ၽႅၼ်ယၼ်ႇသိုၵ်း 1027 ၶွပ်ႈတဵမ်ပီ  မိူဝ်ႈၼႆႉဝၼ်းတီႈ 27 /10/2024 ၶိူင်ႈမိၼ်သိုၵ်းမၢၼ်ႈ လုၵ်ႉတႃႈႁိူဝ်းမိၼ်တိူင်းတႃႈလိူဝ်ႇသေၶိုၼ်ႈမႃးပွႆႇမၢၵ်ႇတီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၸဵမ်ၸဝ်ႉ။

ဝၼ်းတီႈ 27 မိူဝ်ႈၼႆႉ တင်ႈတႄႇယၢမ်းၵၢင်ၼႂ်ၸဝ်ႉ 7 မူင်း 9 မိၼိတ်ႉ ၶၢဝ်းယၢမ်းမိူင်းတႆး- ၸုမ်းလူင်ႉလႅၼ်ႇပၵ်းတႃပႂ်ႉတူၺ်းၶိူင်ႈမိၼ်သိုၵ်းမၢၼ်ႈ NAS တႅမ်ႈတၢင်ႇပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၶိူင်ႈမိၼ် Jetfighter သိုၵ်းမၢၼ်ႈ 4 လမ်း လုၵ်ႉတီႈၶူင်ႇႁိူဝ်းမိၼ် တတႃးဢူး တိူင်းတႃႈလိူဝ်ႇ 2 လမ်း လႄႈ ၶူင်ႇႁိူဝ်းမိၼ်သိုၵ်း  မၵူၺ်း 2 လမ်း မိၼ်ၶိုၼ်ႈမိူဝ်းတၢင်းၸဵင်ႇႁွင်ႇဝၼ်းဢွၵ်ႇ။  ၶိုၼ်ႈမိူဝ်းၵႂႃႇတၢင်း ၼွင်ၶဵဝ်- လႃႈသဵဝ်ႈ – ၼမ်ႉၶမ်း ဝႃႈၼႆဝႆႉ။

ၵူၼ်းမိူင်းဝဵင်းၼမ်ႉၶမ်းလၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇမွၵ်ႈ 7 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈမိၼ်ၶိုၼ်ႈမႃးပၼ်ႇလဵပ်ႈတီႈဝဵင်းၼမ်ႉၶမ်း  4 လမ်း ။ ထိုင်ၶၢဝ်းယၢမ်း 8 မူင်း 14 လႄႈ 8 မူင်း 17 မိၼိတ်ႉ ၼၼ်ႉ ပွႆႇမၢၵ်ႇလူင်းတူၵ်းၾၢႆႇၸၢၼ်းဝဵင်းၼမ်ႉၶမ်း 2 လုၵ်ႈ ။ တူၵ်းသႂ်ႇတီႈလႂ်တႄႉ ဢမ်ႇပႆႇမီးၽႂ်ႁတ်းဢွၵ်ႇၵႂႃႇတူၺ်းလႄႈ ဢမ်ႇႁူႉတႅတ်ႈတေႃး။ သဵင်တႄႉလႅပ်ႈတေတူၵ်းသႂ်ႇတၢင်း ၸၶၢၼ်းတိတ်ႉၵူင်း( တပ်ႉၵဝ်ႇသိုၵ်းမၢၼ်ႈ) လႄႈ တၢင်းဝၢၼ်ႈ 12 လၵ်း(ဝၢၼ်ႈၶႄႇ) ဝၢၼ်ႈၽႃလႅၼ်ႇ (ဝၢၼ်ႈလွႆ) ၸိူဝ်းၼႆႉ။ ဝၢၼ်ႈၸိူဝ်းၼႆႉ ယွၼ်ႉမၼ်းတိတ်းၸပ်းၵၼ်ဝႆႉ။   ”- ဝႃႈၼႆ။

ၼွၵ်ႈလိူဝ်ဝၢၼ်ႈၸိူဝ်းၼႆႉယဝ်ႉ ယွမ်ႇၼၼ်ႉ မီးဝၢၼ်ႈသႃလူႈ ၊ ဝၢၼ်ႈဢွမ်ႈ ၊ ဝၢၼ်ႈၽႃလႅၼ်ႇ၊ ဝၢၼ်ႈသႅင်တင်ႈ ၸိူဝ်းၼႆႉယူႇဝႆႉတိတ်းၸပ်းၵၼ် – ပဵၼ်ဝၢၼ်ႈၸၢဝ်းလွႆ တဢၢင်းၶဝ်ယူႇသဝ်းဝႆႉ။မၢၵ်ႇတေတူၵ်းသႂ်ႇသိုဝ်ႈလႂ်တႄႉပႆႇလႆႈႁူႉတႅတ်ႈတေႃး ဝႃႈၼႆ။

ၶိူင်ႈမိၼ်ထႅင်ႈ 2 လမ်းတႄႉ လႅပ်ႈ ၵႂႃႇပွႆႇမၢၵ်ႇတၢင်းတူၼ်းႁၢဝ်းသၼ်လွႆ ၾၢႆႇၸၢၼ်းဝဵင်းၼမ်ႉၶမ်းပုၼ်ႉ။ လႅပ်ႈတေၵႆဝဵင်း။ ၵွပ်ႈဝႃႈၵူၼ်းမိူင်းၼႂ်းဝဵင်းဢမ်ႇလႆႈငိၼ်းသဵင်မၢၵ်ႇတူၵ်းတႅၵ်ႇ။ ဢၼ်လႆႈငိၼ်းၼႆႉပဵၼ်ဢၼ်တူၵ်း တၢင်းၸၢၼ်းဝဵင်းၼမ်ႉၶမ်းၼၼ်ႉၵူၺ်း ဝႃႈၼႆ။

