ယၢမ်းလဵဝ် သိုၵ်းတဢၢင်း TNLA ယိုတ်းၵုမ်းလႆႈ ဝဵင်းသီႇပေႃႉယဝ်ႉသေတႃႉ ၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ မႃးပွႆႇမၢၵ်ႇသႂ်ႇၶိူဝ်းယႂ်း မိူၼ်ဝဵင်းလႃႈသဵဝ်ႈတင်း ဝဵင်းသႅၼ်ဝီ ဝႃႈၼႆ။
ဝၼ်းတီႈ 13/10/2024 ယၢမ်းၵၢင်ၼႂ်မွၵ်ႈ 2 မူင်းၼႆႉ သိုၵ်းတဢၢင်း TNLA ယိုဝ်းတိုၵ်းလႆႈ တပ်ႉသိုၵ်းမၢၼ်ႈၶလယ 23 ဢၼ်ပၵ်းဝႆႉၾၢႆႇႁွင်ႇဝဵင်း ယၢၼ်ဝဵင်းမွၵ်ႈ 4 လၵ်း ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႉ ဝၢႆးယိုတ်းလႆႈယဝ်ႉ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇသႂ်ႇ ၸွမ်းၼႂ်းပွၵ်ႉၼႂ်းဝဵင်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ၼႂ် သိုၵ်းလွႆၶဝ် သိမ်းလႆႈတပ်ႉ 23 ယဝ်ႉ။ တပ်ႉမၢၼ်ႈတႄႉ ဢမ်ႇမီးယဝ်ႉ တီႈသီႇပေႃႉၼႆႉ။ ၵူၺ်းၼႃႇ ဢၼ်လႆႈၵူဝ်တႄႉ ပဵၼ်ၶိူင်ႈမိၼ်ၶႃႈဢေႃႈ။ ဝၢႆးၶဝ်သိမ်းလႆႈယဝ်ႉ ၸႂ်ႉၶိူင်ႈမိၼ်မႃးပွႆႇမၢၵ်ႇၼႆႉ တႄႇဢဝ်ပွၵ်ႉမျႅၼ်ႇမႃႇယႅတ်ႉၼၼ်ႉမႃး တေႃႇထိုင်ၼႂ်းဝဵင်းၼႆႉ တင်းၼမ်ယဝ်ႉ။ ၵူၼ်းမိူင်း ဢွၼ်ၵၼ်ပၢႆႈဢွၵ်ႇဝဵင်းၵေႃႈၼမ်ဢေႃႈ။ ၼႂ်းဝဵင်းဢၼ်ၶဝ်မႃးပွႆႇသမ်ႉ တီႈပွၵ်ႉမၢၼ်ႈၸၢတ်ႈတင်း တူင်ႈၸၢင်ႉ ၸိူဝ်းၼၼ်ႉဢေႃႈ”- ဝႃႈၼႆ။
ယၢမ်းလဵဝ် ၼႂ်းဝဵင်းသီႇပေႃႉၼႆႉ ဢမ်ႇမီးတပ်ႉသိုၵ်းမၢၼ်ႈယဝ်ႉသေတႃႉ ၵူၼ်းမိူင်းတႄႉ မၢင်ၸိူဝ်း ပႆႇႁတ်းပွၵ်ႈ မိူဝ်းယူႇသဝ်းၶိုၼ်းတီႈႁိူၼ်း။ ၵူဝ်သိုၵ်းမၢၼ်ႈ မႃးပွႆႇမၢၵ်ႇသႂ်ႇၼႂ်းဝဵင်း ဝႃႈၼႆ။
“မိူဝ်းၸႂ်းႁိူၼ်းတႄႉ မိူဝ်းဢေႃႈ တႃႇတေမိူဝ်းယူႇတႄႉ ပႆႇႁတ်းဝူၼ်ႉၶႃႈ။ ၸုမ်းလႂ်ပေႉၵေႃႈ လႆႈမႆႈၸႂ်ၶႃႈယဝ်ႉ။ လႆႈၵူဝ် ၶိူင်ႈမိၼ်မႃးပွႆႇမၢၵ်ႇ မိူၼ်တၢင်းလႃႈသဵဝ်ႈ၊ သႅၼ်ဝီ ၶဝ်ၼၼ်ႉဢေႃႈ။ တီႈသီႇပေႃႉၵေႃႈ ၵူဝ်မိူၼ်ၵၼ်ၶႃႈယဝ်ႉ။ ၵွပ်ႈၼႆလႄႈ ဢွၼ်ၵၼ်မႆႈၸႂ်ႁႅင်း”- ၵူၼ်းပိုၼ်ႉတီႈ ဝဵင်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း TNLA တီႈဝဵင်းသီႇပေႃႉၼႆႉ ပဵၼ်မႃးၶၢဝ်းတၢင်း 2 လိူၼ် ယဝ်ႉ။ ၽွင်းပၢင်တိုၵ်းၼ်ႉ သိုၵ်းတင်းသွင်ၾၢႆႇ ၸႂ်ႉၵွင်ႈလူင်/ မၢၵ်ႇလူင် ပိုတ်းယိုဝ်းၵၼ် ၸႂ်ႉၶိူင်ႈမိၼ် တိုၵ်း ၸိူဝ်းၼႆႉ မႃးပွႆႇမၢၵ်ႇ ပႃးထႅင်ႈလႄႈ ႁဵတ်းႁႂ်ႈမၢၵ်ႇတူၵ်းသႂ်ႇ ႁိူၼ်းယေးလူႉၵွႆ ၼပ်ႉႁူဝ်သိပ်းလင်။ ၵူၼ်းမိူင်း ဢၼ်တိူဝ်ႉၺႃးၸၢၵ်ႇမၢၵ်ႇလူႉတၢႆ ဢမ်ႇယွမ်း 30 ၵေႃႉ မၢတ်ႇၸဵပ်း 40 ပၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