သိုၵ်းၵဝ်ႈၵၢင်ႉ MNDAA တီႉၺွပ်း ၵူၼ်းတီႈဝဵင်းလႃႈသဵဝ်ႈ 30 ၵေႃႉ ဝႃႈပဵၼ်ၵူၼ်းပၼ်ၶၢဝ်ႇ တီႈသိုၵ်းမၢၼ်ႈ ၵူၼ်းၵမ်ႉထႅမ်သိုၵ်းမၢၼ်ႈၼႆသေ တေပၼ်တူတ်ႈတၢမ်ႇၵႂႃႇ ဝႃႈၼႆ။ 

ၵူၼ်းပိုၼ်ႉတီႈ ဢၼ်ၸမ်ၸႂ်ၵၼ်တင်း ၸုမ်းသိုၵ်းၵဝ်ႈၵၢင်ႉလၢတ်ႈဝႃႈ ပဵၼ်ယွၼ်ႉၸိူဝ်းၶဝ်ၼႆႉ သူင်ႇၶၢဝ်ႇလႄႈ သိုၵ်းမၢၼ်ႈ ၸင်ႇမႃးပွႆႇမၢၵ်ႇတိူဝ်ႉသႂ်ႇႁိူၼ်းယေးၵူၼ်းမိူင်းလူႉၵွႆ ၵူၼ်းမိူင်းလူႉတၢႆၼႆသေ သိုၵ်းၵဝ်ႈၵၢင်ႉ ၸင်ႇတီႉၺွပ်းၸိူဝ်း ၶဝ် ဝႃႈၼႆ။

ၼၢင်းယိင်းၵူၼ်းမိူင်း ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶႄႇဝႃႈ ၶဝ်တီႉလႆႈ ၵူၼ်းပၼ်ၶၢဝ်ႇသိုၵ်းမၢၼ်ႈ 30 ၵေႃႉယဝ်ႉ ၼႆဝႃႇ။ တီႉလႆႈတီႈလႂ်တႄႉ ဢမ်ႇႁူႉ၊ ၶဝ်တေထတ်းၶိုၼ်းသေ ၸင်ႇပၼ်တူတ်ႈတၢမ်ႇၵႂႃႇ ၼႆဝႃႇ။ မီးၶၢဝ်ႇဢွၵ်ႇမႃးဝႃႈ ၶဝ်တေဢဝ်လႄႇလဵပ်ႈဝဵင်း ၼႄၵူၼ်းမိူင်းသေ ၸင်ႇပၼ်တၢမ်ႇ”- ဝႃႈၼႆ။

ၵဵဝ်ႇလူၺ်ႈလွင်ႈၼႆႉ မီးၶၢဝ်ႇလိုဝ်းဝႆႉၸိူင်ႉၼႆသေတႃႉ ယူႇတီႈ ၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၽူႈမီးပုၼ်ႈၽွၼ်း ၽူႈၶၢၼ်ပၢၵ်ႇ တီႈၸုမ်းၵဝ်ႈၵၢင်ႉၵေႃႈ ၵပ်းသိုပ်ႇဢမ်ႇလႆႈလႄႈ ဢမ်ႇၸၢင်ႈလႆႈၶေႃႈယိုၼ် ယၼ်။ 

ၵူၼ်းၸမ်ၸႂ် သိုၵ်းၵဝ်ႈၵၢင်ႉ ၼႂ်းဝဵင်းလႃႈသဵဝ်ႈ လၢတ်ႈဝႃႈ ၸိူဝ်းၶဝ်လႆႈငိုၼ်းတီႈသိုၵ်းမၢၼ်ႈ တႃႇပႂ်ႉတူၺ်းသေ သူင်ႇၶၢဝ်ႇပၼ် – ဝႃႈၼႆ။

ၼၢင်းယိင်းလႃႈသဵဝ်ႈ ပၢႆႈၽႄးသိုၵ်း ယူႇဝႆ့တီႈၵေးသီး လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈမႃးပွႆႇမၢၵ်ႇ တိၵ်းတိၵ်းလႄႈ မၢင်ၸိူဝ်းၶႂ်ႈပၢႆႈၵေႃႈ ဢမ်ႇမီးငိုၼ်းဢွၵ်ႇမႃးၶိုၼ်း၊ ၵႃႈၵႃးၵေႃႈ ၵႃႈယႂ်ႇၼႃႇၶႃႈ၊ ၼႂ်းဝဵင်း ဢမ်ႇၸၢင်ႈႁဵတ်းႁႃၵိၼ်လဵင်ႉတွင်ႉသင်၊ သမ်ႉမီးၵူၼ်းၵမ်ႈၽွင်ႈ ပႂ်ႉပွင်ႇၶၢဝ်ႇပၼ်သိုၵ်းမၢၼ်ႈလႄႈ ၸင်ႇဝႃႈသိုၵ်းမၢၼ်ႈမႃးပွႆႇမၢၵ်ႇၵူႈၶမ်ႈ”- ဝႃႈၼႆ။   

