ၼႂ်းဝၼ်းတီႈ 6/9/2024 ၼႆႉ သိုၵ်းမၢၼ်ႈၼမ်ႉလၼ်ႈ ယိုဝ်းမၢၵ်ႇလူင်ၵႂႃႇတူၵ်း သႂ်ႇၼႂ်းပွၵ်ႉၵိဝ်ႇတေႃး တိူဝ်ႉၵူၼ်းဝၢၼ်ႈၵေႃႉၼိုင်ႈၽွင်းၵႂႃႇလဵင်ႉၵႂၢႆး ၵူၼ်းမၢတ်ႇၸဵပ်းၵႂၢႆးတႄႉတၢႆထင်တီႈ ။
ၵူၼ်းမိူင်းဝဵင်းၼမ်ႉလၼ်ႈလၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈပွႆႇမႃးမိူဝ်ႈယၢမ်းၵၢင်ဝၼ်း 11 မူင်းၶႃႈဢေႃႈ။ ၵူၼ်းဝၢၼ်ႈၵိဝ်ႇတေႃး ၸၢဝ်းၶႄႇ ၼၼ်ႉသမ်ႉတိုၵ်ႉၵႂႃႇလဵင်ႉၵႂၢႆး။ မၢၵ်ႇမႃးတူၵ်းသႂ်ႇႁိမ်းမၼ်းၶႃႈဢေႃႈ ၵႂၢႆးမၼ်းတေႉတၢႆၵမ်းလဵဝ်ယဝ်ႉၶႃႈ။ ၵူၼ်းလဵင်ႉၵႂၢႆးၼၼ်ႉ ၸၢၵ်ႇမၢၵ်ႇတိူဝ်ႉသႂ်ႇတီႈပိၵ်ႇၵႇႇမၼ်း။ လုပ်ႇပိၵ်ႇၵႆႇမၼ်းႁၵ်းၵႂႃႇ။ လႆႈဢဝ်ၵႂႃႇႁူင်းယႃလူင်သေ ပိူၼ်ႈၽႃႇဢဝ်ၸၢၵ်ႇမၢၵ်ႇၸိူဝ်းၶမ်ဝႆႉၸွမ်းပိၵ်ႇၵႆႇ ၵွင်းလင် ၸွမ်းၶႃမၼ်းတိၼ်မၼ်းၸိူဝ်းၼႆႉယဝ်ႉ။ ” ဝႃႈၼႆ။
သိုၵ်းမၢၼ်ႈဢၼ်ပၵ်းတပ်ႉဝႆႉၼႂ်းဝဵင်းၼမ်ႉလၼ်ႈၼႆႉ ဢမ်ႇမီးပၢင်တိုၵ်းသိုၵ်းသိူဝ်သင်ၵေႃႈ ၵႆႉယိုဝ်းၵွင်ႈလူင် မၢၵ်ႇလူင်ၵႂႃႇတၢင်း ဝဵင်းသီႇပေႃႉလႄႈ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်းၵႄႈ ဝဵင်းၼမ်ႉလၼ်ႈလႄႈ ဝဵင်းသီႇပေႃႉၼႆႉ ဢမ်ႇမီးလွင်ႈႁူမ်ႇ လူမ်ႈ ။
“ ပၢင်တိုၵ်းတႄႉဢမ်ႇပဵၼ် သိုၵ်းမၢၼ်ႈယိုဝ်းမၢၵ်ႇလူင်ၵႂႃႇတင်းသီႇပေႃႉၼႆႉ ၶႂ်ႈမီးပဵၼ် လိူၼ်ပၢႆယဝ်ႉၶႃႈဢေႃႈ။ ႁဝ်းၶႃႈၸိူဝ်းယူႇၼႂ်းဝဵင်းၼမ်ႉလၼ်ႈၵေႃႈ ယၢမ်ႈပၢႆႈယဝ်ႉ။ ၵူၺ်းၵႃႈဢမ်ႇတမ်းၸႂ်တီႈႁိူၼ်းသေ ပွၵ်ႈမႃးယူႇၶိုၼ်းယဝ်ႉၶႃႈ။ ၼွၼ်းသေထွမ်ႇသဵင်မၢၵ်ႇလူင်ယူႇၵူႈၶိုၼ်းဢေႃႈ။ သမ်ႉပေႃး ၶႂ်ႈၼၢပ်ႈပႅတ်ႈယဝ်ႉၶႃႈဢေႃႈၼႆႉ။ ၵၢၼ်ငၢၼ်း ၵေႃႈဢမ်ႇၸၢင်ႈၵႂႃႇႁဵတ်းသင်တႄႉတႄႉၶႃႈမိူဝ်ႈလဵဝ်ၼႆႉ ။ ဢမ်ႇမီးလွင်ႈႁူမ်ႇလူမ်ႈ။ တေပၢႆႈၵေႃႈ ဢမ်ႇႁူႉတေပၢႆႈတၢင်းလႂ်ယဝ်ႉၶႃႈ” – ၵူၼ်းမိူင်းဝဵင်းၼမ်ႉလၼ်ႈလၢတ်ႈၼင်ႇၼႆ။
ယၢမ်းလဵဝ်ၼႂ်းၸႄႈဝဵင်းၼမ်ႉလၼ်ႈၼႆႉ ၼွၵ်ႈလိူဝ်သေ လႆႈငိၼ်းသဵင်မၢၵ်ႇလူင်ဢၼ်သိုၵ်းမၢၼ်ႈလၢမ်းလိမ်းပွႆၼႆႉယဝ်ႉ ယွၼ်ႉၾူၼ်တူၵ်းႁၢဝ်ႈႁႅင်းၵေႃႈပိူင်ၼိုင်ႈသေ ႁဵတ်းႁႂ်ႈၼမ်ႉလႆၶဝ်ႈထူမ်ႈၸွမ်းပိုၼ်ႉတီႈပဵင်းၼႂ်းဝဵင်းၼမ်ႉလၼ်ႈ။ ၵူၼ်းမိူင်းထူပ်းတင်းယၢပ်ႇ ထပ်းၵၼ် လၢႆၸိူဝ်ႉလၢႆယၢင်ႇ။ ဝၢႆးၾူၼ်ယဝ်ႉဢွၼ်ၵၼ်မႆႈၸႂ်ဝႆႉမူင်ႈမႅင်းတေယႃႉ မၢၵ်ႇၶဝ်ႈတဝ်ႈၼမ်ႉၵူၺ်းယဝ်ႉ ဝႃႈၼႆ ။
