ဝၼ်းတီႈ 30/04/2026 ၶမ်ႈဝႃးၼႆႉ သိုၵ်းမၢၼ်ႈပိုၼ်ၽၢဝ်ႇဝႃႈ ၶၢႆႉ ၻေႃႇဢွင်ႇသၢၼ်းၸူႉၵျီႇ ႁူဝ်ၼႃႈပႃႇတီႇၼူၵ်ႉယုင်း NLD  ဢွၵ်ႇၶွၵ်ႈသေ ဢဝ်မႃးၵုမ်းၶင်ၵိုၵ်းႁိူၼ်း  ဝႆႉယဝ်ႉ- ဝႃႈၼႆ။

 သိုၵ်းမၢၼ်ႈပိုၼ်ၽၢဝ်ႇဝႃႈ “ ဢဝ်ဢွင်ႇသၢၼ်းၸူႉၵျီႇ ဢွၵ်ႇၶွၵ်ႈမႃးၵုမ်းၶင်ၵိုၵ်းႁိူၼ်းယဝ်ႉ” ဝႃႈၼႆသေတႃႉ ဢဝ်ဢွၵ်ႇၶွၵ်ႈဢၼ်လႂ်- လုၵ်ႉတီႈလႂ်သေတေဢဝ်  မႃးၵုမ်းၶင်ၵိုၵ်းႁိူၼ်းတီႈလႂ်ၼႆၸိူဝ်းၼႆႉ သိုၵ်းမၢၼ်ႈဢမ်ႇလၢတ်ႈပႃး။ၵူၺ်းၵႃႈ သိုၵ်းမၢၼ်ႈပိုၼ်ၽၢဝ်ႇပႃးဝႃႈ – တူတ်ႈတၢမ်ႇဢၼ်မၼ်းၼၢင်းလႆႈႁပ်ႉၼၼ်ႉ တေႁႂ်ႈသိုပ်ႇႁပ်ႉၽွင်းၵုမ်းၶင်ၵိုၵ်းႁိူၼ်းၼၼ်ႉပႃးယူႇ – ဝႃႈၼႆ။

ၼႂ်းငဝ်းႁၢင်ႈသဵင် MRTV ၼၼ်ႉတႄႉ ၽွင်းပိုၼ်ၽၢဝ်ႇလွင်ႉၼႆႉၼၼ်ႉ သိုၵ်းမၢၼ်ႈ ဢဝ်ႁၢင်ႈၼၢင်းဢွင်ႇသၢၼ်းၸူႉၵျီႇ ဢွၵ်ႇၼႄ – မၼ်းၼၢင်းၼုင်ႈဝႆႉသိူဝ်ႈမၼ်ႈသီၶၢဝ်။ ၼုင်ႈသိၼ်ႈတူင်ႇသီသွမ်ႇလမ် မီးမွၵ်ႇၶၢဝ်ၼၼ်ႉသေ ၼင်ႈဝႆႉတီႈတင်ႇ ။ တၢင်းၼႃႈမၼ်းၼၢင်း မီးႁၢင်ႈသိုၵ်းၵေႃႉၼိုင်ႈလႄႈပလိၵ်ႈၵေႃႉၼိုင်ႈ – မိူၼ်ၼင်ႇၶဝ်ဢုပ်ႇသင်ၵၼ်ဝႆႉ။ ၵူၺ်းၵႃႈ သိုၵ်းမၢၼ်ႈဢမ်ႇပွႆႇပႃးသဵင်ဢၼ်ၶဝ်ဢုပ်ႇၵၼ်ၼၼ်ႉ။ ၵွပ်ႈၼႆလႄႈ ပဵၼ်ႁၢင်ႈမိူဝ်ႈလႂ် – ဢုပ်ႇၵၼ်တီႈလႂ်ၼႆၽႂ်ၵေႃႈဢမ်ႇၸၢင်ႈလၢမ်းႁူႉလႆႈ။ ယွၼ်ႉဝႃႈ ၼႂ်းၶၢဝ်းတၢင်း 5 ပီပၢႆၼႆႉ သိုၵ်းမၢၼ်ႈဢဝ်မၼ်းၼၢင်းၶင်တီႈလႂ် – ၶၢႆႉၵႂႃႇဝႆႉတီႈလႂ်- ပၢႆးယူႇလီမၼ်းၼၢင်းပဵၼ်ႁိုဝ် ၸိူဝ်းၼႆႉ – ၽႂ်ဢမ်ႇလႆႈႁူႉၸွမ်းသေၵေႃႉ။ သိုၵ်းမၢၼ်ႈၵေႃႈဢမ်ႇပိုၼ်ၽၢဝ်ႇသင်သေၶေႃႈ။

