ဝၼ်းတီႈ 09/10/2024 ယၢမ်းဝၢႆးဝၼ်း 3 မူင်း တေႃႇထိုင် ၵၢင်ၶမ်ႈ ၶိူင်ႈမိၼ်သိုၵ်းမၢၼ်ႈ သႅၼ်း Y – 12 မႃး ပွႆႇမၢၵ်ႇတီႈဝဵင်းသီႇပေႃႉ တင်းဝၼ်း တိူဝ်ႉၺႃးမႄႈၶၢဝ် လွၼ်ႇ 1 ၸဝ်ႈ၊ မၢတ်ႇၸဵပ်း 2 ၸဝ်ႈ တီႈဝၢၼ်ႈၼမ်ႉငုမ်း ဝဵင်းသီႇပေႃႉ ၸိုင်ႈတႆးပွတ်းႁွင်ႇ။
သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇ တီႈပွၵ်ႉၸၢင်ႈၶမ်းၸၢၼ်း၊ ပွၵ်ႉၵျွင်းၶမ်း၊ ပွၵ်ႉဢူၵ်ႉၵျိၼ်း၊ ပွၵ်ႉဝဵင်းၸၢၼ်း တင်းဝၢၼ်ႈၼမ်ႉငုမ်း။ ဝၢၼ်ႈၼမ်ႉငုမ်းၼႆႉ ပဵၼ်ဝၢၼ်ႈဢၼ်မီးၼိူဝ်လွႆ ယၢၼ်ၵႆၵၼ် တင်းသီႇပေႃႉ 5 လၵ်း။ မၢၵ်ႇဢၼ်တူၵ်းသႂ်ႇ တီႈဝၢၼ်ႈဢူၵ်ႉၵျိၼ်းၼႆႉ တိူဝ်ႉၺႃးမႄႈၶၢဝ် လွၼ်ႇၸဝ်ႈၼိုင်ႈ မၢတ်ႇၸဵပ်း 2 ၸဝ်ႈ – ဝႃႈၼႆ။
ၵူၼ်းၸၢႆး ယူႇဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး သိုၵ်းမၢၼ်ႈ မႃးပွႆႇမၢၵ်ႇ လႆႈငိၼ်းသဵင်မၼ်း ဢမ်ႇယွမ်း 60 ၵမ်းၼႆႉ၊ ၶိူင်ႈမိၼ်သိုၵ်းၼႆႉ မႃး 4 လမ်း၊ ပဵၼ်သႅၼ်း Y -12 ။ မႄႈၶၢဝ်တၢင်းဝၢၼ်ႈၼမ်ႉငုမ်း ဢၼ်မၢတ်ႇ 2 ၸဝ်ႈ ၼၼ်ႉ ယၢမ်းလဵဝ် ယူတ်းယႃတူဝ်ဝႆႉတီႈ ႁူင်းယႃ ဢၼ်ၸုမ်းပရႁိတ ပိုတ်ႇဝႆႉ တီႈဝဵင်းသီႇပေႃႉ”- ဝႃႈၼႆ။
သိုၵ်းမၢၼ်ႈ ဢဝ်ႁိူဝ်းမိၼ်မႃးပွႆႇမၢၵ်ႇ တီႈပွၵ်ႉၸၢင်ႈၶမ်းၸၢၼ်း ဢမ်ႇယွမ်း 10 ၵမ်း၊ တၢင်းၼႃႈယေးငိုၼ်းသီႊပီႊ CB Bank ၼၼ်ႉ ႁိူၼ်းၵွႆလင်ၼိုင်ႈ၊ ပွၵ်ႉၵျွင်းၶမ်း တူၵ်းတိူဝ်ႉႁိူၼ်းၼိုင်ႈလင်။