ၵူၼ်းမိူင်းဝဵင်းၼမ်ႉၶမ်းလၢတ်ႈထႅင်ႈဝႃႈ- “ၵွၼ်ႇၼႃႈတေထိုင်ဝၼ်းတီႈ 27 ဢွၵ်ႊထူဝ်ႊပိူဝ်ႊ  ၵူၼ်းမိူင်းၼမ်ႉၶမ်း တႄႉ ဢွၼ်ၵၼ်ၾၢင်ႉတူဝ်ႁၢင်ႈႁႅၼ်းဝႆႉ မႆႈၸႂ်ၵူဝ်ပဵၼ်ပၢင်တိုၵ်းယႂ်ႇလူင် မၢႆတွင်းၶွပ်ႈတဵမ်ပီ။ ငိၼ်းၶၢဝ်ႇဝႆႉဝႃႈ – မၢႆတွင်း 1027 ၶွပ်ႈတဵမ်ပီ သိုၵ်းလွႆ ႁၢင်ႈႁႅၼ်းတႃႇႁဵတ်းပွႆးဢွင်ႇပေႉသိုၵ်း ၼႆသေ ၶၢၼ်းႁွင်ႉဝႆႉ ႁွင်ႈၵၢၼ်ၾၢႆႇၵဵဝ်ႇၶွင်ႈ။ ၵူၼ်းမိူင်းၼမ်ႉၶမ်းၵေႃႈ ႁၢင်ႈႁႅၼ်း ၾၢင်ႉတူဝ်ဝႆႉ တေဢမ်ႇၵႂႃႇႁဵတ်းၵၢၼ် ဢမ်ႇဢၢၼ်းၵႂႃႇၶၢႆၶူဝ်းၼႂ်းၵၢတ်ႇၼႂ်းသႃး။ ၼႂ်ၼႆႉၵေႃႈ ၼႂ်းၵၢတ်ႇဢမ်ႇမီးၵူၼ်းၶၢႆၶူဝ်းၼမ်။ ထိုင်ၶိူင်ႈမိၼ်သိုၵ်းမႃးပွႆႇမၢၵ်ႇၸဵမ်ၸဝ်ႉ  ႁဵတ်းႁႂ်ႈၵူၼ်းထဝ်ႈ လုၵ်ႈဢွၼ်ႇ ဢွၼ်ၵၼ်တူၵ်းၸႂ်ၵူဝ်ႁႄ တေပၢႆႈၵေႃႈပႆႇၸၢင်ႈ တိုၵ်ႉပႂ်ႉတူၺ်းငဝ်းလၢႆးဝႆႉယူႇ”-ဝႃႈၼႆ။

ၼွၵ်ႈလိူဝ်ၼၼ်ႉ ၼႂ်ၼႆႉ မွၵ်ႈ 8 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ ၵႂႃႇပွႆႇမၢၵ်ႇတၢင်း ဝဵင်းလၢဝ်ႇၵၢႆးပုၼ်ႉပႃး- ၵူၼ်းပိုၼ်ႉတီႈလၢတ်ႈၼင်ႇၼႆယူႇသေတႃႉပႆႇလႆႈငိၼ်းၶၢဝ်ႇဝႃႈတိူဝ်ႉသႂ်ႇတီႈလႂ် ငဝ်းလၢႆးပဵၼ်ႁိုဝ်ၸဵမ်ၸိူဝ်းၼႆႉ။

ပၢင်ယၼ်ႇသိုၵ်း 1027 ဢၼ်သိုၵ်းဢူၺ်းလီ 3 ၸုမ်း (TNLA,MNDAA,AA) ႁူမ်ႈၵၼ်တႄႇယိုဝ်းမၢၼ်ႈမႃးမိူဝ်ႈပီၵၢႆ လိူၼ်ဢွၵ်ႊထူဝ်ႊပိူဝ်ႊ 27 ၼႆႉ ဝၢႆးလင်ပိုတ်းယိုဝ်းဝဵင်းၼမ်ႉၶမ်းႁၢဝ်ႈႁႅင်းႁိုင် လိူၼ်ပၢႆ မိူဝ်ႈဝၼ်းတီႈ 19/12/2023 သိုၵ်းလွႆတဢၢင်းပိုၼ်ၽၢဝ်ႇဝႃႈ ယိုတ်းလႆႈတပ်ႉသိုၵ်းမၢၼ်ႈ ၸၶၢၼ်းတိတ်ႉၵူင်း ဝဵင်းၼမ်ႉၶမ်း  (တပ်ႉသိုၵ်းဢၼ်လမ်ႇလွင်ႈတႃႇၽႅၼ်ၵၢၼ်သိုၵ်းမိူင်းတႆးပွတ်းႁွင်ႇ) ၼႆသေ ထိုင်မႃးဝၼ်းတီႈ 22/12/2023 တႄႇပူၵ်းတုင်းၶၢဝ်လႄႈ တုင်းၸိူဝ်ႉၸၢတ်ႈတဢၢင်း ၼႂ်းဝဵင်းၼမ်ႉၶမ်း။ သိုၵ်းမၢၼ်ႈလႆႈထွႆထွၼ်ဢွၵ်ႇဝဵင်း။ ဝၢႆးၼၼ်ႉၵေႃႈ သိုၵ်းလွႆတႄႇပၼ်ႇၵၢၼ်ၽွင်းငမ်းၶဝ်မႃးႁင်းၶေႃ တီႈဝဵင်းၼမ်ႉၶမ်း ။တေႃႇထိုင်ဝၼ်းမိူဝ်ႈၼႆႉ။