ႁူဝ်ၼႃႈ သိုၵ်းမၢၼ်ႈ ယိုတ်းမိူင်း ၸွမ်ၸိၵ်းသိုၵ်း မိၼ်းဢွင်ႇလၢႆႇ လၢတ်ႈဝႃႈ ၶေႃႈတုၵ်းယွၼ်း ဢၼ်ယိပ်းၵွင်ႈၵၢင်ႇၶဝ် တုၵ်းယွၼ်းမႃးၼၼ်ႉ တေဢမ်ႇၸၢင်ႈယွၼ်ႇယၢၼ်းပၼ်လႆႈ ၶေႃႈၵႂၢမ်းၼႆႉ မိၼ်ဢွင်ႇလၢႆႇ လၢတ်ႈၵႂႃႇတီႈပၢင် NCA ၶွပ်ႈတဵမ် 9 ပီ ၼႂ်းဝၼ်းတီႈ 15/10/2024 ၼႆႉ။

ယိပ်းၵွင်ႈၵၢင်ႇသေ တုၵ်းယွၼ်း ဢၼ်ၶႂ်ႈလႆႈၶႂ်ႈပဵၼ်ၼႆႉ တေဢမ်ႇလႆႈ၊ ထုၵ်ႇလီမႃးတီႈ ၽိူၼ်ဢုပ်ႇဢူဝ်း ၵၢၼ်မိူင်းသေ ၵႄႈလိတ်ႈၵႂႃႇၸွမ်း လွင်ႈငမ်းယဵၼ်၊ ယိပ်းၵွင်ႈၵၢင်ႇသေ တုၵ်းယွၼ်းမႃးၼႆႉ တေဢမ်ႇၸၢင်ႈယွၼ်ႇယၢၼ်းၵႄႈလိတ်ႈပၼ်လႆႈ ဝႃႈၼႆ။

လိူဝ်ၼၼ်ႉ ယူႇတီႈ တပ်ႉသိုၵ်းမၢၼ်ႈသေ တေသိုပ်ႇၽဵဝ်ႈမူၺ်ႉပႅတ်ႈ ၸုမ်းလုၵ်ႉၽိုၼ်ႉ၊ ၵူၼ်းမိူင်းၵေႃႈ ၼင်ႇႁိုဝ် တေဢမ်ႇပဵၼ်ၶွၼ်ႉတဝ်ႉၸုမ်းၵေႃႇၵၢၼ်ႁၢႆႉၼၼ်ႉ ထုၵ်ႇလီၾၢင်ႉၸွမ်းၼႆ တိုၵ်းသူၼ်းပႃးၼင်ႇၼႆ။

တႄႇႁူဝ်ပီ 2021 ဝၢႆးယိုတ်းဢဝ် ဢႃႇၼႃႇၸိုင်ႈမိူင်းယဝ်ႉ ၸုမ်းလုၵ်ႉၽိုၼ်ႉ ဢၼ်သၢၼ်ၶတ်း သိုၵ်းမၢၼ်ႈ ယူႇတင်းသဵင်ႈၼႆႉ သိုၵ်းမၢၼ်ႈလၢတ်ႈဝႃႈ ပဵၼ်ၸုမ်းၵေႃႇၵၢၼ်ႁၢႆႉၼႆသေ တီႉၺွပ်းႁဵတ်းႁၢႆႉ ၶႃႈတၢႆ။

မိူၼ်ၼႆ ၸုမ်းဢူၺ်းလီသၢမ်ၸုမ်း ဢၼ်ပဵၼ် ၸုမ်းသိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA လႄႈ သိုၵ်းရၶႅင်ႇ AA ၸိူဝ်းၼႆႉၵေႃႈ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉဝႃႈ ပဵၼ်ၸုမ်းၵေႃႇၵၢၼ်ႁၢႆႉ၊ ဝၢႆးၼၼ်ႉ ၸႂ်ႉ ၶိူင်ႈမိၼ်ပွႆႇမၢၵ်ႇယိုဝ်းသႂ်ႇ ႁၢဝ်ႈႁႅင်း။

ယွၼ်ႉၶိူင်ႈမိၼ်သိုၵ်းမၢၼ်ႈသေ ၼႂ်းၸိုင်ႈတႆးပွတ်းႁွင်ႇ ၶၢဝ်းတၢင်းၼိုင်ႈလိူၼ် ၵူၼ်းမိူင်းလူႉတၢႆၸွမ်း ဢမ်ႇယွမ်း 55 ၵေႃႉၼႆ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ၵေႃႈ ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉ ၼင်ႇၼႆ။

ၽွင်းငဝ်းလၢႆးၼင်ႇၼႆ သိုၵ်းမၢၼ်ႈ မွၵ်ႇႁွင်ႉဝႆႉ ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဝၢင်းၶိူင်ႈ ၶဝ်ႈပၢင်လိူၵ်ႈ တင်ႈသေ ၵႄႈလိတ်ႈၵၢၼ်မိူင်းၵႂႃႇ ဝႃႈၼႆ။