ဢၼ်ႁၢႆႉၸႃႉသုတ်းတႄႉ ၽွင်းၵုမ်းၶင်ဝႆႉ ၵမ်းၼႆႉ သိုၵ်းမၢၼ်ႈဢမ်ႇပၼ်ၶႂၢင်ႉ ၵူၼ်းတၢင်းၼွၵ်ႈတၢင်းၼႂ်း ၽႂ်ၵေႃႉလႂ်ၶဝ်ႈႁႃသူႇၸႂ်းမၼ်းၼၢင်းသေပွၵ်ႈသေၵမ်း။ ပႃးၸဵမ် ၽွင်းလူင်ၸၼ်ႉၸိုင်ႈမိူင်းလႄႈ မူႇၸုမ်းယႂ်ႇၸၼ်ႉလုမ်ႈၾႃႉ ၵေႃႈ ဢမ်ႇပၼ်ၶႂၢင်ႉ ႁူပ်ႉထူပ်းဢုပ်ႇဢူဝ်းသင်ၵၼ်တင်း ဢွင်ႇသၢၼ်းၸူႉၵျီႇသေပွၵ်ႈ။

ၵွပ်ႈၼႆ ၵူၼ်းသႅၼ်းပၢၼ်ၼုမ်ႇၵမ်ႈၼမ်ဢွၼ်ၵၼ်ဝႃႈ “ႁၢင်ႈဢၼ်သိုၵ်းမၢၼ်ႈဢဝ်ဢွၵ်ႇမႃးၼႄၼႆႉ ၸွင်ႇၸႂ်ႈဢွင်ႇသၢၼ်းၸူႉၵျီႇ ဢၼ်တႄႉမၼ်းယူႇႁိုဝ်ဢမ်ႇႁူႉ” – ဝႃႈၼႆ။

လွင်ႈၼႆႉ လုၵ်ႈၸၢႆးမၼ်း ၶိမ်ႊ ဢေႊရိတ်ႉသ် ဢွၵ်ႇမႃးလၢတ်ႈထႅင်ႈဝႃႈ – “ ၼႄႁၢင်ႈမႄႈ ၼႂ်းထီႊဝီႊ ၸိူင်ႉၼႆၵူၺ်းလႄႈ – ဢမ်ႇၸၢင်ႈယုမ်ႇလႆႈဝႃႈ မႄႈႁဝ်းတိုၵ်ႉမီးသၢႆၸႂ်ယူႇ။ ယွၼ်ႉဝႃႈႁၢင်ႈၼၼ်ႉပဵၼ်ႁၢင်ႈမိူဝ်ႈလႂ်ၵေႃႈဢမ်ႇႁူႉ။ ၵႃႈပႆႇလႆႈလၢတ်ႈတေႃႇၵၼ်တင်းမႄႈၵမ်းသိုဝ်ႈတႄႉ တိုၼ်းဢမ်ႇယုမ်ႇယမ်သိုၵ်းမၢၼ်ႈလႃးလႃး- ဝႃႈၶဝ်တေလုမ်းလႃးမႄႈၶႃႈ  တိုၵ်ႉမီးသၢႆၸႂ်လိပ်းၶီးယူႇ” – ဝႃႈၼႆ။

