သိုၵ်းမၢၼ်ႈ ပွႆႇမၢၵ်ႇတီႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ  သွင်ဝၼ်းထပ်းၵၼ် မီးၵူၼ်းလူႉတၢႆ မၢတ်ႇၸဵပ်း။

မိူဝ်ႈၼႆႉ ဝၼ်းတီႈ 22/10/2024 ယၢမ်းၵၢင်ၼႂ် 2 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇ တီႈဝၢၼ်ႈႁူဝ်မိူင်း ဝဵင်း ၼမ်ႉသၼ်ႇ တီႈဢၼ်သိုၵ်းတဢၢင်း TNLA ပိုၼ်ၽၢဝ်ႇဝႃႈ ၵုမ်းၵမ်လႆႈဝႆႉ။

ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ-“ သိုၵ်းမၢၼ်ႈ ပွႆႇမၢၵ်ႇသွင်ဝၼ်းထပ်းၵၼ် ယၢမ်းၵၢင်ၼႂ် တီႈတင်းဝၢၼ်ႈႁူဝ်မိူင်း၊ မီးၵူၼ်းမၢတ်ႇၸဵပ်းလူႉတၢႆ ၼႆသေတႃႉ လၢႆၵေႃႉတႄႉ ဢမ်ႇႁူႉတႅတ်ႈတေႃး ”- ဝႃႈၼႆ။

မိူဝ်ႈဝၼ်းတီႈ 21/10/2024 ၼၼ်ႉၵေႃႈ ယၢမ်းၵၢင်ၼႂ် 8 မူင်း သိုၵ်းမၢၼ်ႈ ဢဝ် Jet fighter မိူဝ်းပွႆႇမၢၵ်ႇ တီႈဝၢၼ်ႈၵျွၵ်ႉ ၽိဝ်ႇ ဢၼ်ယၢၼ်ၵႆၵၼ် တၢင်းဝဵင်းၼမ်ႉသၼ်ႇမွၵ်ႈ 30 လၵ်းၼၼ်ႉ ၼင်ႇၵဝ်ႇ။

ၵူၺ်းၵႃႈ ယၢမ်းလဵဝ် တီႈဝဵင်းၼမ်ႉသၼ်ႇ သၢႆၾူၼ်း၊ ဢိၼ်ႊထိူဝ်ႊၼႅတ်ႊ ဢမ်ႇလႆႈလႄႈ တႃႇတေၵပ်းသိုပ်ႇတိတ်းတေႃႇၸူး ယၢပ်ႇၼႃႇၼႆ မၼ်းၸၢႆး သိုပ်ႇလၢတ်ႈထႅင်ႈၼင်ၼႆ။

“ၾူၼ်းၵေႃႈ သိုပ်ႇဢမ်ႇလႆႈ တတ်းပႅတ်ႈမူတ်းယဝ်ႉ၊ ၶဝ်ၵူဝ်မီးၵူၼ်း သူင်ႇၶၢဝ်ႇၸူးသိုၵ်းမၢၼ်ႈ။ ဢမ်ႇတူၺ်းလႃႇ တီႈလႃႈသဵဝ်ႈ မိူဝ်ႈလႅင်းၾူၼ်းဢမ်ႇလႆႈ သိုၵ်းမၢၼ်ႈ ဢမ်ႇၵႆႉဢဝ်မႃးပွႆႇမၢၵ်ႇ။ ၽိူဝ်ႇလႆႈလႅင်းၾူၼ်းၶိုၼ်းယဝ်ႉ ၸွင်ႇသိုၵ်းမၢၼ်ႈ ၵႆႉဢဝ်မၢၵ်ႇမႃးပွႆႇ ယွၼ်ႉမီးၵူၼ်းပၼ်ၶၢဝ်ႇၼၼ်ႉၼႃႇ”- ဝႃႈၼႆ။

သိုၵ်းမၢၼ်ႈ မႃးပွႆႇမၢၵ်ႇတီႈဝၢၼ်ႈႁူဝ်မိူင်း ဝၼ်းမိူဝ်ႈၼႆႉၼၼ်ႉ မီးၵူၼ်းတၢႆ 5 ၵေႃႉ ပဵၼ်ၵူၼ်းသိုၵ်းတဢၢင်း TNLA (4) ၵေႃႉ၊ ၵူၼ်းပိုၼ်ႉတီႈ 1 ၵေႃႉ သိုဝ်ႇၶၢဝ်ႇ The Irrawaddy ႁၢႆးငၢၼ်းဝႆႉၼင်ႇၼႆသေတႃႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ တႄႉ ၵပ်းသိုပ်ႇၼႂ်းပိုၼ်ႉတီႈဢမ်ႇလႆႈလႄႈ ဢမ်ႇၸၢင်ႈယိုၼ်ယၼ်။

ၶမ်ႈဝႃး ယၢမ်းတဵင်ႈၶိုၼ်း 12 မူင်းၵေႃႈ သိုၵ်းမၢၼ်ႈ မိူဝ်းပွႆႇမၢၵ်ႇ ဝဵင်းလႃႈသဵဝ်ႈ ၼင်ႇၵဝ်ႇ။   

ဝဵင်းတီႈဢၼ် သိုၵ်းၸၢဝ်းၶိူဝ်း ပိုၼ်ၽၢဝ်ႇဝႆႉဝႃႈ တိုၵ်းယိုဝ်းလႆႈ တပ်ႉသိုၵ်းမၢၼ်ႈသေ ယိုတ်းၵုမ်းလႆႈဝႆႉယဝ်ႉ ၼႆၸိူဝ်းၼၼ်ႉ သိုၵ်းမၢၼ်ႈ တင်ႈၸႂ်ဢဝ်ၶိူင်ႈမိၼ် မႃးပိုတ်းယိုဝ်းသႂ်ႇႁိူၼ်းယေးၵူၼ်းမိူင်း လူႉၵွႆဢမ်ႇထၢတ်ႇ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)