မီးၶၢဝ်ႇၼႂ်းပိုၼ်ႉတီႈဝႃႈ ၵူၼ်းပႂ်ႉတူၺ်း သူင်ႇၶၢဝ်ႇပၼ်သိုၵ်းမၢၼ်ႈၼႆႉ ၼိုင်ႈလိူၼ်လႆႈငိုၼ်း 10 ထိုင် 15 သႅၼ် ဝႃႈၼႆသေတႃႉ လွင်ႈၼႆႉၵေႃႈ ဢမ်ႇလႆႈၶေႃႈယိုၼ်ယၼ်။

ၵူၼ်းမိူင်းဝဵင်းလႃႈသဵဝ်ႈ ဢမ်ႇပၢႆႈၽေးသိုၵ်း ၵေႃႉၼိုင်ႈ လၢတ်ႈဝႃႈ –  ပေႃးႁူႉလီလီ လႆႈၶၢဝ်ႇမႅၼ်ႈမႅၼ်ႈ သေတီႉတႄႉ ဢမ်ႇၸၢင်ႈဝႃႈ။ သင်ဝႃႈ ထၢင်ႇထိူမ်သေတီႉၵူၺ်းတႄႉ ထုၵ်ႇလီၵူတ်ႇထတ်းၸွပ်ႇထၢမ် တူၺ်းထႅင်ႈလီလီၵွၼ်ႇ ၸင်ႇပၼ်တူတ်ႈတၢမ်ႇတႄႉ တေလီ။ မၢင်ၸိူဝ်း ၵႆႉၶႂ်ႈၶၢႆၵၼ်ၵူၺ်းလႄႈ ပေႃးတီႉၽိတ်းၵေႃႉမၼ်းတႄႉ ၵူၼ်းမိူင်း ဢၼ်ဢမ်ႇမီးတၢင်းၽိတ်းၼၼ်ႉ တေၺႃးၵိၼ်ၶီႈသူမ်ႈမၼ်းလၢႆလၢႆၵူၺ်း – ဝႃႈၼႆ။ 

ယၢမ်းလဵဝ်ၼႆႉ လႅင်းၾူၼ်းလႄႈ ဢိၼ်ႊထိူဝ်ႊၼႅတ်ႊ တီႈဝဵင်းလႃႈသဵဝ်ႈၼႆႉ ၶၢတ်ႇဝႆႉ ၵပ်းသိုပ်ႇတိတ်းတေႃႇၵၼ် ယၢပ်ႇၽိုတ်ႇ။ ပေႃးမေႃလိူၵ်ႈၸႂ်ႉဢိၼ်ႊထိူဝ်ႊၼႅတ်ႊမၢင်သၢႆၵေႃႈ ၸႂ်ႉလႆႉပဵၼ်ၵမ်း။

သိုၵ်းမၢၼ်ႈၼႆႉ ဝၢႆးလင်ပိုၼ်ၽၢဝ်ႇဝႃႈ တေပိုတ်းယိုဝ်း တိုၵ်းတေႃးဢဝ်ၶိုၼ်းဝဵင်းလႃႈသဵဝ်ႈ ႁႂ်ႈလႆႈၼႆသေ ၼႂ်းလိူၼ်သႅပ်ႊထႅမ်ႊပိူဝ်ႊပူၼ်ႉမႃး သိုၵ်းမၢၼ်ႈဢဝ်ၶိူင်ႈမိၼ် မႃးပွႆႇမၢၵ်ႇၵူႈၶမ်ႈၶိုၼ်းလႄႈ တီႈဝဵင်းလႃႈသဵဝ်ႈၼႆႉ ၵူၼ်းမိူင်းတၢႆ 10 ပၢႆ မၢတ်ႇၸဵပ်း 40 ပၢႆ။ ႁိူၼ်းယေးလူႉၵွႆ တင်းၼမ်တင်းလၢႆ။

ပၢင်တိုၵ်းၵေႃႈ ဢမ်ႇမီးသေ ၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇလူင်း ယၢမ်းၵၢင်ၶမ်ႈၵၢင်ၶိုၼ်း ယၢမ်းလပ်းလီၼွၼ်းဝၢၼ် ၸိူင်ႉၼႆတိၵ်းတိၵ်းလႄႈ ၵူၼ်းမိူင်း ပဵၼ်ဢၼ်တုမ်ႉတိူဝ်ႉပၢႆးၸႂ် ဢမ်ႇႁတ်းယူႇသဝ်း ဢမ်ႇၸၢင်ႈႁႃၵိၼ်လဵင်ႉတွင်ႉ ယူႇ ဢမ်ႇလႆႈလႄႈ ၶိုၼ်းဢွၼ်ၵၼ်ပၢႆႈ ဢွၵ်ႇဝဵင်းလႃႈသဵဝ်ႈထႅင်ႈ။

တႅမ်ႈ – ယိင်းသဵဝ်ႈၶၢဝ် (ၽူႈတွႆႇႁွၵ်ႈ)