ၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ် ၵိုင်ႇငိုၼ်း 1,000 လၢၼ်ႉဝၢတ်ႇ တီႈၵဵတ်ႉ/ လၢၼ်ႇၵူတ်ႇထတ်း (Huai Ya-U) ဢၼ်မီးတီႈတၢင်းဢွၵ်ႇ ဝဵင်းမႄႈႁွင်ႈသွၼ် လႅၼ်လိၼ် တႆး – ထႆး ၼႂ်းၸိုင်ႈထႆးၼၼ်ႉ ဝႃႈၼႆ။

ဝၼ်းတီႈ 09/09/2024 ၸဝ်ႈၼႃႈတီႈထႆး ပႂ်ႉၵူတ်ႇထတ်း တီႈၵဵတ်ႉ/လၢၼ်ႇ Huai Ya-U checkpoint ဢၼ် မီးၼိူဝ်သဵၼ်ႈတၢင်းဝႆး မႄႈႁွင်ႈသွၼ် – တၢၵ်ႇၼၼ်ႉ ၵူတ်ႇထတ်းထူပ်းႁၼ် ၼႂ်းရူတ်ႉၵႃး တၢင်ႇၽၵ်းၶဵဝ် လမ်းၼိုင်ႈ ဢၼ်လၵ်ႉဢဝ်ထူင်ယႃႈမဝ်းၵမ် သႂ်ႇဝႆႉတႂ်ႈထူင်ၽၵ်းၶဵဝ်သေ တေႃႉတၢင်ႇမႃးၼၼ်ႉ – ဝႃႈၼႆ။

ၼႂ်းထူင်ၸၢၼ်ႈ 30 ထူင် ဢၼ်သႂ်ႇမႃးတႂ်ႈ ထူင်ၽၵ်းၶဵဝ်ၼၼ်ႉ မီးယႃႈဢႆႊသ် 750 ၵီႊလူဝ်ႊ၊ ၼႂ်းထူင်ၸၢၼ်ႈထႅင်ႈ 15 လုၵ်ႈသမ်ႉ မီးယႃႈၶႅတ်ႉတမိၼ်း(Ketamine) 549 ၵီႊလူဝ်ႊ ႁူမ်ႈၵၼ်တင်းမူတ်း ၼမ်ႉၼၵ်းမီး 1 တၼ်ႊပၢႆ –  ၶၼ်ငိုၼ်းထႆး မွၵ်ႈ 1,000 လၢၼ်ႉဝၢတ်ႇပၢႆ – ဝႃႈၼႆ။

ၸဝ်ႈၵႃး ၵေႃႉတေႃႉတၢင်ႇ ယႃႈမဝ်းၵမ်ၼၼ်ႉ ဢႃယုမီး 34 ပီ ၊ မၼ်းၸၢႆး ယွမ်းႁပ်ႉဝႃႈ လုၵ်ႉတီႈၼႂ်းၸႄႈဝဵင်းၽုတ်ႊၽရႃႉ ၵႂႃႇထိုင်ဝဵင်းၵမ်ႇၽႄႊ လႆႈၵႃႈၸၢင်ႈတေႃႉသူင်ႇ 1 သႅၼ်ဝၢတ်ႇ ဝႃႈၼႆ။

ဝၢႆးၼၼ်ႉ ၽူႈမီးပုၼ်ႈၽွၼ်းၶဝ် သိုပ်ႇၵူတ်ႇထတ်း ႁိူၼ်းယေး ၸဝ်ႈၵႃးၼၼ်ႉဝႆႉယူႇ – ၼႆယဝ်ႉ။

မိူၼ်ၼႆ ၼႂ်းဝၼ်းတီႈ 9 ၼၼ်ႉ ၸဝ်ႈၼႃႈတီႈထႆး ပိုၼ်ၽၢဝ်ႇဢွၵ်ႇမႃးဝႃႈ လႆႈပိုတ်းယိုဝ်းၵၼ်တင်း ၸုမ်းတေႃႉယႃႈ ၼႂ်းၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႂ်ႇ။ ၸုမ်းတေႃႉယႃႈ တၢႆ 6 ၵေႃႉ ဝႃႈၼႆ။

ၼႂ်းဝၼ်းတီႈ 7 – 8 ပူၼ်ႉမႃးၼၼ်ႉၵေႃႈ ပလိၵ်ႈထႆး တပ်ႉပႂ်ႉလႅၼ်လိၼ်လႄႈ ၸုမ်းတေႃႉယႃႈ မွၵ်ႈ 10 ၵေႃႉ လုၵ်ႉတၢင်းလႅၼ်လိၼ်တႆး ၶဝ်ႈမႃးၼႂ်းၸႄႈဝဵင်းမႄႈဢၢႆးၼၼ်ႉ ပဵၼ်လွင်ႈပိုတ်းယိုဝ်းၵၼ်၊ ဝၢႆးၸုမ်း တေႃႉယႃႈ ထွႆၵႂႃႇၶိုၼ်း ၾၢႆႇၸဝ်ႈၼႃႈတီႈထႆး ၵူတ်ႇထတ်းႁၼ် တူဝ်တၢႆၵူၼ်းတေႃႉယႃႈ 6 ၵေႃႉလႄႈ ထူင် သႂ်ႇယႃႈမဝ်းၵမ် 13 ထူင်၊ ယႃႈမႃႉ ၼိုင်ႈလၢၼ်ႉမဵတ်ႉပၢႆ ဝႃႈၼႆ။

ၸွမ်းၼင်ႇ ၸဝ်ႈၼႃႈတီႈထႆး လႆႈၶၢဝ်ႇဝႆႉဝႃႈ လုၵ်ႉတၢင်းမိူင်းမၢၼ်ႈ တေမီးၸုမ်းတေႃႉယႃႈ ႁူဝ်ၼပ်ႉမွၵ်ႈ 100 လၢၼ်ႉ ၼႆလႄႈ လႆႈထႅမ်ႁႅင်းသိုၵ်း ပႂ်ႉၵူတ်ႇထတ်းၸွမ်းလႅၼ်လိၼ်မႃး၊ ဝၢႆးလင် လႆႈၶၢဝ်ႇၼႆႉယဝ်ႉ ၸဝ်ႈၼႃႈတီႈၵူတ်ႇထတ်းတီႉၺွပ်းလႆႈ ယႃႈမဝ်းၵမ် ပဵၼ်ၵေႃႇပဵၼ်ၵွင်ၼႆႉ 5 ပွၵ်ႈယဝ်ႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။