ပေႃးထိုင်မႃး ၶၢဝ်းၵၢင်ဝႃႇသႃၸိုင် ၵူၼ်းထုင်ႉၼွင်ႁၢႆးယႃႈ ဢွၼ်ၵၼ် ၸတ်းႁဵတ်းပွႆးၽြႃးၸၢမ်ၵဝ်ႈ တွၼ်ႈမႃးၵူႈပီ။ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၵူၼ်းထုင်ႉႁၢႆးယႃႈ ဢမ်ႇတဵမ်ၸႂ်တႃႇၸတ်းပွႆး ယွၼ်ႉသိုၵ်းမၢၼ်ႈ ၶိၼ်ၽွင်းငမ်းဝၢၼ်ႈမိူင်းလႄႈ ႁဵတ်းႁႂ်ႈဝၢၼ်ႈမိူင်း ဢမ်ႇမီးလွင်ႈၼိမ်သဝ်း။

ပီၼႆႉ ၵေႃပွင်ၵၢၼ်ပၢင်ပွႆးလႄႈ သင်ၶၸဝ်ႈ ၼႂ်းၼွင်တူၵ်းလူင်းၵၼ်ဝႃႈ ဢမ်ႇႁဵတ်းဝႃႈၼႆသေတႃႉ သိုၵ်းမၢၼ်ႈ ပၼ်ႁႅင်းဢီးႁႂ်ႈၸတ်းလႄႈ ၼႅတ်ႈပိုၼ်ၽၢဝ်ႇဝႃႈ တေၸတ်း။ ၵူၺ်းၵႃႈ ၼမ်ႉၼွင်းလုပ်ႇ ထူမ်ႈႁိုင်ၸမ်လိူၼ်ယဝ်ႉ ပႆႇယွမ်းလူင်းလႄႈ ၵွပ်ႈၼႆ တေဢမ်ႇပဵၼ်ၸတ်း ပွႆးၽြႃးၸၢမ်ၵဝ်ႈတွၼ်ႈယဝ်ႉ ဝႃႈၼႆ။

ပေႃးထိုင်မႃး ၼႂ်းလိူၼ်သႅပ်ႊထႅပ်ႊပိူဝ်ႊ – လိူၼ်ဢွၵ်ႊထိူဝ်ႊပိူဝ်ႊ မႃးၵူႈပီပီၸိုင် ၵူၼ်းမိူင်းၼႂ်းၼွင်ႁၢႆးယႃႈ ဢွၼ်ၵၼ်တူင်ႉတိုၼ်ႇႁၢင်ႈႁႅၼ်း တႃႇၸတ်းပၢင်ပွႆးၽြႃးၸၢမ်ၵဝ်ႈတွၼ်ႈ (ဖောင်တော် ဦးဘုရား ဒေသစာရီ ကြွချီပွဲတော်) မႃးတႃႇသေႇ ၵူၼ်းမိူင်းတၢင်ႇတီႈသီႇလႅၼ်ၵေႃႈ မႃးဝႆႈသႃၵိုၼ်းၶွၼ်ႈ။ ဝၢႆးသေ ၸွမ်ၸိၵ်း သိုၵ်းမၢၼ်ႈ မိၼ်းဢွင်ႇလၢႆႇ ယိုတ်းမိူင်း မႃးၼႆႉ ႁဵတ်းႁႂ်ႈငဝ်းလၢႆးဝၢၼ်ႈမိူင်းသုၵ်ႉယုင်ႈဢူၼ်ႈ ၵဝ်းလႄႈ ဢမ်ႇထၢင်ႇႁၢင်ႈ လႆႈၸတ်းႁဵတ်းပွႆးၽြႃးမႃးလီလီ။

ၵွပ်ႈၼႆလႄႈ တေဢမ်ႇၸတ်းၵေႃႈ လၢႆးလႆႈငိုၼ်းၶဝ်ႈ ၵူၼ်းထုင်ႉၼွင်ႁၢႆးယႃႈၵေႃႈ ဢမ်ႇမီး၊ တေဝႃႈ ၸတ်းၼႆၵေႃႈ သမ်ႉပဵၼ်ၶၢဝ်းၽွင်းသိုၵ်းမၢၼ်ႈ ၶိၼ်ၽွင်းငမ်းဝၢၼ်ႈမိူင်းဝႆႉလႄႈ ၵူၼ်းမိူင်းၵူဝ်ပဵၼ် ၽေးသိုၵ်းသိူဝ် ၼႂ်းၶၢဝ်းပွႆး။ ယွၼ်ႉဝႃႈ ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈ လၢႆမူႇၸုမ်းၵေႃႈ ဢမ်ႇပၼ်ႁႅင်း ၸတ်း ၼႆယဝ်ႉ။

