ၵူၼ်းမိူင်း ထူပ်းႁၼ်ႁေႃႇၵူၼ်းတၢႆဢမ်ႇႁူႉၾၢႆႇ လွင်ႈမႃးၸွမ်းၼမ်ႉႁူၺ်ႈ တီႈၶူဝ်ႁၢၵ်း ဢၼ်မီးႁိမ်း ဝဵင်းၼမ်ႉလၼ်ႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။
ၼႂ်းဝၼ်းတီႈ 1/8/2025 ယၢမ်းဝၢႆးဝၼ်း ၵူၼ်းမိူင်းပိုၼ်ႉတီႈ ထူပ်းႁၼ်တူဝ်တၢႆ ဢၼ်ဢဝ်ၽႃႈယၢင်သီလမ် ပူၵ်ႉသေ လွင်ႈမႃးၼႂ်းၼမ်ႉ ဢၼ်မီးတီႈ မၢၼ်ႈလီႈလႄႈ ၶူဝ်ႁၢၵ်းၼၼ်ႉသေ ၵူၼ်းပိုၼ်ႉတီႈ ဢဝ် ၵႂႃႇလုမ်းလႃးသၢင်းၵဵဝ်ႇ ပၼ်ဝႃႈၼႆ ။ ဝၢၼ်ႈမၢၼ်ႈလီႈၼႆႉ ယၼ်ၵႆၵၼ်တင်း ဝဵင်းၼမ်ႉလၼ်ႈ 13 လၵ်း ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼႂ်းဝၼ်းတီႈ 1 ၼၼ်ႉ ထူပ်းႁၼ်တူဝ်တၢႆ ၊ ဢဝ်တင်းၽႃႈယၢင်သေ ပူၵ်ႉဝႆႉသၢမ်ႇၸၼ်ႉ ။ ၵူၼ်းပိုၼ်ႉတီႈ သႄႇဢဝ်သေ ပိုတ်ႇတူၺ်း။ တၢႆဝႆႉ လႅပ်ႈတေမီး 4 ဝၼ်းယဝ်ႉ ၊ တီႈတူဝ်မၼ်းၵေႃႈ မီးႁွႆးပေႃႉထုပ်ႉဝႆႉတင်းၼမ် ၊ ပဵၼ်ၽႂ်ဢၼ်ဝႃႈၼၼ်ႉတႄႉ ဢမ်ႇလႆႈႁူႉ”- ဝႃႈၼႆ ။
လွင်ႈထူပ်းႁၼ်တူဝ်တၢႆၼႆႉ ၵူၼ်းပိုၼ်ႉတီႈ လႆႈပိုၼ်ၽၢဝ်ႇႁႃပီႈၼွင်ႉဝႆႉသေ လႆႈတၢင်ႇလိၵ်ႈဝႆႉပႃးတီႈ သိုၵ်း(SSPP/SSA) ဝႆႉၼႆယဝ်ႉ ။
မိူၼ်ၼင်ႇၼႆ ၼႂ်းဝၼ်းတီႈ 25/2/2025 တီႈဝၢၼ်ႈၼႃးမၢၵ်ႇၶေႃ ဢၼ်မီးၼႂ်းၸႄႈဝဵင်းသီပေႃႉ ၼၼ်ႉၵေႃႈ ထူပ်းႁၼ် ၶၢပ်ႈတူဝ်တၢႆ ၼၢင်းယိင်း 3ၵေႃႉ ထုၵ်ႇၶႃႈႁႅမ်တၢႆဝႆႉဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