သိုၵ်းၵဝ်ႈၵၢင်ႉ ထႅမ်ႁႅင်းသိုၵ်းတူင်ႉၼိုင် တီႈဢိူင်ႇႁူဝ်ယ ဝဵင်းမိူင်းယႆ ၸိုင်ႈတႆးပွတ်းႁွင်ႇ သိုၵ်းမၢၼ်ႈ ၵႆႉဢဝ်ၶိူင်ႈမိၼ်မႃးပွႆႇမၢၵ်ႇ ၵူၼ်းပိုၼ်ႉတီႈမႆႈၸႂ် ၵူဝ်ပဵၼ်ပၢင်တိုၵ်းယႂ်ႇလႄႈ ဢွၼ်ၵၼ်ငိူင်ႉဝႄႈဝႆႉထႃႈ။  

တင်ႈတႄႇ ၵၢင်လိူၼ်သႅပ်ႊထႅမ်ႊပိူဝ်ႊပူၼ်ႉမႃး သိုၵ်းၵဝ်ႈၵၢင်ႉ ၶဝ်ႈမႃးယူႇၼႂ်းဝၢၼ်ႈၼႂ်းဢိူင်ႇႁူဝ်ယ ဝဵင်းမိူင်းယႆ။ ၼွၵ်ႈလိူဝ် တၢင်းၼွင်ၵေႃႈလူင်ယဝ်ႉ မၢင်ပွၵ်ႈ လၢမ်းမႃးယူႇသဝ်း တူင်ႉၼိုင်တၢင်းဝၢၼ်ႈၸၢင်ႉ။

ၵူၼ်းႁူဝ်ယ လၢတ်ႈၽူႈတွႆႇႁွၵ်ႈဝႃႈ – “ၵူၼ်းတင်းဝၢၼ်ႈၸၢင်ႉ ဢွၼ်ၵၼ်ငိူင်ႉဢွၵ်ႇ ပိုၼ်ႉတီႈ၊ ၵူၼ်းမိူင်း ငိၼ်းၶၢဝ်ႇဝႃႈ သိုၵ်းၵဝ်ႈၵၢင်ႉ ထႅမ်ႁႅင်းသိုၵ်း မႃးယူႇၸွမ်းႁိမ်းႁွမ်းဝၢၼ်ႈ၊ သိုၵ်းမၢၼ်ႈ ၸၢင်ႈဢဝ်မၢၵ်ႇ မႃးပွႆႇလႄႈ ၵူၼ်းမိူင်းၸင်ႇမႆႈၸႂ်သေငိူင်ႉဝႄႈဝႆႉ”- ဝႃႈၼႆ။

ယၢမ်းလဵဝ် ၵူၼ်းတၢင်းဝဵင်းမိူင်းယႆ လႆႈၶၢဝ်ႇထႅင်ႈဝႃႈ ၸုမ်း PDF ဢၼ်ပဵၼ်ဢူၺ်းလီ သိုၵ်းၵဝ်ႈၵၢင်ႉၵေႃႈ ထႅမ်ႁႅင်း ၶိုၼ်ႈမႃးတၢင်းပၢင်ႇၼိဝ်ႇ ၼွင်ၵေႃႈၼႆလႄႈ ၵူၼ်းမိူင်းမႆႈၸႂ်ဝႃႈ ႁူၺ်းၾႆးပၢင်တိုၵ်းလၢမ်းလူင်းမႃး ၵူၺ်းႁိုဝ်ၼႆယူႇ။ 

ယၢမ်းလဵဝ် တၢင်းဢိူင်ႇႁူဝ်ယ မီးသိုၵ်းၵဝ်ႈၵၢင်ႉ ဢဵၼ်ႁႅင်းၼပ်ႉႁူဝ်ပၢၵ်ႇ ဝႃႈၼႆသေတႃႉ ယူႇတီႈၽူႈတွႆႇႁွၵ်ႈသေ တိတ်းတေႃႇၽူႈမီးပုၼ်ႈၽွၼ်း ၾၢႆႇသိုၵ်းၵဝ်ႈၵၢင်ႉယူႇၵေႃႈ  တိတ်းတေႃႇဢမ်ႇလႆႈ။

ဢိင်ၼိူဝ် ပၢင်တိုၵ်းလႄႈ ငဝ်းလၢႆးၵၢၼ်သိုၵ်း ဢမ်ႇၼိမ်သဝ်းၼႆႉသေ ၼႂ်းၸိုင်ႈတႆးပွတ်းႁွင်ႇ ယၢမ်းလဵဝ် သၢႆဢိၼ်ႊထိူဝ်ႊၼႅတ်ႊ၊ ၾူၼ်း ၸိူဝ်းၼႆႉၵေႃႈ ၵိုတ်းၶၢတ်ႇဝႆႉမူတ်း။

ၵူၼ်းဝၢၼ်ႈၵမ်ႈၽွင်ႈ မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်လီဢဝ်ယဝ်ႉသေတႃႉ ဢမ်ႇႁတ်းၵႂႃႇဢဝ်သေ လႆႈပွႆႇ ဝႆႉၵေႃႈမီး ဝႃႈၼႆ။ 