ၵူၼ်းထုင်ႉၼွင်ႁၢႆးယႃႈတႄႉ လွမ်မုင်ႈမွင်းၵူၼ်းၼႂ်းမိူင်း/ ၼွၵ်ႈမိူင်း မႃးဢႅဝ်ႇလႄႇတွင်ႈတဵဝ်း ယွၼ်ႉဝႃႈ တေမီးငိုၼ်းၶဝ်ႈၼမ် မိူၼ်ၼင်ႇ – လႆႈၵႃႈၶၢတ်ႈႁိူဝ်း၊ ၵႃႈၶၢတ်ႈႁူင်းႁႅမ်း၊ လႆႈၶၢႆၶွင်ၵိၼ်ယႅမ်ႉ ၼႂ်းပိုၼ်ႉတီႈ၊ လႆႈၶၢႆၶိူင်ႈမႆႉၶိူင်ႈမိုဝ်း ဢၼ်ဢွၵ်ႇပိုၼ်ႉတီႈ ၸိူဝ်းၼႆႉ။

ၼႂ်းပီၼႆႉ ၵေႃပွင်ၵၢၼ်ပၢင်ပွႆးလႄႈ ၸုမ်းသင်ၶၸဝ်ႈ ၼွင်ႁၢႆးယႃႈ ႁူပ်းထူပ်းဢုပ်ႇဢူဝ်းၵၼ် ၼႂ်းၵၢင်လိူၼ်ဢေႃႊၵတ်ႊသ်ၼၼ်ႉယဝ်ႉ ပွၵ်ႈၼိုင်ႈ။ တူၺ်းငဝ်းလၢႆးဝၢၼ်ႈမိူင်း ဢမ်ႇၼိမ်သဝ်းလႄႈ တူၵ်း လူင်းလႆႈၸႂ်ၵၼ်ဝႃႈ တေဢမ်ႇပဵၼ် ၸတ်း။ မိူဝ်ႈဝၼ်းတီႈ 26/08/2024 ၼၼ်ႉ သိုၵ်းမၢၼ်ႈသမ်ႉ ႁွင်ႉ ဢုပ်ႇၵုမ် ၵူၼ်းထုင်ႉၼွင်ႁၢႆးယႃႈဝႃႈ တၵ်းတေလႆႈ ၸတ်းပွႆးၽြႃးၸၢမ်ၵဝ်ႈတွၼ်ႈၼႆႉ ၼႆလႄႈ ၵေႃပွင် ၵၢၼ်ပၢင်ပွႆးပိုၼ်ၽၢဝ်ႇဝႃႈ တေၸတ်းၼႆ ၵမ်းၼိုင်ႈ။

ၵူၺ်းၵႃႈ တႄႇဢဝ်မိူဝ်ႈၵၢင်လိူၼ်ဢေႃႊၵတ်ႊသ်ၼၼ်ႉမႃး ၾူၼ်တူၵ်းထပ်းၵၼ်လၢႆဝၼ်းသေ ႁဵတ်းႁႂ်ႈၼမ်ႉၼွင်းယိုင်ႈထူမ်ႈၵူႈဝၢၼ်ႈၵူႈဢိူင်ႇ ၼႂ်းၼွင်ႁၢႆးယႃႈ ဢွင်ႈတီႈ ဢၼ်ယၢမ်ႈၸတ်းပၢင်ပွႆးၽြႃး ၸၢမ်ၵဝ်ႈတွၼ်ႈ ၸိူဝ်းၼၼ်ႉၵေႃႈ ၺႃးၼမ်ႉလုပ်ႇထူမ်ႈဝႆႉမူတ်း ထိုင်ယၢမ်းလဵဝ်လႄႈ ၵေႃပွင်ၵၢၼ် ပၢင်ပွႆး ၸင်ႇၶိုၼ်းၸႅင်ႈဝႃႈ တေဢမ်ႇပဵၼ်ၸတ်းယဝ်ႉၼႆ ၼၢင်းယိင်း ၵူၼ်းၼွင်ႁၢႆးယႃႈ ၵေႃႉၼိုင်ႈ လၢတ်ႈဝႆႉၼင်ႇၼႆ –