ဢွင်ႇသၢၼ်းၸူႉၵျီႇၼႆႉ ထုၵ်ႇသိုၵ်းမၢၼ်ႈတီႉၺွပ်းၵုမ်းၶင်ၸဵမ်မိူဝ်ႈဝၼ်းတီႈ 01/02/ 2021 ။

သိုၵ်းမၢၼ်ႈဢဝ်လိူင်ႈၸွႆးတြႃးတေႃႇမၼ်းၼၢင်း တႃႇ 19 လိူင်ႈသေ လုမ်းတြႃးတႅပ်းတတ်းပၼ်တူတ်ႈတၢမ်ႇၶွၵ်ႈမၼ်းၼၢင်း 33 ပီ။ သိုၵ်းမၢၼ်ႈၶိုၼ်းလူတ်းယွၼ်ႇတူတ်ႈတၢမ်ႇပၼ်မၼ်းၼၢင်းမိူဝ်ႈဝၼ်းတီႈ 1/8/2023 ၼၼ်ႉ တႃႇ 6 ပီ လႄႈတူတ်ႈၶွၵ်ႈၵိုတ်း 27 ပီ။ ဝၼ်းတီႈ 17/04/2026 ၼၼ်ႉသမ်ႉ သိုၵ်းမၢၼ်ႈပိုၼ်ၽၢဝ်ႇလူတ်းယွၼ်ႇတူတ်ႈၶွၵ်ႈပၼ်ၵူၼ်းတူၵ်းၶွၵ်ႈပီယၢဝ်းၶဝ် တႃႇ 6  ပုၼ်ႈၼိုင်ႈပုၼ်ႈ ၼႆလႄႈ တူတ်ႈၶွၵ်ႈမၼ်းၼၢင်းၵိုတ်း 18 ပီပၢႆ 9 လိူၼ် ။

တေႃႇထိုင်ဝၼ်းမိူဝ်ႈၼႆႉ မၼ်းၼၢင်းလႆႈယူႇၼႂ်းၶွၵ်ႈဝႆႉႁိုင်ၼၢၼ်းၶၢဝ်းတၢင်း 5 ပီပၢႆ (1900 ဝၼ်းပၢႆ)ယဝ်ႉ။

ၽွင်းမိူဝ်ႈပီမႂ်ႇသၢင်းၵျၢၼ်ႇပူၼ်ႉမႃးၼႆႉသိုၵ်းမၢၼ်ႈပွႆႇၵူၼ်းတူၵ်းၶွၵ်ႈ 4000 ပၢႆ။ ၼႂ်းၼၼ်ႉၵူၼ်းတူၵ်းၶွၵ်ႈၵၢၼ်မိူင်းၵေႃႈပႃး။  သိုၵ်းမၢၼ်ႈပွႆႇၶၢဝ်ႇဝႃႈ တေဢဝ်မၼ်းၼၢင်းမႃးၵုမ်းၶင်ၵိုၵ်းႁိူၼ်း- ဝႃႈၼႆသေတႃႉ လႆႈမႃးၶၢဝ်းတၢင်း ၽၢၵ်ႇလိူၼ်သၢဝ်းဝၼ်း ၵေႃႈဢမ်ႇႁၼ်ဢဝ်ဢွၵ်ႇမႃးလႄႈၵူၼ်းမိူင်း ၸိူဝ်းၵမ်ႉထႅမ်မၼ်းၼၢင်း  ဢွၼ်ၵၼ်မႆႈၸႂ်လွင်ႈပၢႆးယူႇလီမၼ်းၼၢင်း။

လုၵ်ႈၸၢႆးမၼ်းၼၢင်း ဢၼ်ပဵၼ် ၶိမ်ႊ ဢႄႊရိတ်ႉသ် ၵေႃႈၵမ်းၵမ်းဢွၵ်ႇမႃးလၢတ်ႈဝႃႈ – မႄႈမၼ်းၸၢႆး ဢွင်ႇသၢၼ်းၸူႉၵျီႇၼႆႉ သိုၵ်းမၢၼ်ႈဢမ်ႇလၢတ်ႈၶိူဝ်းသေၵမ်းလႄႈ ယူဝ်ၶေး တၢႆၼႂ်းၶွၵ်ႈဢၼ်သိုၵ်းမၢၼ်ႈၵုမ်းၶင်ဝႆႉၼၼ်ႉယဝ်ႉႁိုဝ် – ဝႃႈၼႆ။

