ၵူၼ်းပၢႆႈၽေးသိုၵ်း တီႈၸႄႈဝဵင်းၼွင်ၶဵဝ် 5,000 ပၢႆ ယၢပ်ႇၽိုတ်ႇယႃႈယႃ တႃႇယူတ်းယႃတူဝ် တႃႇသုမ်ႉသွင်းတီႈယူႇလႄႈ တႃႇၵိၼ်ယႅမ်ႉ ဝႃႈၼႆ။

ပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း ဝဵင်းလိူဝ်ႇ MDY PDF တီႈလႅၼ်လိၼ် ၸႄႈဝဵင်းၼွင်ၶဵဝ်တင်း ၸႄႈဝဵင်းပၢင်ႁူႈ (ပၢင်ႇဢူႈလူင်) ၼႂ်းၸိုင်ႈတႆးပွတ်းႁွင်ႇၼၼ်ႉသေ ၵူၼ်းမိူင်းလႆႈ ငိူင်ႉပၢႆႈၽေးသိုၵ်း သွၼ်ႈယူႇတီႈလွတ်ႈၽေး မီးႁူဝ်ၵူၼ်း 5,000 ပၢႆ ယၢမ်းလဵဝ် ယွၼ်ႉလွင်ႈႁူမ်ႇလူမ်ႈသေ ပႆႇႁတ်းၶဝ်ႈယူႇၼႂ်းဝၢၼ်ႈ လႆႈႁဵတ်းသုမ်ႉယူႇသဝ်းဝႆႉၼႂ်းသူၼ်ၼႂ်းႁႆႈ ဝႃႈၼႆ။

ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ပေႃးတူၺ်းငဝ်းလၢႆး တေႃႈလဵဝ်တႄႉ လွင်ႈၵိၼ်ယႅမ်ႉၼႆႉ ဢမ်ႇမီးယဝ်ႉ။ ၵၢၼ်ၵေႃႈ ဢမ်ႇလႆႈႁဵတ်း တုၵ်ႉၶႁႅင်းဢေႃႈ။ ၾူၼ်ၵေႃႈတူၵ်းၼမ် ၽႃႈယၢင် (မူဝ်းၵႃႇ) ၵေႃႈလူဝ်ႇ။ ယၢမ်းလဵဝ် ႁဝ်းၶႃႈ လႆႈႁဵတ်းသုမ်းသေ ယူႇဝႆႉၸွမ်းၼႂ်းသူၼ်ၼႂ်းၼႃး ပႆႇႁတ်းပွၵ်ႈ မိူဝ်းယူႇၼႂ်းဝၢၼ်ႈ။ ပေႃးငဝ်းလၢႆး ဝၢၼ်ႈမိူင်းလီမႃးမိူဝ်ႈလႂ် ၸင်ႇတေၶဝ်ႈယူႇၼႂ်းဝၢၼ်ႈၵူၺ်းယဝ်ႉၶႃႈ”- ဝႃႈၼႆ။

တီႈလႅၼ်လိၼ် ၸႄႈဝဵင်းၼွင်ၶဵဝ်တင်း ၸႄႈဝဵင်းပၢင်ႁူႈၼၼ်ႉ တႄႇလိူၼ်ဢေႊပရိူဝ်ႊၼၼ်ႉမႃး သိုၵ်းတဢၢင်း TNLA ႁူမ်ႈတင်း MDY PDF သေ ပဵၼ်ပၢင်တိုၵ်းၵၼ်တင်း သိုၵ်းမၢၼ်ႈမႃး ႁၢဝ်ႈႁႅင်း။ ယၢမ်းလဵဝ် ၸုမ်းၵႅတ်ႇၶႄၵူၼ်းမိူင်း ၶဝ်ႈဢဝ်တီႈယူႇဝႆႉၼႂ်းဝၢၼ်ႈလႄႈ ၵူၼ်းပိုၼ်ႉတီႈ ပႆႇႁတ်းပွၵ်ႈမိူဝ်းယူႇသဝ်းၼႆ – ၵူၼ်းပၢႆႈၽေးသိုၵ်းလၢတ်ႈ။

ဢိင်ၼိူဝ်လွင်ႈၼႆႉ ယူႇတီႈၸုမ်းႁဝ်းၶႃႈ ၵပ်းသိုပ်ႇတီႈ ၽူႈမီးပုၼ်ႈၽွၼ်း ၸုမ်း PDF ယူႇသေတႃႉ ၵပ်းသိုပ်ႇဢမ်ႇလႆႈ။

သိုၵ်းၸုမ်းလႂ်သေဢမ်ႇဝႃႈ ပေႃးၶဝ်ႈယူႇ ၼႂ်းပိုၼ်ႉတီႈၵူၼ်းမိူင်းယူႇသဝ်း၊ ယိုဝ်းတိုၵ်းၵၼ် ဢွင်ႈတီႈၵူၼ်းပၢႆႈၽေးသိုၵ်း ၼႆ ပဵၼ်လွင်ႈပူၼ်ႉပႅၼ် ပိူင်သိုၵ်း War Crimes ယဝ်ႉ။ ၸွမ်းၼင်ႇ ၶေႃႈတူၵ်းလူင်း ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဢၼ်မိူင်းမၢၼ်ႈ ၶဝ်ႈပႃးလူင်းလၢႆးမိုဝ်းဝႆႉ ၼၼ်ႉၵေႃႈ ပႃးဝႆႉဝႃႈ တေလႆႈၵႅတ်ႇၶႄၵူၼ်းမိူင်း ၼႂ်းၼႃႈတီႈပဵၼ်ပၢင်တိုၵ်း ဝႃႈၼႆဝႆႉ။

ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼွင်ၶဵဝ်ၼႆႉ ၵမ်ႈၼမ် ပဵၼ်ၼၢင်းယိင်း၊ ၵူၼ်းထဝ်ႈလႄႈ လုၵ်ႈဢွၼ်ႇ။ မၢင်ၸိူဝ်း ၸပ်းမႆႈၶႆႈၼၢဝ် တွင်ႉႁေႈတွင်ႉၸဵပ်း၊ ပူၼ်ႉမႃးမိူဝ်ႈႁၢင်လိူၼ်ဢေႃႊၵတ်ႊသ်ၼၼ်ႉ ၼုမ်ႇၸၢႆး ဢႃယု 22 ပီ ၵေႃႉၼိုင်ႈ ပဵၼ်တွင်ႉႁေႈတွင်ႉၸဵပ်းသေ ဢမ်ႇတၼ်းၶိုတ်းလွင်ႈယူတ်းယႃလႄႈ လူႉတၢႆၵႂႃႇ ဝႃႈၼႆ။

တေႃႇထိုင် ယၢမ်းလဵဝ် ၼႂ်းပိုၼ်ႉတီႈၼၼ်ႉ သိုၵ်းမၢၼ်ႈ ၵႆႉလၢမ်းယိုဝ်းၵွင်ႈလူင်ပဵၼ်ၵမ်း ၵူၼ်းပၢႆႈၽေးသိုၵ်း မႆႈၸႂ်လွင်ႈႁူမ်ႇလူမ်ႈဝႆႉ။