ဝၼ်းတီႈ 26/10/2024 ၼႆႉ ပဵၼ်ဝၼ်းၵေႃႇတင်ႈပႃႇတီႇႁူဝ်သိူဝ် SNLD ၶွပ်ႈတဵမ် 36 ပီ ။ ယူႇတီႈငဝ်ႈငုၼ်းဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ပႃးဝႆႉဝႃႈ – ပၢင်တိုၵ်းၼႂ်းမိူင်းႁူမ်ႈတုမ် ဢၼ်ပဵၼ်မႃးၼပ်ႉႁူဝ်သိပ်းပီ ၼႆႉ ပဵၼ်ယွၼ်ႉ ၸဝ်ႈဢႃႇၼႃႇသိုၵ်း ၵူႈသိုပ်ႇၵူႈပၢၼ် ဢမ်ႇယွမ်းႁပ်ႉ လွင်ႈၽဵင်ႇပဵင်းၸိူဝ်ႉၸၢတ်ႈလႄႈ ပိူင်ၽွင်းငမ်းတူဝ်ၵဝ်ႇ ၽဵင်ႇပဵင်းလွတ်ႈလႅဝ်း ။ ၵွပ်ႈၼႆထုၵ်ႇလီ ၽဵဝ်ႈမူၺ်ႉၸဝ်ႈဢႃႇၼႃႇသိုၵ်း တင်းငဝ်ႈႁၢၵ်ႈတူၼ်ႈတေႃတင်းမူတ်း – ၸင်ႇတေၸၢင်ႈၵေႃႇတင်ႈလႆႈၸိုင်ႈမိူင်းၾႅတ်ႊတရႄႊ ၵၼ်ၵိုင်ႇလႅပ်ႈၵၼ်တင်း ငဝ်းလၢႆးၵၢပ်ႈပၢၼ် လုမ်ႈၾႃႉ ဝႃႈၼႆ။

ဝၼ်းၶွပ်ႈၶူပ်ႇပႃႇတီႇႁူဝ်သိူဝ် SNLD ၶွပ်ႈတဵမ် 36 ပီၼႆႉ ယၢမ်းၵၢင်ၼႂ်မီးပၢင်ၵႅဝ်ႈတၢင်းဢွၼ်ႊလၢႆႊ။ ႁူဝ်ပဝ်ႈပႃႇတီႇ လုင်းၸၢႆးၺုၼ်ႉလုၼ်ႇ လၢတ်ႈၶေႃႈၵႂၢမ်းဝႃႈ- ဝၼ်းမိူဝ်ႈၼႆႉ ၵူၼ်းတင်းမိူၼ်းပတ်းပိုၼ်ႉ လႆႈႁုပ်ႉၽေးရေႃးၵႃႇတၢင်းပဵၼ်၊ ၽေးသိုၵ်းသိူဝ်၊ၽေးသိင်ႇဝႅတ်ႉလွမ်ႉ၊ ၽေးၶိူင်ႈၵွင်ႈၵၢင်ႇ၊ ၽေးမၢၵ်ႇဢၼ်လုၵ်ႉတၢင်းၵၢင်ႁၢဝ်လူင်းမႃး၊ ၽေးဢၼ်ထုၵ်ႇၸုမ်း/ၵေႃႉဢမ်ႇၵျိူၵ်ႈဢမ်ႇလူဝ်ႇၼၼ်ႉမႃးၽွင်းငမ်းဝၢၼ်ႈမိူင်း၊ ၽေးၵႃႈၶၼ်ၵုၼ်ႇယႂ်ႇသုင်၊ ၽေးၶဵၼ်လူင် 5 ပိူင် ၸိူဝ်းၼႆႉ တင်းၼမ်တင်းလၢႆ – ဝႃႈၼႆ။

“လွင်ႈၼႆႉႁဝ်းၵႄႈလိတ်ႈႁႂ်ႈမၼ်းလီတီႈႁဝ်းတီႈလဵဝ်ဢမ်ႇလႆႈ။   ၵူၼ်းတင်းမိူင်းတၵ်းလႆႈႁူမ်ႈၵၼ်ၵႄႈလိတ်ႈ။ ပေႃးတေလၢတ်ႈသိုဝ်ႈသိုဝ်ႈၼႆ တီႈမိူင်းႁူမ်ႈတုမ်ၼႆႉ မိူဝ်းၼႃႈမႃးၼင်ႇႁိုဝ်တေဢမ်ႇမီး ၸဝ်ႈဢႃႇၼႃႇသိုၵ်းၸိူင်ႉၼႆထႅင်ႈၼၼ်ႉ ႁဝ်းႁႃးတင်းသဵင်ႈ တၵ်းလႆႈၶတ်းၸႂ်ၽဵဝ်ႈမူၺ်ႉၸဵမ်ငဝ်ႈႁၢၵ်ႈတူၼ်ႈတေႃမၼ်း ” – ဝႃႈၼႆ။

