သိုၵ်းမၢၼ်ႈ ယိုတ်းမိူင်းတင်း ၸုမ်းႁူမ်ႈႁွမ်းသိုၵ်းတဢၢင်း TNLA တိုၵ်ႉသိုပ်ႇပဵၼ်ပၢင်တိုၵ်းၵၼ် တီႈဝဵင်းသီႇပေႃႉ ႁၢဝ်ႈ ႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ၵႆႉပွႆႇမၢၵ်ႇယိုဝ်းတိုၵ်းၸွႆႈ တိူဝ်ႉၺႃးၵူၼ်းမိူင်းတၢႆထႅင်ႈ 4 ၵေႃႉ မၢတ်ႇၸဵပ်း 10 ပၢႆ။
ၼႂ်းဝၼ်းတီႈ 28-29/09/2024 ၼႆႉ သွင်ၾၢႆႇယိုဝ်းတိုၵ်းၵၼ် ႁၢဝ်ႈႁႅင်း မၢၵ်ႇလူင်တူၵ်းတႅၵ်ႇ ၼႂ်းဝၢၼ်ႈၶႃလိုင်ႈသေ တိူဝ်ႉၺႃးၵူၼ်းမိူင်းတၢႆထင်တီႈ 3 ၵေႃႉလႄႈ ႁိမ်းထမ်ႇမရူင်ႇၵၢင်ဝဵင်းထႅင်ႈ ၵေႃႉၼိုင်ႈ၊ ၸၢၵ်ႇမၢၵ်ႇ တိူဝ်ႉၺႃးၵူၼ်းမၢတ်ႇ ၸဵပ်းထႅင်း 10 ပၢႆ ၼႂ်းၼၼ်ႉ ပႃးၽူႈၶဝ်ႈၸုမ်းပရႁိတ ၼႂ်းပိုၼ်ႉတီႈ ဝႃႈၼႆ။
ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ -“တႃႇတေယိုတ်းၵုမ်းလႆႈ တပ်ႉသိုၵ်းမၢၼ်ႈ 503 – 504 ၼၼ်ႉ သိုၵ်းၵဝ်ႈၵၢင်ႉတင်း PDF လုၵ်ႉတၢင်းၼမ်ႉတူႈသေ လူင်းမႃးတိုၵ်းၸွႆႈ။ ယၢမ်းလဵဝ် ၵိုတ်းထႅင်ႈ ၶလ ယ 23 ၼၼ်ႉၵူၺ်းယဝ်ႉ။ သိုၵ်းမၢၼ်ႈသမ်ႉ ယူႇၼႂ်းပိုၼ်ႉတီႈသေ ၵဵပ်းၶေႃႈမုလ်း ႁၢႆးငၢၼ်းတၢင်းၼိူဝ် ပေႃးၵၢင်ၶမ်ႈၵၢင်ၶိုၼ်းမႃး ၶဝ်သမ်ႉ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇသေ တိူဝ်ႉၺႃးၵူၼ်းမိူင်းလူႉတၢႆဢေႃႈ”- ဝႃႈၼႆ။
တႄႇဢဝ် ဝၼ်းတီႈ 28-30/09/2024 ၼႂ်းၶၢဝ်းတၢင်း 3 ဝၼ်းမႃးၼႆႉ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းသီႇပေႃႉၼႆႉ တိူဝ်ႉၺႃး ၵူၼ်းမိူင်းလူႉတၢႆ 4 ၵေႃႉ မၢတ်ႇၸဵပ်း 11 ၵေႃႉ – ယူႇတီႈ TNLA ပိုၼ်ၽၢဝ်ႇဝႆႉၼင်ႇၼႆ။
ဝၢႆးလင် တႄႇၶိုၼ်းၽႅၼ်ၵၢၼ်ယၼ်ႇသိုၵ်း 1027 ၵမ်းသွင်ၼႆ့ သိုၵ်းတဢၢင်း TNLA ယိုဝ်းတိုၵ်း ယိုတ်းၵုမ်းလႆႈ ၼႂ်းဝဵင်းသီႇပေႃႉ၊ တိုၵ်ႉသိုပ်ႇလေႃႇတိုၵ်းထႅင်ႈ တပ်ႉသိုၵ်းမၢၼ်ႈ ၶလယ 23 ဢၼ်မီး တီႈၼွၵ်ႈဝဵင်း ဝႃႈၼႆ။
ၶၢဝ်းတၢင်းပၢင်တိုၵ်း လိူၼ်ပၢႆ တီႈဝဵင်းသီႇပေႃႉၼႆႉ ၵူၼ်းမိူင်းလူႉတၢႆ ၵႄႈပၢင်တိုၵ်းမီး 30 ပၢႆ၊ မၢတ်ႇၸဵပ်းထႅင်ႈ 70 ပၢႆ ၸိူဝ်းလႆႈပၢႆႈၽေးသိုၵ်း မီးၼပ်ႉႁူဝ်ႁဵင်ႁူဝ်မိုၼ်ႇၼႆ ၸွမ်းၼင်ႇ သဵၼ်ႈမၢႆ ၸုမ်းၸွႆႈထႅမ် ၼႂ်းပိုၼ်ႉတီႈ လႆႈႁူႉၸွမ်းဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