ၽွင်းပၢင်တိုၵ်းၼႆႉ ႁူင်းယႃလူင်ဝဵင်းသီႇပေႃႉၵေႃႈ ဢမ်ႇပိုတ်ႇ။ မေႃယႃလႄႈ မေႃလုမ်းလႃၶဝ်ၵေႃႈ ဢမ်ႇမီးတီႈႁူင်းယႃ။ ပေႃးမီးၵူၼ်းမိူင်းမၢတ်ႇၸဵပ်းၸၢၵ်ႇမၢၵ်ႇ ၸိူင်ႉၼႆ ဢမ်ႇၸၢင်ႈၵႂႃႇယူတ်းယႃတူဝ် ပဵၼ်ဢၼ် ယၢပ်ႇၽိုတ်ႇၵိၼ်းၸႂ်ဝႆႉ ၵူၼ်းမိူင်းဝဵင်းသီႇပေႃႉ လၢတ်ႈၼင်ႇၼႆ။
“တေႃႈလဵဝ် တေၵိၼ်ၵေႃႈ လႆႈၾၢင်ႉထွမ်ႇသဵင်ႁိူဝ်းမိၼ်၊ တေၼွၼ်းၵေႃႈ လႆႈၾၢင်ႉထွမ်သဵင်ႁိူဝ်းမိၼ်၊ ယူႇၵေႃႈ ဢမ်ႇမီးလွင်ႈႁူမ်ႇလူမ်ႈ သေဢိတ်း၊ ဢမ်ႇမီးလွင်ႈဢုၼ်ႇၸႂ် သေဢိတ်း၊ တေပၢႆႈၵေႃႈ ဢမ်ႇၸၢင်ႈ၊ မီးလွင်ႈယၢပ်ႇၽိုတ်ႇၵေႃႈ ၵူဝ်သေယူႇၵႂႃႇ ၵႃႈလႆႈၸုၼ်ႉသၢႆၸႂ်သေယူႇၵူၺ်းယဝ်ႉ”- ဝႃႈၼႆ။
ယၢမ်းလဵဝ် တီႈဝဵင်းသီပေႃႉ သဵင်ၶိူင်ႈမိၼ်သိုၵ်းမၢၼ်ႈ လႆႈငိၼ်းၵူႈဝၼ်း။ ၵူၼ်းဢၼ်ယူႇၸမ် တပ်ႉ 23 တႄႉ လႆႈငိၼ်းသဵင်ၵွင်ႈ၊ သိုၵ်းတဢၢင်းတင်း သိုၵ်းမၢၼ်ႈ တိုၵ်ႉယိုဝ်းၵၼ်ဝႆႉယူႇ။
ၵူၼ်းပၢႆႈၽေးသိုၵ်း တီႈဝဵင်းသီပေႃႉ ဢမ်ႇမီးၽႂ် မိူဝ်းယူႇၶိုၼ်းႁိူၼ်း၊ ၸိူဝ်းပွၵ်ႈမိူဝ်းၵေႃႈ ဢွၼ်ၵၼ်ၵႂႃႇယူႇ တၢင်းဝၢၼ်ႈတၢင်းသူၼ် တီႈဢၼ်ၵႆဝဵင်း တီႈဢၼ်သိုၵ်းမၢၼ်ႈ ဢမ်ႇၵႂႃႇပွႆႇမၢၵ်ႇ ထိုင်ၼၼ်ႉ ၸင်ႇတေ ၸၢင်ႈယူႇငၢႆႈဢုၼ်ႇၸႂ် ဝႃႈ ၼႆ။
တီႈဝဵင်းသီႇပေႃႉၼႆႉ ပၢင်တိုၵ်းတႄႇပဵၼ်ႁၢဝ်ႈႁႅင်းၶိုၼ်း မိူဝ်ႈႁူဝ်လိူၼ်ဢေႃႊၵတ်ႊသ်၊ တေႃႇထိုင်ၼႂ်းလိူၼ် ဢွၵ်ႊထူဝ်ႊပိူဝ်ႊၼႆႉ ယွၼ်ႉသိုၵ်းမၢၼ်ႈ ပွႆႇမၢၵ်ႇလႄႈ ၵူၼ်းပိုၼ်ႉတီႈလူႉတၢႆ ဢမ်ႇယွမ်း 30 ယဝ်ႉ – ၵူၼ်းပိုၼ်ႉတီႈလၢတ်ႈ။
တႅမ်ႈ – ယိင်းသဵဝ်ႈၶၢဝ် (ၽူႈတွႆႇႁွၵ်ႈ)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