 ငဝ်းလၢႆးပၢင်တိုၵ်းသိုၵ်းသိူဝ်ႁၢဝ်ႈႁႅင်းယၢမ်းလဵဝ် ယူႇတီႈပႃႇတီႇႁူဝ်သိူဝ်သေ ဢမ်ႇၵႅတ်ႇၶႄႁႄႉၵင်ႈပၼ်လႆႈၵူၼ်းမိူင်းလႄႈ လုၵ်ႈၸုမ်းပႃႇတီႇ ၼႂ်းမိူင်းတႆးပွတ်းႁွင်ႇၼႆႉ ပဵၼ်ဢၼ်တိူဝ်ႉၸႂ်တႄႉတႄႉ။ ၵွပ်ႈၼႆလႄႈ ႁႂ်ႈၵူၼ်းမိူင်းဝႆႉၸႂ်ၵႅၼ်ႇၵႅၼ်ႇၶႅင်ၶႅင်၊ ႁႂ်ႈၽွမ်ႉသဵင်ပဵင်းပၢၵ်ႇၵၼ်ဝႆႉ – ၸၢႆးၺုၼ်ႉလုၼ်ႇ တိုၵ်းသူၼ်းၵႂႃႇၼင်ႇၼႆ။

ယၢမ်းလဵဝ်ၽွင်းၵူၼ်းမိူင်းထူပ်းလွင်ႈၵပ်ႉၵိၼ်းၶၢၼ်ၸႂ်ယူႇၵူႈတၢင်းၸိူင်ႉၼႆ ႁႂ်ႈၵူၼ်းမိူင်း ဝႆႉၸႂ်ၵႂၢင်ႈၵႂၢင်ႈတေႃႇၵၼ်သေ လုမ်းလႃးတူၺ်းလူၵၼ်ဝႆႉလီလီ ဝႃႈၼႆ။

“ႁဝ်းၶႃႈၼႆႉ ဢမ်ႇၸၢင်ႈပိုၼ်ႉပႅတ်ႈၼမ်ႉလိၼ်ႁိၼ်ၽႃၸဝ်ႈၵဝ်ႇ တီႈယူႇၸဝ်ႈၵဝ်ႇသေ ပၢႆႈ။ၵွပ်ႈၼႆ ၵႃႈလႆႈဝႆႉၸႂ်ၵႅၼ်ႇၶႅင်သေ ယိပ်းၵမ်မိုဝ်းၵၼ်ၵႅၼ်ႇၵႅၼ်ႇ ၶၢမ်ႈႁႂ်ႈပူၼ်ႉပၼ်ႁႃလူင်ဢၼ်ၼႆႉႁႂ်ႈလႆႈ။ယူႇတီႈပႃႇတီႇႁူဝ်သိူဝ်ၵေႃႈပၼ်ၵႂၢမ်းမၼ်ႈၵႅၼ်ႇဝႃႈ – တေဢမ်ႇပိုၼ်ႉပွႆႇၵူၼ်းမိူင်းလႄႈလုၵ်ႈၸုမ်းၸဝ်ႈၵဝ်ႇလႃးလႃး ”-  ႁူဝ်ပဝ်ႈပႃႇတီႇႁူဝ်သိူဝ် ပၼ်ၵႂၢမ်းမၼ်ႈၵႂႃႇၼင်ႇၼႆ။

တီႈပၢင်ၵႅဝ်ႈတၢင်း Zoom – ဢွၼ်ႊလၢႆႊၼႆႉ မီးၽူႈၼမ်း ၵူႈပႃႇတီႇလႄႈမူႇၸုမ်း ၵူႈၸၢဝ်းၶိူဝ်းမႃးၶဝ်ႈႁူမ်ႈ။ လိူဝ်ၼၼ်ႉ ၸုမ်းပွင်ၵၢၼ် လႄႈလုၵ်ႈၸုမ်းပႃႇတီႇ ၊ၸုမ်းၵူၼ်းၼုမ်ႇ ၼွၵ်ႈမိူင်းၼႂ်းမိူင်းၵေႃႈၶဝ်ႈႁူမ်ႈ။ ၽူႈၶဝ်ႈႁူမ်ႈတင်းမူတ်းမီးမွၵ်ႈ 200 ။

