မိူဝ်ႈဝၼ်းတီႈ 17/12/2025 ယၢမ်းၵၢင်ၼႂ် 9 မူင်း သိုၵ်းမၢၼ်ႈယိုတ်းမိူင်း ၶဝ်ႈတီႉၺွပ်းၶႄႇ ၸိူဝ်းႁဵတ်းၵၢၼ်ၵျႃႊၽျႅၼ်ႉ ၼႂ်းထုင်ႉၼမ်ႉလၼ်ႈ ႁိမ်းဝၢၼ်ႈပဵင်းသၢႆး(ပန်စင်ရွာ) ၸႄႈဝဵင်းသီႇပေႃႉ မိူင်းတႆးပွတ်းႁွင်ႇ ။
သိုၵ်းမၢၼ်ႈ ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉဝႃႈ – ၽွင်းၸုမ်းၾၢႆႇဢဝ်ႁူမ်ႇလူမ်ႈ ၵႂႃႇၵူတ်ႇထတ်းၼၼ်ႉ ၵူၼ်းသွင်ၵေႃႉ ဢၼ်ယူႇဝႆႉ ၼႂ်းသုမ်ႉၽႃႈယၢင်ၼၼ်ႉ ဢဝ်ၵွင်ႈယိုဝ်းသႂ်ႇ ဢွၼ်တၢင်း။ ၵွပ်ႈၼၼ် သဵင်ၵွင်ႈတႅၵ်ႇၵႂႃႇၵမ်းၼိုင်ႈ – ၼႆယဝ်ႉ။
ၵူၼ်းၸိူဝ်းဢၼ်ၶဝ်တီႉၺွပ်းလႆႈၼၼ်ႉ – ပဵၼ်ၵူၼ်းသိုၵ်း ၼႂ်းတပ်ႉ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA) သၢမ်ၵေႃႉ တီႉလႆႈပႃး ၵွင်ႈသႅၼ်း AK-47 ၼိုင်ႈလဝ်း၊ M-22 ၼိုင်ႈလဝ်း၊ MK-12 ၼိုင်ႈလဝ်း၊ ၵွင်ႈ (ပွိုင့်- 22 ) ၼိုင်ႈလဝ်း ၼႆ – သိုၵ်းမၢၼ်ႈပိုၼ်ၽၢဝ်ႇ ပဵၼ်တၢင်းၵၢၼ်ဝႆႉ ၼင်ႇၼႆ။
လွင်ႈၼႆႉ ပႆႇႁၼ်တၢင်း SSPP/SSA ပိုၼ်ၽၢဝ်ႇဢွၵ်ႇမႃးၶိုၼ်းဝႃႈႁိုဝ်။ ယူႇတီႈၽူႈတွႆႇႁွၵ်ႈတိတ်းတေႃႇၵပ်းသိုပ်ႇၸူးၵေႃႈ ဢမ်ႇလႆႈ ။
ၵူၼ်းၼုမ်ႇ ၵေႃႉယူႇဝႆႉ ၼႂ်းၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ဢၼ်တီႉၺွပ်းလႆႈၵျႃႊၽျႅၼ်ႉ တၢင်းပုၼ်ႉၼႆႉတႄႉ ပဵၼ်လႆႈယူႇ။ ၵွပ်ႈဝႃႈ တီႈပွၵ်ႉၼၼ်ႉ မီးၵူၼ်းၶႄႇယူႇဝႆႉၼမ်တေႉတေႉ။ လွင်ႈဝႃႈ ၶဝ်လႆႈယိုဝ်းၵၼ် သဵင်ၵွင်ႈတႅၵ်ႇၼႆၼၼ်ႉတႄႉ ႁဝ်းဢမ်ႇလႆႈငိၼ်း ” ၼႆယဝ်ႉ။
လႆႈႁူႉဝႃႈ သိုၵ်းမၢၼ်ႈ ၺွပ်းလႆႈ ၵူၼ်းၸၢႆး (ၸၢဝ်းၶႄႇ) 5 ၵေႃႉ၊ ၼၢင်းယိင်း ၵူၼ်းယိပ်းမၢႆၾၢင် မိူင်းမၢၼ်ႈ 1 ၵေႃႉ။ ၶိူင်ႈၸႂ်ႉတိုဝ်း ၼႂ်းၵၢၼ်ၵျႃႊၽျႅၼ်ႉ ၶွမ်ႊပိဝ်ႊတိူဝ်ႊယႂ်ႇ 6 လုၵ်ႈ၊ ၶွမ်ႊပိဝ်ႊတိူဝ်ႊသႅၼ်းလဵၵ်ႉ 70 လုၵ်ႈ၊ ၾူၼ်းၵူႈသႅၼ်းသႅၼ်း 160 လုၵ်ႈ၊ Ipad 10 လုၵ်ႈ၊ Router 10 လုၵ်ႈ၊ Modern Stick – 37 ဢၼ်၊ ၸၢၵ်ႈၾႆးဢၼ်ယႂ်ႇ 3 လုၵ်ႈ၊ Starlink 19 ဢၼ်၊ ၵႃး 4 wheel သီႇၽၵ်းတူ 2 လမ်း လႄႈ ၵႃးလူင် ၼိုင်ႈလမ်း ၼႆယဝ်ႉ။
ၵူၼ်းၸိူဝ်းယူႇသဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊယူႇ ၼႂ်းထုင်ႉၼမ်ႉလၼ်ႈ ႁိမ်းဝၢၼ်ႈပဵင်းသၢႆးၼၼ်ႉ တင်းသဵင်ႈမီးႁႅင်းၵူၼ်းမွၵ်ႈ 200 ၵေႃႉ။ ၽွင်းတိုၵ်ႉယိုဝ်း ၵၼ်ၼၼ်ႉ ဢွၼ်ၵၼ်လႅၼ်ႈပၢႆႈၵႂႃႇ ႁင်းၽႂ်မၼ်းလႄႈ ဢမ်ႇတၼ်းတီႉၺွပ်းလႆႈတင်းသဵင်ႈ ဝႃႈၼႆ။
တႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉ ၸုမ်းၸိူဝ်းႁဵတ်းၵၢၼ်ဢွၼ်ႊလၢႆႊ လွၵ်ႇၵိၼ်ငိုၼ်းၵူၼ်းတင်းလုမ်ႈၾႃႉ ယူႇၼႆႉ သိုၵ်းမၢၼ်ႈပိုၼ်ဢွၵ်ႇဝႆႉပဵၼ်တၢင်းၵၢၼ်ဝႃႈ တေႁူမ်ႈမိုဝ်းၵၼ်တင်း မိူင်းၶႄႇ- မိူင်းထႆးသေ ႁဵတ်းသၢင်ႈ ၼႃႈၵၢၼ်ၵႂႃႇ ႁႂ်ႈထိုင်တီႈထိုင်တၢင်းတေႉတေႉဝႃႈဝႃႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