ်းဝၢၼ်ႈထူဝ်းလၢတ်ႈ သင်ၶၸဝ်ႈ ၼင်ႈၵျွင်းဝၢၼ်ႈၼၼ်ႉ သေ ၸင်ႇလၢတ်ႈၸွႆႈ ၸင်ႇႁပ်ႉႁွင်းပၼ်သေ ပွႆႇပၼ်ၶိုၼ်း”- ဝႃႈၼႆ။

2 ပေႃႈလုၵ်ႈ ဢၼ်ၺႃးသိုၵ်းပျီႇတူႉၸိတ်ႉပဢူဝ်း PNO ယိုဝ်းၵွင်ႈလွၵ်ႇငိုတ်ႈၼႆႉ ပေႃႈမီးဢႃယု 50 ပၢႆ လႄႈ လုၵ်ႈၸၢႆး ဢႃယု 20 ပၢႆ။ ၵူၼ်းဝၢၼ်ႈလူင်ၵမ်ၼႆႉ ပၢင်တိုၵ်းပႆႇလၢမ်းထိုင်ဝၢၼ်ႈသေတႃႉ ၵူၼ်း မိူင်း ဢမ်ႇထၢင်ႇႁၢင်ႈ ႁဵတ်းၵၢၼ် ႁႃၵိၼ်လဵင်ႉတွင်ႉလီလီ။

ဝၼ်းတီႈ 23/10/2024 ၼၼ်ႉၵေႃႈ ၼၢင်းယိင်းၵူၼ်းၶၢႆပႃ ၼႂ်းၵၢတ်ႇလူင်ၵမ် ၵေႃႉၼိုင်ႈ ၺႃးၸုမ်း PNO ပဢူဝ်း တဵၵ်းယွၼ်းငိုၼ်း။ ဢမ်ႇပၼ်လႆႈၼင်ႇၵႃႈၶဝ်ယွၼ်းလႄႈ ၼၼ်ႉၵေႃႈ ၺႃးပျီႇတူႉၸိတ်ႉ ယိုဝ်းၵွင်ႈလွၵ်ႇ ၵူၼ်းၼႂ်းၵၢတ်ႇပေႃးတူၵ်းၸႂ်။ ၵူၼ်းဝၢၼ်ႈလူင်ၵမ် လၢတ်ႈၼင်ႇၼႆ –

“ၼၢင်းယိင်းၶဝ် မႃးၶၢႆပႃ ၼႂ်းၵၢတ်ႇလူင်ၵမ်ၼၼ်ႉၵေႃႈ ၺႃး PNO ပၢပ်းၵႅမ်ႈ၊ တီႈၵႅမ်ႈပေႃးမီးႁွႆးမိုဝ်း လႅင်လူင်ဝႆႉ။ ယဝ်ႉၵေႃႈ ယိုဝ်းၵွင်ႈႁဵတ်းႁႂ်ႈႁူပိူၼ်ႈပေႃးလိတ်ႇ။ ယွၼ်ႉလႆႈငိၼ်းသဵင်ၵွင်ႈ ဢွၵ်ႇၸဵမ်ၸဝ်ႉလႄႈ ၵူၼ်းၸၢႆႇၵၢတ်ႇ ၶၢႆၵၢတ်ႇ ၶဝ် ၵူဝ်သေ ၼႅတ်ႈသိမ်းၶူဝ်းၽႂ်မၼ်းမိူဝ်း။ ၵၢတ်ႇၵေႃႈ ဢမ်ႇပဵၼ်ၶၢႆလီလီ”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈလူင်ၵမ်လႄႈ ဝၢၼ်ႈႁူး ဢၼ်မီးၼႂ်းၵႄႈလႅၼ်လိၼ်တႆး – ယၢင်းလႅင်ၼႆႉ မိူဝ်ႈဝၢၼ်ႈမိူင်း ၼိမ်သဝ်း ယၢမ်ႈၽုၵ်ႇမၢၵ်ႇၶဝ်ႈတဝ်ႈၼမ်ႉသေ ၵႂႃႇၵႃႉၶၢႆတၢင်းမိူင်းပၢႆး ၾၢႆၶုၼ် လႆႈယူႇသေတႃႉ ဝၢႆးသိုၵ်းမၢၼ်ႈ ဢဝ်မၢၵ်ႇမႃးပွႆႇသႂ်ႇဝၼ်းဝၼ်းၶိုၼ်းၶိုၼ်းသေ ၵူၼ်းမိူင်းဢမ်ႇႁတ်းၵႂႃႇမႃး။ PNO သမ်ႉပိၵ်ႉတၢင်းဝႆႉ၊ ၵႂႃႇတၢင်းဝၢၼ်ႈလဢီႉ/ လတဵင်ႇ ၼႂ်းၸႄႈမိူင်းယၢင်းလႅင်ၼၼ်ႉၵေႃႈ ဢမ်ႇလႆႈ။ PNO ၶဝ်ၼႆႉ ပႂ်ႉဝႆႉၸွမ်းတႃႈၸွမ်းတၢင်းလၢႆတီႈသေ တဵၵ်းယွၼ်းၵဵပ်း ၶွၼ်ႇၵူၼ်းဝၢၼ်ႈၵူၼ်းသူၼ်။

ယၢမ်းလဵဝ် သဵၼ်ႈတၢင်းၵႂႃႇမႃး တၢင်းဝၢၼ်ႈမေႃႇပီႇ – ဝဵင်းပၢင်လွင်း ၸိူဝ်းၼႆႉၵေႃႈ ၸုမ်းပျီႇတူႉၸိတ်ႉပဢူဝ်း ပႂ်ႉၵဵပ်း ၶွၼ်ႇရူတ်ႉၵႃးဝႆႉ၊ ၽႂ်လတ်းၵႂႃႇတၢင်းၼၼ်ႉၵေႃႈ ၵဵပ်းငိုၼ်း ၵႃးၼိုင်ႈလမ်းလႂ် 150,000 (သႅၼ်ႁႃႈမိုၼ်ႇ) ပျႃး၊ ရူတ်ႉၶိူင်ႈ ၼိုင်ႈလမ်းလႂ် 20,000 (သွင်မိုၼ်ႇ) ပျႃး – ၵူၼ်းပၢင်လွင်း လၢတ်ႈၼႄၼင်ႇၼႆ။