ပလိၵ်ႈထႆးၵဵင်းမႂ်ႇ ၵူတ်ႇထတ်းၼႂ်းဝၢၼ်ႈၼႂ်းသူၼ် တီႉႁႅင်းၵၢၼ်ဢၼ်ႁဵတ်းၵၢၼ်ထုၵ်ႇႁၢမ်ႈဝႆႉ လႄႈတီႉၵူၼ်းတၢင်ႇၸၢတ်ႈဢၼ်ႁႃၵိၼ်လဵင်ႉတွင်ႉလူၺ်ႈဢမ်ႇမီးဝႂ်ႁဵတ်းၵၢၼ် / ဝႂ်ဢၼုယၢတ်ႈၵၢၼ်ငၢၼ်း။
ၼႂ်းဝူင်ႈထိ လိူၼ်မေႊၼႆႉ ပလိၵ်ႈထႆး လႄႈ ပလိၵ်ႈၵူတ်ႇၵူၼ်းၶဝ်ႈမိူင်း မိူင်းၵဵင်းမႂ်ႇၵူတ်ႇထတ်းၼႂ်းဝၢၼ်ႈၼႂ်းဢိူင်ႇ – ဝၼ်းတီႈ 7/5/2026 တီႉလႆႈႁႅင်းၵၢၼ်ၵူၼ်းမိူင်းမၢၼ်ႈ ဢၼ်ႁဵတ်းၵၢၼ်ႁပ်ႉတွၼ်ႈၶႅၵ်ႇၼႃႈႁၢၼ်ႉတၢင်းၵိၼ် ၼႂ်းဢိူင်ႇသီၽုမ်းဝဵင်းၵဵင်းမႂ်ႇ။
ပလိၵ်ႈထႆး ၵူတ်ႇထတ်းတူၺ်းဝႂ်ႁဵတ်းၵၢၼ်ႁႅင်းၵၢၼ်ၸၢႆး ၼၼ်ႉတႅမ်ႈဝႆႉဝႃႈ “ၵမ်ႊမၵွၼ်ႊ” ႁဵတ်းၵၢၼ်ႁပ်ႉၸၢင်ႈၵူႈလွင်ႈလွင်ႈၼႆလႄႈ – ၼႄးဝႃႈမၼ်းၸၢႆးႁဵတ်းၵၢၼ်ၽိတ်းတီႈ၊ ႁဵတ်းၵၢၼ်ဢၼ်ဝႆႉပၼ်တႃႇၵူၼ်းမိူင်းပိုၼ်ႉတီႈႁဵတ်း၊ ႁဵတ်းၵၢၼ်ဢၼ်ႁၢမ်ႈႁႅင်းၵၢၼ်ႁဵတ်းဝႆႉ- ၼႆသေတီႉၺွပ်းမၼ်းၸၢႆးၵႂႃႇ။
လွင်ႈၼႆႉၵူၼ်းပိုၼ်ႉတီႈ ဢွၼ်ၵၼ်ၸီႉၸမ်ႈဝႃႈ ႁႅင်းၵၢၼ်ယၢၼ်မိူင်းမႃးႁိမ်ၼႃႈၵၢၼ်ၵူၼ်းမိူင်းထႆး ၼႆသေ တိုၵ်းသူၼ်းႁႂ်ႈၸဝ်ႈၼႃႈတီႈ ပလိၵ်ႈထႆးၵူတ်ႇထတ်းတီႉၺွပ်းဢဝ်လိူင်ႈပၼ်ထႅင်ႈဝႃႈၼႆ။
ဝၼ်းတီႈ8/5/2026 ၼႆႉသမ်ႉ ပလိၵ်ႈထႆး ၸႄႈတွၼ်ႈၵဵင်းမႂ်ႇပိုၼ်ၽၢဝ်ႇထႅင်ႈဝႃႈ – ၶဝ်ႈၵူတ်ႇထတ်းႁိူၼ်းလင်ၼိုင်ႈ ဢၼ်မီးၼႂ်းၸႄႈဝဵင်းႁၢင်လူင်း ၸႄႈတွၼ်ႈၵဵင်းမႂ်ႇ။ ထူပ်းႁၼ်ၸၢဝ်းၶႄႇႁူမ်ႇၵၼ်ၶၢတ်ႈယူႇဝႆႉ သေ ႁဵတ်းၵၢၼ်ထၢႆႇၸိူင်းပွတ်းၶႄႇ -တၢင်ႇတီႈသူဝ်ႊသျႄႊလ် ႁႃငိုၼ်း။ ၸိူဝ်းၶဝ်ဢမ်ႇမီးဝႂ်ဢၼုယၢတ်ႈႁဵတ်းၵၢၼ်သေဢမ်ႇၵႃး ဢမ်ႇမီးပႃးဝႂ်ဢၼုယၢတ်ႈၼႃႈၵၢၼ်တႃႇငၢၼ်းပဵၼ်တၢင်းၵၢၼ်ၼႆသေတီႉၺွပ်းၵႂႃႇ တင်းမူတ်း 8 ၵေႃႉ ။ ၼႂ်းၼၼ်ႉပႃးၵူၼ်းထႆး 2 ၵေႃႉႁဵတ်းလၢမ်ႈပိၼ်ႇၽႃႇသႃႇပၼ်- ဝႃႈၼႆ။ ပလိၵ်ႈထႆးပိုၼ်ၽၢဝ်ႇဝႃႈ ၸိူဝ်းၶဝ်ယိပ်းဝတ်းဝႂ်ဢႅဝ်ႇယဵမ်ႈၵူၺ်း ဢမ်ႇမီးဝႂ်ႁဵတ်းၵၢၼ်။ ၵွပ်ႈၼႆလႆႈသူင်ႇတူဝ်ဝႆႉတီႈႁူင်းပလိၵ်ႈႁၢင်လူင်း လူၺ်ႈတၢင်းၽိတ်း ၵူၼ်းတၢင်ႇၻၢဝ်ႉ လၵ်ႉႁဵတ်းၵၢၼ်လူၺ်ႈဢမ်ႇမီးဝတ်းဝႂ်ဢၼုယၢတ်ႈ ဝႃႈၼႆ။
ပလိၵ်ႈထႆး ပိုၼ်ၽၢဝ်ႇပႃးဝႃႈ ၵူၼ်းၸိူဝ်းတေႁဵတ်းၵၢၼ်ထၢႆႇၸိူင်းၼႂ်းမိူင်းထႆးၼႆႉ တၵ်းလႆႈမီးဝႂ်ဢၼုယၢတ်ႈတီႈလူင်ပွင်ၸိုင်ႈ။ တေလႆႈမီးပႃးပလိၵ်ႈမႃးၵုမ်းတူၺ်းဢဝ်ႁူမ်ႇလူမ်ႈပၼ်။ ယွၼ်ႉဝႃႈၵူဝ်လွင်ႈတၢင်းလႄႈၶေႃႈမုလ်းၽိတ်းပိူင်ႈဢမ်ႇၼၼ် တုမ်ႉတိူဝ်ႉသလေႇၼႃႈတႃၸိုင်ႈမိူင်းထႆး ။ ၽိုၼ်လိၵ်ႈၽိုၼ်လၢႆး ၼိူဝ်ႉၸိူင်းၵေႃႈတေလႆႈသူင်ႇပၼ်ၾၢႆႇထတ်းထွင်ၸိူင်းထႆးသေလူးၵွၼ်ႇၸင်ႇတေလႆႈၸႂ်ႉၼႂ်းၵၢၼ်ထၢႆႇၸိူင်း။ ပေႃးဢမ်ႇႁဵတ်းၸွမ်းၼင်ႇမၢႆမီႈၸိုင်ႈမိူင်းၸိုင် မီးတူတ်ႈတၢမ်ႇတီႉၺွပ်းၵုမ်းၶင်သေဢမ်ႇၵႃး တၢမ်ႇငိုၼ်းထိုင် 1 လၢၼ်ႉဝၢတ်ႇဝႃႈၼႆ။
ၵဵဝ်ႇၵပ်းလွင်ႈၸိူဝ်းၼႆႉသေ ပလိၵ်ႈၸႄႈတွၼ်ႈၵဵင်းမႂ်ႇ ၵေႃႈလၢတ်ႈဝႃႈ – ယူႇတီႈၵူၼ်းမိူင်းၵဵင်းမႂ်ႇ ၸိုင်ႈထႆးသေ ၼႂ်းဢိူင်ႇၼႂ်းဝၢၼ်ႈၸဝ်ႈၵဝ်ႇၼၼ်ႉ သင်ဝႃႈႁၼ်မႅၼ်ႈ ၵူၼ်းတၢင်ႇၸၢတ်ႈ- ၵူၼ်းပႅၵ်ႇၼႃႈ မႃးၶၢတ်ႈယူႇသဝ်းၼႂ်းဝၢၼ်ႈၼႂ်းသူၼ် ၊ ယူႇၸွမ်းၵၼ်ၵူၼ်းၼမ်လိူဝ်ႁႅင်း၊ ၶဝ်ႈဢွၵ်ႇၽိတ်းၶၢဝ်းယၢမ်း၊ ယူႇလပ်ႉလပ်ႉသွၼ်ႉသွၼ်ႉ ၊ ၾၢင်ႁၢင်ႈႁဵတ်းၵၢၼ်ၽိတ်းမၢႆမီႈ၊ တူၺ်းမိူၼ်ၵူၼ်းႁဵတ်းၵၢၼ်ၵျႃႊၽျႅၼ်ႉ ၊လွၵ်ႇလႅၼ်ၵိၼ်ငိုၼ်း၊ ၵၢၼ်တေႃႇလွင်းၸိူဝ်းၼႆႉၼႆၸိုင် ႁႂ်ႈတိတ်းတေႃႇၸဝ်ႈၼႃႈတီႈသေ ၸႅင်ႈၶၢဝ်ႇပၼ်သေၵမ်း-ၼႆ ၶၢဝ်ႇထႆး ၵဵင်းမႆႇၼိဝ်းသ် ၵေႃႈပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