“ၶၢဝ်းၼႆႉ ၸမ်ၶၢဝ်းတႅပ်းဢွႆႈ၊ ပေႃးပဵၼ်ပၢင်တိုၵ်းမႃး ပီႈၼွင်ႉၵူၼ်းမိူင်း ဢၼ်ၽုၵ်ႇဢွႆႈၵေႃႈ တေသုမ်းၼမ် ၵူဝ်ပၢင်တိုၵ်းပဵၼ်မႃးသေ ဢမ်ႇတၼ်းလႆႈၵဵပ်းဢွႆႈ။ တင်းထုင်ႉႁူဝ်ယ ၵမ်ႈၽွင်ႈၵေႃႈ ပွႆႇပႅတ်ႈသူၼ်ဢွႆႈ ၵေႃႈမီး၊ ဢမ်ႇႁတ်းၵႂႃႇလုမ်းလႃး၊ ၵူဝ်ၵႂႃႇယဵပ်ႇၺႃးမၢၵ်ႇ ၸိူဝ်းၼၼ်ႉ၊ ၸဝ်ႈသူၼ်ဢွႆႈၵေႃႈ မီးလွင်ႈလူႉသုမ်း တင်းၼမ်”- ဝႃႈၼႆ။

ႁၢင်လိူၼ် သႅပ်ႊထႅမ်ႊပိူဝ်ႊၼႆႉ ဢမ်ႇပဵၼ်ပၢင်တိုၵ်းသေ တီႈဢၼ်သိုၵ်းမၢၼ်ႈ ထၢင်ႇထိူမ်ဝႃႈ မီးသိုၵ်းၵဝ်ႈၵၢင်ႉ တူင်ႉ ၼိုင်ၼၼ်ႉ ဢဝ်ၶိူင်ႈမိၼ်မႃးလၢမ်းလိမ်းပွႆႇမၢၵ်ႇတူၵ်းသႂ်ႇ ၵူၼ်းမိူင်းမၢတ်ႇၸဵပ်းလူႉတၢႆ။

မိူဝ်ႈဝၼ်းတီႈ 29/09/2024 ၵၢင်ၶမ်ႈ 8 မူင်း သိုၵ်းမၢၼ်ႈ ဢဝ်ၶိူင်ႈမိၼ်သိုၵ်း မႃးပွႆႇမၢၵ်ႇတီႈ ဝၢၼ်ႈၵွင်းမွင် ဢၼ်မီးၾၢႆႇ ၸၢၼ်း ဝဵင်းမိူင်းယႆ 7 လုၵ်ႈ၊ တူၵ်းၼႂ်းဝၢၼ်ႈ 3 လုၵ်ႈ၊ တူၵ်းၼွၵ်ႈဝၢၼ်ႈ 4  လုၵ်ႈ ၵူၼ်းပိုၼ်ႉတီႈ မၢတ်ႇၸဵပ်းၸၢၵ်ႇမၢၵ်ႇ 4 ၵေႃႉ၊ ႁိူၼ်းယေးလူႉၵွႆ 3 လင်။

မိူဝ်ႈဝၼ်းတီႈ 26/09/2024 ယၢမ်းၵၢင်တဵင်ႈၶိုၼ်း ၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇတီႈဝၢၼ်ႈၼမ်ႉတူၵ်း သိုၵ်းမၢၼ်ႈမႃးပွႆႇမၢၵ်ႇ တုမ်ႉတိူဝ်ႉၸဝ်ႈသၢင်ႇ 7 တူၼ်၊ တူၼ်ၼိုင်ႈ မၢတ်ႇၸဵပ်းႁၢဝ်ႈႁႅင်းလႄႈ လႆႈသူင်ႇယူတ်းယႃတူဝ် တီႈႁူင်းယႃလူင် ဝဵင်းတူၼ်ႈတီႈ၊ ဝၼ်းၼၼ်ႉၵူၺ်း မၢၵ်ႇသိုၵ်းမၢၼ်ႈ တူၵ်းတိူဝ်ႉႁိူၼ်းၵူၼ်း ဝၢၼ်ႈၼမ်ႉတူၵ်း လင်ၼိုင်ႈ၊ ၸဝ်ႈ ႁိူၼ်း 3 ၵေႃႉ တၢႆထင်တီႈ။ 

တင်ႈတႄႇၼၼ်ႉမႃး ၵူၼ်းဝၢၼ်ႈၵွင်းမွင် ၵမ်ႈၽွင်ႈ ပၢႆႈၵႂႃႇတၢင်းၼႂ်းဝဵင်းမိူင်းယႆ၊ မိူင်းပၢတ်ႇ။ ၵူၼ်းဝၢၼ်ႈၵုင်းၵေႃႇ၊ ဝၢၼ်ႈၾႃႉၽႃႇ ဢွၼ်ၵၼ်ငိူင်ႉဝႄႈ ၵႂႃႇတၢင်းဝၢၼ်ႈပုင်ႇ ယူႇၵျွင်းမုၼ်ၸဝ်ႈ၊ ႁိူၼ်းပီႈႁိူၼ်းၼွင်ႉ ၵူၼ်းမီးၸမ် 30-40 ဝႃႈၼႆ။

တႅမ်ႈ – ယိင်းသဵဝ်ႈၶၢဝ်ႇ (ၽူႈသိုပ်ႇၶၢဝ်ႇၾိုၵ်းၵၢၼ်)