 ၼႂ်းၽူႈၼမ်းတႆးၵေႃႈ မိူၼ်ၼင်ႇ ၼႃယၵလူင် SSPP ၊ ႁူဝ်ပဝ်ႈလူင် RCSS ၶဝ်ၸဝ်ႈၵေႃႈၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်း။  

ၼႂ်းၶေႃႈပိုၼ်ၽၢဝ်ႇ SNLD ၶွပ်ႈတဵမ် 36 ပီၼၼ်ႉ ပႃးဝႆႉထႅင်ႈဝႃႈ- ယိင်ႈပၢင်တိုၵ်းၼႂ်းမိူင်းႁိုင်ၼၢၼ်းၸိူင်ႉၼႆၼႆႉ  ယိင်ႈပဵၼ်ႁႅင်းဢီးႁႂ်ႈ – ၵူႈၸၢဝ်းၶိူဝ်းယူႈႁူမ်ႈၵူမ်ၵဵဝ်ၵၼ်ၵတ်းၵတ်းယဵၼ်ယဵၼ်ၼႆႉ – ၸဵဝ်းလူမ်ႉလႅဝ်ၵူၼ်ႇပင်း။ၵွပ်ႈၼႆလႄႈ ထုၵ်ႇလီလႆႈႁဵတ်းႁႂ်ႈပၢင်တိုၵ်းၼႂ်းမိူင်းၸဵဝ်းၵိုတ်း။

ၵူၼ်းမိူင်းၵူႈၵေႃႉမီးပုၼ်ႈၽွၼ်း ယႃႇႁႂ်ႈလႆႈပဵၼ် ၽူႈၶွင်ႈမၢၵ်ႇ သႄႇယူင်းပူင်းၸႃႉ ဢၼ်ႁဵတ်းႁႂ်ႈၸိူဝ်ႉၸၢတ်ႈၸၢဝ်းၶိူဝ်းတႅၵ်ႇယႅၵ်ႈ၊ ၵူႈၵေႃႉ မီးပုၼ်ႈၽွၼ်းတႃႇႁႂ်ႈပဵၼ်ႁႅင်းဢီး တႃႇၵေႃႇသၢင်ႈမိူင်းႁူမ်ႈတုမ်ဢၼ်မီးလွင်ႈၽဵင်ႇပဵင်း – ၼႆႉပဵၼ်တႃႈမုင်ႈယိူင်းမၢႆလူင်ၵူၼ်းမိူင်းႁူမ်ႈတုမ်ၵူႈၵေႃႉ- ပႃးဝႆႉၼင်ႇၼႆ။

ငဝ်ႈငုၼ်းတီႇမူဝ်ႇၶရေႇသီႇ ၸိူဝ်ႉၶိူဝ်းတႆး (SNLD) ပႃႇတီႇႁူဝ်သိူဝ်ၼႆႉ ၵေႃႇတင်ႈမႃးမိူဝ်ႈဝၼ်းတီႈ 26/10/1988 သေၶတ်းၸႂ်ႁဵတ်းၵၢၼ်တႃႇသုၼ်ႇလႆႈၸိူဝ်ႉၸၢတ်ႈၵူၼ်းၸၢဝ်းၶိူဝ်းၼႂ်းၸိုင်ႈတႆးမႃး တေႃႇထိုင်ဝၼ်းမိူဝ်ႈၼႆႉ။ ၵူၺ်းၵႃႈ မိူဝ်ႈပီ 2022  သိုၵ်းမၢၼ်ႈယိုတ်းမိူင်း  ပိုၼ်ၽၢဝ်ႇၸႂ်ႉတၢင်ႇမၢႆၾၢင်ပႃႇတီႇၶိုၼ်း တႃႇၶဝ်ႈပၢင်လိူၵ်ႈတင်ႈဢၼ်ၸဝ်ႈဢႃႇၼႃႇသိုၵ်းတေဢွၼ်ၼမ်းၸတ်းႁဵတ်း။ ပႃႇတီႇႁူဝ်သိူဝ် ဢမ်ႇယွမ်းႁပ်ႉၸဝ်ႈဢႃႇၼႃႇသိုၵ်းလႄႈ ဢမ်ႇတၢင်ႇမၢႆၾၢင်ပႃႇတီႇလႄႈ ထုၵ်ႇသိုၵ်းမၢၼ်ႈယိုတ်းမိူင်းပိုၼ်ၽၢဝ်ႇယႃႉမၢႆၾၢင်ပႃႇတီႇဝႆႉ။