ၼႂ်းၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ဢမ်ႇပွင်ႇၶၢဝ်ႇပၼ်ၵူၼ်းမိူင်းသင်သေ ၵိုင်ႉၵၢင်ႉဢိုတ်း ၶူဝ်လူင်တီႈဝဵင်းသီႇပေႃႉ၊ သိုပ်ႇတင်ႈၵဵတ်ႉလၢၼ်ႇထႅမ်ႁႅင်းသိုၵ်းၶိုၼ်ႈမိူင်းတႆးပွတ်းႁွင်ႇ ။
ၶူဝ်လူင်တီႈဝဵင်းသီႇပေႃႉ လႄႈ သဵၼ်ႈတၢင်းၵႂႃႇမႃး ဝဵင်းလိူဝ်ႇ- လႃႈသဵဝ်ႈၼႆႉ သိုၵ်းတင်းသွင်ၾၢႆႇဢိုတ်းဝႆႉ ၵူႈသဵၼ်ႈ၊ တင်ႈၵဵတ်ႉလၢၼ်ႇၽိူမ်ႉဝႆႉၵူႈၸွၵ်ႉ ၼွၵ်ႈလိူဝ်ၵူၼ်းၼႂ်းပိုၼ်ႉတီႈ ဢမ်ႇပၼ်ရူတ်ႉၵႃးတင်းၼွၵ်ႈ လတ်းၽၢၼ်ႇၵႂႃႇမႃးၼႆ ၸၢႆးဢွင်ႇ ၵူၼ်းမိူင်းၵေႃႉယူႇဝႆႉၼႂ်းထုင်ႉၼမ်ႉလၼ်ႈ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။
“တေႃႇထိုင်မိူဝ်ႈၼႆႉ (18/11/2025) ယၢမ်းၵၢင်ဝၼ်းၼႆႉတႄႉ ၶူဝ်လူင်တီႈသီႇပေႃႉၼၼ်ႉဢမ်ႇၶဝ်ႈ/ဢွၵ်ႇလႆႈ။ တၢင်းၵႂႃႇမိူင်းယႆၼၼ်ႉၵေႃႈ ၶဝ်ဢိုတ်းဝႆႉ တိုၼ်းဝႃႈဢမ်ႇပၼ်ၵႂႃႇလႃးလႃး။ ရူတ်ႉၶိူင်ႈ၊ ထေႃႈလႃႈ ၵျီႈ၊ ၵႃးဢွၼ်ႇ ၵူၼ်းၼႂ်းပိုၼ်ႉတီႈၵႂႃႇတၢင်းပုၼ်ႉတၢင်းၼႆႉဢိတ်းဢွတ်းတႄႉ ၶဝ်ပၼ်လတ်းယူႇ။ “လႅင်းၵႃး” (ရူတ်ႉတၢင်ႇၵူၼ်း) တႄႉၵေႃႈ တီႈၼမ်ႉလၼ်ႈၼႆႉ တိုၼ်းဝႃႈဢမ်ႇပၼ်ၶဝ်ႈဢမ်ႇပၼ်ဢွၵ်ႇၼၼ်ႉယဝ်ႉ။ ၸွမ်းၵိဝ်ႇဢွၼ်ႇ၊ ၵိဝ်ႇဢိတ်း သဵၼ်ႈတၢင်းလတ်းၸိူဝ်းၼႆႉၵေႃႈ ဢမ်ႇၵႂႃႇလႆႈႁေသဵၼ်ႈ။ ဢိုတ်းဝႆႉမူတ်း။”
လႆႈႁူႉဝႃႈ ရူတ်ႉၵႃး ၸိူဝ်းတေၵႂႃႇမႃး ဝဵင်းလိူဝ်ႇ (မၢၼ်းတလေး) – ဝဵင်းလႃႈသဵဝ်ႈၼႆႉ လႆႈဢွၵ်ႇၶၢဝ်းတၢင်းၵႂႃႇ တၢင်းမိူင်းတႆးပွတ်းၸၢၼ်း ဝဵင်းလိူဝ်ႇ- တူၼ်ႈတီး- လွႆလႅမ်- ပၢင်လူင်-လၢႆးၶႃႈ-မိူင်းၼွင်-ၵေးသီး-မိူင်းယႆ- လႃႈသဵဝ်ႈလႆႈသေတႃႉ ၸွမ်းသဵၼ်ႈတၢင်းၼႆႉ သိုၵ်းမၢၼ်ႈၵဵပ်းငိုၼ်းတီႈၸဝ်ႈရူတ်ႉၵႃးၼမ်သေ ၵဵတ်ႉ လၢၼ်ႇၵေႃႈ ၽိူမ်ႉမႃးထႅင်ႈလိူဝ်ၵဝ်ႇလၢႆတီႈ ။
ၸၢႆးထုၼ်း ၵူၼ်းႁေႃႈရူတ်ႉၵႃး ၼႂ်းမိူင်းတႆးပွတ်းႁွင်ႇလၢတ်ႈၼႄဝႃႈ “သဵၼ်ႈတၢင်းၼႆႉ ၶဝ်တေပိုတ်ႇဝၼ်းလႂ် တေႉတေႉၼႆတႄႉဢမ်ႇလၢတ်ႈ။ ၵူၺ်းငိၼ်းၶၢဝ်ႇဝႃႈ ဝၼ်းတီႈ 20/11/2025 ၼႆႉ ပေႃးသိုၵ်းမၢၼ်ႈႁဵတ်းသုမ်ႉယၢမ်း တီႈႁူဝ်ၶူဝ်လူင်သီႇပေႃႉၼၼ်ႉယဝ်ႉတႄႉ ၾၢႆႇသိုၵ်းမၢၼ်ႈတေပိုတ်ႇပၼ်ၼႆယူႇ။ တီႈၶူဝ်ၼၼ်ႉသမ်ႉ သိုၵ်းမၢၼ်ႈပိုတ်ႇပၼ်ၾၢႆႇလဵဝ်ၵူၺ်းဢမ်ႇလႆႈၶႃႈလူး။ သိုၵ်းၵဝ်ႈၵၢင်ႉၵေႃႈ တေလႆႈၽုၺ်ႇပၼ်ဢေႃႈ ၸင်ႇတေၸၢင်ႈၵႂႃႇမႃးလႆႈ” ဝႃႈၼႆ။
ယွၼ်ႉသိုၵ်းမၢၼ်ႈတင်းသိုၵ်းၵဝ်ႈၵၢင်ႉၶႅင်ႇၵၼ်ဢိုတ်းၶူဝ်၊ ဢိုတ်းသဵၼ်ႈတၢင်းလႄႈ ၵူၼ်းမိူင်းတင်းၸဝ်ႈရူတ်ႉ ၸဝ်ႈၵႃး ၼႂ်းမိူင်းတႆးပွတ်းႁွင်ႇ ယၢပ်ႇၽိုတ်ႇၼႂ်းၵၢၼ်ဢွၵ်ႇၶၢဝ်းတၢင်း ၵူၺ်းဢမ်ႇၵႃး တုမ်ႉယွၼ်ႈပႃး ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းၼႂ်းပိုၼ်ႉတီႈတေႉတေႉ – ၵူၼ်းမိူင်းဝဵင်းသီႇပေႃႉ-လႃႈသဵဝ်ႈ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