ၸုမ်းယိပ်းၵွင်ႈၵၢင်ႇ မႃးတင်းၵဵတ်ႉလၢၼ်ႇၼမ် ၵူတ်ႇထတ်းပႃးႁၢဝ်ႈႁႅင်း တီႈသဵၼ်ႈတၢင်းၵျွၵ်ႉတၢၼ်း ၼႂ်းၵႄႈတူၼ်ႈတီး – ပၢင်လူင် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇ။

သဵၼ်ႈတၢင်း ၼႂ်းၵႄႈမိူင်းပွၼ် – လွႆလႅမ်သမ်ႉ လိၼ်လွႆၵူၼ်ႇတဵင်တၢင်းလႄႈ ႁဵတ်းႁႂ်ႈၵူၼ်းမိူင်း ဢမ်ႇၸၢင်ႈၵႂႃႇမႃး လႆႈ ဢွၼ်ၵၼ်တႆႇၵႂႃႇၸွမ်းသဵၼ်ႈတၢင်းၵျွၵ်ႉတၢၼ်းၼႆႉ ၼမ်ႉမႃးႁႅင်း တႄႇဢဝ်လိူၼ်သႅပ်ႊထႅမ်ႊပိူဝ်ႊၼၼ်ႉမႃး ၸုမ်းယိပ်းၵွင်ႈၵၢင်ႇ လၢႆမူႇၸုမ်း တင်ႈၵဵတ်ႉလၢၼ်ႇသေ ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း။

ၸဝ်ႈၵႃး ဢၼ်လႅၼ်ႈတီႈသဵၼ်ႈတၢင်းၼၼ်ႉ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ ဝၢႆးလင်ၼႆႉ ၼႂ်းၵႄႈဝဵင်းႁူဝ်ပူင်း – ပၢင်လူင် သဵၼ်ႈတၢင်းၵျွၵ်ႉတၢၼ်းၼႆႉ ၸုမ်းယိပ်းၵွင်ႈ တင်ႈၵဵတ်ႉလၢၼ်ႇဝႆႉ မီးဢမ်ႇယွမ်း 8 တီႈ၊ တၢင်းၶဝ်ႈဢွၵ်ႇဝၢၼ်ႈ ၸိူဝ်းၼႆႉ မီးဝႆႉၵဵတ်ႉသိုၵ်းမၢၼ်ႈ၊ ပျီႇတူႉၸိတ်ႉ၊ ႁိမ်းၼမ်ႉပွၼ်သမ်ႉ မီးဝႆႉၵဵတ်ႉလၢၼ်ႇသိုၵ်းတႆး။ ယၢမ်းလဵဝ်ၼႆႉ ၵူတ်ႇထတ်းယွၼ်းငိုၼ်းပႃးဢေႃႈ”- ဝႃႈၼႆ။

တီႈသဵၼ်ႈတၢင်းၵျွၵ်ႉတၢၼ်း ၼႂ်းၵႄႈႁူဝ်ပူင်း – ပၢင်လူင်ၼႆႉ မီးဝႆႉၵဵတ်ႉလၢၼ်ႇ 8 တီႈ၊ ပဵၼ်ၵဵတ်ႉသိုၵ်းမၢၼ်ႈ 2 တီႈ၊ ၵဵတ်ႉပျီႇတူႉၸိတ်ႉပဢူဝ်း 4 တီႈလႄႈ ၵဵတ်ႉသိုၵ်းတႆး SSPP 2 တီႈ ဝႃႈၼႆ။

“သဵၼ်ႈတၢင်းမိူင်းပွၼ် – လွႆလႅမ်တႄႉ ပိၵ်ႉဝႆႉဢေႃႈ။ ၶဝ်ပိုတ်ႇပၼ်ၶၢဝ်းလၢႆၵေႃႈ တေလႆႈၵႂႃႇမႃးၶၢဝ်းၼၼ်ႉၵူၺ်း။ ယွၼ်ႉလိၼ်လွႆၵူၼ်ႇတဵင်တၢင်းလႄႈ သဵၼ်ႈတၢင်းၸင်ႇလႆႈပိၵ်ႉဢိုတ်းဢေႃႈ။ ဢၼ်ယၢပ်ႇၽိုတ်ႇႁႅင်းတႄႉ ပဵၼ်တီႈႁိမ်းဝၢၼ်ႈၶွၵ်းၼွႆႉ ၼၼ်ႉဢေႃႈ။ သဵၼ်ႈတၢင်းၼႆႉ သင်ၾူၼ်မႃးတေမိုၼ်ႈ ၵွပ်ႈၼႆလႄႈ ထုၵ်ႇလီၾၢင်ႉၵၼ်ၵႂႃႇမႃး။ ရူတ်ႉၵႃးၵေႃႈ တေလႆႈပၼ်လႄႉၵၼ်သေ ၶိုၼ်ႈလူင်းဢေႃႈ”- ၸဝ်ႈၵႃး သိုပ်ႇလၢတ်ႈၼႄၼင်ႇၼႆ။

သဵၼ်ႈတၢင်းၼႂ်းၵႄႈမိူင်းပွၼ် – လွႆလႅမ်ၼႆႉ တၢင်းၵႅပ်ႈသေဢမ်ႇၵႃး မၢင်တီႈ ၼမ်ႉလူၵ်ႈလိၼ် ၵူၼ်ႇတဵင်တၢင်းသေ ၵႂႃႇမႃးယၢပ်ႇၽိုတ်ႇ ႁဵတ်းႁႂ်ႈၵူၼ်းမိူင်း ၸိူင်ႉၵၢတ်ႈ လႆႈပႂ်ႉၶၢဝ်းယၢမ်းႁိုင် ၼႆယဝ်ႉ။