“ပွႆးတႄႉ တေဢမ်ႇပဵၼ်ႁဵတ်းယဝ်ႉ ၼႆဢေႃႈ။ ၼမ်ႉၵေႃႈ ပႆႇယွမ်းလူင်း။ ဢွင်ႈတီႈ ဢၼ်တေၸတ်း ပၢင်ပွႆး ၸိူဝ်း ၼၼ်ႉၵေႃႈ ၺႃးၼမ်ႉထူမ်ႈဝႆႉမူတ်းလႄႈ ဢမ်ႇၸၢင်ႈႁၢင်ႈႁႅၼ်းၸိူင်ႉႁိုဝ်ယဝ်ႉ။ ၵူၼ်းမိူင်းတႄႉၵေႃႈ ၶၢတ်ႇၵၢၼ်ၵႃႉ ၵၢၼ်ၶၢႆမႃးႁိုင်ယဝ်ႉလႄႈ ၸူးၸႂ်တႄႉ ၶႂ်ႈႁႂ်ႈမီးပွႆးမီးလၢမ်းၽွင်ႈယူႇ။ ယွၼ်ႉ ဝႃႈ တေပဵၼ်လၢႆးတၢင်းႁႃငိုၼ်းၽႂ်မၼ်း။ ပေႃးဢမ်ႇမီးပွႆးလၢမ်းသင်ၵေႃႈ ၵူၼ်းတၢင်ႇတီႈသီႇလႅၼ် ဢမ်ႇမႃးၼမ်။ သင်ဝႃႈ သၢႆငၢႆဝၢၼ်ႈမိူင်းၵေႃႈလီ၊ ၾိင်ႈၾႃႉရႃႇသီႇၵေႃႈ လီမိူၼ်ၵူႈပွၵ်ႈတႄႉ တႄႇဢဝ် ၼႆႉၵႂႃႇ သမ်ႉပေႃးႁၢင်ႈႁႅၼ်းၵူႈလွင်ႈလွင်ႈပႂ်ႉထႃႈယဝ်ႉဢေႃႈ”- ဝႃႈၼႆ။

မိူဝ်ႈငဝ်းလၢႆးဝၢၼ်ႈမိူင်းၼိမ်သဝ်းတႄႉ တႄႇဢဝ်လိူၼ် 11 မႂ်ႇ 1 ၶမ်ႈ ၼၼ်ႉၵႂႃႇတေႃႇပေႃးထိုင်လိူၼ် 11 မူၼ်း ၵေႃပွင် ၵၢၼ်ပၢင်ပွႆးလႄႈ သင်ၶၸဝ်ႈၶဝ် တေပၢင်းၽြႃးၸၢမ်ၵဝ်ႈတွၼ်ႈ ၶဝ်ႈဝၢၼ်ႈဢွၵ်ႇ ဝၢၼ်ႈသေ ပၼ်ႇလဵပ်ႈတႃႇႁႂ်ႈၵူၼ်းမိူင်း ၼႂ်းၸႄႈဝဵင်းယွင်ႁူၺ်ႈ ၼႂ်းၼွင်ႁၢႆးယႃႈ ပေႃးတေလႆႈဝႆႈသႃလႄႈ ၵူၼ်းဢႅဝ်ႇလႄႇတွင်ႈတဵဝ်းၵေႃႈ လႆႈမႃးႁၼ်ဝႆႈသႃ ၼႆယဝ်ႉ။

မိူဝ်ႈႁူဝ်လိူၼ်ဢေႃႊၵတ်ႊသ်ၼၼ်ႉ တႃႇၸတ်းပွႆးၽြႃးၸၢမ်ၵဝ်ႈတွၼ်ႈၼႆႉသေ သိုၵ်းမၢၼ်ႈ ၸီႉသင်ႇ ႁႂ်ႈၸုမ်းပျီတူႉ ၸိတ်ႉ ပဢူဝ်း PNO လူင်းၵဵပ်းငိုၼ်း ၵူၼ်းၼႂ်းၼွင်ႁၢႆးယႃႈ ၼိုင်ႈႁိူၼ်းလႂ် ၼပ်ႉႁူဝ်မိုၼ်ႇပျႃး မႃးယဝ်ႉၵမ်းၼိုင်ႈ ၼႆႉ ၵေႃႈ တဵၵ်းၶၢၼ်းႁႂ်ႈသႂ်ႇငိုၼ်းပၼ်လႄႈ ၵူၼ်းထုင်ႉၼွင်ႁၢႆးယႃႈ ဢွၼ်ၵၼ် ၵိၼ်းၸႂ်တႄႉတႄႉ။

