ဝၼ်းတီႈ 19/10/2024 ယၢမ်းၵၢင်ၼႂ်ၸဝ့် 1 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇ တီႈဝဵင်းလၢဝ်ႇၵၢႆး တိူဝ်ႉႁိူၼ်းယေးၵူၼ်းမိူင်းလူႉၵွႆၼမ် မၢၵ်ႇၼၼ်ႉ တူၵ်းတီႈၾၢႆႇဢွၵ်ႇဝဵင်းလၢဝ်ႇၵၢႆး။
ၽူႈၸၢႆးသႅၼ်းပၢၼ်ဢႃယု 35 ပီ ယူႇဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ – “ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ ပဵၼ်သႅၼ်းမၢၵ်ႇ 500 ပွင်ႇ၊ တူၵ်းတၢင်းတူင်ႊၶျိူင်ႊ (ၾၢႆႇဢွၵ်ႇဝဵင်းလၢဝ်ႇၵၢႆး – တီႈမီးသိုၵ်းၵဝ်ႈၵၢင်ႉၶဝ်ယူႇသဝ်း) လႄႈတၢင်းသူၼ်မွၵ်ႇ 311 ” – ဝႃႈၼႆ။
ယၢမ်းလဵဝ် တီႈဝဵင်းလၢဝ်ႇၵၢႆး (ၵၢတ်ႇၵဝ်ႇ) ၼႆႉ သၢႆသၼ်ယၢၼ်ႊ (လႅင်းၾူၼ်း) လႄႈ ဢိၼ်ႊထိူဝ်ႊၼႅတ်ႊ ဢမ်ႇလႆႈလႄႈ လွင်ႈမၢတ်ႇၸဵပ်းလူႉတၢႆ မီးလၢႆၵေႃႉ ပဵၼ်ၽႂ်လၢႆလၢႆ ၼႆတႄႉ ဢမ်ႇလႆႈႁူႉၸွမ်း။ ၾၢႆႇတၢင်းသိုၵ်းၵဝ်ႈၵၢင်ႉၵေႃႈ ဢမ်ႇပိုၼ်ၽၢဝ်ႇ။
တီႈဝဵင်းလၢဝ်ႇၵၢႆးၼႆႉ ဝၢႆးလင် သိုၵ်းၵဝ်ႈၵၢင်ႉ ပိုၼ်ၽၢဝ်ႇ ၵုမ်းလႆႈၸဵမ်မိူဝ်ႈႁၢင်ပီ ပီၵၢႆသေ ယူႇယူႇသိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ။
မိူဝ်ႈဝၼ်းတီႈ 02/08/2024 ၵေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈဝဵင်းလၢဝ်ႇၵၢႆး ယၢမ်းၵၢင်ၶိုၼ်း တူၵ်းတိူဝ်ႉသႂ်ႇႁူင်းယႃလႄႈ ႁိူၼ်းယေးၵူၼ်းမိူင်း ၼႂ်းပွၵ်ႉတူင်ႊၶျိူင်ႊၼင်ႇၵဝ်ႇ။ ၽွင်းၼၼ်ႉ ၵူၼ်းမိူင်းမၢတ်ႇၸဵပ်းလႄႈ လူႉတၢႆ 10 ပၢႆ။
မိူဝ်ႈဝၼ်းတီႈ 23/07/2024 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ တီႈပွၵ်ႉတူင်ႊၶျိူင်ႊၼႆႉ ၵူၺ်းၼင်ႇၵဝ်ႇ ၽွင်းၼၼ်ႉၵေႃႈ ၵူၼ်းမိူင်းတၢႆ 2 ၵေႃႉ မၢတ်ႇၸဵပ်း 3 ၵေႃႉ။
ဝၢႆးလင် ၽႅၼ်ယၼ်ႇသိုၵ်း 1027 သိုၵ်းမၢၼ်ႈ ၵႆႉဢဝ်ၶိူင်ႈမိၼ်မႃးတိုၵ်းလႄႈ ၵူၼ်းမိူင်းတီႈဝဵင်းလၢဝ်ႇၵၢႆး လႆႈပၢႆႈၽေးသိုၵ်း ၵႂႃႇသွၼ်ႈယူႇသဝ်းဝႆႉတၢင်းဝဵင်းၼမ်ႉၶမ်း၊ ဝဵင်းမူႇၸေႊ။ ၵူၼ်းမိူင်းၼႂ်းပိုၼ်ႉတီႈဝႃႈ ၵူၼ်းပၢႆႈၽေးသိုၵ်း ၶိုင်ႈပၢႆ ပႆႇၸၢင်ႈပွၵ်ႈၶိုၼ်းႁိူၼ်း ဝႃႈၼႆ။
တႅမ်ႈ – ယိင်းသဵဝ်ႈၶၢဝ်ႇ (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