ဝၼ်းတီႈ 8/5/2026 မိူဝ်ႈၼႆႉ ဢႃႊသီႊယၼ်ႊ ၸတ်းပၢင်ၵုမ်ထူၼ်ႈၵမ်း 48 တီႈဝဵင်း သီႊပူႊ မိူင်းၾလိပ်ႉပိၼ်း၊ ႁူဝ်ၼႃႈသိုၵ်းမၢၼ်ႈယိုတ်းမိူင်းတႄႉ ပႆႇလႆႈသုၼ်ႇၶဝ်ႈႁူမ်ႈပၢင်ၵုမ်။

ယွၼ်ႉၵၢၼ်ၽဵဝ်ႈမူၺ်ႉႁဵတ်းႁၢႆႉတေႃႉ ၸုမ်းၶတ်းၶၢၼ်ႉ ဢိၵ်ႇပႃး ပၼ်ႁႃသိုၵ်းသိူဝ် ဝၢႆးလင်တပ်ႉသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းၸိူဝ်းၼၼ်ႉသေ ဢႃႊသီႊယႅၼ်ႊ တႅပ်းတတ်းဝႆႉဝႃႈ တေဢမ်ႇပၼ်မိူင်းမၢၼ်ႈ ၶဝ်ႈႁူမ်ႈၸွမ်းပၢင်ၵုမ်လွင်ႈယႂ်ႇ။ ယွၼ်ႉၼၼ် တီႈယူႇ ႁူဝ်ၼႃႈမိူင်းႁူမ်ႈတုမ်မၢၼ်ႈၼႆႉ ဢူးႁွၵ်ႉၶၼ်ႉသုမ်း (ဦးဟောက်ခန့်ဆုမ်း) ၽွင်းလူင် ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းႁူမ်ႈတုမ်မၢၼ်ႈၵူၺ်း လႆႈၶဝ်ႈႁူမ်ႈၸွမ်းဝႆႉ။

ပီၼႆႉ မိူင်းၾလိပ်ႉပိၼ်း ႁပ်ႉႁဵတ်းပဵၼ်ႁူဝ်ပဝ်ႈဢႃႊသီႊယၼ်ႊ။ ၽွင်းမိူဝ်ႈ ၵၢၼ်မၢၵ်ႈမီးလုမ်ႈၾႃႉဢမ်ႇၼိမ်သဝ်း၊ ပၼ်ႁႃ တီႈထုင်ႉ တႃဝၼ်းဢွၵ်ႇၵၢင် တိုၵ်ႉၵပ်ႉၵိၼ်းယူႇၼႆႉ မိူင်း ၾလိပ်ႉပိၼ်း ပဵၼ်သုၼ်ၵၢင်တႃႇၸတ်းပၢင်ၵုမ်ယဝ်ႉၼႆ ႁူဝ်ပဝ်ႈဢႃႊသီႊယၼ်ႊ လၢတ်ႈၵႂႃႇၼင်ႇၼႆ။

လိူဝ်ၼၼ်ႉ ၵဵဝ်ႇၵပ်းလွင်ႈမိူင်းႁူမ်ႈတုမ်မၢၼ်ႈသေ ႁႂ်ႈတပ်ႉသိုၵ်း ပွႆႇလွတ်ႈပၼ် ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸူႉၵျီႇ၊ ႁႂ်ႈပၼ်ၶႂၢင်ႉႁူပ်ႉထူပ်းၵၼ်တင်း ၽူႈတၢင်တူဝ် ဢႃႊသီႊယၼ်ႊ၊ ၸွမ်းၼင်ႇၶေႃႈတူၵ်းလူင်းဢႃႊသီႊယၼ်ႊ 5 ၶေႃႈၼၼ်ႉ ႁႂ်ႈတပ်ႉသိုၵ်းမၢၼ်ႈ ၽေႃႇၼမ်ႉၼႄတူဝ်ၵႂႃႇၼႆ ႁူဝ်ပဝ်ႈဢႃႊသီႊယၼ်ႊ ႁူဝ်ၼႃႈမိူင်းၾလိပ်ႉပိၼ်းၵေႃႈ ဢွၵ်ႇလိၵ်ႈတိုၵ်းသူၼ်းသိုၵ်းမၢၼ်ႈဝႆႉ ၼင်ႇၼႆ။