ၵွပ်ႈၼႆလႄႈ ၵူၼ်းၼုမ်ႇၵူၼ်းမိူင်းမၢၼ်ႈ ၸိူဝ်းႁွတ်ႈထိုင်ဝႆႉၼွၵ်ႈမိူင်း မိူင်းဝၼ်းတူၵ်း မိူင်းဝၼ်းဢွၵ်ႇ – ဢွၼ်ၵၼ်တူင်ႉၼိုင်ဢွၵ်ႇမႃးၼႄၵၢင်ၸႂ်တေႃႇသိုၵ်းမၢၼ်ႈ ဝႃႈ Proof of Life- “ပေႃးဝႃႈ ဢွင်ႇသၢၼ်းၸူႉၵျီႇပႆႇတၢႆၵေႃႈ ႁႂ်ႈသိုၵ်းမၢၼ်ႈဢဝ်တူဝ်မၼ်းၼၢင်းဢွၵ်ႇမႃးၼႄၵူၼ်းမိူင်းႁႂ်ႈလႆႈႁၼ်။ ႁႂ်ႈပွႆႇပၼ်ဢွင်ႇသၢၼ်းၸူႉၵျီႇ ဝႆးဝႆး ” ၼႆၸိူဝ်းၼႆႉ ႁဵတ်းႁႂ်ႈၵူၼ်းမိူင်းတင်းလုမ်ႈၾႃႉ သူၼ်ၸႂ်မႃး။

ၼၢင်းယိင်းဢႃယု 80 ပီပၢႆ ဢၼ်သိုၵ်းမၢၼ်ႈၵူဝ်ၼႃႇ ထိုင်တီႈဢမ်ႇႁတ်းလၢတ်ႈၸိုဝ်ႈသဵင် ဢမ်ႇႁတ်းပွႆႇပၼ်လွတ်ႈလႅဝ်းၼႆႉ ယူႇယူႇသိုၵ်းမၢၼ်ႈသမ်ႉၶိုၼ်းဢဝ်မႃးလၢတ်ႈၸိုဝ်ႈမၼ်းၼၢင်းၼႂ်းထီႊဝီႊၸိူင်ႉၼႆၼႆႉ- ပဵၼ်ယွၼ်ႉ  ဢႃႊသီႊယၼ်ႊ တုၵ်းယွၼ်းတီႈသိုၵ်းမၢၼ်ႈၵမ်းသိုဝ်ႈ ႁႂ်ႈပွႆႇပၼ်ဢွင်ႇသၢၼ်းၸူႉၵျီႇ၊ ၶၢဝ်းတၢင်းၽွင်းလူင်ၾၢႆႇၼွၵ်ႈမိူင်းမိူင်းၶႄႇ – ဝင်ႊယိ – ဢႅဝ်ႇယဵမ်ႈမိူင်းမၢၼ်ႈ ၊ ပဵၼ်ယွၼ်ႉ ၽွင်းလူင်ၾၢႆႇၼွၵ်ႈမိူင်း မိူင်းထႆးလၢတ်ႈဝႃႈ – သင်သိုၵ်းမၢၼ်ႈၶႂ်ႈလႆႈတီႈယူႇတီႈၼင်ႈၶိုၼ်းၼႂ်းဢႃႊသီႊယၼ်ႊၵေႃႈ လူဝ်ႇပွႆႇပၼ်ဢွင်ႇသၢၼ်းၸူႉၵျီႇၶိုၼ်းဝႆးဝႆး – ၸဵမ်ၸိူဝ်းၼႆႉ- ၼႆၵူၼ်းပၵ်းတႃၵၢၼ်မိူင်းၶဝ်လၢတ်ႈၼင်ႇၼႆ။