မိူဝ်ႈၼႆႉ ဝၼ်းတီႈ 23/11/2024 ယၢမ်းၵၢင်ဝၼ်း 12 မူင်း မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ ပွၵ်ႉၵွင်းလၢင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ လူႉၵွႆ 2 လင် ၸၢၵ်ႇမၢၵ်ႇတိူဝ်ႉၺႃး ထဝ်ႈယိင်း မၢတ်ႇၸဵပ်း ၵေႃႉၼိုင်ႈ ဝႃႈၼႆ။
ၵူၼ်းၼမ်ႉလၼ်ႈ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇသိုၵ်းမၢၼ်ႈ ယိုဝ်းမႃးသႂ်ႇၶႃႈ ဢေႃႈ။ တိူဝ်ႉႁိူၼ်းယေး ၵူၼ်းမိူင်းလူႉၵွႆသွင်လင်လႄႈ ၸၢၵ်ႇမၢၵ်ႇတိူဝ်ႉၺႃးမႄႈထဝ်ႈ ဢႃယု 60 ပၢႆ ၵေႃႉၼိုင်ႈ လႆႈမၢတ်ႇၸဵပ်းႁၢဝ်ႈႁႅင်းၶႃႈ”- ဝႃႈၼႆ။
ယၢမ်းလဵဝ် ထဝ်ႈယိင်း ဢႃယု 60 ပၢႆၼႆႉ လႆႈသူင်ႇယူတ်းယႃတူဝ် တီႈႁူင်းယႃလူင် ဝဵင်းၼမ်ႉလၼ်ႈဝႆႉယဝ်ႉ ဝႃႈၼႆ။
မိူဝ်ႈဝၼ်းတီႈ 05/11/2024 ယၢမ်းဝၢႆးဝၼ်း 2 မူင်း ၼၼ်ႉၵေႃႈ မၢၵ်ႇလူင်တူၵ်းသႂ်ႇ တီႈပွၵ်ႉၸၢၼ်း 1 လုၵ်ႈလႄႈ ပွၵ်ႉပၢင်ႇႁႆႈ 1 လုၵ်ႈ တီႈဝဵင်းၼမ်ႉလၼ်ႈ ၸၢၵ်ႇမၢၵ်ႇ တိူဝ်ႉၺႃးၵူၼ်းထဝ်ႈ 1 ၵေႃႉလႄႈ လုၵ်ႈဢွၼ်ႇ 2 ၵေႃႉ တီႈပွၵ်ႉၸၢၼ်း လႆႈမၢတ်ႇၸဵပ်း။ ၼႂ်း 3 ၵေႃႉၼၼ်ႉ လုၵ်ႈဢွၼ်ႇ တႃႇၵေႃႉၼိုင်ႈ လႆႈသူင်ႇယူတ်းယႃတူဝ် ဝႆႉတီႈႁူင်းယႃ ၼမ်ႉလၼ်ႈ ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ဝႃႈၼႆ။
ထိုင်မႃး ဝၼ်းတီႈ 06/11/2024 ယၢမ်းၵၢင်ၼႂ် သိုၵ်းၵဝ်ႈၵၢင်ႉ MNDAA ယူႇၾၢႆႇႁွင်ႇဝဵင်း ယိုဝ်းမၢၵ်ႇလူင် ၸူးသိုၵ်းမၢၼ်ႈ ဢၼ်ပႂ်ႉၵဵတ်ႉ/ လၢၼ်ႇ တီႈၼိူဝ်သဵၼ်ႈတၢင်းလူင် ၼမ်ႉလၼ်ႈ – မိူင်းလိူၼ်း တၢင်းၸဵင်ႇ ႁွင်ႇဝၼ်းဢွၵ်ႇဝဵင်းၼမ်ႉလၼ်ႈ တင်းမူတ်း 3 လုၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