သိုၵ်းမၢၼ်ႈယိုတ်းမိူင်း လုၵ်ႉတၢင်းၾၢႆႇတူၵ်းဝဵင်းမိူင်းမိတ်ႈသေ ႁႅၼ်းသိုၵ်းၵႂႃႇတၢင်း ၵျွင်းဢွင်ႇတေႃႇမူႇ – ၸၢင်ႉသွင်တူဝ်ၼၼ်ႉသေ သဵင်ၵွင်ႈတႅၵ်ႇ ယိုဝ်းၵၼ်တင်း ၸုမ်းၵူၼ်းၼုမ်ႇမိူင်းမၢၼ်ႈထုင်ႉပဵင်း (PDF) ၸူဝ်ႈၵႅပ်ႉ ၼႂ်းၸႄႈဝဵင်းမိူင်းမိတ်ႈ မိူင်းတႆးပွတ်းႁွင်ႇ။

မိူဝ်ႈဝၼ်းတီႈ 11 လိူၼ်တီႊသႅမ်ႊပိူဝ်ႊ ယၢမ်းၵၢင်ၼႂ် သိုၵ်းမၢၼ်ႈလၢမ်းလိမ်းယိုဝ်း ၵွင်ႈဢမျွၵ်ႈၵႂႃႇၸွမ်းသဵၼ်ႈတၢင်းတုၼ်းငႄႇ (တွင်းငယ်) ၼၼ်ႉသေ မၢၵ်ႇၵႂႃႇတူၵ်းသႂ်ႇၼႂ်းထုင်ႉ ၼႃး ၵႄႈၵၢင်ဝၢၼ်ႈၼမ်ႉတူၵ်း တင်း ၵွင်ႇယႃႇ ၸၢၵ်ႇမၢၵ်ႇတိူဝ်ႉၺႃးၼၢင်းယိင်းၵေႃႉလဵင်ႉၵႂၢႆးယူႇၼၼ်ႉ လူႉတၢႆၵႂႃႇ ၼႆယဝ်ႉ။

ၵူၼ်းမိူင်းပိုၼ်ႉတီႈ ဝဵင်းမိူင်းမိတ်ႈၵေႃႉၼိုင်ႈ လၢတ်ႈၼႄဝႃႈ “ၼၢင်းယိင်းၵေႃႉဢၼ်တၢႆၵႂႃႇၼႆႉ ဢႃႇယုမၼ်း မီးယူႇမွၵ်ႈ 40 ပၢႆ။ ပဵၼ်ၵူၼ်းဝၢၼ်ႈၼမ်ႉတူၵ်း။ ၽွင်းပိူၼ်ႈယိုဝ်းၵၼ် ၼၼ်ႉ မၼ်းတိုၵ်ႉလဵင်ႉၵႂၢႆးယူႇၼႂ်းၼႃး။ မၢၵ်ႇသမ်ႉၵႂႃႇတူၵ်းသႂ်ႇ ၼႂ်းလွၵ်းၼႃးႁႄ တိူဝ်ႉၺႃးမၼ်းၼၼ်ႉၼႃႇ။ တီႈမိူင်းမိတ်ႈၼႆႉ ၸွမ်းဝၢၼ်ႈ ၸွမ်းၼွၵ်ႈဝဵင်းၸိူဝ်းၼႆႉ ပၢင်တိုၵ်းပႆႇယဵၼ်။ ၼႂ်းဝဵင်းၵေႃႈ ဢမ်ႇပေႃးမီးၵူၼ်းသင်ၼမ်ၵႃႈႁိုဝ်။ ပိူၼ်ႈပၢႆႈဢွၵ်ႇ ဝႆႉၵမ်ႈၼမ်ယဝ်ႉၼႃႇ။ ၵူၼ်းၸွမ်းဝၢၼ်ႈတႄႉ ၵမ်ႈၼမ်ဢမ်ႇပၢႆႈ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 10 လိူၼ်တီႊသႅမ်ႊပိူဝ်ႊ ယၢမ်းၵၢင်ၶမ်ႈမွၵ်ႈ 7 မူင်းၸမ်ၼၼ်ႉၵေႃႈ သိုၵ်းမၢၼ်ႈ ဢၼ်ပၵ်းတပ်ႉပၢင်သဝ်းဝႆႉတီႈ ဝၢၼ်ႈတူၼ်ႈၵႅင်း (မန်ကျည်းပင်) ၼၼ်ႉ ယိုဝ်းၵွင်ႈလူင်ႈ ၵႂႃႇတၢင်းၸၢၼ်းဝဵင်း မွၵ်ႈ 10 ၵမ်းပၢႆသေတႃႉ ဢမ်ႇတၼ်းတိူဝ်ႉၺႃးၵူၼ်းမိူင်းၼႆ – လႆႈႁူႉၼင်ႇၼႆ။

လိူဝ်ၼၼ်ႉ သိုၵ်းမၢၼ်ႈယိုတ်းမိူင်း ယင်းယၢမ်ႈၸႂ်ႉတိုဝ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းဝၢၼ်ႈမျိတ်ႉသူင်ႇ ပႃးၸဵမ်လုၵ်ႈဢွၼ်ႇ လႄႈ မႄႈပႃးတွင်ႉ (မႄႈမၢၼ်း) ၵူၼ်းမိူင်းလူႉတၢႆၵႂႃႇ 11 ၵေႃႉ မိူဝ်ႈဝၼ်းတီႈ 6 လိူၼ်တီႊသႅမ်ႊပိူဝ်ႊၼႆႉ။

ဝၢႆးလင် သိုၵ်းတဢၢင်းပိုၼ်ၽၢဝ်ႇ ထွႆသိုၵ်းဢွၵ်ႇ ၼႂ်းဝဵင်းမိူင်းၵုတ်ႈ၊ ဝဵင်းမိူင်းမိတ်ႈယဝ်ႉဢမ်ႇႁိုင် သိုၵ်းမၢၼ်ႈႁႅၼ်းသိုၵ်းမႃးပၵ်းတပ်ႉယူႇၶိုၼ်းၼႂ်းဝဵင်းၵူၺ်းဢမ်ႇၵႃး ၸွမ်းဝၢၼ်ႈၸိူဝ်းမီးယူႇၾၢႆႇၼွၵ်ႈဝဵင်းၼၼ်ႉၵေႃႈ ၵႂႃႇပၵ်းတပ်ႉပၢင်သဝ်းဝႆႉ သွင်သၢမ်တီႈ ဝႃႈၼႆ။