ယၢမ်းလဵဝ် ယႃႇဝႃႈတေၸတ်းပၢင်ပွႆးၽြႃး တေႃႈၼင်ႇ ၵူၼ်းမိူင်းၼႂ်းၼွင် ၼင်ႇၵၼ် တေၵႂႃႇမႃးႁႃၵၼ် ပေႃးပဵၼ်ယၢပ်ႇ၊ ၵၢၼ်ၽုၵ်ႇသွမ်ႈၵေႃႈ ဢမ်ႇပဵၼ်ၵၢၼ်။ လႆႈဝႃႈ ၼမ်ႉထူမ်ႈ ပီၼႆႉ ႁၢဝ်ႈႁႅင်းလိူဝ်ၵူႈပီ။ ၼႂ်းၼွင်ၼႆႉ ပေႃးပဵၼ်ႁိူၼ်းသွင်ၸၼ်ႉတႄႉ ၸဝ်ႈႁိူၼ်းတိုၵ်ႉႁတ်းယူႇပႂ်ႉ ယူႇသေတႃႉ ပေႃးပဵၼ်ႁိူၼ်း ၸၼ်ႉလဵဝ်တႄႉ လႆႈပၢႆႈၵႂႃႇယူႇတီႈၵုင်း၊ တီႈသုင် ၸိူဝ်းၼၼ်ႉ ၼၢင်းယိင်း ၵူၼ်းၼွင်ႁၢႆးယႃႈ ၵေႃႉၼိုင်ႈ သိုပ်ႇလၢတ်ႈၼႄၼင်ႇၼႆ –

“ႁိူၼ်းၼႂ်းၼွင်ၼႆႉ ၵမ်ႈၼမ် တေႁဵတ်းပဵၼ် 2 ၸၼ်ႉသေယူႇဝႆႉ။ ယၢမ်းလဵဝ် ၼမ်ႉထူမ်ႈၸၼ်ႉတႂ်ႈ ပႅတ်ႈမူတ်းယဝ်ႉလႄႈ ၸဝ်ႈႁိူၼ်းၶဝ် ပေႃးလႆႈၶိုၼ်ႈယူႇၸၼ်ႉၼိူဝ်။ ပေႃးပဵၼ်ႁိူၼ်းၸၼ်ႉလဵဝ်တႄႉ ထူမ်ႈပႅတ်ႈမူတ်းၶႃႈယဝ်ႉ ဢမ်ႇ ၸၢင်ႈယူႇ။ သမ်ႉပေႃး လႆႈပၢႆႈၵႂႃႇႁႃယူႇတၢင်ႇတီႈ။ ၵၢၼ်ၽုၵ်ႇသွမ်ႈၵေႃႈ ဢမ်ႇပဵၼ်ၵၢၼ်။ လႆႈဝႃႈ ၵူၼ်းၼႂ်းၼွင်ၼႆႉ ယၢပ်ႇမိူၼ်ၵၼ်မူတ်းယဝ်ႉၶႃႈ”- ဝႃႈၼႆ။

ယွၼ်ႉၼမ်ႉထူမ်ႈ ၶၢဝ်းႁိုင်ႁၢဝ်ႈႁႅင်း ၸိူင်ႉၼႆတႄႉ ၸုမ်းၸွႆႈထႅမ် တူင်ႇၵူၼ်း ဢမ်ႇၶဝ်ႈထိုင်လႆႈၵူႈ ဢွင်ႈတီႈ။ မိူၼ်ၼင်ႇ – ၵူၼ်းၼႂ်းၼွင်ႁၢႆးယႃႈၼႆႉ မၢင်ဢွင်ႈတီႈၵေႃႈ လႆႈတၢင်းၵမ်ႉၸွႆႈ၊ မၢင်ဢွင်ႈတီႈၵေႃႈ ဢမ်ႇလႆႈ။ ယွၼ်ႉၼၼ် ၵူၼ်းထုင်ႉႁၢႆးယႃႈ မၢင်ဢွင်ႈတီႈ ၶၢတ်ႇၵၢၼ်ၵိၼ်ယႅမ်ႉ ဢၼ်ႁၢႆႉသုတ်းတႄႉ ဢမ်ႇမီးၼမ်ႉသႅၼ်ႈသႂ် တႃႇၵိၼ်။ ၼမ်ႉဢၼ်ယၢမ်ႈဢဝ်ၵိၼ် ဢဝ်ၸႂ်ႉမႃးၵူႈပွၵ်ႈ ၼၼ်ႉၵေႃႈ ၺႃးၼမ်ႉၼွင်းထူမ်ႈပႅတ်ႈယဝ်ႉ။ ၸိူဝ်းဢမ်ႇမီးတၢင်းလိူၵ်ႈတႄႉ ၵႃႈလႆႈ ၵိၼ်ၼမ်ႉၼၼ်ႉၵူၺ်းလႄႈ ဢွၼ်ၵၼ်ၸပ်းတၢင်းပဵၼ်တွင်ႉႁေႈတွင်ႉၵႂႃႇ၊ ၸပ်းမႆႈၶႆႈၼၢဝ်ၵေႃႈမီးၼႆ – ၵူၼ်းပိုၼ်ႉတီႈလၢတ်ႈ။