ၸုမ်းပျီႇတူႉၸိတ်ႉပဢူဝ်း PNO ၶဝ်ႈၽဝ်ႁိူၼ်းၵူၼ်းဝၢၼ်ႈလွႆလူင် တီႈထုင်ႉၸၢမ်ၵႃး ၸိုင်ႈတႆးပွတ်းၸၢၼ်း ၵူၼ်းဝၢၼ်ႈ လႆႈငိူင်ႉပၢႆႈၵူႈယွမ်ႇၵူႈတၢင်း ဝႃႈၼႆ။
ဝၼ်းတီႈ 02/09/2024 ယၢမ်းဝၢႆးဝၼ်းမွၵ်ႈ 2 မူင်း လုၵ်ႈၸုမ်းပျီႇတူႉၸိတ်ႉပဢူဝ်း PNO ယိုဝ်းၵွင်ႈသႂ်ႇၼႂ်း ဝၢၼ်ႈလွႆလူင်သေ ၶဝ်ႈၽဝ်ႁိူၼ်းၼႂ်းဝၢၼ်ႈ ၾႆးမႆႈလူႉၵွႆဝႆႉတင်းၼမ် ႁူဝ်ၼပ်ႉတႄႉ ဢမ်ႇၸၢင်ႈယိုၼ် ယၼ် ၼႆယဝ်ႉ။
ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၸုမ်း PNO ၶဝ်ႈမႃးယိုဝ်းၼႂ်းဝၢၼ်ႈ ယၢမ်းဝၢႆးဝၼ်း မွၵ်ႈ 2 မူင်း။ ၶဝ်ယိုဝ်းၾၢႆႇလဵဝ်ၵူၺ်းၶႃႈ ယဝ်ႉၵေႃႈ ၶဝ်ၽဝ်ႁိူၼ်းယေး လူႉၵွႆတင်းၼမ်ၶႃႈဢေႃႈ”- ဝႃႈၼႆ။
ၸုမ်းပျီႇတူႉၸိတ်ႉပဢူဝ်း PNO ၼႆႉ မိူဝ်ႈလိူၼ်ဢေႃႊၵတ်ႊသ် ပူၼ်ႉမႃးၼၼ်ႉၵေႃႈ ၶဝ်ႈၼႂ်းဝၢၼ်ႈလွႆလူင်သေ လွၵ်ႇငိုတ်ႈ၊ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၵူဝ်ႁႄ မႆႈၸႂ်ၵူဝ်ပဵၼ်ပၢင်တိုၵ်း။ ၵူၼ်းဝၢၼ်ႈ ၵမ်ႈၽွင်ႈ ဢွၼ် ၵၼ်ငိူင်ႉပၢႆႈဢွၵ်ႇဝၢၼ်ႈ။ လိူဝ်ၼၼ်ႉ PNO ယိုဝ်းၵွင်ႈလွၵ်ႇထႅင်ႈ လၢႆၵမ်း ဝႃႈၼႆ။
မိူဝ်ႈႁၢင်လိူၼ်ၵျူႊလၢႆႊပူၼ်းမႃးၼၼ်ႉၵေႃႈ PNO မၢပ်ႈၼႄးဝႃႈ ၵဵဝ်ႇၶွင်ႈၸွမ်း ၸုမ်းလုၵ်ႉၽိုၼ်ႉၼႆသေ တီႉၺွပ်းၵႂႃႇ ၵူၼ်းဝၢၼ်ႈလွႆလူင် 7 ၵေႃႉ။ ၼႂ်းၼၼ်ႉ ထဝ်ႈၸၢႆးၵေႃႉၼိုင်ႈ ၺႃးပေႃႉထုပ်ႉ တီႈပၢင်ၵူတ်ႇထတ်းၵၢၼ်သိုၵ်း၊ ၵူၼ်းၼုမ်ႇထႅင်ႈ 6 ၵေႃႉသမ်ႉ ယွၼ်းငိုၼ်း ၼိုင်ႈၵေႃႉ 20 သႅၼ်သေ ၸင်ႇပွႆႇလွတ်ႈတူဝ် မႃးၶိုၼ်း ဝႃႈၼႆ။
