ၼၢင်းယိင်း ၸိူဝ်းၺႃးသိုၵ်းမၢၼ်ႈ ၶႃႈႁႅမ်တၢႆလူၺ်ႈၶိူင်ႈမိၼ်တိုၵ်း ၼႂ်းၼႃႈတီႈၵုမ်းၵမ် သိုၵ်းၸၢဝ်းၶိူဝ်း ဢွင်ႈတီႈပဵၼ်ပၢင်တိုၵ်းၵၼ်တင်း သိုၵ်းမၢၼ်ႈၼၼ်ႉ ၼႂ်းလိူၼ်မေႊပူၼ်ႉမႃးၼႆႉ လူႉတၢႆၵႂႃႇ 92 ၵေႃႉ – ၸုမ်းၼၢင်းယိင်းမိူင်းမၢၼ်ႈ (Burmese Women’s Union) ပိုၼ်ၽၢဝ်ႇဢွၵ်ႇဝႆႉၼင်ႇၼႆ။  

တႄႇဝၼ်းတီႈ 01/02/2021 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၶၢဝ်းတၢင်း 4 ပီပၢႆၼႆႉ သိုၵ်းမၢၼ်ႈ ၸႂ်ႉလၢႆးတၢင်းၵူႈလွင်ႈသေ ပူၼ်ႉပႅၼ်သုၼ်ႇလႆႈၵူၼ်း၊ ၽိတ်းပၵ်းပိူင်သိုၵ်း ၶႃႈႁႅမ်တၢႆၵူၼ်းမႃး ၸဵမ်ၸိူဝ်းၼႆႉ။

ၸုမ်းၼၢင်းယိင်းမိူင်းမၢၼ်ႈ ဢွၵ်ႇၽိုၼ်ႁၢႆးငၢၼ်းဝႆႉဝႃႈ – ၼႂ်းလိူၼ်မေႊ ပီ 2025 ၼႆႉၵူၺ်း ၼၢင်းယိင်း ၸိူဝ်းလႆႈတၢႆယွၼ်ႉ ၶိူင်ႈမိၼ်သိုၵ်းမၢၼ်ႈ မီးယူႇ 81 ၵေႃႉ၊ မၢတ်ႇၸဵပ်း 70 ၵေႃႉ၊ ၵူၼ်းၸိူဝ်းၺႃး မၢၵ်ႇၶိူင်ႈ ၵွင်ႈလူင်သေတၢႆၵႂႃႇမီး 4 ၵေႃႉ၊ မၢတ်ႇၸဵပ်း 7 ၵေႃႉ၊ ၼၢင်းယိင်းၸိူဝ်း ၺႃးၶႃႈႁႅမ်တၢႆ လူၺ်ႈဢမ်ႇႁူႉလွင်ႈ တၢင်းသမ်ႉမီးယူႇ 4 ၵေႃႉ၊ ၸိူဝ်းယဵပ်ႇၺႃးမၢၵ်ႇၾင်လိၼ်သေ မၢတ်ႇၸဵပ်းဝႆႉသမ်ႉ မီး 3 ၵေႃႉ၊ ၸိူဝ်းၺႃး ၵၼ်ႉၸၼ်လူလၢႆသေတၢႆၵႂႃႇ မီး 2 ၵေႃႉ၊ မၢတ်ႇၸဵပ်းဝႆႉ 1 ၵေႃႉ၊ ဢမ်ႇယူႇလီၼႂ်းၶွၵ်ႈလႄႈ ၾၢႆႇသိုၵ်းမၢၼ်ႈ ဢမ်ႇပၼ်သုၼ်ႇလႆႈယူတ်းယႃတူဝ်သေ ထိုင်တီႈလႆႈတၢႆၵႂႃႇၼၼ်ႉသမ်ႉ မီးယူႇ 1 ၵေႃႉ – ဝႃႈၼႆ။

ၼၢင်းယိင်းၸိူဝ်းၺႃးသိုၵ်းမၢၼ်ႈ ၶႃႈႁႅမ်သေ မၢတ်ႇၸဵပ်းလူႉတၢႆၵႂႃႇၼၼ်ႉ ပဵၼ်ၼႂ်းၸႄႈမိူင်းၶၢင် 1 ၵေႃႉ၊ မိူင်းၶျၢင်း 1 ၵေႃႉ၊ မိူင်းမွၼ်း 1 ၵေႃႉ၊ မိူင်းရၶႅင်ႇ 16 ၵေႃႉ၊ တိူင်းဝဵင်းလိူဝ်ႇ 14 ၵေႃႉ၊ တိူင်းၸႄႈၵႅင်း 41 ၵေႃႉ၊ တိူင်းပႃႇၵိူဝ် 10 ၵေႃႉ၊ တိူင်းမၵူၺ်း 8 ၵေႃႉ။

တႅမ်ႈ – ၽူၺ်းၼုမ်ႇ